နေပြည်တော် ဇူလိုင် ၂၉
ပို့ဆောင်ရေးနှင့် ဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးသန့်စင်မောင်သည် ဇူလိုင် ၂၈ ရက် နံနက် ၈ နာရီတွင် မန္တလေး တိုင်းဒေသကြီး ပုဂံညောင်ဦး လေဆိပ်သို့ ရောက်ရှိလာရာ လေကြောင်း ပို့ဆောင်ရေး ညွှန်ကြားမှု ဦးစီးဌာန ညွှန်ကြားရေးမှူးချုပ် ဦးအောင်ကျော်ထွန်းနှင့် တာဝန်ရှိသူများက ပုဂံ-ညောင်ဦးလေဆိပ်၏ လက်ရှိ လေယာဉ်ပြေးလမ်းနှင့် လေဆိပ်အဆောက်အအုံအခြေအနေ၊ လေယာဉ်များ အဆင်းအတက်နှင့် ခရီးသည် ဝင်/ထွက်မှု အခြေအနေ များကို ရှင်းလင်းတင်ပြကြသည်။
ကြည့်ရှုစစ်ဆေး
ယင်းနောက် ပြည်ထောင်စုဝန်ကြီးက ပုဂံယဉ်ကျေးမှုအမွေအနှစ်ဒေသ ကို ကမ္ဘာ့အမွေအနှစ် စာရင်းဝင်အဖြစ် အောင်မြင်စွာ သတ်မှတ်ခဲ့ပြီးဖြစ် သည့်အတွက် ဤဒေသသို့ နိုင်ငံတကာခရီးသွားများ ပိုမိုဝင်ရောက် လာနိုင်ကြောင်း၊ အထူးသဖြင့် လာမည့်ခရီးသွားရာသီတွင် ပုဂံသို့ လေယာဉ်ဖြင့် လာရောက်မည့် ခရီးသည်အရေအတွက် တိုးတက်များပြား လာနိုင်သဖြင့် လေဆိပ်၏ဝန်ဆောင်မှုလုပ်ငန်းများ ကောင်းမွန် စွာဆောင်ရွက်နိုင်ရန် အစီအမံများ ကြိုတင်ပြင်ဆင်ထားရန် လိုအပ်ကြောင်း၊ လိုအပ်ပါက လေဆိပ်အဆောက်အအုံကို အကြီးစားမွမ်းမံပြင်ဆင်ရန် လိုအပ်မည်ဖြစ်ကြောင်း၊ ဝန်ဆောင် မှုကောင်းသော၊ သန့်ရှင်းသပ်ရပ်သော လေဆိပ်တစ်ခု ဖြစ်စေရန် ကြိုးစားဆောင်ရွက်ရမည်ဖြစ်ကြောင်း ပြောကြားပြီး လေဆိပ်အဆောက် အအုံအတွင်း လှည့်လည်ကြည့်ရှုစစ်ဆေးသည်။
အစီအမံများ ကြိုတင်ရေးဆွဲ
ထို့နောက် ပြည်ထောင်စုဝန်ကြီးနှင့် အဖွဲ့သည် မကွေးတိုင်းဒေသကြီး ပခုက္ကူလေဆိပ်သို့ရောက်ရှိပြီး လေယာဉ်ပြေးလမ်း၊ လေဆိပ်အဆောက် အအုံနှင့် လေယာဉ် အဆင်း/အတက် အသုံးပြုနိုင်မှု အခြေအနေများကို စစ်ဆေးကြည့်ရှုရာ ညွှန်ကြားရေးမှူးချုပ်နှင့် တာဝန်ရှိသူများက ရှင်းလင်း တင်ပြကြသည်။ ပြည်ထောင်စုဝန်ကြီးက ပုဂံညောင်ဦးလေဆိပ်သည် ကာကွယ်ထိန်းသိမ်းထားသည့် ပုဂံရှေးဟောင်း ယဉ်ကျေးမှုဇုန်နှင့် နီးကပ်စွာတည်ရှိနေ၍ ရေရှည်တွင် လေဆိပ်အား အဆင့်မြှင့်တင်ခြင်း လုပ်ငန်းများဆောင်ရွက်နိုင်မည် မဟုတ်ပါကြောင်း၊ ပခုက္ကူလေဆိပ်မှာ ထပ်မံတိုးချဲ့နိုင်မည့်မြေဧရိယာ အလုံအလောက်ရှိသဖြင့် နောင်တွင် လေဆိပ်အား အဆင့်မြှင့်တင်နိုင်ရန်အစီအမံများ ကြိုတင်ရေးဆွဲထားရန် လိုအပ်ကြောင်း ပြောကြားသည်။
အလုပ်ကိုကြိုးစား
ဆက်လက်၍ ပြည်ထောင်စုဝန်ကြီးသည် ပခုက္ကူဘူတာသို့သွားရောက်၍ မြန်မာ့မီးရထားမှ ဝန်ထမ်းများနှင့် တွေ့ဆုံရာတွင် ပြည်သူ့ဝန်ထမ်း များဖြစ်၍ ပြည်သူကိုချိုသာစွာဆက်ဆံရန်၊ အလုပ်ကိုကြိုးစားကြရန်နှင့် စည်းစည်းလုံးလုံး ညီညီညွတ်ညွတ် နေထိုင်ကြရန် မှာကြားခဲ့ကြောင်း သိရသည်။
သတင်းစဉ်
No comments:
Post a Comment