မြန်မာ့စီးပွားရေးလုပ်ငန်းရှင်များနှင့် စတုတ္ထအကြိမ်ပုံမှန် တွေ့ဆုံဆွေးနွေးပွဲသို့ ဒုတိယသမ္မတ ဦးမြင့်ဆွေ တက်ရောက် အမှာစကားပြောကြား

ရန်ကုန် - မတ် ၁၆

လုပ်ငန်းရှင်များ စီးပွားရေးလုပ်ငန်းများ လုပ်ဆောင်ရာတွင် လွယ်ကူလျှင်မြန် ချောမွေ့စေရန်နှင့် လိုအပ်ချက်များကို သက်ဆိုင်ရာကဏ္ဍအလိုက် ဌာနအသီးသီးမှ ဖြည့်ဆည်းပေးရန် ရည်ရွယ်ချက်များဖြင့် မြန်မာ့စီးပွားရေး လုပ်ငန်းရှင်များနှင့် စတုတ္ထအကြိမ်ပုံမှန်တွေ့ဆုံ ဆွေးနွေးပွဲ ကို ယနေ့ နံနက် ၈ နာရီတွင် ရန်ကုန်မြို့ လမ်းမတော်မြို့နယ် မင်းရဲကျော်စွာလမ်းရှိ ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် (UMFCCI)  အစည်းအဝေးခန်းမ၌ ကျင်းပရာ ပုဂ္ဂလိကကဏ္ဍ ဖွံ့ဖြိုးတိုးတက်ရေးကော်မတီဥက္ကဋ္ဌ ဒုတိယသမ္မတ ဦးမြင့်ဆွေ တက်ရောက် အမှာစကား ပြောကြားသည်။

ဒုတိယသမ္မတက ပုဂ္ဂလိက ကဏ္ဍဖွံ့ဖြိုးတိုးတက်ရေးအတွက်  စီးပွားရေးလုပ်ငန်းရှင်များနှင့်  တွေဆုံဆွေးနွေးခဲ့သည်မှာ  ယခုဆိုလျှင် (၄)ကြိမ်မြောက်ရှိပြီဖြစ်ပါကြောင်း၊ ၂၀၁၆ ခုနစ် ဒီဇင်ဘာ (၁)ရက် ပထမအကြိမ် တွေ့ဆုံဆွေးနွေးပွဲတွင် ဆုံးဖြတ်ချက် (၂၇)ချက်၊ ၂၀၁၇ ဇန်န၀ါရီ (၁၃)ရက် ဒုတိယအကြိမ်တွေ့ဆုံ ဆွေးနွေးပွဲတွင် ဆုံးဖြတ်ချက် (၁၁)ချက်နှင့် ၂၀၁၇ ခုနစ် ဖေဖော်ဝါရီ (၁၈)ရက် တွင် ဆုံးဖြတ်ချက်(၁၆)ချက် စုစုပေါင်း (၅၄) ချက်ကို ချမှတ်ခဲ့ကြောင်း။

အဆိုပါတင်ပြချက်များကို သက်ဆိုင်ရာဝန်ကြီးဌာနများ၊ တိုင်းဒေသကြီး/ပြည်နယ်များနှင့် လုပ်ငန်းကော်မတီများက ဆက်လက်ပေါင်းစပ် ညှိနှိုင်းဖြေရှင်းဆောင်ရွက်ပေးလျှက်ရှိပြီး ဆောင်ရွက် ပြီးစီးမှုအခြေအနေများကိုလည်း UMFCCI သို့ အသိပေးအကြောင်းကြားထားပြီးဖြစ်ရာ ၎င်းမှတစ်ဆင့် သက်ဆိုင်ရာလုပ်ငန်းရှင်များကို အသိပေးအကြောင်းကြားလျက် ရှိကြောင်း၊ မှတ်တမ်းများအဖြစ် ပြုလုပ်ထားပြီး ၀န်ကြီးဌာနများကလည်း ဆောင်ရွက်ပြီးစီးမှုများကို ပေးပို့ထားပါကြောင်း၊ တိုင်းပြည်၏ စီးပွားရေးလုပ်ငန်းများ ဖွံ့ဖြိုးတိုးတက်ပြီး ပုဂ္ဂလိကကဏ္ဍပိုမိုဆောင်ရွက်နိုင်ရန်နှင့် လုပ်ငန်းရှင်များ၏ အခက်အခဲများကို ထိထိရောက်ရောက်ဖြေရှင်းပေးနိုင်ရန် ရည်ရွယ်၍ ပုဂ္ဂလိက ကဏ္ဍဖွံ့ဖြိုးတိုးတက်ရေး ကော်မတီကို ဖွဲ့စည်းထားပြီး ယင်းကော်မတီကို အထောက်အကူပြုမည့် လုပ်ငန်းစဉ်အလိုက် လုပ်ငန်းကော်မတီ(၅)ရပ်ကို ထပ်ဆင့် ဖွဲ့စည်းပေးထားပါကြောင်း။

