(၇၉) ကြိမ်မြောက် ပြည်ထောင်စုနေ့အခမ်းအနားကျင်းပရေး ပို့ဆောင်ရေးနှင့် ဆက်သွယ်ရေးဆပ်ကော်မတီ၏ ပထမအကြိမ် လုပ်ငန်းညှိနှိုင်း

နေပြည်တော် ဇန်နဝါရီ ၁၂

၂၀၂၆ ခုနှစ် (၇၉) နှစ်မြောက် ပြည်ထောင်စုနေ့အခမ်းအနားကျင်းပရေး ပို့ဆောင်ရေးနှင့် ဆက်သွယ်ရေးဆပ်ကော်မတီ၏ ပထမအကြိမ် လုပ်ငန်းညှိနှိုင်း အစည်းအဝေးကို ဇန်နဝါရီ ၁၀ ရက်က ပို့ဆောင်ရေးနှင့်ဆက်သွယ်ရေးဝန်ကြီးဌာန အစည်းအဝေးခန်းမ၌ ကျင်းပသည်။

ဦးစွာ ပို့ဆောင်ရေးနှင့်ဆက်သွယ်ရေးဆပ်ကော်မတီဥက္ကဋ္ဌ ပို့ဆောင်ရေးနှင့်ဆက်သွယ်ရေး ဝန်ကြီးဌာန ဒုတိယဝန်ကြီး ဦးအောင်ကျော်ထွန်းက ပြည်ထောင်စုနေ့အခမ်းအနားသည် နိုင်ငံတော်အဆင့်အခမ်းအနားဖြစ်သည့်အတွက် ဆပ်ကော်မတီဝင်များအနေဖြင့် မိမိတို့လုပ်ငန်းတာဝန်များကို အလေးအနက်ထားဆောင်ရွက်ကြရမည်ဖြစ်ကြောင်း၊ ပြည်ထောင်စုနေ့ အခမ်းအနားသို့ တက်ရောက်လာကြမည့် ကိုယ်စားလှယ်များ၊ တိုင်းဒေသကြီး/ ပြည်နယ်အသီးသီးမှ ယဉ်ကျေးမှုအဖွဲ့များကို အချိန်မီ ဘေးအန္တရာယ်ကင်းရှင်းစွာ ပို့ဆောင်ရမည့်ကိစ္စသည် မိမိတို့ ဆပ်ကော်မတီ၏ အဓိကလုပ်ငန်းတာဝန်ဖြစ်ပါကြောင်း၊ ထို့ပြင် ပို့ဆောင်ရေးနှင့်ဆက်သွယ်ရေး ကိစ္စများကို လစ်ဟာမှုမရှိ စနစ်တကျဖြစ်စေရေး ဆောင်ရွက်ကြရန်လိုကြောင်း၊ ဧည့်သည်တော်များနှင့်ယဉ်ကျေးမှုအဖွဲ့များကို သတ်မှတ်နေရာများသို့ အချိန်မီပို့ဆောင်ပေးရမည်ဖြစ်ကြောင်း၊ ယာဉ်တန်းများ ကြိုတင်ဇာတ်တိုက်လေ့ကျင့်မှုကိုလည်း သတ်မှတ်ရက်များအတိုင်း ဆောင်ရွက်ရမည်ဖြစ်ကြောင်း၊ သယ်ယူပို့ဆောင်မည့် ယာဉ်များ၏ ကြံ့ခိုင် ရေး၊ သန့်ရှင်းသပ်ရပ်မှုရှိစေရေး၊ မီးဘေးအန္တရာယ် ကြိုတင်ကာကွယ်ရေးနှင့် ယာဉ်တန်းလုံခြုံရေးတို့ကိုလည်း အထူးအလေးထားဆောင်ရွက်သွားကြရန် လိုအပ်ပါကြောင်း၊ အဆင့်ဆင့်သော တာဝန်ကျဝန်ထမ်းများအနေဖြင့် လုံခြုံရေးအသိ၊ လုံခြုံရေးသတိ ရှိရန်လိုသကဲ့သို့ ကျန်းမာရေးနှင့် ပတ်သက်၍ အထူးဂရုပြုစားသောက်နေထိုင်ကြရန်လိုကြောင်း ပြောကြား သည်။

ထို့နောက် အစည်းအဝေးတက်ရောက်လာကြသည့် ဆပ်ကော်မတီဝင်များနှင့် အထူးဖိတ်ကြား ထားသည့် ဆက်စပ်ဆပ်ကော်မတီမှ တာဝန်ရှိသူများက သက်ဆိုင်ရာကဏ္ဍများအလိုက် ဆွေးနွေးတင်ပြကြရာ ဒုတိယဝန်ကြီးက လိုအပ်သည်များ ပေါင်းစပ်ညှိနှိုင်းဆောင်ရွက်ပေးခဲ့ကြောင်း သိရသည်။

သတင်းစဉ်