Monday, October 10, 2016

ဒုတိယဝန်ကြီး ဒေါက်တာထွန်းဝင်း မြန်မာဆယ်မာအူးလ်အွန်ဒုန်စီမံကိန်း ကျေးရွာများ၏ စီမံကိန်းအကောင်အထည်ဖော် ဆောင်ရွက်နေမှုများကို ကြည့်ရှုစစ်ဆေးအားပေး

နေပြည်တော် အောက်တိုဘာ ၁၀
စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ဒုတိယဝန်ကြီး ဒေါက်တာထွန်းဝင်းသည် မြန်မာဆယ်မာအူးလ် အွန်ဒုန် စီမံကိန်း စီမံကိန်းမန်နေဂျာ Mr. Kin နှင့် ကိုရီးယားနိုင်ငံမှ စေတနာ့ဝန်ထမ်းများ လိုက်ပါသောအဖွဲ့သည် အောက်တိုဘာ (၉)ရက် နံနက်ပိုင်းတွင် နေပြည်တော်ကောင်စီနယ်မြေ၊ ဒက္ခိဏသီရိမြို့နယ် တဲကြီးကုန်းကျေးရွာ၊ ဂုံမင်းအင်းကျေးရွာနှင့် ရှားတောကျေးရွာများတွင် ဆောင်ရွက်လျက်ရှိသော ကျေးရွာသစ်စီမံကိန်းလုပ်ငန်းများ ဆောင်ရွက်အောင်မြင်နေမှုများ အား ကွင်းဆင်းကြည့်ရှုအားပေးကြပြီး ရှင်းလင်းဆောင်တွင် ကျေးရွာသစ်ခေါင်းဆောင်များက စီမံကိန်းအကောင်အထည် ဖော်နေမှုများ၊ ဆောင်ရွက်ပြီးစီးမှုများနှင့် ဆက်လက် အကောင်အထည်ဖော်မည့် ကျေးရွာဖွံ့ဖြိုးရေးဆိုင်ရာများအား ရှင်းလင်းတင်ပြကြသည်။

