ပြုပြင်ပြောင်းလဲမှုများကို နိုင်ငံတော်အစိုးရအနေဖြင့် နောက်ဆုံးအချိန်အထိ ဇွဲ၊ လုံ့လ စိုက်ထုတ် ကြိုးပမ်းသွားမည်

နေပြည်တော် စက်တင်ဘာ ၂၄

ပြုပြင်ပြောင်းလဲရေးဦးဆောင်ကော်မတီ အစည်းအဝေးကို ယနေ့ နံနက် ၁၀ နာရီတွင် နိုင်ငံတော်သမ္မတရုံး အစည်းအဝေးခန်းမ၌ ကျင်းပရာ ပြုပြင်ပြောင်းလဲရေး ဦးဆောင်ကော်မတီဥက္ကဋ္ဌ နိုင်ငံတော်သမ္မတ ဦးသိန်းစိန် တက်ရောက်အမှာစကား ပြောကြားသည်။

အဆိုပါအစည်းအဝေးသို့ ဒုတိယသမ္မတ ဒေါက်တာ စိုင်းမောက်ခမ်းနှင့် ဦးဥာဏ်ထွန်း၊ ပြည်ထောင်စုဝန်ကြီးများနှင့် တာဝန်ရှိသူများ တက်ရောက်ကြသည်။

အစည်းအဝေးတွင် ပြုပြင်ပြောင်းလဲရေး ဦးဆောင်ကော်မတီ ဥက္ကဋ္ဌ နိုင်ငံတော် သမ္မတ ဦးသိန်းစိန်က အမှာစကားပြောကြားရာတွင် မိမိတို့အစိုးရအနေဖြင့် နိုင်ငံတော် တာဝန်ကို စတင်တာဝန်ယူစဉ်ကတည်းကပင် ပြုပြင်ပြောင်းလဲမှုများ တစိုက်မတ်မတ် ကြိုးပမ်းဆောင်ရွက်ခဲ့ရာ ယခုဆိုလျှင် လေးနှစ်ကျော်၊ ငါးနှစ် နီးပါးရောက်ခဲ့ပြီ ဖြစ်ပါ ကြောင်း၊ ထင်သာမြင်သာမှုများ၊ ပြည်သူများ တိုက်ရိုက်အကျိုးသက်ရောက်မှု များရှိသကဲ့သို့ နှစ်ကာလရှည်ကြာစွာအကျိုးရှိရန် အခြေခံအုတ်မြစ်ခင်းခဲ့ရခြင်းများ လည်း ရှိခဲ့ပါကြောင်း။

၂၀၁၁ ခုနှစ်က မိမိပြည်သူများထံ တင်ပြခဲ့သော သမ္မတတာဝန် စတင် ထမ်းဆောင်သည့် မိန့်ခွန်းကိုကြည့်လျှင် မိမိတို့၏ ရည်မှန်းချက်ကို ကွက်ကွက် ကွင်းကွင်း သိရှိနိုင်မည်ဖြစ်ပါကြောင်း၊ မိမိတို့အစိုးရ တာဝန်ယူစဉ်ကတည်းက လုပ်ဆောင်စရာ အများကြီးအနက်မှ  ဆင်းရဲမှုလျော့နည်းပပျောက်ရေးနှင့် ကျေးလက် ဒေသဖွံ့ဖြိုးတိုးတက်ရေးကို ရွေးချယ်ပြီး မူဝါဒလုပ်ငန်းစဉ်များ ချမှတ်ခဲ့ပါကြောင်း၊  သိသာမှုများ၊  မြင်သာထင်သာမှုများအနက် မြစိမ်းရောင်စီမံချက်၊ ကမ္ဘာ့ဘဏ်၏ CDD စီမံချက်များ ဖြစ်ပါကြောင်း၊ ထို့အတူ နယ်စပ် ဒေသဖွံ့ဖြိုးတိုးတက်ရေးနှင့် ကျေးလက် ဒေသဖွံ့ဖြိုးတိုးတက်ရေးတို့အတွက် ဟန်ချက်ညီညီ ကြိုးပမ်းဆောင်ရွက်မှုများကိုလည်း တွေ့နိုင်ပါကြောင်း။

