၂၁ ရာစု အဆင့်မြင့်ပညာကဏ္ဍနှင့် မြန်မာနိုင်ငံ၏ တက္ကသိုလ်ဝင်ခွင့်လမ်းညွှန်

 

ဒေါက်တာဇော်ထွန်းအောင်(ပညာရေး)

မိမိတို့နိုင်ငံ၌ တက္ကသိုလ်ဝင်ခွင့်လုပ်ငန်းစဉ်တစ်ခုလုံးကို ပညာရေးဝန်ကြီးဌာနကဗဟိုပြု၍ စနစ်တကျ စီမံခန့်ခွဲပေးခြင်းဖြစ်ပြီး အဓိကပင်မဝင်ခွင့်လမ်းကြောင်းမှာ အမျိုးသားအဆင့်တက္ကသိုလ်ဝင်တန်းစာမေးပွဲပင် ဖြစ်ပါသည်။ ယင်းစာမေးပွဲသည် ကျောင်းသားများ၏ ပညာရပ်ဆိုင်ရာ ထူးချွန်မှုအပေါ်မူတည်၍ နိုင်ငံတစ်ဝန်းရှိ သီးခြားဘာသာရပ်အသီးသီးအလိုက် ဝင်ခွင့်အမှတ်ပိုင်းဖြတ်မှုများဖြင့် စနစ်တကျ အဆုံးအဖြတ်ပေးခြင်းဖြစ်ပါသည်။

မျက်မှောက်ခေတ် မြန်မာနိုင်ငံ၏ တက္ကသိုလ်ဝင်ခွင့် အခင်းအကျင်းတွင် ကျောင်းသားလူငယ်များအနေဖြင့် မိမိတို့၏ အခြေခံပညာရလဒ်များ၊ ကိုယ်ပိုင်ထူးချွန်မှုများနှင့် ဝါသနာအလိုက် မိမိတို့တက်ရောက်လိုသော အထူးပြုတက္ကသိုလ်နှင့် ဘာသာရပ်လမ်းကြောင်းများကို ကိုယ်ပိုင်ဆုံးဖြတ်ပိုင်ခွင့်စနစ်ဖြင့် ဉာဏ်ပညာရှိစွာ ဦးစားပေးအစီအစဉ်အလိုက် တိုက်ရိုက်ရွေးချယ်လျှောက်ထားနိုင်သည့် လွတ်လပ်သောအခွင့်အရေးကို စနစ်တကျ ဖန်တီးပေးထားပါသည်။ ပြုပြင်ပြောင်းလဲထားသော စနစ်သစ်ပညာရေး၏ အနှစ်သာရ၊ ဝင်ခွင့်မူဝါဒများနှင့် ဘာသာရပ်အုပ်စုကဏ္ဍကြီးများကို အောက်ပါအတိုင်း တင်ပြအပ်ပါသည် -

၁။ တက္ကသိုလ်ဝင်ခွင့်နှင့် ဘာသာရပ်ရွေးချယ်ခြင်းဆိုင်ရာ စံသတ်မှတ်ချက်များ

တက္ကသိုလ်ဝင်ခွင့်ရရှိရေးသည် ပြိုင်ဆိုင်မှုအလွန်မြင့်မားလှပြီး အမျိုးသားအဆင့် တက္ကသိုလ်ဝင်တန်းစာမေးပွဲတွင် ရရှိခဲ့သည့် စုစုပေါင်းရမှတ်အပေါ်တွင်သာ အခြေခံဆုံးဖြတ်ခြင်းဖြစ်ပါသည်။ ဝင်ခွင့်လျှောက်ထားသူများသည် မိမိတို့၏ ရမှတ်အဆင့်အတန်းအလိုက် တန်းစီဇယားစနစ်ဖြင့် ဦးစားပေးသတ်မှတ်ခံရမည်ဖြစ်ပြီး အထူးပြုဘာသာရပ်များ သင်ယူခွင့်ရရှိရန် ဘာသာရပ်အလိုက် သတ်မှတ်ထားသော စံနှုန်းအမှတ်နှင့် အနိမ့်ဆုံးစည်းကမ်းချက်များကို မဖြစ်မနေပြည့်မီရမည်ဖြစ်ပါသည်။

