Sunday, January 31, 2016

လားရှိုး-မူဆယ်လမ်းပိုင်း ယာဉ်ကြောပိတ်ဆို့မှုလျော့နည်းရေး ကုန်တင် ယာဉ်ကြီးများအား ဖြတ်သန်း သွားလာချိန် သတ်မှတ်


လားရှိုး ဇန်နဝါရီ ၃ဝ
ရှမ်းပြည်နယ်(မြောက်ပိုင်း) ကွတ်ခိုင်ရှုခင်းသာ နမ့်ဖတ်ကာလမ်းပိုင်းတွင် ၂ဝ၁၅ ခုနှစ် ဒီဇင်ဘာလနှင့် ၂ဝ၁၆ ခုနှစ် ဇန်နဝါရီလအတွင်း ယာဉ်ကြောပိတ်ဆို့မှုများ မကြာခဏ ဖြစ်ပွားလျက်ရှိသည်။

ယာဉ်ကြောပိတ်ဆို့ရခြင်း အကြောင်းအရင်းမှာ ယင်းလမ်းပိုင်းသည် မိုင် ၃ဝ ခန့်ရှည်လျားခြင်း၊ လမ်းအကွေ့ အကောက်များပေါ များခြင်း၊ လမ်းကျဉ်း ပိုင်းများဖြစ်နေ၍ ယာဉ်တစ်စီးနှင့်တစ်စီး မျက်နှာချင်းဆိုင် မမြင် တွေ့ရဘဲ မျက်ကွယ်များဖြစ်ကာ ယာဉ်နှစ်စီး ရုတ်တရက်တွေ့ကြသဖြင့် ယာဉ်တိမ်းမှောက် မှုများ၊ ယာဉ်ကြံ့ခိုင်ရေး စိစစ်မှုအားနည်းခြင်းများ၊ ယာဉ်မောင်းများ ကျွမ်းကျင်မှုနည်းပါးခြင်း၊ ယင်းလမ်းပိုင်းသည် ကတ္တရာ ခင်းထားသည့် အကျယ်ပေ ၂ဝ ခန့်သာရှိပြီး လမ်းချိုင့်၊ လမ်းခွက်များ ထူပြောသဖြင့် ယာဉ်ကြီးများ အထူးသဖြင့် (၂၂) ဘီးယာဉ်ကြီးများ မှာ ရှောင်တိမ်းမောင်းနှင်ရ၍ လမ်းချော်ကာ တိမ်းမှောက်မှုများ၊ ဂီယာပေါက်ချွတ်ယွင်းခြင်းများ၊ ကရောင်းကြွေခြင်းများကြောင့် ဖြစ်သည်။
ယာဉ်မောင်းအချို့သည် အသက်အရွယ်ငယ်လွန်းကာ ယာဉ်စည်းကမ်း၊ လမ်းစည်းကမ်းလိုက်နာမှုအားနည်းပြီး သတ်မှတ်လိုင်စင်ဖြင့် မမောင်းနှင်ခြင်း၊ တောင်ပေါ်ဒေသလမ်းကြောအနေအထား မကျွမ်းကျင်ဘဲ သူ့ထက်ငါ အပြိုင် ကျော်တက်မောင်းနှင်ခြင်းများကြောင့် မလိုလားအပ်သော ထိခိုက်နစ်နာမှု၊ ယာဉ်တိုက်မှု၊ ယာဉ်တိမ်း မှောက်မှုများဖြစ်ပြီး အသက် အန္တရာယ်ဖြစ်ကာ ယာဉ်ကြောပိတ်ဆို့မှုများ မကြာခဏဖြစ်ပေါ်ကြုံတွေ့ ခဲ့ကြရသည်။
အချိန်အခါအားဖြင့်လည်း ပြောင်း၊ ဖရဲ၊ သခွားမွှေးရာသီပေါ် သီးနှံပေါ်သည့်အချိန်ဖြစ်နေခြင်းကြောင့် အနယ်နယ်အရပ်ရပ်မှ ယာဉ်ကြီးများ မူဆယ်မြို့သို့ လာရောက်ကြသည့်အတွက် အတက်/အဆင်း ယာဉ်စီးရေ များပြားလာသဖြင့် ယာဉ်ကြောကျပ်၍ ပိတ်ဆို့မှုများဖြစ်လာခဲ့သည်။ ယင်းလမ်းပိုင်းအတွင်း အကြောင်း အမျိုးမျိုးကြောင့် ယာဉ်ကြော ပိတ်ဆို့မှုများဖြစ်ပွားလာပါက သတင်းရရှိလျှင်ရရှိခြင်း အချိန်နှင့်တစ်ပြေးညီ အမှတ်(၂ဝ) ယာဉ်ထိန်း ရဲတပ်ဖွဲ့ခွဲ [ရှမ်းမြောက်/ကွပ်ကဲမှုအောက်ရှိ အမှတ်(၁၂၂)ယာဉ်ထိန်းရဲတပ်ဖွဲ့စု (မူဆယ်)]မှ ထုတ်နုတ်အင်အား ကွတ်ခိုင်အခြေပြုနှင့် နယ်မြေခံရဲတပ်ဖွဲ့ဝင်များ ပေါင်းစပ်၍ ရှင်းလင်း ဆောင်ရွက်မှုများ ပြုလုပ်၍ လုံလောက်မှုမရှိပါက ၁ဝ၅ မိုင် ကုန်သွယ်ရေးဇုန်တွင် တာဝန်ထမ်းဆောင်နေသော ယာဉ်ထိန်း ရဲတပ်ဖွဲ့ဝင်များနှင့် အမှတ်(၂ဝ)ယာဉ်ထိန်းရဲ ဒုတပ်ဖွဲ့ခွဲမှ ထုတ်နုတ်အင်အားများ ပေါင်းစပ်ပြီး ယာဉ်ကြောရှင်းလင်းနိုင်ရေး၊ ခရီးသွားပြည်သူများ ခရီးချောမောစွာ သွားရောက်နိုင်ရေးအတွက် ဆောင်ရွက် လျက်ရှိကြသည်။