ထို့နောက် ကျေးရွာသူ ကျေးရွာသားများက ဆွေးနွေး တင်ပြကြရာ ဒုတိယဝန်ကြီးနှင့် ညွှန်ကြားရေးမှူးချုပ် ဒေါက်တာ ရဲတင့်ထွန်းတို့က ဖြေကြားရှင်းလင်း ဆွေးနွေးကြသည်။
၎င်းမှတဆင့်  လယ်ဝေးမြို့နယ် ကံသာကျေးရွာတွင်ကျင်းပသည့် မြန်မာ ဆယ်မာအူးလ် အွန်ဒုန်(ကျေးရွာသစ်) စီမံကိန်း ကျေးရွာရေပေးဝေရေးနှင့် ရေစင်ဖွင့်ပွဲ အခမ်းအနားသို့ တက်ရောက်အားပေးကြသည်။
ယင်းနောက် ကျေးရွာသစ်စီမံကိန်း ကျေးရွာဥက္ကဌများက ဒေသဖွံ့ဖြိုးရေး ဆောင်ရွက်နေမှုများကို ဆွေးနွေးတင်ပြကြပြီး နေပြည်တော်ကောင်စီဝင် ဦးအေးမောင်စိန်၊ ဒုတိယ ညွှန်ကြားရေးမှူးချုပ် ဦးအေးကိုကိုနှင့် စီမံကိန်းမန်နေဂျာ Mr. Kin တို့က ဖြည့်စွက်ဆွေးနွေးကြသည်။
ဒုတိယဝန်ကြီးက ဆွေးနွေးမှာကြားရာ၌ ကိုရီးယားသမ္မတနိုင်ငံအနေဖြင့် ပြည်ပ၏ အကြိမ်ကြိမ်ကျူးကျော်စစ်ပွဲများ ခံစားခဲ့ရသကဲ့သို့ နှစ်ရှည်လများ ပြည်တွင်းစစ်၏ နှိပ်စက်ခံခဲ့ရမှုတို့ကြောင့် များစွာဆင်းရဲချို့တဲ့ခဲ့ရကြောင်း၊ ရေမြေ ရာသီဥတု၏ အကန့်အသတ်များစွာကို အန်တုကာ မြေဆီမြေနှစ် ရှားပါးသောမြေပေါ်တွင် ခက်ခက်ခဲခဲ စိုက်ပျိုးလုပ်ကိုင် စားသောက်ခဲ့ကြရပြီး တာဝန်ရှိသူတို့၏ မှန်ကန်သောခေါင်းဆောင်ပေးမှု၊ ပြည်သူတို့၏ ဇွဲ၊ လုံ့လ၊ ဝီရိယ ထက်သန်စွာဖြင့် ညီညီညွတ်ညွတ် ကြိုးပမ်းခဲ့မှုများကြောင့် ယနေ့ကမ္ဘာ့အဖွံ့ဖြိုးဆုံး နိုင်ငံအဖြစ် ရပ်တည်နိုင်ခဲ့ပါကြောင်း၊
ယခုကဲ့သို့ ကိုရီးယားနိုင်ငံမှ မိတ်ဆွေအဖွဲ့ အစည်းများ၏ အကူအညီပေးမှုဖြင့် မိမိတို့ဒေသဖွံ့ဖြိုးရေးလုပ်ငန်းများ ဆောင်ရွက်ကြရာတွင် ယင်းတို့၏ ကြိုးစား ဆောင်ရွက်ခဲ့မှုများကို စံနမူနာဖြစ် ခံယူပြီး အားထုတ်ကြိုးပမ်းကြစေလိုကြောင်း၊
ကျေးလက်နေပြည်သူ ၇၀% သည် မြေယာမဲ့များဖြစ်ရာ အိမ်တွင်းအသေးစား ကုန်ထုတ် လုပ်မှုလုပ်ငန်းများ ထူထောင် လုပ်ကိုင်နိုင်ရေး၊ တီလားဘီးယားငါးကဲ့သို့ ဝန်ပေါ့ ငွေပေါ် ငါးမွေးခြင်း၊ မွေးဘက်ပေး ဝက်မွေးခြင်း စသည့်မွေးမြူရေး လုပ်ငန်းများလုပ်ကိုင်နိုင်ရေး၊ ဝင်ငွေရနိုင်သကဲ့သို့ ထွက်ငွေကိုလည်း ကာမိနိုင်သည့် ခြံဝင်းအတွင်း မြေပိုလေးများတွင် စိုက်ပျိုး လုပ်ကိုင်နိုင်ရေးတို့အတွက် ရင်းနှီး မတည်ငွေ၊ နည်းပညာနှင့် မျိုးရရှိရေး၊ စုပေါင်းစိုက်ပျိုး မွေးမြူရေး အခြေခံသည့် သမဝါယမလုပ်ငန်းများကို ဥပဒေနှင့်အညီ ထူထောင်လုပ်ကိုင်နိုင်ရေးတို့အတွက် ဖြည့်ဆည်းကူညီပေးမည်ဖြစ်ရာ အတူတကွ ပူးပေါင်းပါဝင်ကြိုးစားဆောင်ရွက်ကြရေး ဆွေးနွေးအမှာစကားပြောကြားခဲ့သည်။

ထို့နောက် လယ်ဝေးမြို့နယ် ကံသာကျေးရွာ၊ သော်မှော်ကုန်းကျေးရွာ၊ ကျွန်းကုန်း ကျေးရွာများမှ မြန်မာဆယ်မာအူးလ် အွန်ဒုန် (ကျေးရွာသစ်) စီမံကိန်းတာဝန်ရှိသူများအား ဒုတိယဝန်ကြီးနှင့် နေပြည်တော်ကောင်စီဝင် ဦးအေးမောင်စိန်တို့က ဂုဏ်ပြုမှတ်တမ်းလွှာများ ပေးအပ်ခဲ့ကြကြောင်း သတင်းရရှိသည်။

No comments:

Post a Comment