မြန်မာ-ဂျပန် နှစ်နိုင်ငံ နိုင်ငံခြားရေးဝန်ကြီးများ သတင်းစာ ရှင်းလင်းပွဲကျင်းပ

နေပြည်တော် သြဂုတ် ၆

နိုင်ငံတော်၏အတိုင်ပင်ခံပုဂ္ဂိုလ် နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဒေါ်အောင်ဆန်းစုကြည်နှင့် ဂျပန်နိုင်ငံ နိုင်ငံခြားရေးဝန်ကြီး မစ္စတာတာရိုခိုနို တို့သည် ယနေ့ နံနက်ပိုင်းတွင် နိုင်ငံခြားရေးဝန်ကြီးဌာန၌ တွေ့ဆုံကြသည်။

တွေ့ဆုံပွဲအပြီးတွင် မြန်မာ-ဂျပန် နှစ်နိုင်ငံပူးတွဲသတင်းစာ ရှင်းလင်းပွဲကို ကျင်းပရာ ရှေးဦးစွာ ဂျပန်နိုင်ငံခြားရေးဝန်ကြီး မစ္စတာတာရိုခိုနို က “မြန်မာနိုင်ငံ နေရာတော်တော်များမှာ ဖြစ်ပွားနေတဲ့ ရေကြီးမှုနဲ့ ပတ်သက်ပြီး ဒုက္ခတွေခံစားနေရတဲ့ ပြည်သူပြည်သားတွေကို စာနာမိပါကြောင်း ပြောကြားလိုပါတယ်။ ဂျပန်အစိုးရအနေနဲ့ ရေတိုင်ကီနဲ့ ရွက်ဖျင်တဲတွေ ပေးအပ်ဖို့ ချဉ်းကပ်ခဲ့ပါတယ်။ နေထိုင်မှုဘ၀တွေ အမြန်ဆုံး ပြန်လည်ထူထောင်နိုင်ရေးအတွက် ဆုတောင်းအပ်ပါတယ်။

ဂျပန်နိုင်ငံ အနောက်ပိုင်းဒေသ ရေကြီးမှုနဲ့ ပတ်သက်ပြီး နိုင်ငံတော်သမ္မတ ဦးဝင်းမြင့်နဲ့ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့က မြန်မာပြည်သူ ပြည်သားတွေ အားလုံးကို ကိုယ်စားပြုပြီး နွေးထွေးစွာ စာနာမိပါကြောင်း ပြောကြားပေးတဲ့အတွက် အထူးကျေးဇူးတင်ပါကြောင်း ပြောကြား လိုပါတယ်။ ဒီနေ့ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ နှစ်နိုင်ငံအကြား ပူးပေါင်း ဆောင်ရွက်မှုတွေ မူဝါဒတွေနဲ့ပတ်သက်ပြီး ထပ်မံ အတည်ပြုခဲ့ပါတယ်။ အရင် ဇူလိုင်လခရီးစဉ်တုန်းက ရန်ကုန်မြို့ပြ ဖွံ့ဖြိုးတိုးတက်ရေး၊ သယ်ယူပို့ဆောင်ရေးနဲ့ လျှပ်စစ်မီးကဏ္ဍတွေမှာ မြန်မာ ပြည်သူတွေရဲ့ နေထိုင်မှုဘ၀ အဆင့်မြှင့်တင်သွားဖို့ လက်တွေ့ခံစားနိုင်အောင် ကူညီ ထောက်ပံ့သွားမယ် ဆိုတာ ကတိပြုခဲ့ပါတယ်။ ဂျပန်နိုင်ငံအနေနဲ့ ကူညီထောက်ပံ့ရေး အစီအစဉ်တွေကို သေသေချာချာ ဆောင်ရွက် နေပါတယ်။

