နေပြည်တော် ဇွန် ၇
အစည်းအဝေးသို့ အမျိုးသားသဘာဝ ဘေးအန္တရာယ်ဆိုင်ရာ စီမံခန့်ခွဲမှုကော်မတီ ဒုတိယဥက္ကဋ္ဌ ပြည်ထဲရေးဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီး ကျော်ဆွေ၊ ကော်မတီဝင်များ ဖြစ်ကြသည့် ပြည်ထောင်စုဝန်ကြီးများ၊ နေပြည်တော် ကောင်စီဥက္ကဋ္ဌနှင့် တိုင်းဒေသကြီး၊ ပြည်နယ် အစိုးရအဖွဲ့ဝန်ကြီးချုပ်များ၊ ဒုတိယ ၀န်ကြီးများ၊ ဘေးအန္တရာယ် စီမံခန့်ခွဲမှုဆိုင်ရာ အကြံပေးအဖွဲ့ဥက္ကဋ္ဌ နှင့် အတွင်းရေးမှူး၊ ၀န်ကြီးဌာနများမှ အမြဲတမ်းအတွင်းဝန်များ၊ ဌာနဆိုင်ရာအကြီးအကဲ များနှင့် တာဝန်ရှိသူများ တက်ရောက်ကြသည်။
အစည်းအဝေးတွင် အမျိုးသားသဘာဝ ဘေးအန္တရာယ်ဆိုင်ရာ စီမံခန့်ခွဲမှုကော်မတီ ဥက္ကဋ္ဌ ဒုတိယသမ္မတ ဦးဟင်နရီဗန်ထီးယူက ယခုအစည်းအဝေးတွင် မိုးရာသီကာလ ၌ ဖြစ်ပွားနိုင်သည့် သဘာဝဘေး အန္တရာယ်များ၊ ကြိုတင်ခန့်မှန်း၍ မရနိုင်သည့် ငလျင် ဘေးအန္တရာယ်နှင့် ဘေးအန္တရာယ် စီမံခန့်ခွဲမှု ဆိုင်ရာ အကြံပေးအဖွဲ့မှ ပညာရှင်များ ၏ အကြံပြုချက်များနှင့် ပတ်သက်ပြီး အဓိကထား ဆွေးနွေး သွားလိုကြောင်း၊ ထို့ပြင်အခြား အရေးကြီး သည့်ဆောင်ရွက်ဆဲလုပ်ငန်းများ၊ ပေါင်းစပ်ညှိနှိုင်းပေးရမည့် လုပ်ငန်းများကျန်ရှိနေပါက ဆွေးနွေးတင်ပြကြရန်ပြောကြားလိုကြောင်း။
ယနေ့ကာလ ကမ္ဘာ့ရာသီဥတု ဖောက်ပြန်ပြောင်းလဲမှုများကြောင့် သဘာဝဘေး အန္တရာယ်များ ပိုမိုများပြားလာခြင်း၊ ပိုမိုအင်အား ပြင်းထန်လာခြင်းတို့သည် ထူးခြားစွာ ခံစားလာရသည့် ဘေးအန္တရာယ်များ မဟုတ်တော့ဘဲ ကမ္ဘာပေါ်တွင် ပုံမှန်ဖြစ်ပေါ် ခံစားလာရ သည့် ဘေးအန္တရာယ်များ ဖြစ်လာနေသည်ကို အားလုံးမြင်တွေ့ သိရှိနေရပါကြောင်း။
မြန်မာနိုင်ငံအနေဖြင့် မုတ်သုံကာလ တိုတောင်းလာပြီး မိုးရွာသွန်းမှုပုံစံများ ပြောင်းလဲ လာခြင်း၊ ဆိုင်ကလုန်းမုန်တိုင်းများ ပိုမိုဖြစ်ပေါ်လာခြင်း၊ အပူချိန်လွန်ကဲမှု များဖြစ် လာခြင်း၊ လေပြင်းတိုက်ခတ် မှုများ၊ မိုးသီးကြွေမှုများ၊ မိုးကြိုးပစ်မှုများ ပိုမိုများပြား လာခြင်း၊ ရေကြီးရေလျှံမှုများ နှစ်စဉ်ဖြစ်လာခြင်း စသည်ဖြင့် ဘေးအန္တရာယ်များ ပိုမိုရင်ဆိုင် ကြုံတွေ့နေရသည်ကိုအားလုံးသိရှိကြပြီးဖြစ်ပါကြောင်း။