အဓိကအားဖြင့် နိုင်ငံရေးပြုပြင်ပြောင်းလဲမှု၊ လူမှုစီးပွားရေး ပြုပြင်ပြောင်းလဲမှု၊ အုပ်ချုပ်ရေးပြုပြင်ပြောင်းလဲမှု၊ ပုဂ္ဂလိကကဏ္ဍ ပြုပြင်ပြောင်းလဲမှုများ ဖြစ်ပါကြောင်း၊  နိုင်ငံရေးပြုပြင်ပြောင်းလဲရာတွင်  နိုင်ငံရေးလွတ်လပ်မှု၊ နိုင်ငံရေးပါတီများ ဖွဲ့စည်းနိုင်မှု၊ မကြာခင်ကျင်းပမည့်  ရွေးကောက်ပွဲများအပြင် လူမှုအဖွဲ့အစည်းများ ဖွဲ့စည်းမှု၊ သတင်းမီဒီယာလွတ်လပ်ခွင့်၊ လွတ်လပ်စွာ ဆန္ဒထုတ်ဖော်ခွင့်၊ လူ့အခွင့်အရေး ပြဿနာများ လျော့ပါးလာစေမှုအပါအဝင် နိုင်ငံရေးအကျဉ်းသား အများအပြားကို လွတ်ငြိမ်းခွင့်ပေးခဲ့ပါကြောင်း၊ ငြိမ်းချမ်းရေးကြိုးပမ်းမှုကိုလည်း ဦးစားပေးအဆင့် အနေဖြင့်  ယခုအချိန်အထိ တစိုက်မတ်မတ် ဆောင်ရွက်နေသည်ကို  အားလုံးအသိ ပင် ဖြစ်ပါကြောင်း။

နိုင်ငံတကာဆက်ဆံရေးနယ်ပယ်တွင်  ယခင်နှင့်မတူ ထူးခြားစွာ ပြောင်းလဲနိုင်ခဲ့ သဖြင့် ဒေသတွင်းရော၊ အပြည်ပြည်ဆိုင်ရာကပါ အသိအမှတ်ပြု ကူညီဆက်ဆံခဲ့သည် ကို တွေ့ရှိနိုင်ပါကြောင်း၊  အာဆီယံအခမ်းအနားများ၊ အားကစားပြိုင်ပွဲများကို အောင်မြင်စွာ ဆောင်ရွက်နိုင်ခဲ့ခြင်းသည်လည်း တိုးတက်မှုတစ်ရပ် ဖြစ်ပါကြောင်း၊ လူမှုစီးပွားဘဝပြုပြင်ပြောင်းလဲမှု များစွာ ကြိုးပမ်းဆောင်ရွက်ရာတွင်  Framework for Economic and Social Reforms (FESR) ကို မူချမှတ်ပြီး ပြောင်းလဲစေခဲ့ပါကြောင်း၊ ငွေရေးကြေးရေးဘဏ္ဍာရေးကဏ္ဍ တိုးတက်မှုသည်  သိသာထင်ရှားလှပါကြောင်း။

ကမ္ဘာ့ဘဏ်နှင့် အပြည်ပြည်ဆိုင်ရာ ငွေကြေးရန်ပုံငွေအဖွဲ့ (IMF) ကဲ့သို့သော အဖွဲ့အစည်းများ၏  နည်းပညာအထောက်အပံ့များကလည်း ထိရောက်သည့်  ပြုပြင် ပြောင်းလဲမှုရရှိခဲ့ပါကြောင်း၊  ယခုဆိုလျှင် ဗဟိုဘဏ်သည် သီးခြားအဖွဲ့အစည်းဖြစ်လာ သကဲ့သို့ ဘဏ္ဍာရေးဝန်ကြီးဌာနသည်လည်း သီးခြားအဖွဲ့အစည်း ဖြစ်လာခဲ့ပါကြောင်း၊  Monetary Policy နှင့် Fiscal Policy သီးခြားစီလုပ်ဆောင်နေသည်ကို တွေ့ရပြီ ဖြစ်ပါကြောင်း။