အမျိုးသားအဆင့် တက္ကသိုလ်ဝင်တန်းစာမေးပွဲကို စုစုပေါင်းရမှတ် ၆၀၀ ဖြင့် အကဲဖြတ် သတ်မှတ်ထားပြီး ပင်မဘာသာရပ်ကြီး သုံးခုဖြစ်သည့် မြန်မာစာ၊ အင်္ဂလိပ်စာ၊ သင်္ချာနှင့် အထူးပြုဘာသာရပ်များဖြစ်သည့် (ရူပဗေဒ၊ ဓာတုဗေဒ၊ ဇီဝဗေဒ) သို့မဟုတ် (ပထဝီ၊ သမိုင်း၊ ဘောဂဗေဒ) စိတ်ကြိုက်ရွေးချယ်ခွင့်ဘာသာရပ်တို့ လွှမ်းခြုံပါဝင်သည့် စုစုပေါင်း ခြောက်ဘာသာကို အခြေခံသည်။

ကျောင်းသား ကျောင်းသူများ၏ အရည်အချင်းကို ၎င်းတို့၏ စုစုပေါင်းရမှတ် သို့မဟုတ် အထူးပြုဘာသာရပ်အလိုက် ရရှိသောရမှတ်များပေါ်တွင် စနစ်တကျအခြေခံတွက်ချက်တန်းစီခြင်း ဖြစ်သည်။ အဆင့်မြင့်ပညာဦးစီးဌာနနှင့် သက်ဆိုင်ရာဝန်ကြီးဌာနများ၏ မူဝါဒများအရ တက္ကသိုလ်ဝင်ခွင့်လျှောက်ထားရာတွင် နိုင်ငံသားဖြစ်မှု၊ ပညာအရည်အချင်း၊ အကျင့်စာရိတ္တနှင့် ကျန်းမာရေးအခြေအနေ စသည့်အခြေခံစံနှုန်းများကို တိကျစွာသတ်မှတ်ထားရှိပါသည်။

ကျောင်းသား ကျောင်းသူများအနေဖြင့် တက္ကသိုလ်ဝင်ခွင့် လျှောက်ထားသည့်အခါ မိမိတို့တက်ရောက်လိုသော အထူးပြုဘာသာရပ်လမ်းကြောင်းများကို ပညာရပ်အလိုက် သီးခြားသတ်မှတ်ထားသော ဦးစားပေးအစီအစဉ်အတိုင်း မိမိတို့၏ ကိုယ်ပိုင်ဆုံးဖြတ်ချက်ဖြင့် လွတ်လပ်စွာ ဖော်ပြလျှောက်ထားနိုင်ပါသည်။

၂။ စစ်မှန်သော ပညာရေးအနှစ်သာရ

တက္ကသိုလ်၏ စစ်မှန်သောရည်ရွယ်ချက်မှာ အခြေခံပညာရေးကို ပြီးမြောက်ခဲ့သည့် လူငယ်လူရွယ်များအား ပိုမိုနက်နဲသော အဆင့်မြင့်အတတ်ပညာရပ်များကို ဆည်းပူးခွင့်ပေးရန်၊ အမှား အမှန်ကို ကိုယ်ပိုင်ဉာဏ်ဖြင့် စူးစမ်းရှာဖွေတတ်စေရန်နှင့် တိုင်းပြည်အတွက် အားကိုးအားထားပြုရမည့် ထိပ်တန်းပညာရှင်ကြီးများကို ပြုစုပျိုးထောင်မွေးထုတ်ပေးရန်ဖြစ်ပါသည်။

