လူငယ့်အသံ၊ လူငယ်အားမာန် လူငယ်ငြိမ်းချမ်းရေးဖိုရမ်

မိမိတို့နိုင်ငံတွင် လူငယ်ဆိုသည်မှာ အသက်အပိုင်းအခြား ၁၅ နှစ် မှ ၃၅နှစ်အတွင်းရှိ နိုင်ငံသားများကို ဆိုလိုခြင်းဖြစ်သည်ဟု အဓိပ္ပာယ်ဖွင့်ဆိုထားသည်။ နိုင်ငံလူဦးရေ၏ သုံးပုံတစ်ပုံ ကျော်၊ ခန့်မှန်းခြေအားဖြင့် ၁၈ ဒသမ ၃ သန်းကျော်တို့မှာ လူငယ်များဖြစ်ရာ ကြီးမားလှသည့် အင်အားစုဖြစ်သည့်အလျောက် နိုင်ငံတည်ဆောက်ရေးအတွက် လူစွမ်းအားအရင်း အမြစ်ကောင်းဖြစ်လာစေရန် ပြုစုပျိုးထောင်ပေးခြင်းအားဖြင့် နိုင်ငံတည်ဆောက်ရေးတွင် အရေးပါသောအင်အားစုကြီးကို ရရှိနိုင်မည်ဖြစ်သည်။

လက်ရှိကာလ မိမိတို့နိုင်ငံတွင် ဖြစ်ပေါ်နေသည့် နိုင်ငံရေး မတည်ငြိမ်မှုများနှင့် လက်နက်ကိုင်ပဋိပက္ခများက လူငယ်များ၏ နေ့စဉ်လူမှုဘဝများနှင့် အနာဂတ်ရည်မှန်းချက်များအပေါ်တွင် ထိခိုက်ဆုံးရှုံးမှုများ၊ အခက်အခဲများနှင့် စိန်ခေါ်မှုများကို ဖြစ်ပေါ်စေသည်။ လူငယ်များ၏ ပညာရေး၊ ကျန်းမာရေး၊ ဘေးအန္တရာယ်လုံခြုံရေး၊ ဖွံ့ဖြိုးရေး၊ အလုပ်အကိုင်အခွင့်အလမ်းစသည့် ကဏ္ဍအများအပြားတို့တွင် ဖြည့်ဆည်းပေးရန်၊ လူငယ် ဖွံ့ဖြိုးတိုးတက်ရေးလုပ်ငန်းများ အကောင်အထည်ဖော်ဆောင်ရွက်ပေးရန် လိုအပ်ချက်များ အများအပြားရှိနေသည်။ အထူးသဖြင့် အေးချမ်းတည်ငြိမ်မှုကင်းမဲ့သည့် ဒေသများတွင် ရှိနေကြသည့် လူငယ်များမှာ အကြမ်းဖက်လက်နက်ကိုင်အဖွဲ့များ၏ ထိန်းချုပ်မှု၊ ခြိမ်းခြောက်မှု၊ သွေးဆောင်စည်းရုံးမှုများကြောင့် ဆန့်ကျင်ဘက်အဖျက်အင်အားအဖြစ် ရောက်ရှိ သွားမည့်အန္တရာယ်နှင့် အချိန်ပြည့်ရင်ဆိုင်နေကြရသည်။ တရားဥပဒေစိုးမိုးမှုကင်းမဲ့သည့် အခြေအနေများကြောင့် အမျိုးသမီးငယ်များ၏ ဘဝလုံခြုံရေးမှာလည်း ရေရာမှုကင်းမဲ့သည့် အနေအထားတို့ကို တွေ့ရှိနိုင်သည်။ ငြိမ်းချမ်းရေးနှင့် လူငယ်ကဏ္ဍသည် အပြန်အလှန်ဆက်စပ်လျက်ရှိရာ လူငယ်များအား လေ့ကျင့်ပျိုးထောင်ပေးပြီး ငြိမ်းချမ်းရေးလုပ်ငန်းစဉ်များတွင် ပါဝင်စေရန်လိုအပ်သကဲ့သို့ ငြိမ်းချမ်းသည့် လူ့ဘောင်အဖွဲ့အစည်း ခိုင်ခိုင်မာမာဖြစ်ပေါ်လာမှသာ လူငယ်ကဏ္ဍ ဖွံ့ဖြိုးတိုးတက်မှုလည်း လိုက်ပါဖြစ်ထွန်းလာမည်ဖြစ်သည်။