  ပြည်သူ့ဘဏ္ဍာစီမံခန့်ခွဲမှု (Public Financial Management - PFM) လုပ်ငန်း များ  ပိုမိုထိရောက်လာသကဲ့သို့  Treasury Department ကလည်း ပီပြင်လာပြီ ဖြစ်ပါကြောင်း၊ အခွန်အကောက်စနစ်များ ပိုမိုပီပြင်လာခြင်းကြောင့် ၂၀၁၁-၂၀၁၂ ဘဏ္ဍာနှစ်တွင်  ငွေကျပ် ၁ ဒသမ ၆၉ တြီလီယံမှ ၂၀၁၅-၂၀၁၆ ဘဏ္ဍာနှစ်တွင်  ငွေကျပ် ၅ ဒသမ ၉ တြီလီယံအထိ  ရရှိခဲ့ပြီး  GDP Tax ratio များ တစတစ မြင့်မားလာသည်ကို တွေ့ရပါကြောင်း။

 ပြည်တွင်းဘဏ်လုပ်ငန်းများ ဖွံ့ဖြိုးရန် လုပ်ဆောင်နေရသကဲ့သို့ ပြည်ပဘဏ်များ ၏  အခန်းကဏ္ဍကိုလည်း စတင်ပေးနိုင်ခဲ့ပါကြောင်း၊ Mobile Payment စနစ်များ  တဖြည်းဖြည်း ကူးပြောင်းလာစေမည် ဖြစ်ပါကြောင်း၊  ပြည်သူများက ဘဏ်များအပေါ် ပိုမိုယုံကြည်အသုံးပြုရန်လည်း ကြိုးစားနေပါကြောင်း၊ 

ပညာရေးကဏ္ဍတွင်  ပြည်သူများ သိသာထင်ရှားစေသည့်  ရလဒ်မှာ အထက်တန်း အဆင့်အထိ အခမဲ့ပညာရေး ဆောင်ရွက်ပေးနိုင်ခဲ့ခြင်း ဖြစ်ပါကြောင်း၊ တက္ကသိုလ် အဆင့်များတွင်  စကော်လားရှစ်၊ စတိုင်ပင် အသုံးစရိတ်များ ပိုမိုသုံးစွဲပေးနေသကဲ့သို့  စနစ်တကျဖြစ်ရန်လည်း လုပ်ဆောင်နေပါကြောင်း၊ ထူးခြားမှုတစ်ခုမှာ  နိုင်ငံတော် သမ္မတ၏  ပညာသင်ဆုချီးမြှင့်ပေးခဲ့ခြင်း ဖြစ်ပါကြောင်း၊ ယင်းမှာ အနာဂတ် နိုင်ငံတော် အတွက် ရင်းနှီးမြှုပ်နှံခြင်းဖြစ်ပါကြောင်း၊  ယခုအချိန်အထိ သြစတြေးလျ၊ ဂျာမနီ၊ ယူကေ၊ အမေရိကန်၊ တရုတ်နှင့် ထိုင်းနိုင်ငံတို့သို့ ပညာတော်သင် ၁၁၆ ဦး စေလွှတ်ခဲ့ပြီးဖြစ်ပါကြောင်း။

အထူးလိုအပ်နေသည့် မူလတန်း၊ အလယ်တန်း၊ အထက်တန်း ကျောင်းဆရာ၊ ဆရာမများလည်း သောင်းနှင့်ချီ၍ ခန့်ထားခဲ့ပါကြောင်း၊  တစ်ဘက်မှလည်း အလုပ်အကိုင်ရရှိရန်၊  ကျွမ်းကျင်လုပ်သားများ မွေးထုတ်ပေးရန် အသက်မွေးဝမ်း ကျောင်းပညာရေး မြှင့်တင်ပေးသည့် အနေဖြင့် Vocational Training ကို အရှိန်အဟုန်ဖြင့် လုပ်ဆောင်နေပါကြောင်း။