လမ်းအသုံးပြုသူယာဉ်မောင်းများ စည်းကမ်းစနစ်တကျရှိစေရန်၊ ယာဉ်စည်းကမ်း၊ လမ်းစည်းကမ်း လိုက်နာမှု ရှိစေရန် အမှတ်(၂ဝ)ယာဉ်ထိန်းရဲ ဒုတပ်ဖွဲ့ ခွဲမှူးရုံး၊ ရုံးအခြေစိုက်ရာဒေသလားရှိုးမြို့ မြို့ရှောင်လမ်းနှင့် နမ္မတူ လမ်းဆုံတွင် ဒုတပ်ဖွဲ့ခွဲမှူး ရဲမှူးမျိုးမင်းအောင်ဦးစီး၍ ခရိုင်ယာဉ် စည်းကမ်းထိန်းသိမ်းရေး ကြီးကြပ်မှုကော် မတီဝင်များ၊ နယ်မြေခံ သတင်း မီဒီယာများ ပါဝင်ပူးပေါင်းအဖွဲ့များဖြင့် ယာဉ်စည်းကမ်း၊ လမ်းစည်း ကမ်း ရှောင်တခင်စစ်ဆေး၍ ၂ဝ၁၅ ခုနှစ် မော်တော်ယာဉ်ဥပဒေသစ်ဖြင့် ထိထိရောက်ရောက်အရေးယူ ဆောင်ရွက် လျက်ရှိပြီး ယာဉ်ကြော ပိတ်ဆို့ မှုလျော့နည်းစေရေး၊ ယာဉ်မတော်တဆမှုများ လျော့နည်း ကျဆင်းရေးအတွက် မြို့တွင်း၊ မြို့ပြင် အရှိန်ဟုန်မပျက်လုပ်ဆောင် လျက်ရှိသည်။
ဆက်လက်ပြီးရှမ်းပြည်နယ်(မြောက်ပိုင်း) ယာဉ်စည်းကမ်း၊ လမ်းစည်းကမ်း ထိန်းသိမ်းရေးကြီးကြပ်မှု ကော်မတီ နှင့် ORIENTAL HIGHWAY ကုမ္ပဏီနှင့် ပူးပေါင်း၍ လားရှိုး-မူဆယ်လမ်းပိုင်း၌ ယာဉ်ကြော ပိတ်ဆို့ မှု လျော့နည်းကျဆင်းရေး အတွက် ရှမ်းပြည်နယ်(မြောက်ပိုင်း) လမ်းပိုင်းဖြတ်သန်းခ တာဝန်ယူကောက်ခံနေသော ORIENTAL HIGHWAY ကုမ္ပဏီက ၎င်းတို့ တိုးဂိတ်အဝင်/အထွက်များတွင် ယာဉ်မောင်းသူများ အချိန်ပိုင်း လိုက်နာ ဆောင်ရွက်ရမည့် အချိန်ဇယားစည်းကမ်းချက်များအား ဗီနိုင်းများဖြင့် စိုက်ထူထားသည်။
မန္တလေး၊ မူဆယ်သို့ အသွားအပြန်သွားသော ကုန်တင်ယာဉ်ကြီးများ ယခု ရက်ပိုင်းအတွင်း နံနက် ၆ နာရီမှ နံနက် ၁ဝ နာရီထိ မူဆယ်မှ လားရှိုးအဆင်း ကားများကို လည်းကောင်း၊ မွန်းတည့် ၁၂ နာရီမှ ညနေ ၄ နာရီအထိ ကွတ်ခိုင်မှ မူဆယ်အတက်ကားများကိုလည်းကောင်း၊ ညနေ ၆ နာရီမှ ည ၈ နာရီအထိ မူဆယ်မှ လားရှိုးအဆင်းကားများကို လည်းကောင်း၊ ည ၁ဝ နာရီမှ နံနက် ၄ နာရီအထိ ကွတ်ခိုင်မှမူဆယ်အတက် ကားများကို လည်းကောင်း လွှတ်မည်ဖြစ်ပြီး နံနက် ၄ နာရီတွင် ကွတ်ခိုင်တိုးဂိတ်ကို ပြန်ပိတ်ထားမည်။ ကြားအချိန် နှစ်နာရီကာလသည် ယာဉ်ကြောပိတ်ဆို့မှုဖြစ်သည့် ကွတ်ခိုင်၊ နမ့်ဖတ်ကာကြား မော်တော်ယာဉ် များဖြတ်သန်းသွားလာချိန်အဖြစ် သတ်မှတ်ထားသည်။ ယာဉ်ငယ်များနှင့် ခရီးသည်တင် Express ကားများ မပါကြောင်း ရှမ်းပြည်နယ်(မြောက်ပိုင်း) ယာဉ်စည်းကမ်း ထိန်းသိမ်းရေးဆပ်ကော်မတီက သတင်းထုတ်ပြန် ထားကြောင်း သိရသည်။
မှုခင်းသတင်းထောက်အဖွဲ့(လားရှိုး)

No comments:

Post a Comment