အကြမ်းဖက် AA အဖွဲ့၏ မူးယစ်ဆေးဝါးစီးပွားရေးကွန်ရက်နဲ့ အကြမ်းဖက်မှုအန္တရာယ် (အပိုင်း ၁)

အောင်ရှင်း

ယခုဆောင်းပါးမှာ ဖော်ပြမဲ့ အချက်အလက်များဟာ တစ်ဖက်သတ်စွပ်စွဲချက်များ၊ လုပ်ကြံဖန်တီးထားတဲ့ အချက်အလက်များ မဟုတ်ကြောင်း ဦးစွာအသိပေးလိုပါတယ်။

လူမျိုးရေးအစွဲနဲ့ နိုင်ငံရေးရည်မှန်းချက်ကို လက်နက်ကိုင်နည်းလမ်းနဲ့ရယူဖို့ အိပ်မက်မက်နေတဲ့ အကြမ်းဖက်လက်နက်ကိုင်အဖွဲ့တစ်ဖွဲ့ဟာ သူတို့အဖွဲ့ရှင်သန်ရပ်တည်နိုင်ရေးအတွက် ကမ္ဘာ့လူသားမျိုးနွယ်တစ်ခုလုံးကို ခြိမ်းခြောက်အန္တရာယ်ပေးနေတဲ့ မူးယစ်ဆေးဝါးကို အကြီးအကျယ်ကုန်သွယ်မှုပြုလုပ်နေကြောင်း မီးမောင်းထိုးပြသွားမှာဖြစ်ပါတယ်။ အဲဒီအဖွဲ့ကတော့ နိုင်ငံတော်အစိုးရက လက်နက်ကိုင်အကြမ်းဖက်သောင်းကျန်းသူအဖြစ် သတ်မှတ်ခြင်းခံရတဲ့ AA အဖွဲ့ဖြစ်ပါတယ်။

AA အဖွဲ့ဟာ ရခိုင်လူမျိုးအများစုနှင့် ဖွဲ့စည်းထားတဲ့ အကြမ်းဖက်လက်နက်ကိုင်အဖွဲ့ ဖြစ်သော်လည်း ရခိုင်လူမျိုးတိုင်းက လက်ခံထားတဲ့အဖွဲ့အစည်းမဟုတ်သလို ရခိုင်ပြည်နယ်နှင့် ရခိုင်တိုင်းရင်းသားတွေကို ကိုယ်စားပြုတဲ့ အဖွဲ့အစည်းမဟုတ်ကြောင်းကို ပြည်သူအများသိရှိပြီး ဖြစ်ပါတယ်။ အမှန်စင်စစ် AA အဖွဲ့ဆိုတာ ရခိုင်လူမျိုးနဲ့ ရခိုင်ပြည်နယ်ကိုချနင်းပြီး လူမျိုးရေးအစွန်းရောက် စိတ်ဖြင့်ကိုယ်ကျိုးရှာရခိုင်လူမျိုးတစ်စုက ဦးဆောင်ကာ ရခိုင်ပြည်နယ်ရဲ့ တည်ငြိမ်အေးချမ်းမှုကို ဖျက်ဆီးပြီး မူးယစ်ဆေးဝါးကုန်သွယ်မှုကို အကြီးအကျယ်လုပ်ဆောင်နေတဲ့ အကြမ်းဖက်လက်နက်ကိုင်အဖွဲ့သာဖြစ်ကြောင်း ငြင်းလို့မရတဲ့ သက်သေအထောက်အထားများက ညွှန်းဆိုနေပါတယ်။