ကျန်းမာရေးပြုပြင်ပြောင်းလဲမှု၏ အဓိကမှာ ပြည်သူစိုက်ထုတ်ရသည့် ကုန်ကျ စရိတ်များ  လျော့နည်းစေရန်၊ ဆေးရုံကြီးငယ်၊ တိုက်နယ်ဆေးရုံ၊ ကျေးလက် ဆေးပေး ခန်းအထိ ဝန်ဆောင်မှုများ ပီပြင်စေသည့်အပြင် ကျန်းမာရေးအသုံးစရိတ်များလည်း တိုးတက်လာသည်ကို တွေ့ရမည်ဖြစ်ပါကြောင်း၊  ဆရာဝန်၊ သမားတော်ကြီးများ သာမက သူနာပြုသားဖွားဝန်ထမ်းများပါ ပိုမိုမွေးထုတ်လျက်ရှိပါကြောင်း။

မကြာခင်တွင် တောင်ကြီးဆေးတက္ကသိုလ်ကို ဖွင့်လှစ်ပေးသွားမည်ဖြစ်ပါကြောင်း၊ ပြည်သူလူထု၏ လူမှုစီးပွားဘဝတိုးတက်စေရန်၊  အလုပ်အကိုင်တွေရရှိစေရန် အစိုးရအနေဖြင့်  တစ်ဘက်က ငွေကြေးအခြေအနေအရ ကြိုးပမ်းနေသကဲ့သို့ ပြည်တွင်း ပြည်ပ ရင်းနှီးမြှုပ်နှံမှုများလည်း တစတစ တိုးတက်နေရာ၊ ၂၀၁၁-၂၀၁၂ ဘဏ္ဍာနှစ်မှ ၂၀၁၄-၂၀၁၅ ဘဏ္ဍာနှစ်၊ ယနေ့အထိ နိုင်ငံခြားရင်းနှီးမြှုပ်နှံမှုပမာဏ USD  ၁၈ ဘီလီယံကျော် ရှိပြီး ရင်းနှီးမြှုပ်နှံမှုပမာဏ၏  ၃၃ ရာခိုင်နှုန်း ဆောင်ရွက် နိုင်ပြီဖြစ်ပါကြောင်း။

ပြည်တွင်းရင်းနှီးမြှုပ်နှံမှုအနေဖြင့် ၂၀၁၁-၂၀၁၂ ဘဏ္ဍာနှစ်မှ ၂၀၁၄-၂၀၁၅ ဘဏ္ဍာနှစ် ယနေ့အထိ နိုင်ငံသားရင်းနှီးမြှုပ်နှံမှုပမာဏ ကျပ် ၃၈ တြီလီယံကျော်ရှိပြီး ရင်းနှီးမြှုပ်နှံမှုပမာဏ၏ ၆၇ ရာခိုင်နှုန်း ဆောင်ရွက်နိုင်ပြီ ဖြစ်ပါကြောင်း၊  ရင်းနှီးမြှုပ်နှံ သူများ လွယ်ကူစွာဆောင်ရွက်နိုင်ရန် ရန်ကုန်မြို့တွင် One Stop Service ရုံးဖွင့်ပြီး ဆောင်ရွက်ပေးနိုင်ခဲ့ပါကြောင်း။

မိမိတို့ ကြိုးစားကြရဦးမည်မှာ  Productivity မြှင့်တင်ရန် ဖြစ်ပါကြောင်း၊  ပြည်ပပို့ ကုန်များ ပိုမိုထုတ်လုပ်ကြရန် နိုင်ငံခြားရင်းနှီးမြှုပ်နှံမှု၊ နည်းပညာ၊ ကျွမ်းကျင်လုပ်သား နှင့် ဈေးကွက်များ ပူးပေါင်းချိတ်ဆက်ကြရန် ဖြစ်ပါကြောင်း၊ တိုင်းပြည်ဖွံ့ဖြိုး တိုးတက် အောင် ကြိုးပမ်းနေမှုအပေါ် နိုင်ငံတကာအဖွဲ့အစည်းများက ကူညီထောက်ပံ့ငွေ အမေရိကန်ဒေါ်လာ ၃ ဒသမ ၅၁၃ ဘီလီယံ ရယူနိုင်ခဲ့ပြီး ၂ ဒသမ ၀၇၃ ဘီလီယံ လက်ဝယ်အသုံးပြုနေပြီ ဖြစ်ပါကြောင်း.

