အပူချိန်မြင့်မားမှုများနှင့်စပ်လျဉ်း၍ စီမံဆောင်ရွက်နေမှုအခြေအနေများကို အများပြည်သူသို့ အသိပေးသတင်းထုတ်ပြန်ခြင်း

ကမ္ဘာကြီးပူနွေးလာမှု၊ သဘာဝပတ်ဝန်းကျင်ယိုယွင်းပျက်စီးလာမှုတို့အပါအဝင် များစွာသော အကြောင်းခြင်းရာများကြောင့် ရာသီဥတုဖောက်ပြန်ပြောင်းလဲခြင်းများ ဖြစ်ပေါ်လျက်ရှိရာ ယခု ၂၀၂၆ ခုနှစ်အတွင်း၌လည်း ကမ္ဘာတစ်ဝှမ်း အပူချိန်မြင့်မားမှုကို ကြုံတွေ့ ရလျက်ရှိပါသည်။

ဩစတြေးလျနိုင်ငံအနောက်ပိုင်း၊ အွန်စလိုမြို့တွင် ၂၀၂၆ ခုနှစ်၊ ဇန်နဝါရီလ၌ အပူချိန် ၄၉ ဒီဂရီဆဲလ်စီးယပ်စ်အထိရောက်ရှိခဲ့ပြီး ပြင်းထန်သော အပူလှိုင်းသက်ရောက်မှုအဖြစ် မှတ်တမ်းဝင်ခဲ့ ပါသည်။ အလားတူ ကမ္ဘာ့အရှေ့အလယ်ပိုင်းနိုင်ငံတစ်ခုဖြစ်သော ဘာရိန်းနိုင်ငံတွင်လည်း ၂၀၂၆ ခုနှစ်၊ မေလ ၂၉ ရက်နေ့တွင် အပူချိန် ၄၇ ဒသမ ၆ ဒီဂရီဆဲလ်စီးယပ်စ်ဖြင့် နိုင်ငံ၏ အမြင့်ဆုံးအပူချိန်အဖြစ် မှတ်တမ်းတင်ခဲ့ရပါသည်။ ၂၀၂၆ ခုနှစ်အတွက် ကမ္ဘာ့မှတ်တမ်းဝင် အမြင့်ဆုံး အပူချိန်မှာ ၄၉ ဒသမ ၃ ဒီဂရီ ဆဲလ်စီးယပ်စ် (၁၂၁ ဒီဂရီ ဖာရင်ဟိုက်) ဖြစ်ပြီး ပါကစ္စတန်နိုင်ငံ၊ ဂျာကိုဘာဘတ်မြို့၏ ၂၀၂၆ ခုနှစ်၊ မေလ ၂၇ ရက်နေ့ရှိ အပူချိန်ဖြစ်ပါသည်။

အထူးသဖြင့် ဧပြီလလယ်မှ မေလအတွင်း အိန္ဒိယနိုင်ငံနှင့် ပါကစ္စတန်နိုင်ငံတို့တွင် အပူချိန်များ အလွန်မြင့်မားခဲ့ရာ အိန္ဒိယနိုင်ငံရှိ မြို့ပေါင်းများစွာ၏ နေ့စဉ်အမြင့်ဆုံးအပူချိန်မှာ ၄၆ ဒီဂရီ ဆဲလ်စီးယပ်စ်အထက်တွင် အများဆုံးရှိခဲ့ပြီး အပူရှပ်ခြင်း၊ အပူလွန်ကဲခြင်းတို့ကြောင့် အိန္ဒိယနိုင်ငံတွင် သေဆုံးသူအနည်းဆုံး (၃၇) ဦးရှိခဲ့ကာ ပါကစ္စတန်နိုင်ငံတွင်လည်း (၁၀) ဦးရှိခဲ့ကြောင်း သတင်းဖော်ပြ ချက်များအရ သိရှိရပါသည်။

ဥရောပအနောက်ပိုင်းဒေသများ၊ ယူကေနှင့် အိုင်ယာလန်နိုင်ငံတို့တွင်လည်း နွေရာသီအစောပိုင်းကာလဖြစ်သော မေလ၌ အမြင့်ဆုံးအပူချိန်များဖြစ်ပေါ်ခဲ့ရာ ပြင်သစ်နိုင်ငံတွင် မေလအတွင်း အချို့နေရာများ၌ အမြင့်ဆုံးအပူချိန် ၃၉ ဒီဂရီဆဲလ်စီးယပ်စ် အထိရောက်ရှိခဲ့ပြီး အပူဒဏ်ကြောင့် သေဆုံးသူ ခုနစ်ဦးအထိ ရှိခဲ့ပါသည်။