သန္ဓေမကောင်းခဲ့တဲ့ မူးယစ်ရာဇာ

၂၀၀၉ ခုနှစ်က KIA ထိန်းချုပ်နယ်မြေမှာ စတင်ပေါ်ပေါက်လာခဲ့တဲ့ AA အဖွဲ့ဟာ ကချင်ပြည်နယ်ရောက် ရခိုင်လူမျိုးများနဲ့ဖွဲ့စည်းခဲ့ပြီး သူတို့ရဲ့ တပ်ဖွဲ့ဝင်တွေကို လက်နက်တပ်ဆင်ဖို့အတွက် ဘဏ္ဍာငွေလိုအပ်ချက်ကို သူ့ရဲ့ဆရာ KIA နဲ့ UWSA၊ MNDAA အဖွဲ့များကို စံနမူနာအတုယူပြီး စိတ်ကြွဆေးပြားများ၊ အိုက်စ်နဲ့ ဘိန်းဖြူများကို ပြည်တွင်းမှာသာမက အမြတ်အစွန်းကြီးမားစွာရနိုင်တဲ့ ပြည်ပတင်ပို့မှုများကို ဒေသတွင်း မူးယစ်ရာဇာများနဲ့ ချိတ်ဆက်ပြီး တွင်တွင်ကျယ်ကျယ် လုပ်ကိုင်လျက်ရှိပါတယ်။ AA အဖွဲ့ဟာ စတင်ဖွဲ့စည်းချိန်ကစပြီး ယနေ့အချိန်အထိ ခိုင်မာတဲ့စီးပွားရေးလုပ်ငန်းများ မရှိသလို ဆင်းရဲနွမ်းပါးတဲ့ ရခိုင်တိုင်းရင်းသားများ ထံမှလည်း ဆက်ကြေးငွေ လုံလုံလောက်လောက် မရရှိတဲ့အတွက် သူတို့တပ်ဖွဲ့ဝင်များအတွက် လိုအပ်တဲ့ ရိက္ခာ၊ လက်နက်၊ ခဲယမ်းနဲ့ စက်သုံးဆီဝယ်ယူနိုင်ရေးအတွက် မူးယစ်ဆေးဝါးကုန်သွယ်ရောင်းချမှုမှရရှိတဲ့ ဝင်ငွေများကိုသာ အဓိကအားထားနေရပါတယ်။

AA အဖွဲ့ရဲ့ မူးယစ်ဆေးဝါးကုန်သွယ်မှုလုပ်ငန်းဟာ ကြီးထွားကျယ်ပြန့်နေပြီး မူးယစ်ဆေးထုတ်ဖို့ ဓာတုဆေးဝါးမှောင်ခိုတင်သွင်းခြင်း၊ မူးယစ်ဆေးဝါးထုတ်လုပ်ခြင်း၊ သယ်ဆောင်သိုလှောင်ခြင်း၊ ပြည်တွင်းမှာဖြန့်ဖြူးခြင်း၊ ပြည်ပတင်ပို့ရန် ချိတ်ဆက်ဆောင်ရွက်ခြင်းတွေကို နိုင်ငံတကာမူးယစ်ရာဇာများနဲ့ ကွန်ရက်သဖွယ် ချိတ်ဆက်လုပ်ဆောင်လျက်ရှိပါတယ်။

