ဒုတိယသမ္မတ ဦးဟင်နရီဗန်ထီးယူ ကလေးမြို့နယ်အတွင်း သဘာဝဘေးအန္တရာယ် ကာကွယ်ရေး လုပ်ငန်း များနှင့် ကလေး - တီးတိန် - တွန်းဇံလမ်း ပြုပြင်ထိန်းသိမ်းမှုလုပ်ငန်းများကို လှည့်လည်ကြည့်ရှု

တွန်းဇံ မေ ၁၇

အမျိုးသားသဘာဝဘေး အန္တရာယ်ဆိုင်ရာ စီမံခန့်ခွဲမှု ကော်မတီဥက္ကဋ္ဌ ဒုတိယသမ္မတ ဦးဟင်နရီဗန်ထီးယူ သည် စစ်ကိုင်းတိုင်းဒေသကြီး ၀န်ကြီးချုပ် ဒေါက်တာမြင့်နိုင်၊ ကာကွယ်ရေး ၀န်ကြီးဌာနမှ ဒုတိယ၀န်ကြီး ဗိုလ်ချုပ်မြင့်နွယ်၊ နယ်စပ်ရေးရာ ၀န်ကြီးဌာန ဒုတိယ၀န်ကြီး ဗိုလ်ချုပ်သန်းထွဋ်၊ လူမှုဝန်ထမ်း၊ ကယ်ဆယ် ရေးနှင့် ပြန်လည်နေရာချထားရေး ၀န်ကြီးဌာန ဒုတိယ၀န်ကြီး ဦးစိုးအောင်၊ တိုင်းဒေသကြီး ဝန်ကြီးများ၊ အမြဲတမ်း အတွင်းဝန်များ၊ ဌာနဆိုင်ရာ တာဝန်ရှိသူများနှင့် အတူ မေလ ၁၆ ရက် မွန်းလွဲပိုင်းတွင် စစ်ကိုင်း တိုင်းဒေသကြီး ကလေးမြို့သို့ရောက်ရှိကြသည်။

ဒုတိယသမ္မတ ဦးဟင်နရီဗန်ထီးယူအား နယ်မြေခံ တပ်ရိပ်သာ၌ ကလေးခရိုင်အတွင်း သဘာဝဘေး အန္တရာယ် ကြိုတင်ကာကွယ်ရေး လုပ်ငန်းများ ဆောင်ရွက်ထားရှိမှုနှင့် လုပ်ငန်း လိုအပ်ချက်များကို ခရိုင် အုပ်ချုပ်ရေးမှူးနှင့် တာဝန်ရှိသူများက ရှင်းလင်းတင်ပြကြရာ လူမှုဝန်ထမ်း၊ ကယ်ဆယ်ရေးနှင့် ပြန်လည် နေရာချထားရေး ၀န်ကြီးဌာန ဒုတိယ၀န်ကြီး ဦးစိုးအောင်က ဖြည့်ဆည်း ဆောင်ရွက်ပေးသွားမည့် အစီ အစဉ်များကို ဖြည့်စွက်ရှင်းလင်းတင်ပြသည်။

တင်ပြချက်များအပေါ် ဒုတိယသမ္မတက ပေါင်းစပ်ညှိနှိုင်းပေးပြီး သဘာဝဘေး ကြိုတင် ကာကွယ်ရေး အတွက် ရေရှည်ဆောင်ရွက်ရမည့် လုပ်ငန်းများကို နှစ်အလိုက် ဘတ်ဂျက်တွင် လည်းကောင်း၊ အရေးပေါ် အခြေ အနေများတွင် ဆောင်ရွက်ရမည့် လုပ်ငန်းများအား သဘာဝဘေး အန္တရာယ်ဆိုင်ရာ ရန်ပုံငွေမှ လည်းကောင်း တင်ပြတောင်းခံ အသုံးပြုသွားရမည်ဖြစ်ပါကြောင်း၊ ထိုသို့ အသုံးပြုရာတွင် ပြည်သူများ အတွက် အကျိုးရှိထိရောက်အောင် စနစ်တကျစီမံ ဆောင်ရွက်သွားရမည်ဖြစ်ကြောင်း ပြောကြားသည်။