ရခိုင်ပြည်နယ်ရဲ့ အခြေအနေနဲ့ ပတ်သက်လို့ အင်မတန် တန်ဖိုးရှိတဲ့အမြင်ချင်း ဖလှယ်မှုကို ဆောင်ရွက်နိုင်ခဲ့ပါတယ်။ ရခိုင်ပြည်နယ် ငြိမ်းချမ်းမှုနဲ့ တည်ငြိမ်အေးချမ်းမှုဟာ မြန်မာနိုင်ငံရဲ့ ဒီမိုကရေစီနိုင်ငံ ထူထောင်နိုင်ရေး အောင်မြင်စေဖို့အတွက် အရေးကြီးတယ်လို့ ယူဆပါတယ်။ ဂျပန်အစိုးရအနေနဲ့ မြန်မာအစိုးရရဲ့ အခုတလော ဆောင်ရွက်ချက်ဖြစ်တဲ့ လွတ်လပ်တဲ့ စုံစမ်းစစ်ဆေးရေး ကော်မရှင်ဖွဲ့စည်းမှု၊ ကုလသမဂ္ဂ အဖွဲ့အစည်းတွေနဲ့ MoU လက်မှတ်ရေးထိုးခဲ့တာကို တန်ဖိုး ထားပါတယ်။ ဒီဆောင်ရွက်ချက်ကို အခြေခံပြီး မြန်မာအစိုးရ အနေနဲ့ လွတ်လပ်တဲ့ စုံစမ်းစစ်ဆေးရေး ကော်မရှင် ထံက ယုံကြည်နိုင်မှုနဲ့ ပွင့်လင်း မြင်သာမှုရှိတဲ့ စုံစမ်းစစ်ဆေးမှု ဆောင်ရွက်နိုင်ဖို့၊ ကုလသမဂ္ဂနဲ့ ပူးပေါင်း ဆောင်ရွက်ရေးကို တိုက်တွန်းသွားဖို့၊ ဒုက္ခသည်တွေကို ပြန်လည်နေရာချထားရေး နေရာ ဖန်တီးပေးဖို့၊  ပြည်တွင်း ဒုက္ခသည်စခန်း IDP စခန်းတွေ ပိတ်သိမ်းဖို့ ကိစ္စတွေနဲ့ ပတ်သက်လို့ ပိုမိုပြီး ဆောင်ရွက်ပေးစေလိုကြောင်း ပြောကြားခဲ့ပါတယ်။

ဂျပန်အစိုးရအနေနဲ့ ဆက်လက်ပြီး ဒီကိစ္စကို ဖြေရှင်းနိုင်ဖို့အတွက် မြန်မာပြည်သူ ပြည်သားတွေနဲ့ လက်တွဲပြီး နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့အတူ စဉ်းစားသုံးသပ် ဆောင်ရွက် သွားမှာ ဖြစ်ပါတယ်။ ဂျပန်နိုင်ငံကနေ မြန်မာနိုင်ငံကို နှစ်စဉ်လာရောက်တဲ့ ခရီးသည် ဦးရေဟာ ၂၀၁၆ ခုနှစ်မှာ တစ်သိန်းကျော်သွားပြီ ဖြစ်ပါတယ်။ ဂျပန်နိုင်ငံမှာ နေထိုင်တဲ့ မြန်မာနိုင်ငံသား ဦးရေဟာ ၂၀၁၇ ခုနှစ်မှာ နှစ်သောင်းကျော်သွားပြီ ဖြစ်ပါတယ်။ နှစ်နိုင်ငံ ပြည်သူသွားလာမှုတွေ ပိုပြီးများပြားလာတာ တွေ့ရပါတယ်။

ဒီနှစ် အောက်တိုဘာလ ၉ ရက်နေ့မှာ မဲခေါင် - ဂျပန်ထိပ်သီး အစည်းအဝေးကို ဂျပန်နိုင်ငံ တိုကျိုမြို့မှာ ကျင်းပသွားဖို့ ရှိပါတယ်။ ဂျပန်နိုင်ငံနဲ့ မြန်မာနိုင်ငံ အပါအ၀င် မဲခေါင်ဒေသနိုင်ငံတွေ၊  ပြည်သူ ပြည်သားတွေ ဆက်ဆံမှု တိုးပွားစေရေး၊ ကဏ္ဍပေါင်းစုံ ပူးပေါင်းဆောင်ရွက်မှုတွေနဲ့ ပတ်သက်ပြီး ဆောင်ရွက်ချက်တွေကို ဆွေးနွေးသွားဖို့ ရှိပါတယ်။ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်း စုကြည်အနေနဲ့ မဲခေါင်- ဂျပန်ထိပ်သီး အစည်းအဝေးကို တက်ရောက်ပြီး နှစ်နိုင်ငံ ဆက်ဆံရေးမြှင့်တင်ဖို့ အတွက် အခွင့်အလမ်းကောင်း ဖြစ်လာမယ်လို့ မျှော်လင့်ပါတယ်”ဟု ပြောကြားသည်။

