ရန်ကုန် အောက်တိုဘာ ၁၇
ပြန်ကြားရေးဝန်ကြီးဌာန ပြန်ကြားရေးနှင့် ပြည်သူ့ဆက်ဆံရေး ဦးစီးဌာနက ကြီးမှူးကျင်းပမည့် မြန်မာဘာသာမှ အင်္ဂလိပ်ဘာသာသို့ ပြန်ဆိုခြင်းဆိုင်ရာ စာတမ်းဖတ်ပွဲ ကျင်းပနိုင်ရေး အတွက် စတုတ္ထအကြိမ် လုပ်ငန်းညှိနှိုင်းအစည်းအဝေးကို ယနေ့ နံနက် ၁၀ နာရီတွင် ရန်ကုန်မြို့ သိမ်ဖြူလမ်း ပုံနှိပ်ရေးနှင့် ထုတ်ဝေရေးဦးစီးဌာန အစည်းအဝေးခန်းမ၌ ကျင်းပသည်။
အဆိုပါညှိနှိုင်းအစည်းအဝေးတွင် သဘာပတိအဖြစ် ဒေါက်တာကျော်ဝင်း (မြန်မာသမိုင်းအဖွဲ့)က ဆောင်ရွက်ပြီး စာတမ်းဖတ်ပွဲကျင်းပရေး ကော်မတီဝင်များ၊ စာတမ်းဖတ်ကြားမည့် ပညာရှင်များ၊ စာတမ်းဖတ်ပွဲ သဘာပတိအဖွဲ့ဝင်များနှင့် ဖိတ်ကြားထားသည့် ဘာသာရပ်ဆိုင်ရာ ပညာရှင်များ တက်ရောက်ကြသည်။
မြန်မာဘာသာမှ အင်္ဂလိပ်ဘာသာသို့ ပြန်ဆိုခြင်းဆိုင်ရာ စာတမ်းဖတ်ပွဲကို ဘာသာပြန်လုပ်ငန်းများ ပိုမိုဖွံ့ဖြိုးတိုးတက်လာစေရန်၊ အထူးသဖြင့် မြန်မာဘာသာမှ အင်္ဂလိပ်ဘာသာသို့ ပြန်ဆိုခြင်းဆိုင်ရာ အသိပညာ၊ အတတ်ပညာများ မျှဝေဆောင်ရွက်နိုင်ရန်၊ အရည်အသွေးမြင့်မားသော ဘာသာပြန်သုတရသစာပေများ ပေါ်ထွက်လာစေရန်နှင့် ဘာသာပြန် လုပ်ငန်းကို မျိုးဆက်သစ်လူငယ်များ ပိုမိုစိတ်ဝင်စားပါဝင်လာစေရန် စသည့် ရည်ရွယ်ချက်များဖြင့် စာတမ်းဖတ်ပွဲကို ကျင်းပခြင်းဖြစ်ကြောင်း သိရသည်။
အစည်းအဝေးတွင် စာတမ်းဖတ်ကြားမည့် စာတမ်းရှင်များနှင့် စာတမ်းအမည်များအား အတည်ပြုခြင်း၊ စာတမ်းဖတ်ပွဲ သဘာပတိများ ရွေးချယ်အတည်ပြုခြင်း၊ စာတမ်းဖတ်ပွဲ အောင်မြင်စွာကျင်းပနိုင်ရေး အတွက် လုပ်ငန်းတာဝန်များ ခွဲဝေသတ်မှတ်ခြင်း၊ စာတမ်းဖတ်ပွဲကို နိုဝင်ဘာ ၂ ရက်နှင့် ၃ ရက်များတွင် ကျင်းပပြုလုပ်ရန် အတည်ပြုခြင်း စသည့်အကြောင်းအရာများကို ဆွေးနွေးခဲ့ကြပြီး Success Language Academy မှ ဆရာအာသာက စာတမ်းရှင်များ အတွက် အလှူငွေကျပ် ၁၀ သိန်းကို စာတမ်းဖတ်ပွဲဖြစ်မြောက်ရေး ကော်မတီထံ လှူဒါန်းခဲ့ကြောင်း သိရသည်။
သတင်းစဉ်
No comments:
Post a Comment