ထို့နောက် ဒုတိယသမ္မတ နှင့်အဖွဲ့ဝင်များသည် ကလေးမြို့ ဖောင်ကူးတံတားအနီး နေရဉ္ဇရာ ချောင်းကမ်း ထိန်းနံရံ ဆောက်လုပ်ပြီးစီးမှု အခြေအနေများကို လှည့်လည်ကြည့်ရှုသည်။

ကလေးမြို့ ဖောင်ကူးတံတားအနီးတွင် အလျားပေ ၇၂၀ ရှိ နေရဉ္ဇရာ ချောင်းကမ်းထိန်း နံရံကို ၂၀၁၇ - ၂၀၁၈ ဘဏ္ဍာရေးနှစ်အတွင်း ခွင့်ပြုရန်ပုံငွေကျပ် ၂၆၄ သန်းဖြင့် ကျောက်စီ မြေထိန်းတမံအဖြစ် တည်ဆောက် လျက်ရှိသည်။

ယင်းနောက် ဒုတိယသမ္မတ ဦးဟင်နရီဗန်ထီးယူသည် ကလေး - ကလေးဝကားလမ်း နံဘေးရှိ မြစ်သာမြစ် ကမ်းထိန်းနံရံ တည်ဆောက်နေမှု အား လှည့်လည်ကြည့်ရှုသည်။

ကလေး - ကလေးဝ ကားလမ်း ကမ်းပြိုမှုကာကွယ်ရေး လုပ်ငန်းအတွက် အလျားပေ ၅၁၀၀ ရှိ မြစ်သာ မြစ်ကမ်းထိန်း နံရံကို ၂၀၁၈ ခုနှစ် ၆ လ ဘဏ္ဍာရေးနှစ် အတွင်း ခွင့်ပြုရန်ပုံငွေ ကျပ်သန်း ၂၂၀၀ ဖြင့် သံခြင်းအခြေပြု ကျောက်စီတမံအဖြစ် တည်ဆောက်လျက်ရှိရာ စီမံကိန်း လုပ်ငန်း ၆၀ ရာခိုင်နှုန်း ပြီးစီးပြီဖြစ် ကြောင်း သိရသည်။

ဆက်လက်၍ ကလေးမြို့ရှိ ပြည်သူ့ဝန်ဆောင်မှုရုံးသို့ ရောက်ရှိပြီး လုပ်ငန်းဆောင်ရွက် နေမှုများကို လှည့်လည် ကြည့်ရှု၍ ဒေသခံ ပြည်သူများအား တွေ့ဆုံအားပေးသည်။ 

ယင်းနောက် ဒုတိယသမ္မတ ဦးဟင်နရီဗန်ထီးယူသည် ချင်းပြည်နယ်ဝန်ကြီးချုပ် ဦးဆလိုင်းလျန်လွယ်၊ ပြည်နယ် လွှတ်တော် ဥက္ကဋ္ဌ ဦးဇိုဘွဲ့ တို့နှင့်အတူ ချင်းပြည်နယ် တီးတိန် မြို့နယ် ကော်ဖီသုတေသနနှင့် နည်းပညာ ဖွံ့ဖြိုးရေးခြံ(ထေးဇန်)သို့ ရောက်ရှိကြပြီး ခြံအတွင်း ကော်ဖီပင်များ စမ်းသပ်စိုက်ပျိုးနေမှု၊ ပျိုးပင်များ စနစ်တကျ ပျိုးထောင်နေမှုနှင့် ရောင်းတန်းဝင် ကော်ဖီမှုန့်များ ထုတ်လုပ်နေမှု တို့ကို လှည့်လည် ကြည့်ရှုကြသည်။ 