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် က “ဂျပန်နိုင်ငံခြား ရေးဝန်ကြီး လာရောက်ခြင်း ဟာ နှစ်နိုင်ငံရေရှည် ပူးပေါင်းဆောင်ရွက်မှုနဲ့ ပြည်သူပြည်သားများရဲ့ ခင်မင်ရင်းနှီးမှုဟာ ပိုပြီးတော့ အဓိကကျတယ် ဆိုတာ ပြသခြင်း ဖြစ်ပါတယ်။ အစိုးရ နှစ်ခုကြားမှာ အပြန်အလှန် နားလည်မှု အပြန်အလှန် လေးစားမှုရှိတဲ့အတိုင်း ပွင့်ပွင့်လင်းလင်း ဆွေးနွေးနိုင်ခဲ့ပါတယ်။ ဒီလို ပွင့်ပွင့်လင်းလင်း ဆွေးနွေးနိုင်ခြင်းဟာ နှစ်နိုင်ငံစလုံးအတွက် အကျိုးဖြစ်မယ်လို့ ထင်ပါတယ်။ ကျွန်မတို့နှစ်နိုင်ငံဟာ ဘ၀တူတွေပဲ ဖြစ်တယ်လို့လည်း ပြောလို့ ရပါတယ်။ အင်မတန်မှတူညီတဲ့ အတွေ့အကြုံတွေကို ဖြတ်သန်းခဲ့ရပါတယ်။

ဂျပန်နိုင်ငံခြားရေးဝန်ကြီး ပြောသွားတဲ့အတိုင်း မကြာခင်က ကျွန်မတို့နိုင်ငံမှာ ရေကြီးမှုတွေ ဖြစ်ပါတယ်။ ဂျပန်နိုင်ငံမှာလည်း ရေကြီးမှုတွေဖြစ်ပါတယ်။ ကျွန်မတို့က ဖွံ့ဖြိုးစနိုင်ငံ၊ ဂျပန်နိုင်ငံကတော့ ဖွံ့ဖြိုး တိုးတက်ပြီးသား နိုင်ငံတစ်နိုင်ငံ ဖြစ်ပေမယ့် နှစ်နိုင်ငံစလုံးဟာ သဘာဝဘေး အန္တရာယ်တွေ၊ လူတို့နဲ့ ပတ်သက်တဲ့ အန္တရာယ်တွေဆိုရင် ရင်ဆိုင်ရတာချင်းဟာ စိန်ခေါ်မှု အတူတူပဲလို့ ဆိုတာကို ကျွန်မတို့ တွေ့ရတဲ့အတွက် ပိုပြီးတော့ နီးစပ်မှုဖြစ်ရပါတယ်။ ကျွန်မတို့ရဲ့ ဘေးဒုက္ခသည်တွေနဲ့ ပတ်သက်လို့ ဂျပန်နိုင်ငံကပေးတဲ့ အကူအညီတွေအတွက် ကျေးဇူးတင်ပါတယ်။ ကျွန်မတို့ကတော့ စေတနာတွေပဲ ပေးနိုင်ပါတယ်ဆိုရင်လည်း စေတနာတွေ အများကြီးပေးပါတယ်။

အခုအချိန်မှာဆိုရင် တစ်ကမ္ဘာလုံးက စိတ်ဝင်စားနေတဲ့ ရခိုင်အရေးကိုလည်း ပွင့်ပွင့်လင်းလင်း ဆွေးနွေး နိုင်ခဲ့ပါတယ်။ ဒီလိုဆွေးနွေးတဲ့အခါမှာ ဂျပန်နိုင်ငံက မိတ်ဆွေ တစ်ယောက် အနေနဲ့ ဘယ်လိုကူညီရမလဲ၊ ပြဿနာကို ဘယ်လိုဖြေရှင်းရမလဲဆိုပြီး အဓိကထား ချည်းကပ်တာမို့အင်မတန်မှ တန်ဖိုးထားပါတယ်။ အခုလတ်တလော အကြောင်းအရာတွေကိုသာမက နောင်ဖြစ်လာနိုင်တဲ့ ကမ္ဘာကြီးရဲ့ ပြဿနာတွေ ကိုလည်း ကျွန်မတို့နိုင်ငံ နှစ်နိုင်ငံအနေနဲ့ ပူးပေါင်းဆောင်ရွက်ပြီး အပြုသဘောဆောင်တဲ့ အကျိုးဆက် တွေ ပေါ်အောင်လုပ်နိုင်မယ်လို့ ကျွန်မတို့မျှော်လင့်ပါတယ်။

