မိုးမိတ်မြို့၌ အသက်(၇၅)နှစ်အထက် သက်ကြီးဘိုးဘွားများအား ကိုဗစ်-၁၉ရောဂါ ကာကွယ်ဆေး ဦးစားပေးထိုးနှံ

 

မိုးမိတ် ဇူလိုင် ၃၁

ရှမ်းပြည်နယ်(မြောက်ပိုင်း) မိုးမိတ်ခရိုင် မိုးမိတ်မြို့နယ်တွင် ရဟန်းသံဃာများနှင့် သက်ကြီးဘိုးဘွားများအား ကိုဗစ်-၁၉ကာကွယ်ဆေး (Vero Cell) ထိုးနှံပေးခြင်းကို ယနေ့နံနက် ၈ နာရီမှ စတင်၍ မြို့နယ်စည်ပင်သာယာခန်းမ၌ ဆောင်ရွက်လျက်ရှိကြောင်းသိရသည်။

ထိုသို့ထိုးနှံရာ၌ အသက် ၇၅ နှစ်အထက် သက်ကြီးဘိုးဘွားများအား ဦးစားပေး ထိုးနှံပေးလျက် ရှိသည်။ ကိုဗစ်ကာကွယ်ဆေးမထိုးမီ စာရင်းပေးသွင်းခြင်း ၊  သွေးပေါင်ချိန်တိုင်းခြင်း၊ သွေးထဲတွင်ရှိသည့် အောက်ဆီဂျင်ပမာဏာတိုင်းတာခြင်း၊ အပူချိန်တိုင်းတာခြင်း တို့ကို ဦးစွာဆောင်ရွက်ပြီး ယင်းလုပ်ငန်းစဉ်များ အခြေအနေမှန်ဖြစ်မှသာ ကာကွယ်ဆေးထိုးနှံပေးခြင်းဖြစ်သည်။

အမျိုးသမီးကျန်းမာရေးဆရာမ ဒေါ်နွယ်နီခိုင်က “ပထမဆုံးအကြိမ်းထိုးပေးတဲ့ကိုဗစ် -၁၉ ကာကွယ် ဆေးတုန်းက ဆေးတစ်လုံးကို လူ ၁၀ ဦးထိုးရတာပါ အခု ထိုးတဲ့ကာကွယ်ဆေး (Vero Cell ) ကတော့ ဆေးတစ်လုံးကို လူနှစ်ဦး ထိုးရတဲ့ဆေးဖြစ်ပါတယ် ၊ ကာကွယ်ဆေးထိုးပြီးပြီဆိုပေမယ့်လည် ပေါ့ပေါ့ဆဆမနေသင့်ပါဘူး Social Distancing နေထိုင်ခြင်း ၊ Mask တပ်ခြင်း၊ လက်ဆေးခြင်းတွေကို ဆက်လက်လုပ်ဆောင်သွားရမည်ဖြစ်ပါတယ်” လို့ ပြောသည်။

ယနေ့ကတော့ မြို့ပေါ်လေးရပ်ကွက်ရှိ အသက် (၇၅) နှစ် အထက်သက်ကြီးဘိုးဘွားများကို ဦးစားပေး ထိုးနှံလျက်ရှိကာ ကျန်ကျေးရွာများရှိ သက်ကြီး ဘိုးဘွားများကိုလည်း ဆက်လက်ထိုးနှံ ပေးသွားမည်ဖြစ်ပြီး မြို့နယ်ကိုဗစ် ၁၉ ကာကွယ်ထိန်းချုပ်ကုသရေးကော်မတီဥက္ကဋ္ဌ ဦးအောင်ဘော်နှင့် တာဝန်ရှိသူများက လိုအပ်သည်များကို ပေါင်းစပ်ညှိနှိုင်းဆောင်ရွက်ပေးခဲ့ကြောင်းသိရသည်။

မိုးမိတ်သား(စည်သူဌေး)