AA အဖွဲ့ဝင်များ ပါဝင်ပတ်သက်နေတဲ့ မူးယစ်ဆေးဝါးဖမ်းဆီးရရှိမှုများ

၂၀၁၆ ခုနှစ်မှ ၂၀၂၅ ခုနှစ် ဇူလိုင်လ ၂၁ ရက်နေ့ အထိ AA အကြမ်းဖက်သောင်းကျန်းသူအဖွဲ့ဝင်များ ပါဝင်ပတ်သက်တဲ့ မူးယစ်ဆေးဝါးများနဲ့ လက်နက်ခဲယမ်းများ ဖမ်းဆီးရရှိမှု ၂၄ ကြိမ်ရှိခဲ့ပြီး တရားခံ ၂၇၆ ဦးတို့ကို စိတ်ကြွရူးသွပ်ဆေးပြား ၁၄ ဒသမ ၄ သန်းကျော်၊ အိုက်စ် ၁၁ ဒသမ ၉ တန်ကျော်၊ ကဖင်း ၈၀၀ ကီလို၊ ကတ်တမင်း ၂ ဒသမ ၂ တန်၊ စုစုပေါင်း ခန့်မှန်းတန်ဖိုး ကျပ် ၂၆၆ ဘီလီယံ ကျော် (အမေရိကန်ဒေါ်လာ ၇၃ ဒသမ ၉ သန်းကျော်) နဲ့ လက်နက်မျိုးစုံ ၂၂၄ လက်၊ ကျည်မျိုးစုံ ၄၁၃၇၉ တောင့်၊ ကျည်အိမ်မျိုးစုံ ၉၇၇ ခု၊ လက်ပစ်ဗုံး ၃၆ လုံး၊ ဗုံးသီး ၁၇၈ လုံး၊ GPS ၂၅ လုံး၊ ဂြိုဟ်တုဖုန်း ၄၀ တို့ကို ဆက်စပ်ပစ္စည်းများ၊ မူးယစ်ဆေးဝါးသယ်ဆောင်သည့် မော်တော်ယာဉ်၊ စက်လှေ၊ သင်္ဘောများနှင့်အတူ ဖမ်းဆီးရမိခဲ့ကြောင်း ဖြစ်စဉ်အသေးစိတ်များကို Infosheet Website https://info sheet.org/ တွင် ဖော်ပြထားရှိပါတယ်။

ထင်ရှားသည့် ဖမ်းဆီးရရှိမှုဖြစ်စဉ်များ

AA တပ်ဖွဲ့ဝင်များနှင့်ပတ်သက်သည့် မူးယစ်ဆေးဝါးဖမ်းဆီးရရှိမှု ၂၄ ကြိမ်ရှိသည့်အနက် AA ခေါင်းဆောင်ပိုင်းများ ကိုယ်တိုင်ပါဝင်ပတ်သက်ခဲ့သည့်အမှု ကိုးမှုရှိပြီး ထင်ရှားသည့်ဖြစ်စဉ်များကို ထုတ်နုတ်ရှင်းပြလိုပါတယ်။ ၂၀၁၉ ခုနှစ် ဩဂုတ်လ ၈ ရက်နေ့မှာ ရခိုင်ပြည်နယ် ရသေ့တောင်မြို့နယ် ရက်ခုန်တိုင်ကျေးရွာအုပ်ချုပ်ရေးမှူး AA တပ်ဖွဲ့ဝင် စံသာကျော်ရဲ့ နေအိမ်မှာ စိတ်ကြွရူးသွပ်ဆေးပြား ၂ ဒသမ ၄၈ သန်းကျော်၊ ARAKAN Army စာတန်းပါ တံဆိပ်များ၊ လက်ပစ်ဗုံးများ၊ စကားပြောစက်များ ဖမ်းဆီးရမိခဲ့ပါတယ်။ စံသာကျော်ရဲ့ ထွက်ဆိုချက်အရ အဲဒီမူးယစ်ဆေးဝါးတွေဟာ ရခိုင်ပြည်နယ်အတွင်းနှင့် ဘင်္ဂလားဒေ့ရှ်နယ်စပ်ရှိ ဒုက္ခသည်စခန်းများကို ဖြန့်ဖြူးရန်နဲ့ AA တပ်ဖွဲ့ဝင်များ အသုံးပြုရန်အတွက် သိုလှောင်သိမ်းဆည်းထားသည့် မူးယစ်ဆေးဝါးများဖြစ်ကြောင်း သိရှိရပါတယ်။ ရခိုင်ပြည်နယ် မြို့ရွာအသီးသီးမှာ AA အဖွဲ့ရဲ့ အုပ်ချုပ်ရေးတာဝန်ပေးအပ်ခံရသူများထဲက စံသာကျော်လိုစိတ်ချယုံကြည်ရသူတွေကို မူးယစ်ဆေးဝါးဖြန့်ဖြူးရေးအလုပ်ကိုလည်း ပူးတွဲတာဝန်ပေးအပ်လေ့ရှိပါတယ်။