သဘာဝဘေး စီမံခန့်ခွဲသူများအနေဖြင့် ဘေးအန္တရာယ်များ၏ ပြုပြင်ပြောင်းလဲ လာသော သဘော သဘာဝများကို မျက်ခြေမပြတ် လေ့လာသိရှိနေရန်၊ အစဉ်အမြဲနိုးနိုးကြားကြား ရှိနေရန်၊ ရင်ဆိုင် တုံ့ပြန်နိုင်ရေး အဆင့်သင့်ဖြစ်နေရန်၊ အရေးပေါ်တုံ့ပြန်မှု လုပ်ငန်းအစီအမံများအပြင် ရေရှည်ကြိုတင် ကာကွယ်ရေးလုပ်ငန်းများတွင်လည်း ရင်းနှီးမြှုပ်နှံ ဆောင်ရွက်ရန်လိုအပ်ပါကြောင်း။
ဆွစ်ဇာလန်နိုင်ငံ ဂျီနီဗာမြို့၌ ၂၀၁၉ခုနှစ် မေလ ၁၃ ၇က်မှ ၁၇ ရက် ထိကျင်းပခဲ့သည့် ဘေးအန္တရာယ် ကြောင့် ထိခိုက်ဆုံးရှုံးနိုင်ခြေ လျှော့ချရေးအတွက် ကမ္ဘာလုံးဆိုင်ရာ ဆဌမအကြိမ်မြောက်ညီလာခံ တွင်လည်း ကမ္ဘာ့နိုင်ငံပေါင်း(၁၈၂)နိုင်ငံမှ ကိုယ်စားလှယ် အဖွဲ့များ၊ လူမှုရေးအဖွဲ့အစည်း (၁၀၀)ကျော်မှ ကိုယ်စားလှယ်များ၊ တက္ကသိုလ်များ၊ စီးပွားရေးအဖွဲ့အစည်းကြီးများမှ ကိုယ်စားလှယ် များ တက်ရောက် ခဲ့ပြီး မြန်မာနိုင်ငံမှလည်း ပါဝင်တက်ရောက်ခဲ့ပါကြောင်း၊ အဆိုပါ ညီလာခံတွင် အပြည်ပြည်ဆိုင်ရာ ပူးပေါင်းဆောင်ရွက်မှုနှင့် ဘက်စုံပူးပေါင်းဆောင်ရွက်မှုသည် ဖွံ့ဖြိုးဆဲနိုင်ငံများတွင် သဘာဝဘေးလျော့ပါးရေး ဆောင်ရွက်မှုအတွက် အရေးပါမှုတစ်ရပ်အဖြစ် ဆက်လက်လုပ်ဆောင် သွားရန် သဘောတူခဲ့ကြပါကြောင်း။
ထို့ပြင် တိုင်းပြည်ဖွံ့ဖြိုးတိုးတက်ရေးအတွက် ဆောင်ရွက်မှုနှင့် ဘေးအန္တရာယ်ကြောင့် ထိခိုက်ဆုံးရှုံး နိုင်ခြေ လျှော့ချရေးလုပ်ငန်းများတွင် လူထုပါဝင်မှုကိုလည်း ထည့်သွင်းဆောင်ရွက်ကြရန် ဆွေးနွေး ခဲ့ပါကြောင်း။
မြန်မာနိုင်ငံအနေဖြင့်လည်း ကမ္ဘာ့နိုင်ငံများ၊ ရာသီဥတုကြောင့် ထိခိုက်မှုလျော့ပါးရေးဆိုင်ရာ အပြည် ပြည်ဆိုင်ရာ အဖွဲ့အစည်းများနှင့် လက်ရှိပူးပေါင်း ဆောင်ရွက်နေသကဲ့သို့ နောင်တွင်လည်း ယခုကဲ့သို့ စနစ်တကျ ဆက်လက်ဆောင်ရွက်သွားမည်ဖြစ်ပါကြောင်း။