ဥပဒေနှင့်လုပ်ထုံးလုပ်နည်းဆိုင်ရာ ၀န်းကျင်တိုးတက်ကောင်းမွန်စေရေး လုပ်ငန်းကော်မတီအနေဖြင့် ပုဂ္ဂလိက ကဏ္ဍဖွံ့ဖြိုး စေရန် အဟန့်အတားဖြစ်နေပြီး ခေတ်နှင့်မလျော်ညီသည့် ဥပဒေ လုပ်ထုံးလုပ်နည်းများနှင့် စပ်လျဉ်း၍ ပြင်ဆင်သင့်သည့် ဥပဒေများကို ပြင်ဆင်နိုင်ရေးနှင့် လိုအပ်သည့် စီးပွားရေးဆိုင်ရာ ဥပဒေသစ်များ ပြဌာန်းနိုင်ရေးတို့အတွက် ဥပဒေဆိုင်ရာ အကြံပြုခြင်းများကို ဆောင်ရွက်ပေးရန်ဖြစ်ပါကြောင်း၊

ငွေကြေးရရှိစေနိုင်မှုဆိုင်ရာများ ဆောင်ရွက်ရေးလုပ်ငန်း ကော်မတီအနေဖြင့် ငွေကြေး တည်ငြိမ်မှုရရှိစေရန် စီမံကိန်းနှင့် ဘဏ္ဍာရေးဝန်ကြီးဌာန၊ ဗဟိုဘဏ်အပါအ၀င် သက်ဆိုင်ရာ ဌာန များမှ တာဝန်ရှိသူများ ပူးပေါင်းဆောင်ရွက်ခဲ့မှုကြောင့် ထိုက်သင့်သလောက် တည်ငြိမ်မှုရရှိခဲ့ကြောင်း၊

ကုန်သွယ်မှုနှင့် ရင်းနှီးမြှုပ်နှံမှုကို အားပေးမြှင့်တင်ရေး လုပ်ငန်းကော်မတီအနေဖြင့် ရန်ကုန်ဆိပ်ကမ်းများတွင် ကုန်ပစ္စည်း များ တင်ပို့တင်သွင်းခြင်းများ ပြုလုပ်ရာတွင် ပြည်ပသို့ တင်ပို့သည့် ကုန်သေတ္တာများအတွင်း တရားမ၀င်သစ်များ ဖမ်းဆီးရရှိမှုနှင့် ပြည်ပမှ တင်သွင်းလာသော သွင်းကုန်သကြား ကုန်သေတ္တာတွင် မူးယစ်ဆေးဝါး ပါဝင်မှုများ တွေ့ရှိမှုကြောင့် စစ်ဆေးမှုများ ပိုမိုတင်းကြပ်စွာ လုပ်ဆောင်သည့်အတွက် ပို့ကုန်၊ သွင်းကုန်များကို ဆိပ်ကမ်းများ၌ ကုန်တင်၊ ကုန်ချပြုလုပ်ရာ၌ လုပ်ငန်းကြန့်ကြာမှုများ ဖြစ်ပေါ်နေသည်ဟု တင်ပြမှု အပေါ် လုပ်ငန်းကော်မတီအနေဖြင့် ကွင်းဆင်းပြီး လတ်တလောဖြေရှင်းပေးရမည့် အခြေအနေများကို သက်ဆိုင်ရာဌာနများနှင့် ညှိနှိုင်းဖြေရှင်းဆောင်ရွက် ပေးကာ အချို့ အချိန်ယူ၍ ညှိနှိုင်းဖြေရှင်း ဆောင်ရွက်ပေးသွားရမည့်  ကိစ္စရပ်များကိုမူ သက်ဆိုင်ရာဌာနများနှင့် ဖြေရှင်းဆောင်ရွက်ပေးလျှက် ရှိသည်ကို ပြောကြားလိုကြောင်း၊