၂၀၂၃ ခုနှစ် ဒီဇင်ဘာလ ၃ ရက်မှ ၉ ရက်အတွင်း မြန်မာကျပ်ငွေ ၅၁ ဒသမ ၈၇ ဘီလီယံ (အမေရိကန်ဒေါ်လာ ၂၄ သန်းကျော်) တန်ဖိုးရှိ အိုက်စ် ၂ ဒသမ ၀၇ တန်နှင့် ကဖင်း ၈၀၀ ကီလိုဂရမ်တို့ကို ရန်ကုန်မြို့ရှိ အောင်မင်္ဂလာအဝေးပြေးကွင်းမှာ ဖမ်းဆီးရမိခဲ့ပါတယ်။ အဲဒီဖြစ်စဉ်မှာ မူးယစ်ဆေးဝါးသယ်ဆောင်သူများဟာ အကြမ်းဖက် AA အဖွဲ့မှ အရာရှိအဆင့်ရှိသူ လေးဦး၊ အခြားအဆင့် သုံးဦး၊ အရပ်သားရှစ်ဦးပါဝင်တဲ့ မူးယစ်ဆေးဝါးဂိုဏ်းကို ဖော်ထုတ်ဖမ်းဆီးနိုင်ခဲ့ပါတယ်။

အဲဒီတရားခံများကို စစ်ဆေးဖော်ထုတ်ချက်များအရ ဖမ်းဆီးရမိတဲ့ မူးယစ်ဆေးဝါးများကို AA ခေါင်းဆောင်ထွန်းမြတ်နိုင်ရဲ့ စေခိုင်းချက်အရ သူ့ရဲ့လူယုံတော် AA အဖွဲ့ရဲ့ စီးပွားရေးတာဝန်ခံ ဗိုလ်မှူးကြီးအဆင့်ရှိ ကျော်မြတ်ဦး (ခ) သားသား (ခ) ဝေသာထွန်းက စီစဉ်ကြိုးကိုင်ပြီး ရှမ်းပြည်နယ်ရှိ လက်နက်ကိုင်အဖွဲ့များမှ ထုတ်လုပ်သည့် မူးယစ်ဆေးဝါးများကို မန္တလေး၊ ရန်ကုန်မှတစ်ဆင့် ရခိုင်ပြည်နယ်ကို ကုန်းလမ်း၊ ရေလမ်းများမှ သယ်ယူပို့ဆောင်ပြီး ရခိုင်ပင်လယ်ပြင်မှတစ်ဆင့် မလေးရှားနှင့် အင်ဒိုနီးရှားနိုင်ငံများကို ပို့ဆောင်မည့် မူးယစ်ဆေးဝါးများဖြစ်ကြောင်း ဝန်ခံထွက်ဆိုခဲ့ကြပါတယ်။ ဒီဖြစ်စဉ်ကတော့ မူးယစ်ဆေးဝါးတွေကို သယ်ဆောင်သိုလှောင်ဖြန့်ဖြူးရောင်းချရေးများတွင် AA တပ်ဖွဲ့ဝင်များကိုယ်တိုင် တာဝန်ပေးချက်များအရ လုပ်ဆောင်နေကြောင်း ဖော်ထုတ်တွေ့ရှိ ရမှာ ဖြစ်ပါတယ်။