သမိုင်းကြောင်းအရ ယခင်ခေတ်များတွင် တက္ကသိုလ်နှင့် ကောလိပ်များ၏ ကွာခြားချက်ကို ဘွဲ့ဒီဂရီအပ်နှင်းနိုင်မှု၊ မအပ်နှင်းနိုင်မှု စသည့်အုပ်ချုပ်ရေးဆိုင်ရာ ကန့်သတ်ချက်များဖြင့် ခွဲခြားခဲ့ကြသော်လည်း ယနေ့ခေတ် ပြုပြင်ပြောင်းလဲထားသော ပညာရေးစနစ်သစ်တွင် ပညာရေးဒီဂရီ ကောလိပ်အသီးသီးကပါ ပညာရေးဝိဇ္ဇာဘွဲ့ B. A (Education) ၊ ပညာရေးသိပ္ပံဘွဲ့ B.Sc(Education) စသည့် ဘွဲ့ဒီဂရီများကို စနစ်တကျတိုက်ရိုက် အပ်နှင်းလျက်ရှိနေပြီဖြစ်သဖြင့် ပညာရေးအခွင့်အလမ်းများသည် တစ်နိုင်ငံလုံးအတိုင်းအတာဖြင့် မျှတကျယ်ပြန့်လာခဲ့ပြီဖြစ်ပါသည်။

၃။ ဘာသာရပ်ကဏ္ဍအလိုက် တက္ကသိုလ်များနှင့် အဖွဲ့အစည်းများ

တက္ကသိုလ်၊ ဒီဂရီကောလိပ်နှင့် ကောလိပ်များကို ဘာသာရပ်ကဏ္ဍစုံအလိုက် အောက်ပါအတိုင်း စနစ်တကျ အုပ်စုခွဲခြားထားရှိပါသည် -

(က) ဆေးနှင့် ဆေးနှီးနွှယ်တက္ကသိုလ်များအုပ်စု

ကျန်းမာရေးဝန်ကြီးဌာနအောက်တွင် ဆေးပညာ၊ သွားဘက်ဆိုင်ရာ၊ ဆေးဝါးနှင့် သူနာပြုပညာရပ်ဆိုင်ရာ တက္ကသိုလ်များဖြစ်ကြပြီး ၎င်းတို့တွင် နေပြည်တော်တက္ကသိုလ် (ဆေးပညာမဟာဌာန) ဆေးတက္ကသိုလ် (၁) ရန်ကုန်၊ ဆေးတက္ကသိုလ် မန္တလေး၊ ဆေးတက္ကသိုလ် (၂) ရန်ကုန်၊ ဆေးတက္ကသိုလ် မကွေး၊ ဆေးတက္ကသိုလ်တောင်ကြီးနှင့် အခြေခံကျန်းမာရေးတက္ကသိုလ်တို့ ပါဝင်သည်။ ထို့ပြင် သွားဘက်ဆိုင်ရာဆေးတက္ကသိုလ် (ရန်ကုန်/ မန္တလေး)၊ ဆေးဝါးတက္ကသိုလ် (ရန်ကုန်/ မန္တလေး)၊ ဆေးဘက်ဆိုင်ရာ နည်းပညာတက္ကသိုလ် (ရန်ကုန်/ မန္တလေး)၊ သူနာပြုတက္ကသိုလ် (ရန်ကုန် / မန္တလေး)၊ အခြေခံကျန်းမာရေးတက္ကသိုလ် (မကွေး)နှင့် တိုင်းရင်းဆေးတက္ကသိုလ် (မန္တလေး) တို့ ဖွဲ့စည်းထားရှိပါသည်။

