မြို့ပြခေတ်မီဖွံ့ဖြိုးတိုးတက်ရေးနှင့် သန့်ရှင်းသာယာလှပရေးကြိုးပမ်း

ပြည်ထောင်စုသမ္မတမြန်မာနိုင်ငံတော် နိုင်ငံတော်သမ္မတ ဦးမင်းအောင်လှိုင်သည် တပ်မတော်ကာကွယ်ရေးဦးစီးချုပ်၊ ပြည်ထောင်စုဝန်ကြီးများနှင့် တာဝန်ရှိသူများ လိုက်ပါ၍ မေ ၂ ရက် နံနက်ပိုင်းတွင် ရန်ကုန်တိုင်းဒေသကြီး လှိုင်သာယာမြို့နယ်အပါအဝင် ရန်ကုန်မြို့အတွင်း မြို့ပြဖွံ့ဖြိုးတိုးတက်ရေးလုပ်ငန်းများနှင့် မြို့ပြသန့်ရှင်းသာယာလှပရေးလုပ်ငန်းများ ဆောင်ရွက်ထားမှုများကို လှည့်လည် ကြည့်ရှုစစ်ဆေးခဲ့သည်။

ထိုသို့စစ်ဆေးရာတွင် နိုင်ငံတော်သမ္မတက ရန်ကုန်မြို့တွင် လျှပ်စစ်ကြိုးများနှင့် ဆက်သွယ်ရေးကြိုးများ စနစ်တကျဖြစ်စေရေးနှင့် အန္တရာယ်ကင်းရှင်းမှုရှိစေရေး၊ လမ်းမကြီးများတစ်လျှောက် ရေစီးရေလာကောင်းမွန်ရေး၊ ရပ်ကွက်များအတွင်း၌လည်း ရေစီးရေလာကောင်းမွန်ရေး၊ အမှိုက်စွန့်ပစ်သည့်စနစ်များကို စနစ်တကျဖြင့် အဆက်မပြတ်ဆောင်ရွက်သွားရေး၊ ဆောက်လုပ်ရေးလုပ်ငန်းများ ဆောင်ရွက်ရာတွင် မြို့ပြဖွံ့ဖြိုးသာယာလှပရေးအတွက်ပါ စနစ်တကျတွက်ချက်ဆောက်လုပ်သွားရေး၊ လူသွားလမ်းပလက်ဖောင်းများ စနစ်တကျထည့်သွင်းတည်ဆောက်သွားရေး၊ ယာဉ်သွားလာမှုများ ပိုမိုလွယ်ကူလျင်မြန်စွာဖြင့် သွားလာနိုင်ရေးစသည် တို့ကို တာဝန်ရှိသူများအား လမ်းညွှန်မှာကြားခဲ့သည်။

ရန်ကုန်မြို့သည် လူဦးရေအများဆုံးနေထိုင်ကြပြီး မြန်မာနိုင်ငံ၏ အကြီးဆုံးမြို့ကြီးဖြစ်သည်။ စီးပွားရေးဗဟိုချက်ဖြစ်ပြီး နိုင်ငံတကာနှင့် ဆက်သွယ်ကူးသန်း သွားလာနိုင်သော နိုင်ငံတကာရေကြောင်း၊ လေကြောင်းဝင်ထွက်မှုများရှိသည်။ ရွှေတိဂုံစေတီတော်ကြီးကဲ့သို့ ထင်ရှားကျော်ကြားသော ရှေးဟောင်းအမွေအနှစ်များစွာရှိသဖြင့် ပြည်တွင်း၊ ပြည်ပမှ ဥဒဟိုဝင်ထွက်သွားလာနေကြသောမြို့ကြီးဖြစ်သည်။ ထို့ကြောင့် ရန်ကုန်မြို့တော်ကြီးကို မြို့ပြအင်္ဂါရပ်များနှင့်အညီ နိုင်ငံတကာအဆင့်အတန်းနှင့်လျော်ညီစွာ တည်ဆောက်ပြုပြင် ထိန်းသိမ်းဆောင်ရွက်သွားကြရမည်ဖြစ်သည်။

နိုင်ငံတော်သမ္မတသည် ၂၀၂၅ ခုနှစ် နိုဝင်ဘာလအတွင်း နိုင်ငံတော်အကြီးအကဲအဖြစ် ရန်ကုန်တိုင်းဒေသကြီး လှိုင်သာယာမြို့နယ်သို့ရောက်ရှိခဲ့ပြီး မြို့ပြဖွံ့ဖြိုးတိုးတက်ရေးနှင့် သန့်ရှင်းသာယာလှပရေးအတွက် လမ်းညွှန်မှာကြားခဲ့ရာ ယခုအခါ လှိုင်သာယာမြို့နယ် သန့်ရှင်းသာယာလှပရေး၊ ရေစီးရေလာများကောင်းမွန်ရေးနှင့် မြို့ပြဖွံ့ဖြိုးတိုးတက်ရေးတို့အနေဖြင့် အတိုင်းအတာတစ်ခုအထိ တိုးတက်ကောင်းမွန်လာသည်ကို တွေ့ရှိခဲ့ရသည်။ ရန်ကုန်မြို့သည် တစ်နေ့တခြားလူဦးရေထူထပ်လာမှုနှင့်အတူ ရန်ကုန်မြို့ရှိ မြို့နယ်အားလုံးအနေဖြင့် လမ်းညွှန်မှုနှင့်အညီ ဖွံ့ဖြိုးတိုးတက်နေသည်ကို တွေ့နိုင်သည်။