  တိုင်းပြည်တိုးတက်ရန် နိုင်ငံတကာမှ အတိုးနှုန်းသက်သာသော ချေးငွေများနှင့်  Infrastructure များ တည်ဆောက်ရပါကြောင်း၊ ထို့အတွက် မိမိတို့ နိုင်ငံခြားချေးငွေ အမေရိကန်ဒေါ်လာ ၆ ဒသမ ၇၅၃ ဘီလီယံ ရယူခဲ့ပြီး လက်ရှိ ၁ ဒသမ ၅၀၆ ဘီလီယံ သုံးစွဲဆောင်ရွက်နေသည်ကို တွေ့နိုင်ပါကြောင်း၊ မြို့ရွာများ စနစ်တကျ တိုးတက်စေရန် Township Development Plan များ ရေးဆွဲပြီး ရေရှည်ဖွံ့ဖြိုးတိုးတက်ရန် လုပ်ဆောင်နေပါကြောင်း။

 လူဦးရေ  (၁) သိန်းအထက် မြို့ကြီးများအတွက် စီမံချက်များ ရေးဆွဲပြီးဖြစ်ပါ ကြောင်း၊ Affordable Housing ၊ Rental Housing  အိမ်ရာများကို တိုင်းဒေသကြီးနှင့် ပြည်နယ်အနှံ့ ငွေကျပ် ၄၆ ဘီလီယံ အကုန်အကျခံ၍ ဖော်ထုတ်ပေးနေပါကြောင်း၊ မြို့ရွာများတွင် ဂရန်များပေးရန် စတင်နေပြီ ဖြစ်ပါကြောင်း။

  စီးပွားရေးမူဝါဒထဲမှ Inclusive development,  Balance developement, Sustainable growth နှင့် စာရင်းဇယားမှန်ကန်ရန် အဓိကကျသည့်အတွက် ၂၀၁၄ ခုနှစ်တွင်  နှစ်ပေါင်း (၃၀) ကျော် မဆောင်ရွက်နိုင်ခဲ့သည့် လူဦးရေနှင့်  အိမ်ထောင်စု စီးပွားရေးသန်းခေါင်စာရင်း ကောက်ယူနိုင်ခဲ့ပါကြောင်း၊ ပြည်သူ့လူမှုစီးပွားဘဝတိုး တက်ရန်မှာ ICT ကဏ္ဍ ဖွံ့ဖြိုးမှုသည်လည်း ဆက်နွယ်နေပါကြောင်း၊ ထို့ကြောင့် မိုဘိုင်းဖုန်း သုံးစွဲမှုမှာ ၂၀၁၁ ခုနှစ်တွင်  ၅ ရာခိုင်နှုန်း အောက်ရှိရာမှ ယနေ့ ၂၀၁၅ ခုနှစ်တွင်  ၅၂ ရာခိုင်နှုန်းကျော် သုံးစွဲနေကြပြီ ဖြစ်ပါကြောင်း။ 

အလားတူ ခရီးသွားလုပ်ငန်းများ ဖွံ့ဖြိုးတိုးတက်မှုများလည်း တဟုန်ထိုး ဖွံ့ဖြိုးလာခဲ့ပါကြောင်း၊  လာမည့်နှစ်ကို နိုင်ငံခြားသားခရီးသွားဧည့်သည် ၅ သန်းအထိ မျှော်မှန်းထားရှိပြီး ပြင်ဆင်မှုများ စီမံနေသည်ကို တွေ့ရမည် ဖြစ်ပါကြောင်း၊  ထို့အတူ သွားလာမှုလွယ်ကူရေး၊ လမ်းများကောင်းမွန်ရေး အားလုံးကို သုံးသပ်လျှင် ပြောင်းလဲ လာသည်ကို တွေ့ရပါကြောင်း။