မိမိတို့နိုင်ငံအနေဖြင့် သဘာဝဘေး စီမံခန့်ခွဲမှုလုပ်ငန်းများတွင် အားလုံးပိုမို ပူးပေါင်းကာ ဆောင်ရွက် ချက်များ ခိုင်မာအားကောင်းလာသော်လည်း သဘာဝဘေးများ၏ သဘောသဘာဝများအရ အချိန်အခါမရွေး ရင်ဆိုင်ကြုံတွေ့နိုင် သည့်အတွက် ကြိုတင်ပြင်ဆင်မှုနှင့် ရင်ဆိုင်ကြုံတွေ့လာပါက အဆင်သင့်ဖြစ်စေ ရေးတို့ကို စဉ်ဆက်မပြတ် အားထုတ်ဆောင်ရွက်နေကြရန် လိုအပ်ပါကြောင်း၊ ကြိုတင်ပြင်ဆင်အား ထုတ်မှုကောင်းခြင်း၏ သာဓကအနေဖြင့် အိန္ဒိယနိုင်ငံ ဩရိဿပြည်နယ် ပူရီမြို့ကို ၂၀၁၉ ခုနှစ်မေ၂ရက်တွင် ဝင်ရောက်ခဲ့သော အလွန်အားကောင်းသော ဆိုင်ကလုန်း မုန်တိုင်းဖန်နီကြောင့် ထိခိုက်ပျက်စီးဆုံးရှုံးမှု အမေရိကန်ဒေါ်လာ (၇)ဘီလီယံခန့်ရှိပြီး အဆိုပါ ပျက်စီး ဆုံးရှုံးမှုများအတွက် မူလအနေအထားအတိုင်း ပြန်လည်ပြုပြင်ထူထောင်နိုင်ရန်(၁၀)နှစ်ခန့် အချိန်ယူ ရမည်ဖြစ်ပါကြောင်း။
ထိုကဲ့သို့သော ပြင်းထန်ကြီးမားသည့် မုန်တိုင်းဖြစ်သော်လည်း ယင်းပြည်နယ်တွင် သေဆုံးသူဦးရေ သည်(၆၄)ဦးသာရှိသည့်အတွက် အိန္ဒိယနိုင်ငံ၏ သဘာဝဘေး တုန့်ပြန်နိုင်ရန် ကြိုတင်ပြင်ဆင်မှု အပိုင်း အားကောင်းခဲ့သည်ကို တွေ့ရမည်ဖြစ် ပါကြောင်း။
အနီးစပ်ဆုံး ရင်ဆိုင်ဖြေရှင်းကြရမည့် မိုးတွင်းကာလ သဘာဝဘေးအန္တရာယ်များကို ကြည့်မည် ဆိုပါက မုန်တိုင်းဘေး၊ ရေကြီးရေလျှံမှုများ၊ လျှပ်တပြက်ရေဘေး၊ မိုးကြိုးပစ်ခြင်း၊ မြစ်ကမ်းပါးပြိုမှုများ၊ မြေပြိုမှုများပင် ဖြစ်ပါကြောင်း၊ မိမိတို့အနေဖြင့် ပြည်သူများ ဘေးဒဏ်ကြောင့် ထိခိုက်မှုမှ လျော့နည်းသက်သာစေရန် ကြိုတင်ပြင်ဆင် မှုများ ဆောင်ရွက်ထားရမည့် တာဝန်ရှိပါကြောင်း၊ နှစ်စဉ် ရင်ဆိုင်ဖြေရှင်း ခဲ့ရသည့် အတွေ့အကြုံများလည်း ရှိပြီးဖြစ်သဖြင့် သက်ဆိုင်ရာဌာနအလိုက်၊ တိုင်း ဒေသကြီး၊ ပြည်နယ်အစိုးရ အဖွဲ့များအလိုက် ယခင်အတွေ့အကြုံများအပေါ် အခြေခံပြီး ကြိုတင် ပြင်ဆင်မှုများ ဆောင်ရွက်ထားရမည် ဖြစ်ပါကြောင်း။
