ထိုင်းခြေစမ်းခရီးစဉ် ဒုတိယမြောက်ခြေစမ်းပွဲတွင် ရန်ကုန်စီးတီးအသင်း နိုင်ပွဲဆက်

ရန်ကုန် ဇူလိုင် ၂၆

၂၀၂၆-၂၀၂၇ ရာသီ MNL ပြိုင်ပွဲအတွက် ပြင်ဆင်သည့်အနေဖြင့် ထိုင်းနိုင်ငံ၌ လေ့ကျင့်နေသည့် မြန်မာနေရှင်နယ်လိဂ်ကလပ် ရန်ကုန်စီးတီးအသင်းသည် ဒုတိယမြောက် ခြေစမ်းပွဲအဖြစ် ဇူလိုင် ၂၅ ရက်က ထိုင်းလိဂ်-၃ ကလပ် BFB ပတ္တရားအသင်းနှင့် ခြေစမ်းကစားရာ တစ်ဂိုး-ဂိုးမရှိဖြင့် အနိုင်ရရှိခဲ့သည်။

ရန်ကုန်စီးတီးအသင်းသည် ပြည်တွင်း ပြည်ပကစားသမားများ အသုံးပြုခဲ့ပြီး တိုက်စစ်မှူး အောင်ကောင်းမာန် သွင်းယူသည့်ဂိုးဖြင့် အနိုင်ရခဲ့ခြင်းဖြစ်သည်။ ရန်ကုန်စီးတီးအသင်းသည် ဇူလိုင် ၂၁ ရက်က ကစားသည့် ပထမခြေစမ်းပွဲတွင် ထိုင်းလိဂ်-၃ ကလပ် Pluakdaeng Rayong အသင်းကို နှစ်ဂိုး-တစ်ဂိုးဖြင့် အနိုင်ရထားသည်။

ရန်ကုန်စီးတီးအသင်းသည် ရာသီကြိုပြင်ဆင်မှုအဖြစ် ထိုင်းနိုင်ငံ၌ တစ်လကြာ လေ့ကျင့်လျက်ရှိပြီး ခြေစမ်းပွဲကိုးပွဲ ယှဉ်ပြိုင်ကစားမည်ဖြစ်သည်။

ရန်ကုန်စီးတီးအသင်းသည် နောက်ထပ်ခြေစမ်းပွဲများအဖြစ် ဇူလိုင် ၂၉ ရက်တွင် ထိုင်း လိဂ်-၁ ကလပ် ရရောင်းအသင်း၊ ဇူလိုင် ၃၁ ရက်တွင် ထိုင်းလိဂ်-၃ ကလပ် ဘူရာဖာအသင်း၊ သြဂုတ် ၂ ရက်တွင် ထိုင်းလိဂ်-၃ ကလပ် ဟွာဟင်းအသင်း၊ သြဂုတ် ၆ ရက်တွင် ဟောင်ကောင်ထိပ်သီးကလပ် ကစ်ချီအသင်း၊ သြဂုတ် ၉ ရက်တွင် ထိုင်းလိဂ်-၁ ကလပ် ဘန်ကောက်ယူနိုက်တက်အသင်း၊ သြဂုတ် ၁၂ ရက်တွင် ထိုင်းလိဂ်-၃ ကလပ် မြောင်နော့သ်အသင်း၊ သြဂုတ် ၁၅ ရက်တွင် ထိုင်းလိဂ်-၂ ကလပ် မြောင်တောင်ယူနိုက်တက်အသင်းနှင့် ယှဉ်ပြိုင်ကစားမည်ဖြစ်သည်။

 သတင်း-ချစ်ကိုကို

ဓာတ်ပုံ -YCFC