ကုန်စည်စီးဆင်းမှု လွယ်ကူမြန်ဆန်စေရေးအတွက် တတ်နိုင်သမျှ ဖြေလျော့ပေးခဲ့ကြောင်း၊ စီးပွားရေးနှင့် ၀န်ဆောင်မှု ဆိုင်ရာလုပ်ငန်းများတွင် နိုင်ငံ၏ အခန်းကဏ္ဍအား ပြန်လည်ရေးဆွဲရေး လုပ်ငန်းကော်မတီအနေဖြင့် လုပ်ငန်းရှင်များ၏ အခက်အခဲများကို ပိုမိုဖြေရှင်းပေးနိုင်ရန် သက်ဆိုင်ရာဌာနအားလုံးနှင့် ဆက်သွယ်၍ ပူးပေါင်းဆောင်ရွက် လျှက်ရှိကြောင်း၊ အခြေခံလူသားအရင်းအမြစ် တည်ဆောက်ရေးလုပ်ငန်းကော်မတီအနေဖြင့် အစိုးရနှင့် ပုဂ္ဂလိက ပူးပေါင်းဆောင်ရွက်နိုင် မည့် အစီအစဉ်များကို အကောင်အထည်ဖော် ဆောင်ရွက်နိုင်ရန် ပုဂ္ဂလိကလူသားအရင်းအမြစ် ဖွံ့ဖြိုးတိုးတက်ရေးအတွက် အစိုးရနှင့် ပုဂ္ဂလိကကဏ္ဍ ပူးပေါင်းဆောင်ရွက်မှုဆိုင်ရာ နှီးနှောဖလှယ်ပွဲကို ယခုမတ်လအတွင်း ကျင်းပသွားမည် ဖြစ်ကြောင်း၊ အဆိုပါကော်မတီအနေဖြင့် ပညာရပ်ဆိုင်ရာ ကျွမ်းကျင်မှုသင်တန်းဆင်းလက်မှတ်များ ရရှိရေးကိုလည်း အထူးဆောင်ရွက်လျှက်ရှိကြောင်း။

အစိုးရသစ် စတင်တာဝန်ယူသော ကာလဖြစ်သည့် ၂၀၁၆-၂၀၁၇ ဘဏ္ဍာနှစ်၏ နိုင်ငံခြား ရင်းနှီးမြှုပ်နှံမှုကို ကြည့်မည် ဆိုလျှင် လျာထားချက် အမေရိကန်ဒေါ်လာ ၆ ဘီလီယံ သတ်မှတ်ခဲ့ သော်လည်း ယနေ့အထိ အမေရိကန်ဒေါ်လာ ၆ ဒဿမ ၆၁၂ ဘီလီယံထိ ရရှိထားပြီးဖြစ်သည့် အတွက် လျာထားချက်ထက် ပိုမိုဝင်ရောက် ရင်းနှီးမြှုပ်နှံသည်ကို တွေ့ရမည်ဖြစ်ပြီး တိုးတက်မှုများ ရှိနေပြီ ဖြစ်ပါကြောင်း။

ပြည်တွင်း၊ ပြည်ပ ရင်းနှီးမြှုပ်နှံမှုများမှတစ်ဆင့်  တိုင်းဒေသကြီးနှင့် ပြည်နယ်အားလုံး အချိုးညီညီ ဖွံ့ဖြိုးတိုးတက်စေရန် အတွက်လည်း ဖြေလျော့ဆောင်ရွက်ပေးလျက်ရှိပါကြောင်း၊ ထို့ပြင် တိုင်းဒေသကြီးနှင့် ပြည်နယ်အလိုက်၊ မြို့နယ်အလိုက် ရင်းနှီးမြှုပ်နှံမှုဥပဒေအရ ၀င်ငွေခွန် ကင်းလွတ်ခွင့်ပြုမည့် ဇုန်(၁)၊ ဇုန်(၂)၊ ဇုန်(၃) သတ်မှတ်ချက်များကိုလည်း အစိုးရအဖွဲ့၏ အတည်ပြု ချက်ဖြင့် ရင်းနှီးမြှုပ်နှံမှုကော်မရှင်က အမိန့် ကြော်ငြာစာ ထုတ်ပြန်ခဲ့ပြီးဖြစ်ကြောင်း၊

ယခုအစည်းအဝေးသည် နိုင်ငံတော်၏  စီးပွားရေးတိုးတက်မှုတွင် ပုဂ္ဂလိက၏ အခန်းကဏ္ဍ သည် အဓိကကျသည့်အတွက် ပုဂ္ဂလိကကဏ္ဍဖွံ့ဖြိုးတိုးတက်ရေး လိုအပ်သည့် မူဝါဒပိုင်းဆိုင်ရာ များတွင် ခေတ်နှင့် လျော်ညီစွာ ချမှတ်ကျင့်သုံးဆောင်ရွက်နိုင်ရန်နှင့် ပုဂ္ဂလိကလုပ်ငန်းရှင်များ၏ အခက်အခဲများအပေါ် နိုင်ငံတော်ပိုင်းက အတတ်နိုင်ဆုံး ဖြည့်ဆည်းဖြေရှင်းပေးသွားမည်ဖြစ် ပါကြောင်း၊ သို့ဖြစ်၍ မြန်မာ့စီးပွားရေးလုပ်ငန်းရှင်များနှင့် ပုံမှန်တွေ့ဆုံဆွေးနွေးပွဲကို တတ်နိုင် သမျှ တစ်လတစ်ကြိမ် ကြိုးပမ်းတွေ့ဆုံခြင်းဖြစ်ပါကြောင်းဖြင့် ပြောကြားသည်။