ဆေးတက္ကသိုလ်များသို့ ဝင်ခွင့်ရရှိရေးသည် တစ်နိုင်ငံလုံးအတိုင်းအတာဖြင့် ပြိုင်ဆိုင်မှု အလွန်မြင့်မားလှပြီး အမျိုးသားအဆင့် တက္ကသိုလ်ဝင်တန်း စာမေးပွဲတွင် ထူးချွန်ပြောင်မြောက်သော ရမှတ်များ ရရှိရန်လိုအပ်ပါသည်။ အခြေခံအရည်အချင်း သတ်မှတ်ချက်အရ လျှောက်ထားသူများသည် အခြေခံပညာအထက်တန်း သိပ္ပံဘာသာရပ်တွဲ (STEAMS-1) ကို သင်ယူအောင်မြင်ထားရမည်ဖြစ်ပြီး (၂၀၂၄ ခုနှစ်၊ ၂၀၂၅ ခုနှစ် တက္ကသိုလ်ဝင်ခွင့်လမ်းညွှန်များအရ) ဘာသာရပ်ခြောက်ခု စုစုပေါင်း ရမှတ် ၄၅၀ အထက် (၆၀၀ ရမှတ်အနက်) အထူးရရှိထားရန် လိုအပ်ပါသည်။

ဝင်ခွင့်ရွေးချယ်မှုအဆင့်ဆင့်တွင် ကျန်းမာရေးဝန်ကြီးဌာနအောက်ရှိ ကျန်းမာရေး လူ့စွမ်းအားအရင်းအမြစ်ဦးစီးဌာနက ကျောင်းသားများ၏ အင်္ဂလိပ်စာ၊ ဓာတုဗေဒနှင့် ဇီဝဗေဒဘာသာရပ်ကြီးများ၏ ရမှတ်များအပေါ်မူတည်၍ ကနဦးစိစစ်ရွေးချယ်ပြီး အဆင့်မီသူများကို လူတွေ့နှုတ်ဖြေစာမေးပွဲ ထပ်မံစစ်ဆေးအကဲဖြတ်ပါသည်။

ဒေသတွင်း ကျန်းမာရေးစောင့်ရှောက်မှု ညီမျှစေရန်အတွက် ဝေးလံခက်ခဲသောဒေသများ၊ လူမှုစီးပွားဖွံ့ဖြိုးမှု အားနည်းသောဒေသများနှင့် ကိုယ်ပိုင်အုပ်ချုပ်ခွင့်ရ တိုင်း/ ဒေသခြောက်ခု (နာဂ၊ ဓနု၊ ပအိုဝ်း၊ ပလောင်၊ ကိုးကန့်နှင့် ဝ) မှ ထူးချွန် ကျောင်းသားများအတွက် အထူးဦးစားပေးဝင်ခွင့် စနစ် (Regional Quota Systems) ကိုလည်း သတ်မှတ်ပေးထားပါသည်။ ယင်းကဲ့သို့ အထူးခံစားခွင့်ဖြင့် ဆေးတက္ကသိုလ်တက်ရောက်ခွင့်ရရှိသော ကျောင်းသားများသည် ဘွဲ့ရရှိပြီးနောက် မိမိတို့၏ သက်ဆိုင်ရာဇာတိဒေသများတွင် နိုင်ငံ့ဝန်ထမ်းဆရာဝန်များအဖြစ် သတ်မှတ်ကာလပြည့်မီအောင် မဖြစ်မနေ ပြန်လည်တာဝန်ထမ်းဆောင်ရမည်ဖြစ်ပြီး ပညာသင်ယူမှုပျက်ကွက်ပါက သို့မဟုတ် ကတိကဝတ်​ဖောက်ဖျက်ပါက ဥပဒေကြောင်းအရ အရေးယူခြင်းနှင့် ငွေကြေးပေး​လျော်ခြင်းဟူသော ကတိခံဝန်ချက်စာချုပ်ကို လက်မှတ်ရေးထိုးရမည့် စည်းကမ်းချက်များပါရှိသည်။

(ခ) ပိုလီတက္ကနစ်တက္ကသိုလ်များအုပ်စု

ခေတ်ပြိုင်အဆင့်မြင့်ပညာ ကဏ္ဍတွင် အင်ဂျင်နီယာဘာသာရပ်များနှင့် ကွန်ပျူတာသိပ္ပံပညာရပ်များကို အုပ်ချုပ်ရေးစနစ်တစ်ခုတည်းအောက်၌ စုစည်းပေါင်းစပ်ထားသည့် စံပြတက္ကသိုလ်အဖြစ် နေပြည်တော် ပိုလီတက္ကနစ်တက္ကသိုလ် (Naypyitaw State Polytechnic University - NSPU) ကို စနစ်တကျဖွဲ့စည်းတည်ထောင်ထားရှိပါသည်။