မိုးလေ၀သနှင့် ရာသီဥတုအခြေအနေများ၊ သဘာဝဘေး အန္တရာယ်ဖြစ်ပွားနိုင်မှု အခြေအနေများကို အချိန်နှင့်တပြေးညီ သတင်းထုတ်ပြန်နိုင်ရန် သက်ဆိုင်ရာဌာနများ အချင်းချင်း ပေါင်းစပ်ညှိနှိုင်း ဆောင်ရွက်ကြရမည် ဖြစ်ပါကြောင်း၊ ထို့ပြင် ဒေသ အလိုက် သက်ဆိုင်ရာ အစိုးရဌာနများက ဆောင်ရွက်သကဲ့သို့ လူမှုရေး အဖွဲ့ အစည်း များ၊ ရပ်မိရပ်ဖများ၊ စီးပွားရေး လုပ်ငန်းရှင်များ၏ အင်အား ကိုလည်း ရယူ ပူးပေါင်းဆောင်ရွက်နိုင်ရေး ကြိုတင်ချိတ်ဆက်စီမံထားရှိရမည်ဖြစ်ပါကြောင်း။
သဘာဝဘေး လျော့ပါးရေးလုပ်ငန်းများသည် ပြည်သူလူထုမှ အစအားလုံးနှင့် သက်ဆိုင်သည့် လုပ်ငန်းတာဝန်တစ်ရပ် ဖြစ်သည့်အတွက် ပြည်သူများ နားလည်သဘောပေါက်ပြီး ပူးပေါင်းပါဝင် လာအောင် စည်းရုံးလှုံ့ဆော်ကြရမည် ဖြစ်ပါကြောင်း၊ မိမိတို့တွင် ယခင်အတွေ့အကြုံများစွာ ရှိပြီးဖြစ်သည့် အတွက်အားနည်းချက်များ၊ လိုအပ်ချက်များကို ပြန်လည်သုံးသပ်ပြီး မိမိတို့ ဆောင်ရွက်ချက်များ သည်ပြည်သူ့လိုအပ်ချက်နှင့် အနီးစပ်ဆုံး ကိုက်ညီမှုရှိစေရေးကို အလေးထားကာ အားလုံးပူးပေါင်းအကောင်အထည်ဖော် ဆောင်ကြရ မည်ဖြစ်ပါကြောင်း။
လာမည့်မိုးရာသီ ကာလတွင်ဖြစ်ပေါ်နိုင်သည့် ဘေးအန္တရာယ်များနှင့် ပတ်သက်ပြီး ဆောင်ရွက် သကဲ့သို့ ကြိုတင်ခန့်မှန်းနိုင်ခြင်း မရှိသေးသော ငလျင်ဘေးအန္တရာယ်နှင့် ပတ်သက်ပြီး ရင်ဆိုင်တုံ့ပြန် နိုင်ရေး အမြဲအဆင့်သင့်ဖြစ်နေရန် လိုအပ်ပါကြောင်း၊ ထို့ပြင် မိမိတို့အမျိုးသား သဘာဝဘေး အန္တရာယ်ဆိုင်ရာ စီမံခန့်ခွဲမှုကော်မတီနှင့် အတူလက်တွဲပူးပေါင်း ဆောင်ရွက်နေသည့် သဘာဝဘေး အန္တရာယ် စီမံခန့်ခွဲမှုဆိုင်ရာ အကြံပေးအဖွဲ့မှ အကြံပြုတင်ပြထားရှိသည့် အကြံပြုချက်များကိုလည်း သက်ဆိုင်ရာဝန်ကြီးဌာနများ၊ တိုင်းဒေသကြီး၊ ပြည်နယ်အစိုးရ အဖွဲ့များအနေဖြင့် မိမိတို့ ဆောင်ရွက်နိုင်မှု အခြေအနေအလိုက် တင်ပြအကောင်အထည်ဖော်ဆောင်ရွက်ရန်လိုအပ်ပါကြောင်း။
အကြံပြုချက်များကို ကြည့်မည်ဆိုပါက ရာသီဥတုပြောင်းလဲမှုနှင့် ရေရှားပါးမှုဖြစ်စဉ်နှင့် ပတ်သက် သည့် အကြံပြုချက်များ၊ ရာသီဥတု ပြောင်းလဲမှုကြောင့် စိုက်ပျိုးရေး လုပ်ငန်းအပေါ် အကျိုး သက်ရောက်မှုနှင့် ပတ်သက်သော အကြံပြုချက်များ၊ မုန်တိုင်းဘေး၊ မိုးကြိုးဘေး၊ မီးဘေး၊ လေပြင်း ဘေးအန္တရာယ်များနှင့် ပတ်သက်သော အကြံပြုချက်များကို တွေ့ရှိရမည်ဖြစ်ပါကြောင်း။