အောက်တိုဘာလမှာ ဂျပန်နိုင်ငံကို နောက်ထပ် သွားလည်ဖို့ အခွင့်အရေးရတဲ့ အတွက်လည်း ၀မ်းသာပါတယ်။ အဲဒီအတွက် ဂျပန်နိုင်ငံကို သွားလည်တဲ့အခါ နှစ်နိုင်ငံရဲ့ မိတ်ဆွေ ဖြစ်ရေးကို ထပ်ပြီးတော့ ခိုင်မာအောင် လုပ်နိုင်မယ်လို့ ယုံကြည်ပါတယ်” ဟုပြောကြားသည်။

ထို့နောက် သတင်းမီဒီယာများ၏ မေးမြန်းမှုများကို ပြန်လည်ရှင်းလင်း ဖြေကြားကြသည်။

မြန်မာ-ဂျပန် နှစ်နိုင်ငံ ပူးပေါင်းဆောင်ရွက်မှုနှင့် စပ်လျဉ်း၍ နိုင်ငံတော်၏ အတိုင်ပင်ခံပုဂ္ဂိုလ်က “နှစ်နိုင်ငံ ပူးပေါင်းဆောင်ရွက်မှု ပိုမိုတိုးတက်ဖို့ဆိုရင် ရုပ်ပိုင်းဆိုင်ရာ၊ စိတ်ပိုင်းဆိုင်ရာ နှစ်ခုစလုံးတိုးတက်အောင် လုပ်ဖို့ လိုပါတယ်။ ရုပ်ပိုင်းဆိုင်ရာဆိုတာ ဖွံ့ဖြိုးတိုးတက်မှု ကဏ္ဍတွေ ပူးပေါင်းဆောင်ရွက်ခြင်းပါ။ ဒီဟာက ဒီအချိန်မှာနည်းနည်း တစ်ဖက်သတ် ဖြစ်နေတယ်လို့ မြင်ပါတယ်။ အမှန်ပြောရရင် ဂျပန်နိုင်ငံက ကျွန်မတို့ကို ရုပ်ပိုင်းဆိုင်မှာ အများကြီး ကူညီနိုင်ပါတယ်။ သို့သော်ငြားလည်း တစ်ချိန်တစ်ခါမှာ ကျွန်မတို့လည်း တုံ့ပြန်နိုင်မယ်လို့ ဒီလိုမျှော်လင့်ချက် အများကြီးရှိပါတယ်။

စိတ်ပိုင်းဆိုင်ရာကတော့ ပြည်သူလူထု အချင်းချင်းကြားမှာပိုပြီးတော့ နားလည်မှုရှိဖို့၊ ပိုပြီးတော့ ခင်မင်မှုရှိဖို့ ဖြစ်ပါတယ်။ ဒါကတော့ ကျွန်မတို့ နှစ်ပေါင်းများစွာ မြန်မာနိုင်ငံသူ၊ နိုင်ငံသားတွေနဲ့ ဂျပန်နိုင်ငံသူ၊ နိုင်ငံသားတွေ အချင်းချင်းကြားမှာ မိတ်ဆွေစစ်တွေ အင်မတန် များပြားပါတယ်။ ဒါတွေကိုပိုပြီးတော့ ခိုင်မာလာအောင် လူငယ်တွေအချင်းချင်း ပိုပြီးထိတွေ့မှုရှိအောင် ကြိုးစားချင်ပါတယ်။ ဂျပန်နိုင်ငံခြားရေး ၀န်ကြီး ပြောသွားတဲ့အထဲမှာ ဂျပန်နိုင်ငံက ဧည့်သည်တွေ လာတာလည်းများလာတယ်၊ ကျွန်မတို့ ဘက်ကလည်း ဂျပန်နိုင်ငံကို သွားတာများလာတယ်။ ဒါဟာ နိုင်ငံနှစ်နိုင်ငံကြားမှာ ပိုပြီးတော့ ခိုင်မာတဲ့ မိတ်ဆွေစစ် ဖြစ်အောင်လို့ လုပ်ပေးနိုင်တဲ့ အနေအထားလို့ မျှော်လင့်ပါတယ်၊ ယုံကြည်ပါတယ်” ဟု ဖြေကြားသည်။