ပိုလီတက္ကနစ်တက္ကသိုလ်များ၏ ဝင်ခွင့်လုပ်ငန်းစဉ်သည် အမျိုးသားအဆင့် တက္ကသိုလ်ဝင်ခွင့် ရမှတ်အဆင့်သတ်မှတ်ချက်အဆင့်ဆင့်အပေါ်တွင် တိကျစွာအခြေခံထားပြီး ရမှတ်အဆင့် အတန်းလျာထားချက်များမှာ များသောအားဖြင့် အရည်အသွေးမြင့်မားသော စံနှုန်းအမှတ်များ ဖြစ်ကြပါသည်။ ဤတက္ကသိုလ်၏ ထူးခြားချက်မှာ ရွေးချယ်လိုက်သော ဘာသာရပ်လမ်းကြောင်းပေါ် မူတည်၍ သင်ယူရမည့် ပညာသင်နှစ်ကာလ ကွာခြားမှုရှိခြင်းဖြစ်ပြီး အင်ဂျင်နီယာ (Engineering Tracks) အထူးပြုဘာသာရပ်များအတွက် ငါးနှစ်ကြာမြင့်မည်ဖြစ်ကာ ကွန်ပျူတာသိပ္ပံနှင့် သတင်းအချက်အလက် နည်းပညာဘာသာရပ်များအတွက်မူ လေးနှစ်ကြာမြင့်မားစွာ သင်ယူကြရမည်ဖြစ်ပါသည်။

(ဂ) နည်းပညာနှင့် အင်ဂျင်နီယာတက္ကသိုလ်များ အုပ်စု

သိပ္ပံနှင့် နည်းပညာဝန်ကြီးဌာနအောက်ရှိ အင်ဂျင်နီယာနှင့် နည်းပညာဆိုင်ရာများကို အထူးပြုသင်ကြားသော တက္ကသိုလ်များဖြစ်ပြီး ဗဟိုထိပ်တန်းကျောင်းကြီးများအဖြစ် ရန်ကုန်နည်းပညာတက္ကသိုလ် (YTU)နှင့် မန္တလေးနည်းပညာတက္ကသိုလ် (MTU) တို့ ပါဝင်ဖွဲ့စည်းထားရှိပါသည်။

နည်းပညာတက္ကသိုလ်များသို့ ဝင်ခွင့်ရွေးချယ်ရာတွင် ကျောင်းသားများ၏ အင်္ဂလိပ်စာ၊ သင်္ချာ၊ ဓာတုဗေဒနှင့် ရူပဗေဒဟူသော ပင်မဘာသာရပ်ကြီး လေးခု၏ ရမှတ်များကို အဓိကထား၍ အကဲဖြတ်ဆန်းစစ်ခြင်းဖြစ်ပါသည်။ ယေဘုယျအားဖြင့် အဆိုပါပင်မဘာသာရပ်များမှ တွက်ချက်ထားသည့် အနိမ့်ဆုံးလိုအပ်ချက် အမှတ်စံနှုန်းပြည့်မီမှသာ ဝင်ခွင့်လျှောက်ထားနိုင်မည်ဖြစ်ပြီး ရန်ကုန်နည်းပညာတက္ကသိုလ် (YTU) ကဲ့သို့သော ထိပ်တန်းတက္ကသိုလ်ကြီးများ၏ မြို့ပြအင်ဂျင်နီယာ (Civil) သို့မဟုတ် ကွန်ပျူတာအင်ဂျင်နီယာ (Computer Engineering) ကဲ့သို့သော အထူးပြုဘာသာရပ်များအတွက်မူ အလွန်မြင့်မားသော ရမှတ်များရရှိထားရန် လိုအပ်ပါသည်။