အဆိုပါ အကြံပြုချက်များအရ ရေတို၊ရေရှည် ဆောင်ရွက်နိုင်မှု အခြေအနေများအပေါ် ဆောင်ရွက် ပေးကြရန်နှင့် သဘာဝဘေး စီမံခန့်ခွဲမှုလုပ်ငန်းများကို တာဝန်ခွဲဝေ ဆောင်ရွက်နိုင်ရန် လုပ်ငန်း ကော်မတီ (၁၂)ခုကိုလည်း ဖွဲ့စည်းထားရှိပြီးဖြစ်၍ လုပ်ငန်းတာဝန်အလိုက် ဆောင်ရွက်ကြရန်နှင့် အကြံပေးအဖွဲ့နှင့် လုပ်ငန်းကော်မတီ (၁၂)ခုတို့လည်း ပူးပေါင်းဆောင်ရွက်ကြရန် တိုက်တွန်းပြောကြား လိုပါကြောင်း။
မ်ိမိအနေဖြင့် ယခုမိုးတွင်းကာလတွင် ဖြစ်ပေါ်လာနိုင်သည့် သဘာဝဘေး အန္တရာယ်များနှင့် ပတ်သက်ပြီး မိမိတို့ဒေသအတွင်း ဖြစ်ပွားလာနိုင်သည့် ဘေးအန္တရာယ်များအတွက် ရင်ဆိုင်တုံ့ပြန် နိုင်ရန်လိုအပ်သည့် အစီအမံများကို သက်ဆိုင်ရာဝန်ကြီးဌာနများ၊ နေပြည်တော် ကောင်စီနှင့် တိုင်းဒေသကြီး၊ ပြည်နယ်သဘာဝ ဘေးအန္တရာယ်စီမံခန့်ခွဲမှု အဖွဲ့များအနေဖြင့် ကြိုတင်ပြင်ဆင် ဆောင်ရွက်ကြရန်၊ ပြည်သူလူထုထံ လျင်မြန်ထိရောက်သည့် ကြိုတင် သတိပေးချက်များ ရောက်ရှိ စေရန် ကြိုတင်စီမံဆောင်ရွက်ကြရန်၊ ရှာဖွေ ကယ်ဆယ်ရေး လုပ်ငန်းများအတွက် လူအင်အား၊ ပစ္စည်းအင်အားကြိုတင်စုဖွဲ့ ဆောင်ရွက်ထားကြရန်၊ အရေးပေါ်တုံ့ပြန်ရေး လုပ်ငန်းများအတွက် မြေပြင်တွင် ဆောင်ရွက်သူများ၊ ပြည်ထောင်စုအဆင့်မှ ဆောင်ရွက်သူများ အချိတ်အဆက်မိမိ ဆောင်ရွက်နိုင်ရေး ကြိုတင်ပေါင်းစပ်ညှိနှိုင်း ဆောင်ရွက်ကြရန်၊ အရေးပေါ်ထောက်ပံ့ရေး လုပ်ငန်းများ အတွက် လိုအပ်သည့်ပစ္စည်းများ၊ ပို့ဆောင်ရေးယာဉ်နှင့် ပို့ဆောင်ရေးလမ်းကြောင်းများ ကြိုတင် စီမံထားရှိကြရန်၊ လုပ်ငန်းကော်မတီအလိုက် ကြိုတင်ပြင်ဆင်မှုများ ဆောင်ရွက်ထားရှိပြီး သဘာဝ ဘေးကျရောက်ချိန်နှင့် ပြန်လည်ထူထောင်ရေး ဆောင်ရွက်ချိန်တွင် အချိတ်အဆက်မိမိ ပူးပေါင်း ညှိနှိုင်းဆောင်ရွက်ကြရန် တိုက်တွန်းပြောကြားသည်။