ရခိုင်ပြည်နယ် ဖွံ့ဖြိုးတိုးတက်ရေးအတွက် ဂျပန်နိုင်ငံမှ ကူညီထောက်ပံ့ပေးသွားမည့် အခြေအနေနှင့် စပ်လျဉ်း၍ ဂျပန်နိုင်ငံခြားရေးဝန်ကြီးက “ရခိုင်ပြည်နယ် တည်ငြိမ်အေးချမ်းရေးနဲ့ ဖွံ့ဖြိုးတိုးတက်ရေး အတွက် ဦးဆောင်နေတဲ့ နိုင်ငံတော်၏ အတိုင်ပင်ခံပုဂ္ဂိုလ်နဲ့ မြန်မာအစိုးရရဲ့ ဆောင်ရွက်ချက်တွေကို ဂျပန်နိုင်ငံက တတ်နိုင်သမျှ ထောက်ပံ့ပေးသွားမှာ ဖြစ်ပါတယ်။

ဂျပန်နိုင်ငံအနေနဲ့ နေရပ်စွန့်ခွာသွားသူတွေ ပြန်လည်နေရာချထားဖို့အတွက် ဆောင်ရွက်တာကို တိုက်တွန်းသွားမှာ ဖြစ်ပါတယ်။ ရခိုင်ပြည်နယ်တစ်ခုလုံးရဲ့ ဆင်းရဲနွမ်းပါးမှု လျှော့ချရေးနဲ့ ပြည်သူလူထုတွေရဲ့ နေထိုင်မှုဘ၀ အဆင့်မြှင့်တင်ရေးကလည်း အင်မတန် အရေးကြီးပါတယ်။ ဒေသအတွက် ရထားလမ်းတွေ၊ ကားလမ်းတွေ တည်ဆောက်ရေး၊ လျှပ်စစ်မီး ရရှိရေးနဲ့ ကျောင်းဆောက်လုပ်ရေးတွေအတွက် ကူညီထောက်ပံ့မှုတွေ ဆောင်ရွက်သွားမှာ ဖြစ်ပါတယ်။ ရခိုင်ပြည်နယ် တည်ငြိမ်အေးချမ်းရေး၊ ဖွံ့ဖြိုးတိုးတက်ရေးဟာ မြန်မာနိုင်ငံ ဒီမိုကရေစီနိုင်ငံအဖြစ် ထူထောင်ရေးမှာ အရေးကြီးတယ်လို့ ယူဆပါတယ်” ဟုဖြေကြားသည်။