စနစ်သစ်အရ အင်ဂျင်နီယာဘွဲ့ကြို အစီအစဉ်များ၏ ပညာသင်နှစ်ကာလမှာ ငါးနှစ်ကြာမြင့်မားစွာ ပြုစုပျိုးထောင်ပေးခြင်းဖြစ်ပါသည်။ ထို့အပြင် ပြည်နယ်နှင့် တိုင်းဒေသကြီးအလိုက် တည်ရှိသော နည်းပညာတက္ကသိုလ် (စစ်ကိုင်း၊ ကျောက်ဆည်၊ မကွေး၊ ပုသိမ် ၊ မော်လမြိုင် စသည်) တို့တွင်လည်း ဒေသအလိုက် ဝင်ခွင့်ရမှတ်သတ်မှတ်ချက်များဖြင့် စနစ်တကျ လက်ခံသင်ကြားပေးလျက်ရှိပါသည်။

(ဃ) ကွန်ပျူတာတက္ကသိုလ်များအုပ်စု

သတင်းအချက်အလက်နည်းပညာနှင့် ကွန်ပျူတာသိပ္ပံပညာရပ်များကို အထူးပြုမွေးထုတ်ပေးသော အဆင့်မြင့်တက္ကသိုလ်များဖြစ်ကြပြီး ဗဟိုပြုကျောင်းကြီးများအဖြစ် ရန်ကုန်ကွန်ပျူတာတက္ကသိုလ် (UCSY) ၊ မန္တလေးကွန်ပျူတာတက္ကသိုလ် (UCSM) တို့ တည်ရှိပါသည်။ ထို့ပြင် သတင်းအချက်အလက်နည်းပညာရပ်ဆိုင်ရာ လျှောက်ထားလိုသော ကျောင်းသားများအတွက် ရန်ကုန်မြို့ရှိ သတင်းအချက်အလက်နည်းပညာတက္ကသိုလ် (University of Information Technology- UIT) သည် နိုင်ငံ၏ စံပြထိပ်တန်းဗဟိုဌာနကြီးတစ်ခုဖြစ်ပါသည်။

နိုင်ငံတစ်ဝန်းမှ တက္ကသိုလ်ဝင်တန်းစာမေးပွဲ အောင်မြင်ထားသည့် မည်သည့်ကျောင်းသားမဆို UIT သို့ လျှောက်ထားနိုင်ပါသည်။ အခြားသော ကွန်ပျူတာတက္ကသိုလ်များသို့ ဝင်ခွင့်လျှောက်ထားရန်အတွက်လည်း ပုံမှန်အားဖြင့် တက္ကသိုလ်ဝင်တန်း စုစုပေါင်းရမှတ် အဆင့်သတ်မှတ်ချက်တစ်ရပ်ကို ပြည့်မီရမည်ဖြစ်သည့်အပြင် ပင်မအခြေခံဖြစ်သည့် အင်္ဂလိပ်စာနှင့် သင်္ချာဘာသာရပ် နှစ်ခုပေါင်း ရမှတ်အနိမ့်ဆုံး သတ်မှတ်ချက်စံနှုန်းကို ပြည့်မီထားရမည်ဖြစ်ပါသည်။

ဤတက္ကသိုလ်ကြီးများတွင် တက်ရောက်အောင်မြင်ပါက ကွန်ပျူတာသိပ္ပံဘွဲ့ (B.C.Sc.) သို့မဟုတ် ကွန်ပျူတာနည်းပညာဘွဲ့ (B.C.Tech.) စသည့် ဘွဲ့ဒီဂရီများကို အပ်နှင်းချီးမြှင့်မည်ဖြစ်ပြီး အထူးပြုဘာသာရပ်အလိုက် ပညာသင်နှစ်ကာလမှာ လေးနှစ်မှ ငါးနှစ်အထိ ကြာမြင့်မည်ဖြစ်ပါသည်။ တိုင်းဒေသကြီး၊ ပြည်နယ်မြို့တော်များ (မြစ်ကြီး နား၊ မုံရွာ၊ မိတ္ထီလာ၊ တောင်ကြီး၊ ပြည်၊ ပုသိမ် စသည့်) ကွန်ပျူတာတက္ကသိုလ်များတွင်လည်း စနစ်သစ်ဝင်ခွင့်လမ်းညွှန်ချက်များအတိုင်း လက်ခံဖွင့်လှစ်ပေးလျက်ရှိပါသည်။