ထို့အတူ အမျိုးသားသဘာဝဘေး အန္တရာယ်ဆိုင်ရာ စီမံခန့်ခွဲမှုရန်ပုံငွေဖြင့် သော်လည်းကောင်း၊ နေပြည်တော် ကောင်စီအပါအဝင် တိုင်းဒေသကြီး၊ ပြည်နယ်အစိုးရ အဖွဲ့များ၏ ဘတ်ဂျက်ရန်ပုံငွေ ဖြင့်သော်လည်းကောင်း၊ အလှူငွေများဖြင့် လည်းကောင်း ဆောင်ရွက်နေသည့် မုန်တိုင်းဒဏ်ခံ အဆောက်အဦများ ဆောက်လုပ်ခြင်း၊ မြစ်ကမ်းပါးထိန်းသိမ်းခြင်း လုပ်ငန်းများ၊ မြေထိန်းနံရံ တည်ဆောက်ခြင်းလုပ်ငန်းများ၊ ရေတွင်းရေကန် တည်ဆောက်ပြုပြင်ခြင်း လုပ်ငန်းများစသည့် သဘာဝဘေး ကြိုတင်ကာကွယ်ရေး၊ ကြိုတင်ပြင်ဆင်ရေး လုပ်ငန်းများနှင့် ပတ်သက်၍ လုပ်ငန်း ဆောင်ရွက်ပြီးစီးမှုနှင့် ဆောင်ရွက်ဆဲအခြေအနေများကို အမျိုးသားသဘာဝ ဘေးအန္တရာယ်ဆိုင်ရာ စီမံခန့်ခွဲမှုကော်မတီသို့ လုပ်ငန်းဆောင်ရွက် ထားရှိမှုအဆင့်ဆင့်ကို ပုံမှန်တင်ပြပေးရန်ပြောကြားသည်။
ထို့နောက် အမျိုးသားသဘာဝ ဘေးအန္တရာယ်ဆိုင်ရာ စီမံခန့်ခွဲမှုကော်မတီ ဒုတိယဥက္ကဋ္ဌ ပြည်ထဲရေး ၀န်ကြီးဌာန ပြည်ထောင်စုဝန်ကြီး ဒုတိယ ဗိုလ်ချုပ်ကြီးကျော်ဆွေက နိုင်ငံတ၀န်း သဘာဝဘေး အန္တရာယ်များဖြစ်ပွားခဲ့မှု၊ သဘာဝဘေးအန္တရာယ်များကြောင့် ထိခိုက်သေဆုံး၊ ဒဏ်ရာရရှိမှု၊ ပျက်စီး ဆုံးရှုံးနစ်နာခဲ့မှု၊ ရှာဖွေကယ်ဆယ်ရေး ဆောင်ရွက်ခဲ့မှု၊ သဘာဝဘေး ကြိုတင်ကာကွယ်ရေး၊ ကြိုတင် ပြင်ဆင်ရေးလုပ်ငန်းများ ဆောင်ရွက်နေမှု၊ ပြီးစီးမှုနှင့် ဆောင်ရွက်ဆဲအခြေအနေများကို ရှင်းလင်း တင်ပြသည်။
ဆက်လက်၍ အမျိုးသားသဘာဝ ဘေးအန္တရာယ်ဆိုင်ရာ စီမံခန့်ခွဲမှုကော်မတီ အတွင်းရေးမှူး ဒုတိယ ၀န်ကြီး ဦးစိုးအောင်ကအမျိုးသား သဘာဝဘေး အန္တရာယ်ဆိုင်ရာ စီမံခန့်ခွဲမှုကော်မတီ(၁/၂၀၁၉) အစည်းအဝေးဆုံးဖြတ်ချက် ၁၉ချက်ကို ၀န်ကြီးဌာနများ၊ တိုင်းဒေသကြီး၊ ပြည်နယ်နှင့် နေပြည်တော် ကောင်စီတို့မှ အကောင်အထည်ဖော် ဆောင်ရွက်ပြီးစီးမှု အခြေအနေနှင့် အမျိုးသားသဘာဝ ဘေးအန္တရာယ်ဆိုင်ရာ စီမံခန့်ခွဲမှုကော်မတီ ရန်ပုံငွေစာရင်းရှင်းတမ်းတို့ကို ရှင်းလင်းတင်ပြသည်။