နေရပ်စွန့်ခွာသွားသူများ ပြန်လည်လက်ခံရေးအတွက် မြန်မာနိုင်ငံအစိုးရ အနေဖြင့် ထိရောက်စွာ ဆောင်ရွက်သွားမည့် အခြေအနေနှင့် ဂျပန်နိုင်ငံမှ ကူညီထောက်ပံ့မှု အခြေအနေနှင့် စပ်လျဉ်း၍ နိုင်ငံတော်၏ အတိုင်ပင်ခံပုဂ္ဂိုလ်က “မေးခွန်းက ရေတိုကိစ္စတွေနဲ့ ရေရှည်ကိစ္စတွေ ဒီနှစ်ခုရောပြီး မေးသွားတာ ဖြစ်ပါတယ်။ ဒီဟာတွေအတွက် ဒေါက်တာ ကိုဖီအာနန်ရဲ့ အစီရင်ခံစာကို ကြည့်လိုက်ရင် ဒီနှစ်ခုစလုံးကို ကိုင်တွယ်ထားတာ ပါပါတယ်။ ဥပမာဆိုရင် နိုင်ငံသားဖြစ်ရေးဆိုတာ ရေရှည်ကိစ္စပါ။ ဒေါက်တာ ကိုဖီအာနန် ကော်မရှင်က အချက် ၈၈ ချက် အဆိုပြုထားပါတယ်။ အဲဒီအချက်တွေထဲက ၈၀ ကျော်ပြီးသွားပါပြီ။ ၈၁ ချက် ပူးပေါင်းဆောင်ရွက် အကောင်အထည်ဖော်လို့ ပြီးသွားပါပြီ။ ကျန်တဲ့ ၆ ချက်၊ ၇ ချက်က ကော်မရှင်ရဲ့ အစီရင်ခံစာ ထွက်လာကတည်းက တချို့ကိစ္စတွေက ရေရှည်ကိစ္စတွေမို့ တစ်လှမ်းချင်း၊ တစ်လှမ်းချင်း လုပ်ရမယ်လို့ ပြောထားပြီးသား ဖြစ်ပါတယ်။ ဒီအတိုင်းပဲ တစ်လှမ်းချင်း တစ်လှမ်းချင်း လုပ်ရမှာပါ။

နိုင်ငံတစ်နိုင်ငံရဲ့ နိုင်ငံသားဥပဒေဆိုတာလည်း တစ်လှမ်းချင်းတစ်လှမ်းချင်း လုပ်ရမယ့်ကိစ္စပါ။ အရင် ဒီပြဿနာတွေ မဖြစ်ခင် ကျွန်မတို့ အစိုးရတက်ပြီး ၂၀၁၆ ခုနှစ် မေလကတည်းက ရခိုင်ပြည်နယ် တရားဥပဒေစိုးမိုးရေးနဲ့ ဖွံ့ဖြိုးရေးအတွက် ဗဟိုကော်မတီ တစ်ခုဖွဲ့ပါတယ်။ အဲဒီကော်မတီဟာ ရခိုင်ပြည်နယ်ရဲ့ ရေရှည်ပြဿနာတွေ ဖြေရှင်းဖို့ လိုတယ်ဆိုတာ သဘောပေါက်လို့ ဖွဲ့တာဖြစ်ပါတယ်။ ဒါပေမယ့် ဒီဗဟိုကော်မတီ ကနေပြီး အလုပ်မစတင်နိုင်ခင်ဘဲ ပထမဦးဆုံး အကြမ်းဖက် တိုက်ခိုက်မှုတွေ ဖြစ်ပေါ်လာပြီးတော့ တခြားကိစ္စတွေ ပေါ်လာတာဖြစ်ပါတယ်။ ကျွန်မတို့ဟာတစ်လှမ်းချင်း တစ်လှမ်းချင်း ပြဿာနာတွေ ဖြေရှင်းသွားရမှာပါ။ ခုနကသတင်းထောက် ပြောသွားတဲ့ အထဲမှာ နိုင်ငံအထဲမှာကို အမြင်တွေ အမျိုးမျိုးရှိတယ်လို့ ပြောပါတယ်။ ဒါမှန်ပါတယ်။ ကျွန်မတို့ အစိုးရအနေနဲ့ အမျိုးမျိုးသော အမြင်တွေကို နားထောင်ရပါတယ်။ ပြင်ပက ပုဂ္ဂိုလ်တွေကတော့ ကိုယ်ကြိုက်တဲ့အမြင်၊ ကိုယ်စိတ်ဝင် စားတဲ့ အမြင်ကိုပဲ ကြည့်လို့ရပါတယ်။ ပြည်တွင်းမှာရှိတဲ့ အစိုးရတစ်ခုဆိုတာက အမြင်အားလုံးကို စဉ်းစားရပါတယ်။