(င) မြန်မာသတင်းအချက်အလက် နည်းပညာ တက္ကသိုလ် - MIIT

သိပ္ပံနှင့်နည်းပညာဝန်ကြီးဌာနအောက်ရှိ အဆင့်မြင့်နည်းပညာ အထူးပြုတက္ကသိုလ်ကြီး တစ်ခုဖြစ်ပြီး လျှောက်ထားလိုသူများသည် တက္ကသိုလ်ဝင်စာမေးပွဲတွင် သိပ္ပံဘာသာတွဲဖြစ်သော STEAMS-1 (မြန်မာစာ၊ အင်္ဂလိပ်စာ၊ သင်္ချာ၊ ရူပဗေဒ၊ ဓာတုဗေဒ၊ ဇီဝဗေဒ) သို့မဟုတ် ဝိဇ္ဇာ/ သိပ္ပံတွဲ ဖြစ်သော STEAMS-2 (မြန်မာစာ၊ အင်္ဂလိပ်စာ၊ သင်္ချာ၊ ရူပဗေဒ၊ ဓာတုဗေဒ၊ ဘောဂဗေဒ) ဘာသာရပ်တွဲတစ်ခုခုဖြင့် အောင်မြင်ထားရမည်ဖြစ်ပါသည်။

ဝင်ခွင့်လျှောက်ထားသူသည် နိုင်ငံသားဖြစ်ရမည်ဖြစ်ပြီး တက္ကသိုလ်ဝင်စာမေးပွဲအောင်မြင်သူ မည်သူမဆို MIIT သို့ တိုက်ရိုက်လျှောက်ထားနိုင်ပါသည်။ စိစစ်ရွေးချယ်ရာတွင် တက္ကသိုလ်မှ ကျင်းပမည့် ကွန်ပျူတာအခြေပြုဝင်ခွင့်စာမေးပွဲ (Computer-Based Exam) ကို ဖြေဆိုရမည်ဖြစ်ပြီး တက္ကသိုလ်ဝင်စာမေးပွဲ စုစုပေါင်းရမှတ်၏ ၄၀ ရာခိုင်နှုန်းနှင့် ဝင်ခွင့်စာမေးပွဲရမှတ်၏ ၆၀ ရာခိုင်နှုန်းတို့ကို ပေါင်းစပ်တွက်ချက်ကာ အမှတ်အများဆုံး ရရှိသူများကို သတ်မှတ်ဦးရေအလိုက် ရွေးချယ်လက်ခံသင်ကြားပေးပါသည်။

(စ) ဝိဇ္ဇာ၊ သိပ္ပံ၊ နိုင်ငံခြားဘာသာနှင့် စီးပွားရေးတက္ကသိုလ်များအုပ်စု

တိုင်းဒေသကြီး၊ ပြည်နယ်မြို့တော်များ၏ တက္ကသိုလ်ကြီးများသည် ဝိဇ္ဇာပညာရပ်များ၊ အသုံးချသိပ္ပံဘာသာရပ်များ၊ ဘာသာစကားနှင့် စီးပွားရေးပညာရပ်များကို အဓိကသင်ကြားပေးသော ပင်မတက္ကသိုလ်ကြီးများဖြစ်ကြပါသည်။ ယင်းတွင် တက္ကသိုလ်များနှင့် အကယ်ဒမီဖြစ်ကြသည့် နေပြည်တော်တက္ကသိုလ် (Naypyitaw State Academy)၊ ရန်ကုန်တက္ကသိုလ်၊ မန္တလေးတက္ကသိုလ်တို့ ပါဝင်သကဲ့သို့ ဘာသာစကားအထူးပြုအတွက် ရန်ကုန်နိုင်ငံခြားဘာသာတက္ကသိုလ် (YUFL) နှင့် မန္တလေးနိုင်ငံခြားဘာသာတက္ကသိုလ် (MUFL) တို့ တည်ရှိပါသည်။