ယင်းနောက် အမျိုးသားသဘာဝ ဘေးအန္တရာယ်ဆိုင်ရာ စီမံခန့်ခွဲမှုကော်မတီဝင်များ ဖြစ်ကြသည့် ကာကွယ်ရေးဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီး စိန်ဝင်း၊ နယ်စပ်ရေးရာ ၀န်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီး ရဲအောင်၊ ပြန်ကြားရေးဝန်ကြီးဌာန ပြည်ထောင်စုဝန်ကြီး ဒေါက်တာဖေမြင့်၊ သာသနာရေးနှင့် ယဉ်ကျေးမှု ၀န်ကြီးဌာန ပြည်ထောင်စုဝန်ကြီး သူရဦးအောင်ကို၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီး ဒေါက်တာအောင်သူ၊ ပို့ဆောင်ရေးနှင့် ဆက်သွယ်ရေးဝန်ကြီးဌာန ပြည်ထောင်စု ၀န်ကြီး ဦးသန့်စင်မောင်၊ သယံဇာတနှင့် သဘာဝပတ်ဝန်းကျင် ထိန်းသိမ်းရေး ၀န်ကြီးဌာန ပြည်ထောင်စုဝန်ကြီး ဦးအုန်းဝင်း၊ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေ၊ စက်မှုဝန်ကြီး ဌာန ပြည်ထောင်စုဝန်ကြီး ဦးခင်မောင်ချို၊ စီးပွားရေးနှင့် ကူးသန်းရောင်းဝယ် ရေးဝန်ကြီးဌာန ပြည်ထောင်စုဝန်ကြီး ဒေါက်တာသန်းမြင့်၊ ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာ မျိုးသိမ်းကြီး၊ ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီး ဒေါက်တာမြင့်ထွေး၊ ဆောက်လုပ်ရေး ၀န်ကြီးဌာန ပြည်ထောင်စုဝန်ကြီး ဦးဟန်ဇော်နှင့် တိုင်းရင်းသားလူမျိုးများရေးရာ ၀န်ကြီးဌာန ပြည်ထောင်စုဝန်ကြီး နိုင်သက်လွင်တို့က သက်ဆိုင်ရာ ၀န်ကြီးဌာနအလိုက် အမျိုးသား သဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီ(၁/၂၀၁၉) အစည်းအဝေး ဆုံးဖြတ်ချက်များကို လိုက်နာအကောင်အထည်ဖော် ဆောင်ရွက်နေမှု၊ ပြီးစီးမှု၊ မြန်မာနိုင်ငံအတွင်း သဘာဝဘေးအန္တရာယ် များဖြစ်ပေါ်ခဲ့မှု၊ သဘာဝဘေးဒဏ်သင့် ဒေသများတွင် ရှာဖွေကယ်ဆယ်ရေး၊ ပြန်လည်ထူထောင် ရေးနှင့် ကူညီထောက်ပံ့ပေးခဲ့မှု အခြေအနေများနှင့် သဘာဝဘေး ကြိုတင်ကာကွယ်ရေး၊ ကြိုတင်ပြင်ဆင်ရေးနှင့် အရေးပေါ်တုံ့ပြန် ဆောင်ရွက်နိုင်ရေးလုပ်ငန်းများဆောင်ရွက်နေမှု၊ ပြီးစီးမှုနှင့် ဆောင်ရွက်ဆဲအခြေအနေများကို ရှင်းလင်းတင်ပြကြသည်။
