စစ်တွေ အောက်တိုဘာ ၁၃
ပြည်ထောင်စုဝန်ကြီး ဒေါက်တာ ဖေမြင့်၊
ဦးသိန်းဆွေ၊ ပြည်နယ်ဝန်ကြီးချုပ် ဦးညီပုနှင့် အဖွဲ့သည် အောက်တိုဘာ ၉ ရက်က အကြမ်းဖက်စီးနင်းတိုက်ခိုက်ခံခဲ့ရသည့်
မောင်တောမြို့နယ် ကျီးကန်းပြင်ကွပ်ကဲမှု ဌာနချုပ်မှ ၀န်ထမ်းများ၊ မိသားစုများအား ယနေ့
နံနက်ပိုင်းတွင် သွားရောက်တွေ့ဆုံအားပေးပြီး ကျဆုံးတပ်ဖွဲ့ဝင်များ အတွက် ၎င်းတို့၏ မိသားစုဝင်များအား
ထောက်ပံ့ငွေများ ပေးအပ်သည်။
ပြည်ထောင်စုဝန်ကြီး ဒေါက်တာ ဖေမြင့်က
နိုင်ငံတော်အတွက် အသက်ပေးလှူ သွားသည့် တပ်ဖွဲ့ဝင်များ အတွက် စိတ်မကောင်းဖြစ်မိပါကြောင်း၊
အဆိုပါ ကျဆုံး၊ ဒဏ်ရာရ တပ်ဖွဲ့ဝင်များ၏ မိသားစုများအား အားပေးစကားပြောကြားလို၍ ယခုကဲ့သို့
ရောက်ရှိလာခြင်းဖြစ်ပါကြောင်း၊ သက်စွန့်ကြိုးပမ်းထမ်းဆောင်
ခဲ့သည့် နိုင်ငံ့ဝန်ထမ်း များကို လေးစားတန်ဖိုးထားပါကြောင်းနှင့် ထပ်တူ ၀မ်းနည်းရပါကြောင်း၊ ဤစခန်း၌ တာဝန်ထမ်းဆောင်နေကြသူများသည် နိုင်ငံ၏ နယ်နိမိတ်ကို
ကာကွယ်စောင့်ရှောက် နေသူများဖြစ်သည့် အတွက် ကျေးဇူးတင်ရှိပါကြောင်း ပြောကြားသည်။
ပြည်ထောင်စုဝန်ကြီး ဦးသိန်းဆွေက ယခုဖြစ်ရပ်အပေါ်
သင်ခန်းစာယူပြီး နောင် တွင် ပိုမိုစိတ်ချ ကောင်းမွန်သည့် အစီအစဉ်များကို ဆောင်ရွက်သွားမည်ဖြစ်ကြောင်း၊
ရုပ်ဝတ္ထုပစ္စည်းများ ဖြည့်တင်းခြင်း၊ စိတ်ပိုင်းဆိုင်ရာ ခွန်အားပြည့်အောင် ထောက်ပံ့
ကူညီခြင်းများဆောင်ရွက်သွားမည်ဖြစ်ကြောင်း၊ ရန်သူကို အပြီးအပိုင် ချေမှုန်းသွား မည်ဖြစ်ကြောင်း၊
ဤစခန်းရှိ တပ်ဖွဲ့ဝင်များ၊ အိမ်ထောင်သည်များ အနေဖြင့် တပ်မတော်နှင့် ပူးပေါင်းပြီး
ရန်သူကို အမြစ်ပြတ်ချေမှုန်းရန် ခွန်သစ်အားသစ်ဖြင့် ရှိစေလိုကြောင်း ပြောကြားသည်။
ပြည်နယ်ဝန်ကြီးချုပ် ဦးညီပုက ယခုဖြစ်စဉ်နှင့်
ပတ်သက်၍ စိတ်ဓာတ်ကျဆင်း ခြင်း၊ ၀မ်းနည်းပူဆွေးခြင်းဖြစ်ရန် မလိုကြောင်း၊ နိုင်ငံတော်၏
အတိုင်ပင်ခံပုဂ္ဂိုလ် ကလည်း ဤစခန်းရှိ အမျိုးသမီးများ၊ သက်ကြီးရွယ်အိုများ၊ ကလေးများ၏
လိုအပ်ချက် များကို မေးမြန်းပြီး ဖြည့်ဆည်းဆောင်ရွက်ပေးရန်မှာကြားထားပါကြောင်း ပြောကြား
သည်။
ထို့နောက် ဒုတိယ၀န်ကြီးများက ကျဆုံး၊
ဒဏ်ရာရ တပ်ဖွဲ့ဝင်များအား ရေရှည် အကျိုးခံစားခွင့်ရရှိရေး ဆက်လက်ဆောင်ရွက်ပေးရန် စီစဉ်ထားမှု၊ ဒဏ်ရာရ ၀န်ထမ်းများအား အကောင်းဆုံးဆေးကုသပေးလျက်ရှိမှု၊
မပြတ်လေ့ကျင့်နေပြီး လုံခြုံရေး သတိဖြင့် နေထိုင်ရန် လိုအပ်မှုနှင့် စိတ်ခွန်အားအပြည့်ဖြင့် အနာဂတ်တွင် ဆက်လက်ဆောင်ရွက်သွားရန်
ရှင်းလင်းပြောကြားခဲ့ကြသည်။
ထို့နောက် ပြည်ထောင်စုဝန်ကြီးများ၊ ပြည်နယ်ဝန်ကြီးချုပ်နှင့်
ဒုတိယ၀န်ကြီးများ က အောက်တိုဘာ ၉ ရက်ဖြစ်စဉ်တွင် ကျဆုံး၊ ဒဏ်ရာရရှိသည့်တပ်ဖွဲ့ဝင်များအတွက်
၎င်းတို့၏ မိသားစုဝင်များကို ထောက်ပံ့ငွေများ
ပေးအပ်သည်။
ယနေ့တွင် ကျဆုံးတပ်ဖွဲ့ဝင် ၉ ဦးအတွက်
ငွေကျပ် ၂၅၈ ဒသမ ၇၅ သိန်း၊ ဒဏ်ရာရ တပ်ဖွဲ့ဝင် ၅ ဦးအတွက် ငွေကျပ် ၇၂ ဒသမ ၅ သိန်း စုစုပေါင်း
၃၃၁ ဒသမ ၂၅ သိန်းကို ထောက်ပံ့ပေးအပ်ခဲ့ကြောင်း
သိရှိရသည်။
အခမ်းအနားအပြီးတွင် ပြည်ထောင်စုဝန်ကြီးများနှင့်
အဖွဲ့သည် တပ်ဖွဲ့ဝင်များ၊ မိသားစုများအား ရင်းရင်းနှီးနှီးနှုတ်ဆက်အားပေးခဲ့ကြသည်။
ယင်းနောက် ပြည်ထောင်စုဝန်ကြီးများနှင့်အဖွဲ့သည်
ဌာနချုပ်အတွင်း လှည့်လည် ကြည့်ရှုလေ့လာခဲ့ကြသည်။
No comments:
Post a Comment