ငြိမ်းချမ်းရေးတွင် အရေးကြီးသည့် လူငယ်ကဏ္ဍကို ပုံဖော်မည့် လူငယ်ငြိမ်းချမ်းရေးဖိုရမ်ကို နိုင်ငံအတွက် အနှစ်သာရရှိစွာ ကျင်းပသွားမည်ဖြစ်ရာ လူငယ်များသည် နိုင်ငံတည်ဆောက်ရေး တွင် အရေးပါခြင်းကို ပြသခြင်းလည်းဖြစ်သည်။ ဖိုရမ်အတွင်း ပဋိပက္ခကို ဖြစ်ပေါ်စေသည့်အချက်များနှင့် ငြိမ်းချမ်းရေးလုပ်ငန်း စဉ်အပေါ် သက်ရောက်မှုများ၊ လူငယ်များ၏ လုံခြုံရေးနှင့် အကာအကွယ်၊ ကျား/မ ကဏ္ဍအလိုက် မတူညီသော ထိလွယ်ရှလွယ်သည့်အခြေအနေ၊ အားနည်းချက်များ၊ ငြိမ်းချမ်းရေး လုပ်ငန်းစဉ်တွင် နိုင်ငံသားများ ပူးပေါင်းပါဝင်နိုင်မှုအတွက် စိန်ခေါ်မှုများနှင့် ကျော်လွှားနိုင်မည့်နည်းလမ်းများ၊ စီးပွားရေးစိန်ခေါ်မှုများနှင့် အလုပ်အကိုင်အခွင့်အလမ်းကိစ္စရပ်များ၊ ပညာဆက်လက်သင်ယူနိုင်ရေးနှင့် ပညာရေးအတွက် ကွာဟချက် များ၊ မူးယစ်ဆေးဝါးတိုက်ဖျက်ရေးတွင် ပူးပေါင်းပါဝင်ဆောင်ရွက်နိုင်မည့်အခြေအနေ၊ ဉာဏ်ရည်တု နည်းပညာ (Al)၊ ဆိုက်ဘာ (Cyber)၊ လူမှုကွန်ရက် (Social Media) များတွင် လူငယ်များ ပါဝင်ဦးဆောင်နိုင်သောအခြေအနေနှင့် ငြိမ်းချမ်းရေးတည်ဆောက်ရေးတို့အတွက် လူငယ်များ၏ သဘောထားဆန္ဒအသံများကို လေ့လာဖော်ထုတ်၍ ဆက်လက်ဆောင်ရွက်မည့် လူငယ်လုပ်ငန်းစဉ်အစီအစဉ်များကို ရယူဖော်ထုတ်သွားမည်ဖြစ်သည်။

နိုင်ငံကို ဖွံ့ဖြိုးတိုးတက်အောင် တည်ဆောက်ရာတွင် ငြိမ်းချမ်းရေးသည် မဖြစ်မနေလိုအပ်သည့်အရာဖြစ်သည်။ ထူးချွန်ထက်မြက်၍ တက်ကြွသော၊ ရိုးသားဖြောင့်မတ်သော လူငယ်တို့၏အားမာန်သည် ငြိမ်းချမ်းရေးကို ပုံဖော်တည်ဆောက်ရာတွင် အရေးပါသည့်အလျောက် လူငယ်ငြိမ်းချမ်းရေးဖိုရမ်မှ ထွက်ပေါ်လာသည့် လူငယ်တို့၏အသံက တစ်မျိုးသားလုံး စည်းလုံးညီညွတ်ရေး၊ ထာဝရငြိမ်းချမ်းရေးတို့ကို ဖော်ဆောင်နိုင်ပါစေကြောင်း။ ။