  တစ်ဘက်တွင် မြို့ကြီးများ တိုးတက်လာလျှင် တရားဥပဒေစိုးမိုးရေး၊ အုပ်ချုပ်ရေး စနစ် ကောင်းမွန်ရေး၊ မူးယစ်ဆေးဝါးအန္တရာယ်တားဆီးရေး၊ လူကုန်ကူးမှုအန္တရာယ် တားဆီးရေးတို့အပြင် ဘာသာရေး၊ လူမျိုးရေး ပဋိပက္ခများ၏ အန္တရာယ်များလည်း ရင်ဆိုင်နေရသည်ကို သတိပြုရမည်၊  တားဆီးရမည် ဖြစ်ပါကြောင်း။

 အုပ်ချုပ်ရေးပြုပြင်ပြောင်းလဲမှုတွင်  ပထမ၊ ဒုတိယ၊ တတိယ လှိုင်းများနှင့် တွန်းအားပေးနေသော်လည်း ဆက်လက်ကြိုးစားကြရပါအုံးမည် ဖြစ်ပါကြောင်း၊  အဓိကမှာ  ဝန်ထမ်းများ Capacity မြှင့်တင်ရန်နှင့်  Mindset များ ပြောင်းကြရန် ဖြစ်ပါကြောင်း၊  ယခင်က Institution များကို Reengineering လုပ်ဆောင်နေဆဲ ဖြစ်ပါကြောင်း၊  ပြည်သူဗဟိုပြုအုပ်ချုပ်ရေးစနစ် ပီပြင်အောင် အုတ်မြစ်ချပေးခဲ့သကဲ့သို့ မြို့တိုင်းတွင်  One Stop Shop ရုံးများ ဖွင့်လှစ်ပြီး ပြည်သူများ အုပ်ချုပ်မှုလွယ်ကူ စေအောင် ဆောင်ရွက်ပေးခဲ့ပါကြောင်း၊ ထို့အပြင် (၂၁) ဘီလီယံ အကုန်အကျခံပြီး စုပေါင်းရုံးများလည်း စတင် ဆောက်လုပ်နေပြီဖြစ်ပါကြောင်း၊ မကြာခင်တွင် e-government လုပ်ငန်းများ အသက်ဝင်လာမည်ဖြစ်ပါကြောင်း။

ဒီမိုကရေစီအစိုးရတစ်ရပ်အနေဖြင့် ပွင့်လင်းမြင်သာရန်၊  တာဝန်ယူ တာဝန်ခံရန် ၊ အဂတိလိုက်စားမှု၊ လာဘ်ပေးလာဘ်ယူမှုများ ကင်းရှင်းရန် ပပျောက်ရန် ဖြစ်ပါကြောင်း၊  လျော့ပါးလာသော်လည်း ယခုထက် ပိုမိုဆောင်ရွက်ရန် လိုပါကြောင်း၊ ပုဂ္ဂလိကကဏ္ဍ ပြုပြင်ပြောင်းလဲမှုများလည်း စီးပွားရေး၊ လူမှုရေးများတွင်  အဓိကကျပါကြောင်း၊ ကုမ္ပဏီ များစွာ ဖွင့်လှစ်လုပ်ကိုင်နေပါကြောင်း၊  လုပ်ငန်းရှင်များကိုယ်တိုင် Business ကျင့်ဝတ်များ လိုက်နာကြရန်၊ UN Global Compact အဖွဲ့ဝင်အဖြစ် ပါဝင်ကြရန်လည်း တိုက်တွန်းလိုပါကြောင်း၊ အစိုးရအနေဖြင့်  စစ်ဆေးရန်၊ ကြပ်မတ်ပေးရန် အကူအညီ ပေးသွားမည် ဖြစ်ပါကြောင်း။