အရပ်သားအသွင်ယူ AA တပ်ဖွဲ့ဝင်များ၏ မူးယစ်ဆေးဝါးသယ်ဆောင်ဖြန့်ဖြူးမှု

၂၀၂၅ ခုနှစ် မတ်လ ၆ ရက်နေ့ ရန်ကုန်တိုင်းဒေသကြီး ဒဂုံ (တောင်) မြို့နယ် (၁၄၄) ရပ်ကွက်  ဆင်ဖြူရှင်လမ်း အမှတ် (၅၄၆/၅၄၇) ရှိ ဂိုဒေါင်အတွင်းမှ အရပ်သားအသွင်ဆောင်ထားတဲ့ AA စီးပွားရေးတာဝန်ခံ ရဲဝင်း (ခ) ကျော်စိုးလင်းအဖွဲ့ကို ခန့်မှန်းတန်ဖိုး ငွေကျပ် ၉၆ ဘီလီယံကျော် (အမေရိကန်ဒေါ်လာ ၂၈ ဒသမ ၈၂ သန်း) တန်ဖိုးရှိ အိုက်စ် ၃ တန်ကျော်၊ ကတ်တမင်း ၂၀၀ ကီလို ဖမ်းဆီးရမိခဲ့ပါတယ်။ ဒီဖြစ်စဉ်မှာ ဖမ်းဆီးရမိခဲ့တဲ့ မူးယစ်မှောင်ခိုဂိုဏ်း အဖွဲ့ဝင် ၁၄ ဦးရှိပြီး ငါးဦးက AA အဖွဲ့က တာဝန်ပေးအပ်ထားတဲ့ အရပ်သားအသွင်ယူထားတဲ့ စီးပွားရေးတာဝန်ခံများ ဖြစ်ပါတယ်။ မူးယစ်ဆေးဝါး သယ်ဆောင်ရောင်းချမှုများတွင် AA ခေါင်းဆောင်များရဲ့ ယုံကြည်စိတ်ချရသူတပ်ဖွဲ့ဝင်များ ဖမ်းဆီးခံရသူများပြားလာလို့ တစ်ဖက်လှည့်နဲ့ AA တပ်ဖွဲ့ဝင်များကို အရပ်သားစီးပွားရေးတာဝန်ခံများအဖြစ် ပြောင်းလဲတာဝန်ပေးအပ်ထားခြင်းဖြစ်ကြောင်း ဖော်ထုတ်သိရှိရပါတယ်။

အလားတူ ၂၀၂၅ ခုနှစ် ဧပြီလ ၂၆ ရက်နေ့နဲ့ ၂၇ ရက်နေ့မှာ ရန်ကုန်၊ ဖျာပုံ၊ ကော့သောင်းမြို့များမှာ AA ထောက်ပံ့ရေးတာဝန်ခံ နေပိုင်လင်း (ခ) အောင်နိုင်ကြွယ် ဦးစီး ၁၉ ဦးတို့ကို အိုက်စ် ၄ ဒသမ ၁၁၃ တန်၊ အိုက်စ်အရည် ၁ လီတာ၊ ကတ်တမင်း ၃ တန်တို့နှင့်အတူ ဖမ်းဆီးရမိခဲ့ပြီး တရားခံများရဲ့ ထွက်ဆိုချက်များအရ မူးယစ်ဆေးဝါးရောင်းချငွေများဖြင့် AA အဖွဲ့အတွက် လက်နက်ခဲယမ်းများ ဝယ်ယူခြင်း၊ ရိက္ခာများ ထောက်ပံ့ပေးခြင်းများကို ပြုလုပ်နေတဲ့အဖွဲ့ဖြစ်ကြောင်း သိရှိရပါတယ်။

ဒီဖြစ်စဉ်မှာတော့ အရပ်သားအသွင်ယူ မူးယစ်ဆေးဝါးသယ်ဆောင်ရောင်းချသူတွေကို AA အဖွဲ့ရဲ့ ထောက်ပံ့ရေးတာဝန်ခံများအဖြစ် အကာအကွယ် ပေးပြီး မူးယစ်ဆေးဝါးသယ်ဆောင်မှုကို အခေါက်ရေ နည်းနည်းနဲ့ ပမာဏများများ သယ်ဆောင်စေခဲ့ခြင်းဖြစ်ပါတယ်။