ယင်းနောက် ခြံရှင်းလင်းဆောင်တွင် ကော်ဖီစမ်းသပ် စိုက်ပျိုးခဲ့မှု၊ ကော်ဖီအရည်အသွေး စမ်းသပ်ခဲ့မှု၊ ကော်ဖီ မျိုးကောင်းမျိုးသန့်များ ပျိုးထောင်ထားရှိမှု အခြေအနေများကို ခြံတာဝန်ခံ ဦးမင်းလွင်ဦးက ရှင်းလင်း တင်ပြရာ စိုက်ပျိုးရေးဦးစီးဌာန ညွှန်ကြားရေးမှူးချုပ် ဒေါက်တာ ရဲတင့်ထွန်းက ဖြည့်စွက်ရှင်းလင်း တင်ပြ သည်။

တင်ပြချက်များအပေါ် ဒုတိယသမ္မတ ဦးဟင်နရီဗန်ထီးယူက ကမ္ဘာ့ကော်ဖီအရည် အသွေး သတ်မှတ်ချက် (Cupping Score)အရ အဆင့် ၈၀ နှင့်အထက်ကို အထူးတန်းဝင် ကော်ဖီအဖြစ် သတ်မှတ်ပါကြောင်း၊ မြန်မာနိုင်ငံတွင် ပြင်ဦးလွင်၊ ရွာငံနှင့် သံတောင်ဒေသတို့ တွင် ဖြစ်ထွန်းသည့် ကော်ဖီမျိုးများမှာ အဆင့် ၈၄ နှင့် ၉၀ အကြားတွင် ရှိပါကြောင်း၊ ချင်းပြည်နယ်၌ စိုက်ပျိုးဖြစ်ထွန်းသော ကော်ဖီမျိုးမှာ အဆင့် ၉၆ တွင်ရှိ၍ အထူးအရည်အသွေး ကောင်းမွန်ပါကြောင်း၊ အဆိုပါ ကမ္ဘာ့အဆင့်မီ ကော်ဖီမျိုးအား ချင်းပြည်နယ်ရှိ တောင်သူများ အနေဖြင့် စီးပွားဖြစ် တိုးချဲ့စိုက်ပျိုး ထုတ်လုပ်သွားရန် တိုက်တွန်းလိုပါကြောင်း၊ ထိုသို့ ကော်ဖီ မျိုးကောင်းအား တိုးချဲ့စိုက်ပျိုးခြင်းဖြင့် တောင်သူများ ၀င်ငွေတိုးမည့်အပြင် နိုင်ငံတော်၏ ပြည်ပ ပို့ကုန် တန်ဖိုးလည်း တိုးတက်လာမည်ဖြစ်ပါကြောင်း၊ ချင်းပြည်နယ်၏ မြေယာအနေ အထားသည် ယခု အချိန်အထိ သဘာဝအတိုင်း အများစု ကျန်ရှိနေသေး ပါကြောင်း၊ ထို့ကြောင့် ဒေသခံ တောင်သူများ အနေဖြင့် ယင်းအခွင့် အရေးကိုရယူပြီး စိုက်ပျိုးရေး လုပ်ငန်းသုံး ဓာတုဗေဒ ပစ္စည်းများ အသုံးပြုမှု ကင်းမဲ့ ဇုန် အဖြစ် ထူထောင်သွားရန်နှင့် ဈေးကွက်ဝင် သြဂဲနစ် သီးနှံများကိုလည်း တိုးချဲ့စိုက်ပျိုးအောင် စည်းရုံး ဆောင်ရွက် သွားရမည် ဖြစ်ပါကြောင်း ပြောကြားသည်။

ချင်းပြည်နယ်အတွင်း ယခုအချိန်တွင် ကော်ဖီစိုက်ပျိုး ဧကမှာ ၅၆၀ ကျော်ရှိပြီး နှစ်စဉ် ကော်ဖီစိုက် ဧက ၂၂၀ ထပ်မံ တိုးချဲ့စိုက်ပျိုး သွားမည်ဖြစ်ရာ ၂၀၂၁ ခုနှစ်တွင် စုစုပေါင်းစိုက်ဧက ၁၂၂၀ ဧက ရှိလာမည် ဖြစ်ကြောင်း သိရသည်။