အစိုးရနှင့်  ပုဂ္ဂလိက နှစ်ဦးနှစ်ဖက် ညီညီညွတ်ညွတ် တိုင်းပြည်စီးပွားရေး တိုးတက် အောင်လုပ်ကြရန် လိုပါကြောင်း၊ ယင်းသို့ပြုပြင်ပြောင်းလဲမှုများ ဆောင်ရွက်နေရင်း တစ်ဖက်မှလည်း ပြည်သူများ လတ်တလော လိုအပ်ချက်ဖြစ်သည့် လျှပ်စစ်မီးရရှိရေး၊ သောက်သုံးရေရရှိရေး၊ အလုပ်အကိုင်အခွင့်အလမ်းရရှိရေး၊ စိုက်ပျိုးရေးနှင့် မွေးမြူရေး တိုးတက်စေရေး၊ ခရီးသွားလုပ်ငန်းဖွံ့ဖြိုးတိုးတက်ရေး၊ ငွေကြေးကဏ္ဍ ဖွံ့ဖြိုးရေးနှင့် ကုန်သွယ်မှု၊ ရင်းနှီးမြှုပ်နှံမှု တိုးတက်စေရေးတို့ကို တပြိုင်နက် ဦးစားပေး ဆောင်ရွက် ပေးနေသည်ကို တွေ့ရှိနိုင်ပါကြောင်း၊  ပြုပြင်ပြောင်းလဲမှုများကို မိမိတို့အစိုးရအနေဖြင့် နောက်ဆုံးအချိန်အထိ ဇွဲ၊ လုံ့လ စိုက်ထုတ်ကြိုးပမ်းကြရန် ပြောကြားလိုပါကြောင်း။

သန့်ရှင်းသည့် အစိုးရ၊ ကောင်းမွန်သည့်အစိုးရ၊ ပွင့်လင်းသည့်အစိုးရဖြစ်အောင် မိမိအမြဲတိုက်တွန်းနှိုးဆော်နေသော်လည်း အားရကျေနပ်မှုမရှိသေးသည်ကို တွေ့ရပါ ကြောင်း၊  အပြည်ပြည်ဆိုင်ရာ စံနှုန်းတိုင်းတာသည့်  အဖွဲ့အစည်းများ၏ မှတ်ချက်များ အရ တိုးတက်မှုများ အသိအမှတ်ပြုနေသော်လည်း ယခုထက်အများကြီး ကြိုးပမ်း ဆောင်ရွက်ကြရမည်ဟု  သုံးသပ်ပြောကြားလိုပါကြောင်း ပြောကြားသည်။

ထို့နောက် ပြည်ထောင်စုဝန်ကြီး ဦးအောင်မင်းက နိုင်ငံရေးပြုပြင်ပြောင်းလဲရေး ဆောင်ရွက်မှုများနှင့် စပ်လျဉ်း၍ ဆောင်ရွက်နေဆဲ ငြိမ်းချမ်းရေး လုပ်ငန်းစဉ်အခြေ အနေကို အသေးစိတ် ရှင်းလင်းတင်ပြသည်။

ယင်းနောက် ပြည်ထောင်စုဝန်ကြီး ဦးစိုးသိန်းက စီးပွားရေးပြုပြင်ပြောင်းလဲရေး ဆောင်ရွက်မှုများအနက်မှ တိုးတက်ပြောင်းလဲလာမှုအပြင် လတ်တလော ငွေကြေး အခြေအနေ၊ ငွေကြေးဖောင်းပွမှုနှင့် ထိရောက်သော ငွေကြေးသုံးစွဲမှု လိုအပ်ချက် များကို တင်ပြသည်။

ဆက်လက်၍ ပြည်ထောင်စုဝန်ကြီးဦးလှထွန်းက အုပ်ချုပ်ရေးပြုပြင်ပြောင်းလဲရေး ဆောင်ရွက်မှုများအပြင် ဆက်လက် အကောင်အထည်ဖော်ရန် လိုအပ်သော မူဘောင် ဖြစ်ပေါ်ရေး တင်ပြသည်။

ထို့နောက် ပြည်ထောင်စုဝန်ကြီး ဦးဝင်းရှိန်နှင့် ဒေါက်တာကံဇော်တို့က နိုင်ငံတကာချေးငွေ အခြေအနေ၊ အခွန်အကောက်ရရှိမှု အခြေအနေနှင့် နိုင်ငံတကာ အထောက်အပံ့များ အကောင်အထည်ဖော်နိုင်မှုတို့ကို  ဆွေးနွေးတင်ပြကြသည်။