ဖမ်းဆီးရမိတဲ့ မူးယစ်ဆေးဝါးသယ်ဆောင်သူ AA တပ်ဖွဲ့ဝင်များရဲ့ ထွက်ဆိုချက်များအရ မူးယစ်ဆေးဝါးကုန်သွယ်မှုလုပ်ငန်းတွေမှာ တာဝန်ပေးအပ်ခံရသူတွေဟာ AA ခေါင်းဆောင် ထွန်းမြတ်နိုင်ရဲ့ လူယုံတွေပဲဖြစ်ပြီး အဓိက တာဝန်ယူကြိုးကိုင်သူကတော့ AA အဖွဲ့က အတွင်းရေးမှူးဆိုသူ ဗိုလ်မှူးကြီးအဆင့်ရှိ ကျော်ဟန်ဖြစ်ကြောင်း သိရှိရပါတယ်။ အဖမ်းခံရသူတွေဟာ မူးယစ်ဆေးဝါးသယ်ဆောင်ရောင်းချခြင်းကို ပုဂ္ဂလိကစီးပွားရေးအဖြစ် လုပ်ဆောင်နေခြင်းမဟုတ်ဘဲ AA အဖွဲ့အစည်းအတွက် တာဝန်ပေးအပ်ခံရလို့ လုပ်ဆောင်နေခြင်းဖြစ်တယ်လို့ ဆိုပါတယ်။ အခြား AA အဖွဲ့ဝင်တွေထက် လစာနဲ့အခွင့်အရေး ပိုမိုရရှိပြီး သယ်ဆောင်သိုလှောင်သူများ၊ ပြည်တွင်းဖြန့်ဖြူးသူများ၊ ပြည်ပနိုင်ငံများအထိ ချိတ်ဆက်ရောင်းဝယ်သူများကို အကန့်စနစ်ဖြင့် လုပ်ဆောင်ထားတာကိုလည်း တွေ့ရပါတယ်။ ဒါကြောင့် တစ်ဖွဲ့နှင့်တစ်ဖွဲ့မသိရှိဘဲ ဝေသာထွန်းတို့လို တာဝန်ခံအရာရှိကြီးတွေက ချိတ်ဆက်ဆောင်ရွက်ပေးနေတယ်ဆိုတာ စိစစ်ဖော်ထုတ်ချက်များအရ သိရှိရပါတယ်။

မူးယစ်ဆေးဝါးကနေရရှိတဲ့ အကျိုးအမြတ်တွေကို AA အဖွဲ့ခေါင်းဆောင် ထွန်းမြတ်နိုင်ရဲ့ စီမံမှုနဲ့ လက်နက်ခဲယမ်းရိက္ခာဖြည့်တင်းတာတွေ၊ တပ်စခန်းတည်ဆောက်တာတွေ၊ AA အဖွဲ့ဝင် တွေအတွက် ထောက်ပံ့မှုတွေမှာ အသုံးပြုနေတာကို တွေ့ရှိရပါတယ်။ ဒါ့အပြင် ယင်းဝင်ငွေ ၇၀ ရာခိုင်နှုန်းကို လက်နက်ခဲယမ်းဝယ်ယူဖြည့်တင်းမှုမှာ အသုံးပြုကာ နိုင်ငံတကာလက်နက်မှောင်ခိုဂိုဏ်းများနှင့် ချိတ်ဆက်ပြီး လက်နက်ခဲယမ်းနှင့် စိတ်ကြွဆေးပြားလဲလှယ်ခြင်းအပါအဝင် ငွေကြေးခဝါချခြင်း၊ လူကုန်ကူးခြင်းစတဲ့ နိုင်ငံဖြတ်ကျော်မှုခင်းတွေ ကျူးလွန်နေတာကို တွေ့ရှိရပါတယ်။

အပိုင်း(၂) ဆက်လက်ဖော်ပြသွားပါမည်။