ထို့ပြင် စီးပွားရေးနှင့် စီမံခန့်ခွဲမှုပညာရပ်များအတွက် ရန်ကုန်စီးပွားရေးတက္ကသိုလ် (လှိုင်နယ်မြေ)၊ ရန်ကုန်စီးပွားရေးတက္ကသိုလ် (ရွာသာကြီးနယ်မြေ)၊ မုံရွာစီးပွားရေးတက္ကသိုလ်နှင့် မိတ္ထီလာစီးပွားရေးတက္ကသိုလ်တို့ စနစ်တကျပါဝင်ဖွဲ့စည်းထားရှိပါသည်။ အမျိုးသားစီမံခန့်ခွဲမှု ပညာဒီဂရီကောလိပ်သည် ရန်ကုန်တိုင်းဒေသကြီး (ဗိုလ်တထောင်) မြို့နယ်တွင်တည်ရှိပြီး ထိုဒီဂရီကောလိပ်သည် သတင်းစာမှ သီးခြားခေါ်ယူပြီး သတ်မှတ်လျှောက်လွှာပုံစံဖြင့် တိုက်ရိုက်လျှောက်ထားရမည်ဖြစ်ပါသည်။

(ဆ) ပညာရေးတက္ကသိုလ်နှင့် ဆရာအတတ်ပညာ ကောလိပ်များအုပ်စု

ပညာရေးဝန်ကြီးဌာနအောက်ရှိ ဆရာအတတ်ပညာနှင့် ပညာရေးဗေဒဆိုင်ရာ အဆင့်မြင့် အတတ်ပညာပြည့်ဝသည့် ဆရာ ဆရာမများ မွေးထုတ်ရာ ဌာနများဖြစ်ကြပါသည်။ ပင်မပညာရေးတက္ကသိုလ်များအဖြစ် ရန်ကုန်ပညာရေးတက္ကသိုလ်နှင့် စစ်ကိုင်းပညာရေးတက္ကသိုလ်တို့တည်ရှိပြီး ၎င်းတို့နှင့်အတူ ဆရာလောင်းများအား စနစ်တကျလေ့ကျင့်ပျိုးထောင်ပေးရန်အတွက် မြစ်ကြီးနား၊ လွိုင်ကော်၊ ဘားအံ၊ ဟားခါး၊ စစ်ကိုင်း၊ မုံရွာ၊ ကသာ၊ ထားဝယ်၊ မြိတ်၊ တောင်ငူ၊ ပြည်၊ မကွေး၊ ပခုက္ကူ၊ မန္တလေး၊ မိတ္ထီလာ၊ မော်လမြိုင်၊ ကျောက်ဖြူ၊ ရန်ကင်း၊ လှည်းကူး၊ သင်္ဃန်းကျွန်း၊ တောင်ကြီး၊ လားရှိုး၊ ကျိုင်းတုံ၊ ပုသိမ်၊ မြောင်းမြနှင့် ဘိုကလေး ပညာရေးဒီဂရီကောလိပ်များ တစ်နိုင်ငံလုံးအတိုင်းအတာဖြင့် ကျယ်ပြန့်စွာ တည်ရှိကြပါသည်။ ပညာ​ရေးဒီဂရီ​ကောလိပ်များကို အဆင့်မြှင့်တင်ထား​သော ဆရာအတတ်ပညာ တက္ကသိုလ်များသို့လည်း တက်​ရောက်နိုင်ရန် စီစဉ်ထားရှိပါသည်။

(ဆက်လက်ဖော်ပြပါမည်)