ထို့နောက် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဒေါက်တာသန်းမြင့်၊ ရန်ကုန်တိုင်း ဒေသကြီးအစိုးရအဖွဲ့၊ စီမံကိန်းနှင့် ဘဏ္ဍာရေးဝန်ကြီး ဦးမြင့်သောင်းနှင့် ပညာရေးဝန်ကြီးဌာန၊ ဒုတိယ၀န်ကြီး ဦးဝင်းမော်ထွန်းတို့က လုပ်ငန်းဆောင်ရွက်မှု အခြေအနေ များနှင့်စပ်လျဉ်း၍ ရှင်းလင်းတင်ပြကြသည်။

ဆက်လက်၍ ပြည်ထောင်စုသမ္မတမြန်မာနိုင်ငံ ကုန်သည်များနှင့်စက်မှုလက်မှုလုပ်ငန်းရှင်များ အသင်းချုပ်ဥက္ကဋ္ဌ ဦးဇော်မင်းဝင်းက ကြိုဆိုနှုတ်ခွန်းဆက်စကားပြော ကြားသည်။

ယင်းနောက် ပြည်ပပို့ကုန်များတင်ပို့ရာတွင် တွေ့ကြုံရသော အခက်အခဲများနှင့် ပတ်သက်၍  မြန်မာနိုင်ငံဆန်စပါး အသင်းချုပ်၊ မြန်မာနိုင်ငံ ပဲမျိုးစုံနှင့် နှမ်းကုန်သည်များအသင်း၊ ရန်ကုန်တိုင်းဒေသကြီး ကုန်စည်ဒိုင်နှင့် မြန်မာနိုင်ငံ ကုန်သေတ္တာတင် မော်တော်ယာဉ်များအသင်းတို့မှ ကိုယ်စားလှယ်များက သက်ဆိုင်ရာလုပ်ငန်း ကဏ္ဍများအလိုက် ဆွေးနွေးတင်ပြကြသည်။

ဆွေးနွေးတင်ပြချက်များနှင့်စပ်လျဉ်း၍ တက်ရောက်လာကြသည့် ပြည်ထောင်စုဝန်ကြီး၊ ရန်ကုန်တိုင်းဒေသကြီး အစိုးရ အဖွဲ့ဝင် ဝန်ကြီးများနှင့် ဌာနဆိုင်ရာတာဝန်ရှိသူများက ဖြည့်ဆည်း ဆောင်ရွက်ပေးနိုင်မည့် ကိစ္စရပ်များအား ရှင်းလင်း တင်ပြရာ  ဒုတိယသမ္မတက သက်ဆိုင်ရာကဏ္ဍ အလိုက် ပေါင်းစပ်ညှိနှိုင်း ဆောင်ရွက်ပေးသည်။

မြန်မာ့စီးပွားရေးလုပ်ငန်းရှင်များနှင့် စတုတ္ထအကြိမ်ပုံမှန် တွေ့ဆုံဆွေးနွေးပွဲသို့ စီးပွားရေးနှင့် ကူးသန်းရောင်းဝယ်ရေး ၀န်ကြီးဌာန ပြည်ထောင်စုဝန်ကြီး ဒေါက်တာသန်းမြင့်၊ ပညာရေးဝန်ကြီးဌာန ဒုတိယ၀န်ကြီး ဦးဝင်းမော်ထွန်း၊ ရန်ကုန် တိုင်းဒေသကြီးအစိုးရအဖွဲ့ဝင် ၀န်ကြီးများ၊ ဌာနဆိုင်ရာ အကြီးအကဲများ၊ ပြည်ထောင်စုသမ္မတ မြန်မာနိုင်ငံ ကုန်သည်များ နှင့် စက်မှုလက်မှုလုပ်ငန်းရှင်များ အသင်းချုပ်ဥက္ကဋ္ဌနှင့် ညီနောင်အသင်းအဖွဲ့များမှ တာဝန်ရှိသူများနှင့် စီးပွားရေး လုပ်ငန်းရှင်များ တက်ရောက်ကြသည်။

(သတင်းစဉ်)