ထို့နောက် ဒုတိယသမ္မတနှင့် အဖွဲ့ဝင်များသည် တီးတိန်မြို့နယ်၌ ရှေးဟောင်း သုတေသနနှင့် အမျိုးသား ပြတိုက် ဦးစီးဌာနမှ ထိန်းသိမ်းစောင့်ရှောက်ထားသည့် ရှာလ်လုမ်းခံတပ်သို့ ရောက်ရှိရာ ဒေသခံ ပြည်သူ များက ရိုးရာဓလေ့အတိုင်း ကြိုဆိုနှုတ်ဆက်ကြပြီး ရှာလ်လုမ်းခံတပ် ရှင်းလင်းဆောင်၌ ရှေးဟောင်း သုတေသနနှင့် အမျိုးသားပြတိုက် ဦးစီးဌာန ပြည်နယ်မှူး ဒေါ်ငိုင်ဟောက်နြောင်က ခံတပ်၏ သမိုင်း ကြောင်းနှင့် မူလအတိုင်း ထိန်းသိမ်းထားရှိမှု တို့ကို ရှင်းလင်းတင်ပြသည်။

ယင်းနောက် ရှာလ်လုမ်းခံတပ်အတွင်းရှိ အထိမ်းအမှတ်နေရာ၊ စခန်းတည်ဆောက် ဖွဲ့စည်းပုံတို့ကို လှည့်လည် ကြည့်ရှုပြီး ဒေသခံ တိုင်းရင်းသား များနှင့်အတူ စုပေါင်းမှတ်တမ်းတင် ဓာတ်ပုံရိုက်ကူးသည်။

ရှာလ်လုမ်းခံ တပ်သည် ချင်းပြည်နယ် တီးတိန်မြို့နယ် ဝေါ့လပ်ကျေးရွာ အောက်ဘက် ၄ ဖာလုံခန့် ဝေးသော ဝေါ့လပ် - ထုတ်လိုင်လမ်း နံဘေးတွင် တည်ရှိသည်။ အဆိုပါ ရှာလ်လုမ်း ခံတပ် တိုက်ပွဲသည် ၁၈၈၉ ခုနှစ် မေလ ၄ ရက်နေ့တွင် ဖြစ်ပွားခဲ့ပြီး ချင်းတိုင်းရင်းသားများ အနေဖြင့် နယ်ချဲ့အား ရွပ်ရွပ်ချွံချွံ ခုခံ တိုက်ခိုက်ခဲ့သဖြင့် နယ်ချဲ့ဘက်မှ စုစုပေါင်း ၃၆ ဦး ကျဆုံးခဲ့ပြီး ချင်းအမျိုးသား ၁၈ ဦးနှင့် အမျိုးသမီး ၁၀ ဦး စုစုပေါင်း ၂၈ ဦး ကျဆုံးခဲ့၍ ပြင်းထန်သော တိုက်ပွဲ တစ်ခုအဖြစ် မှတ်တမ်းတင်ထားကြောင်း သိရှိရသည်။

ထို့နောက် ဒုတိယသမ္မတသည် ကလေး - တီးတိန် - တွန်းဇံ လမ်းပေါ်ရှိ မြေထိန်းနံရံများ ကြံ့ခိုင်ရေးအတွက် ဆောင်ရွက်နေမှုနှင့် အသစ်တည်ဆောက်နေမှု၊ လမ်းသားတာဘောင် တိုးချဲ့ ဖောက်လုပ်နေမှု တို့ကို လှည့်လည် ကြည့်ရှုပြီး ညနေပိုင်းတွင် တွန်းဇံမြို့သို့ ရောက်ရှိရာ ဒေသခံ ပြည်သူများက ရိုးရာအကများဖြင့် ကြိုဆိုကြသည်။

(သတင်းစဉ်)