အမြင် အားလုံးကို ထည့်သွင်းပြီးတော့ အဲဒီဟာအားလုံးအပေါ်မှာ ဖြေရှင်းနိုင်တဲ့ အမြင် တစ်ခုကို ရှာရပါတယ်။ ကျွန်မတို့ အခုစုံစမ်းစစ်ဆေးရေး ကော်မရှင်အနေနဲ့တော့ သူတို့ရဲ့ လုပ်ပိုင်ခွင့်တွေကို ကျယ်ကျယ်ပြန့်ပြန့် ပေးထားမှာပါ။ စုံစမ်းစစ်ဆေးရေး အဖွဲ့ထဲမှာပါတဲ့ အဖွဲ့ဝင်တွေကလည်း အရည်အချင်း ပြည့်စုံတယ်လို့ ကျွန်မတို့ ထင်ပါတယ်။ ဂျပန်နိုင်ငံရော၊ တခြား မိတ်ဆွေနိုင်ငံတွေကရော လိုအပ်လို့ရှိရင်တော့ နည်းပညာပိုင်းဆိုင်ရာ အထောက်အကူတွေ ပေးလိမ့်မယ်လို့ မျှော်လင့်ပါတယ်” ဟု ဖြေကြားသည်။

ရခိုင်ပြည်နယ် အရေးကိစ္စနှင့် ပတ်သက်၍ ဂျပန်နိုင်ငံ၏ သဘောထား အခြေအနေနှင့် စပ်လျဉ်း၍ ဂျပန်နိုင်ငံခြားရေးဝန်ကြီးက “ရခိုင်ပြည်နယ်မှာဖြစ်တဲ့ ကိစ္စတွေက အင်မတန် နက်နဲရှုပ်ထွေးတဲ့ ကိစ္စတွေ ဖြစ်ပါတယ်။ လူ့အခွင့်အရေး၊ လူသားချင်းစာနာထောက်ထားမှုတွေ သာမကဘဲ ပြည်နယ်တစ်ခုလုံးရဲ့ ဆင်းရဲနွမ်းပါးမှုလျော့ချရေး အတွက်ပါ ကူညီ ဆောင်ရွက်ပေးသွားပါမယ်။ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ဒီလိုမျိုးကိစ္စတွေအတွက် ခိုင်ခိုင်မာမာ ဆောင်ရွက်နေတဲ့ အခြေအနေမှာ ရှိပါတယ်။ ဒီလိုမျိုးဆောင်ရွက်မှုက ပိုပြီးတော့ မြန်မြန်ဆန်ဆန် ဆောင်ရွက်ရမယ်ဆိုတဲ့ အသံလည်း ကြားပါတယ်။ သို့သော်လည်း လူ့အသိုင်းအ၀ိုင်း နှစ်ခုအကြား ပြေလည်မှုရရှိဖို့ ကိစ္စအပါအ၀င် ဆောင်ရွက်မှုတွေက ခိုင်ခိုင်မာမာနဲ့ နှစ်ရှည်ဆောင်ရွက်သွားဖို့ လိုအပ်ပါတယ်။

ဂျပန် အစိုးရအနေနဲ့ ခက်ခဲတဲ့ အခြေအနေကိစ္စတွေကို ဖြေရှင်းဆောင်ရွက်နေရတဲ့ မြန်မာအစိုးရနဲ့ အတူ ကူညီဆောင်ရွက်သွားမှာ ဖြစ်ပါတယ်။ မြန်မာအစိုးရရဲ့ ဆောင်ရွက်မှုတွေကို ဂျပန်အစိုးရအနေနဲ့ နိုင်ငံတကာ အသိုင်းအ၀ိုင်းကို ရှင်းပြသွားမှာ ဖြစ်ပါတယ်။ လွတ်လပ်တဲ့ စုံစမ်းစစ်ဆေးရေး ကော်မရှင်ကို ဂျပန်နိုင်ငံက ကုလသမဂ္ဂနဲ့ ပူးပေါင်း ဆောင်ရွက်တဲ့ ကိစ္စတွေ၊ ဒီလိုကိစ္စမျိုးနဲ့ ပတ်သက်ပြီး ဆောင်ရွက်ပေးဖို့ မြန်မာဘက်ကို တောင်းဆိုခဲ့ပါတယ်။ ပြီးတော့ ဒီလိုမျိုးကိစ္စတွေကို မြန်မာအစိုးရတစ်ခုပြီး တစ်ခုဆောင်ရွက်နေတဲ့အတွက် ကျွန်တော်တို့ အစိုးရက တန်ဖိုးထားပါတယ်” ဟု ဖြေကြားသည်။

 (သတင်းစဉ်)