ရန်ကုန်မြို့အတွင်း၌ လျှပ်စစ်ကြိုးများနှင့် ဆက်သွယ်ရေးကြိုးများ ရှုပ်ထွေးပွေလီဖြစ်ခဲ့ရာ မြို့ပြသာယာလှပမှုကို အကျည်းတန်အရုပ်ဆိုးစေသဖြင့် ယခုအခါ သက်ဆိုင်ရာအဖွဲ့အစည်းများက ပြန်လည်ရှင်းလင်းဆောင်ရွက်လျက်ရှိသည်။ ယခုအခါ မိုးရာသီကာလသို့ ရောက်ရှိလာတော့မည်ဖြစ်၍ လမ်းမကြီးများ တစ်လျှောက် ရေစီးရေလာကောင်းမွန်ရေးအပြင် ရပ်ကွက်များအတွင်း၌လည်း ရေစီးရေလာကောင်းမွန်အောင် ဆောင်ရွက်သွားကြရမည်ဖြစ်သည်။ ရေစီးရေလာကောင်းမွန်ရေးအတွက် သက်ဆိုင်ရာအဖွဲ့အစည်းများက စဉ်ဆက်မပြတ် ဆောင်ရွက်ပေးလျက်ရှိရာ ရပ်ကွက်အတွင်းနေထိုင်ကြသော ပြည်သူများအနေဖြင့် အမှိုက်များ စည်းကမ်းမဲ့စွန့်ပစ်မှုများ မပြုလုပ်ကြရန်လိုအပ်သည်။ ပြည်သူများ ကျန်းမာရေးနှင့်ညီညွတ်ကာ သန့်ရှင်းသာယာသည့် ပတ်ဝန်းကျင်ကောင်းကို ဖော်ဆောင်နိုင်မည်ဖြစ်သည်။

လမ်းများ တိုးချဲ့အဆင့်မြှင့်တင်ခြင်းလုပ်ငန်းများ ဆောင်ရွက်ရာတွင် လူသွားလမ်းပလက်ဖောင်းများကို စနစ်တကျထည့်သွင်းတည်ဆောက်ထားသော်လည်း ပလက်ဖောင်းများပေါ်တွင် စည်းကမ်းမဲ့ပစ္စည်းထားမှုများ၊ ဈေးရောင်းချမှုများကြောင့် မြို့ပြအင်္ဂါရပ်များ ထိခိုက်မှုဖြစ်စေသည်ကို သတိပြုဆောင်ရွက်ကြရမည်ဖြစ်သည်။ ရန်ကုန်မြို့တွင် မော်တော်ယာဉ်များ တစ်နေ့တခြားတိုးပွားလာမှုကြောင့် ယာဉ်သွားလာမှုများ လွယ်ကူလျင်မြန်ချောမွေ့စွာ သွားလာနိုင်ရေးအတွက် လူသွားပလက်ဖောင်းများသည် အဓိကကျသလိုစည်းကမ်းနှင့်အညီ ယာဉ်ရပ်နားမှုနှင့် လမ်းညွှန်အမှတ်အသားများ သတ်မှတ်ချက်များနှင့်အညီ ပြည့်စုံအောင် ထည့်သွင်းတည်ဆောက်ထားရန်လိုအပ်သည်။

သို့ဖြစ်ရာ နိုင်ငံတော်သမ္မတအနေဖြင့် မြို့ပြဖွံ့ဖြိုးတိုးတက်ရေးနှင့် သန့်ရှင်းသာယာလှပရေးကို အလေးထားလမ်းညွှန်ဆောင်ရွက်လျက်ရှိရာ မြို့ပြများ တည်ဆောက်ထိန်းသိမ်းမြှင့်တင်ရာတွင် စနစ်တကျတွက်ချက်ဆောင်ရွက်သွားကြရန်လိုအပ်ပြီး မြို့ပြသန့်ရှင်းသာယာလှပရေး၊ ယာဉ်စည်းကမ်း၊ လမ်းစည်းကမ်းလိုက်နာဆောင်ရွက်ရေးတို့သာမက အများပြည်သူအပန်းဖြေသည့် ပန်းခြံများ၊ ဥယျာဉ်များနှင့် အားကစားကွင်းများ တည်ဆောက်ရာတွင် မြို့ပြလူဦးရေအချိုးအစားပေါ်တွင် မူတည်တွက်ချက်၍ နိုင်ငံတော်သမ္မတ၏ လမ်းညွှန်မှုများနှင့်အညီ စနစ်တကျဆောင်ရွက်သွားကြရမည်ဖြစ်ပါကြောင်း။ ။