ထို့နောက် နေပြည်တော်ကောင်စီဥက္ကဋ္ဌ ဒေါက်တာမျိုးအောင်၊ ကချင်ပြည်နယ် ၀န်ကြီးချုပ် ဒေါက်တာ ခက်အောင်၊ ကယားပြည်နယ် ၀န်ကြီးချုပ် ဦးအယ်လ်ဖောင်းရှို၊ ကရင်ပြည်နယ် ၀န်ကြီးချုပ် ဒေါ်နန်းခင်ထွေးမြင့်၊ ချင်းပြည်နယ် ၀န်ကြီးချုပ်ဆလိုင်းလျန်လွယ်၊ တနင်္သာရီ တိုင်းဒေသကြီး ၀န်ကြီးချုပ် ဦးမြင့်မောင်၊ ပဲခူးတိုင်းဒေသကြီး ၀န်ကြီးချုပ် ဦးဝင်းသိန်း၊ မကွေးတိုင်းဒေသကြီး ၀န်ကြီးချုပ် ဒေါက်တာအောင်မိုးညို၊ မန္တလေးတိုင်းဒေသကြီး ၀န်ကြီးချုပ် ဒေါက်တာ ဇော်မြင့်မောင်၊ မွန်ပြည်နယ် ၀န်ကြီးချုပ် ဒေါက်တာအေးဇံ၊ ရန်ကုန် တိုင်းဒေသကြီး ၀န်ကြီးချုပ် ဦးဖြိုးမင်းသိန်း၊ ရခိုင်ပြည်နယ် ၀န်ကြီးချုပ် ဦးညီပု၊ ရှမ်းပြည်နယ် ၀န်ကြီးချုပ် ဒေါက်တာလင်းထွဋ်၊ ဧရာဝတီ တိုင်းဒေသကြီး ၀န်ကြီးချုပ် ဦးလှမိုးအောင်နှင့် စစ်ကိုင်းတိုင်းဒေသကြီး ချင်းတိုင်းရင်းသားရေးရာ ၀န်ကြီးတို့က ဒေသအလိုက် ရင်ဆိုင်ကြုံတွေ့ခဲ့ရသည့် သဘာဝဘေးအန္တရာယ်ဆိုင်ရာများ၊ ထိခိုက် ပျက်စီးဆုံးရှုံးမှုများ၊ ကူညီထောက်ပံ့ပေးခဲ့မှုများ၊ အခက်အခဲများ၊ လိုအပ်ချက်များ၊ သဘာဝဘေး အန္တရာယ် လျော့ပါးရေးနှင့် သဘာဝဘေးအန္တရာယ်များနှင့် ရင်ဆိုင်ကြုံတွေ့ရပါက ထိခိုက်ဆုံးရှုံးမှု အနည်းဆုံးဖြစ်အောင် ကြိုတင်ပြင်ဆင်ဆောင်ရွက် ထားရှိမှုအခြေအနေများကိုရှင်းလင်းတင်ပြကြသည်။
ဆက်လက်၍ သဘာဝဘေးအန္တရာယ် စီမံခန့်ခွဲမှုဆိုင်ရာ အကြံပေးအဖွဲ့ဥက္ကဋ္ဌ ဦးမောင်မောင်ခင်နှင့် အတွင်းရေးမှူး ဦးချစ်ကျော်တို့က သဘာဝဘေးအန္တရာယ်များ ဖြစ်ပွားပါက အရေးပေါ်တုံ့ပြန်ရေး၊ ပြည်သူလူထုထံ လျင်မြန်ထိရောက်သည့် ကြိုတင်သတိပေးချက်များ ရောက်ရှိစေရေး၊ သဘာဝဘေး အန္တရာယ်များ လျော့ပါးရေးအတွက် ကြိုတင်ပြင်ဆင် ဆောင်ရွက်ရေးနှင့် စပ်လျဉ်းသည့် အကြံပြုချက် များနှင့်၂၀၁၉ ခုနှစ်တွင် ဖြစ်ပေါ်လာနိုင်သည့် မိုးလေ၀သခန့်မှန်းချက်နှင့် တိုင်းဒေသကြီး၊ ပြည်နယ်များ အလိုက်ကြုံတွေ့ ရနိုင်သည့်အခက်အခဲနှင့် စိန်ခေါ်မှု များကို ရှင်းလင်းတင်ပြကြသည်။
ယင်းနောက် ဒုတိယသမ္မတက တင်ပြချက်များအပေါ် ပေါင်းစပ်ညှိနှိုင်းပေးကာ အစည်းအဝေးကို ရုပ်သိမ်းလိုက်သည်။
(သတင်းစဉ်)
No comments:
Post a Comment