မြန်မာနိုင်ငံတွင်လည်း ယခု ၂၀၂၆ ခုနှစ် နွေရာသီကာလများတွင် အထူးသဖြင့် ဧပြီလအတွင်း မကွေးတိုင်းဒေသကြီးအတွင်းရှိ မကွေး၊ မင်းဘူး၊ တောင်တွင်းကြီး၊ ဆင်ဖြူကျွန်း၊ အောင်လံ၊ ပခုက္ကူ၊ ချောက်၊ မန္တလေးတိုင်းဒေသကြီးအတွင်းရှိ မန္တလေးနှင့် မြင်းခြံမြို့များတွင် အပူချိန် ၄၀ ဒီဂရီ ဆဲလ်စီးယပ်စ်နှင့်အထက်တွင် ရှိခဲ့ပါသည်။ ၂၀၂၄ ခုနှစ်တွင် အမြင့်ဆုံးအပူချိန် ၄၈ ဒသမ ၂ ဒီဂရီဆဲလ်စီးယပ်စ်ဖြင့် စံချိန်သစ်တင်ခဲ့သော ချောက်မြို့တွင် ၂၀၂၆ ခုနှစ်၊ ဧပြီလအတွင်း အပူချိန်မှာ ၄၄ ဒသမ ၉ ဒီဂရီ ဆဲလ်စီးယပ်စ်သို့ ရောက်ရှိနေလျက်ရှိပါသည်။

ထိုသို့ပူပြင်းသော နွေရာသီကာလများအတွင်း အများပြည်သူတို့အနေဖြင့် အပူချိန်မြင့်မားခြင်းကြောင့် ဖြစ်ပေါ်တတ်သည့် ထိခိုက်ခံစားရမှုများမှ လျော့နည်းသက်သာစေရေးအတွက် အပူရှောင်စခန်း များဖွင့်လှစ်ဆောင်ရွက်ပေးရန် နိုင်ငံတော်အကြီးအကဲ၏ လမ်းညွှန်ချက်အရ မကွေးတိုင်းဒေသကြီးအတွင်းရှိ မကွေး၊ ရေနံချောင်း၊ နတ်မောက်၊ ချောက်၊ မင်းဘူး၊ စကု၊ အောင်လံ၊ မြို့သစ်မြို့များ၌ ၂၀၂၆ ခုနှစ်၊ မတ်လမှစတင်၍ အရိပ်ရအေးမြသောနေရာများ၊ လေဝင် လေထွက်ကောင်းမွန်သောနေရာများ၌ အပူရှောင်စခန်းများ ဖွင့်လှစ်ပြီး လာရောက်ခိုနားသူများကို သောက်ရေသန့်နှင့် အချိုရည်များ တိုက်ကျွေးခြင်း၊ မြန်မာ့ရိုးရာအစားအစာများ ကျွေးမွေးခြင်း၊ သဘာဝဘေးအန္တရာယ်ဆိုင်ရာအသိပညာများဖြန့်ဝေခြင်း၊ လိုအပ်သော ကျန်းမာရေးဆိုင်ရာများ စောင့်ရှောက်ပေးခြင်းတို့ကို ဆောင်ရွက်ပေးခဲ့ပါသည်။ အပူဒဏ်အန္တရာယ်ကာကွယ်ရေးဆိုင်ရာ အသိပေး နှိုးဆော်ချက်များ၊ လိုက်နာဆောင်ရွက်ရန်များ ထုတ်ပြန်ခြင်း၊ ဆေးရုံ/ ဆေးခန်းများ ကျန်းမာရေးဌာနများ၌လည်း အပူဒဏ်ကြောင့် ခံစားရမှုများကို အမြန်ဆုံးကုသစောင့်ရှောက်ပေးနိုင်ရန် လိုအပ်သော ကြိုတင်ပြင်ဆင်မှုများကို အသင့်ပြင်ဆင်ဆောင်ရွက်ထားခြင်း၊ ကုသစောင့်ရှောက်မှုပေးခြင်းတို့ကို သက်ဆိုင်ရာများအလိုက် ဆောင်ရွက် လျက်ရှိရာ ၂၀၂၆ ခုနှစ်၊ ဇွန်လ ပထမပတ်အထိ အပူဒဏ်အန္တရာယ်ကြောင့် သေဆုံးသူ(၃)ဦးရှိခဲ့ပြီး ကျန်းမာရေးစောင့်ရှောက်မှု ဆောင်ရွက်ပေးခဲ့ရသူ (၇၄) ဦးရှိကြောင်း၊ အပူဒဏ်အန္တရာယ်ဆိုင်ရာဆောင်ရွက်မှုများကို ဆက်လက်ဆောင်ရွက်လျက်ရှိကြောင်းနှင့် လာမည့် ရာသီကာလများတွင် ဖြစ်ပွားနိုင်သည့် သဘာဝဘေးအန္တရာယ်များနှင့်စပ်လျဉ်း၍လည်း ကဏ္ဍအလိုက် လိုအပ်သော ကြိုတင်ပြင်ဆင်မှုများကို ဌာန/ အဖွဲ့အစည်းများ၊ အစိုးရအဖွဲ့များ အလိုက် မပြတ်စီမံဆောင်ရွက်လျက်ရှိကြောင်း အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီက အများပြည်သူသို့ အသိပေးသတင်းထုတ်ပြန်အပ်ပါသည်။