ယင်းနောက် ဒုတိယသမ္မတ ဦးဥာဏ်ထွန်းက ရေဘေးဒုက္ခသည်များ ပြန်လည်ထူထောင်ရေးလုပ်ငန်း အခြေအနေအပါအ၀င် ခြုံငုံသုံးသပ်ဖြည့်စွက် ဆွေးနွေး တင်ပြသည်။

ဆက်လက်၍ ဒုတိယသမ္မတ ဒေါက်တာ စိုင်းမောက်ခမ်းက ပြည်သူလူထု၏ အမြင်များကို ဖြည့်စွက်ဆွေးနွေးတင်ပြသည်။

ထို့နောက် နိုင်ငံတော်သမ္မတက နိဂုံးချုပ်အမှာစကားပြောကြားရာတွင် လေးနှစ်ကျော်ကာလအတွင်း မိမိတို့အစိုးရ၏ ကြိုးပမ်းဆောင်ရွက်မှုများမှာ ထင်သာ မြင်သာသော ပြောင်းလဲတိုးတက်မှုများ ရှိခဲ့သည်ကို မည်သူမျှ ငြင်း၍ မရပါကြောင်း၊  အလားတူ အားနည်းချက်၊ ချို့ယွင်းချက်များလည်း ရှိသည်ကို လက်ခံရမည် ဖြစ်ပါကြောင်း၊ ပြောင်းလဲတိုးတက်မှုများကို အားရကျေနပ်နေ၍ မရဘဲ တိုးတက်သည် ထက် တိုးတက်အောင်၊ အောင်မြင်သည်ထက် အောင်မြင်အောင် အားသွန်ခွန်စိုက် ဆက်လက် ကြိုးပမ်း ဆောင်ရွက်သွားရန်နှင့်  အားနည်းချက်များကို ဖော်ထုတ်ပြီး ပြင်ဆင်ဆောင်ရွက်သွားရန် လိုအပ်ပါကြောင်း၊ လက်တွေ့ဖြစ်ပျက်နေမှုများအပေါ် ကိုယ်တိုင်သိအောင်လုပ်ရန်၊ ပြည်သူလူထု အသံကို နားထောင်ရန်နှင့် ဝေဖန်မှုများ အပေါ် လက်ခံသုံးသပ်ရန်ဖြစ်ပြီး သို့မှသာ အမှားအမှန်ကို ခွဲခြားသိရှိဆောင်ရွက်နိုင် မည်ဖြစ်ကြောင်း။

သန့်ရှင်းသော အစိုးရ၊ ကောင်းမွန်သော အုပ်ချုပ်မှု ဖြစ်စေရန် ၀န်ထမ်းများ၏ အရည်အသွေးမြှင့်တင်ပေးရန် လိုအပ်သကဲ့သို့ ၀န်ထမ်းများ၏ စိတ်ဓာတ်ပိုင်း Mind - set များကိုလည်း ပြောင်းလဲပေးရန်လိုအပ်သလို သက်သာချောင်ချိရေး အလေးထား ဆောင်ရွက်ပေးရန် လိုအပ်ပါကြောင်း၊ တရားဥပဒေစိုးမိုးရေးသည် နိုင်ငံတည်ငြိမ်အေး ချမ်းရေးအတွက်သာမက နိုင်ငံဖွံ့ဖြိုးတိုးတက်ရေးအတွက်ပါ အဓိကကျပါကြောင်း၊ မှုခင်းများ လျော့နည်းကျဆင်းသွားအောင် ဆောင်ရွက်သွားရမည်ဖြစ်ပါကြောင်း၊ အုပ်ချုပ်ရေးအပိုင်းက ထိထိရောက်ရောက် ကြပ်မတ်ပေးရမည် ဖြစ်ပါကြောင်း၊ လက်ရှိရရှိထားသော အောင်မြင်မှုများကို ဆက်လက်ထိန်းသိမ်းပြီး ရှေ့ကို အရှိန်အဟုန်ဖြင့် ပြည်သူလူထုဘ၀ လိုအပ်ချက်များကို အစွမ်းကုန် ကြိုးပမ်း အားထုတ်ကြရန် တိုက်တွန်းပါကြောင်း ပြောကြားခဲ့သည်။