တစ်ပြိုင်တည်း ဝါကောက်သိမ်းနိုင်ရန် အပင်အရွယ်အစားထိန်းချုပ်ခြင်းနည်းလမ်းများ အသုံးပြုစိုက်ပျိုးခြင်း ကွင်းသရုပ်ပြ

နေပြည်တော် ဧပြီ ၃၀

တစ်ပြိုင်တည်း ဝါကောက်သိမ်းနိုင်ရန် အပင်အရွယ်အစားထိန်းချုပ်ခြင်းနည်းလမ်းများ အသုံးပြု စိုက်ပျိုးခြင်းကွင်းသရုပ်ပြပွဲကို ယနေ့နံနက်ပိုင်းက စိုက်ပျိုးရေးနှင့် မွေးမြူရေးသိပ္ပံ (ပျဉ်းမနား) ရှိ မျိုးစေ့စမ်းသပ်စိုက်ပျိုးကွင်း၌ ကျင်းပသည်။

ကွင်းသရုပ်ပြပွဲ၌ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဒေါက်တာ ရဲတင့်ထွန်းက ပြည်တွင်းချည်မျှင် အသုံးပြုမှုနှင့် အထည်အလိပ်လုပ်ငန်းများ၏ ဝါဂွမ်းလိုအပ်ချက် ကို ပြည်တွင်းစိုက်ပျိုးထုတ်လုပ်မှုဖြင့် ထိရောက်စွာ ဖြည့်ဆည်းပေးနိုင်ရေးအတွက် အရည်အသွေး ကောင်းဝါမျိုးများနှင့် ဝါဂွမ်းစိုက်ပျိုးထုတ်လုပ်မှုနည်းပညာများ ပြောင်းလဲကျင့်သုံးလျက်ရှိကြောင်း၊ ထိုသို့ဆောင်ရွက်ရာတွင် လုပ်သား အင်အားနှင့် အချိန်လိုအပ်ချက်များသော အကြိမ်ကြိမ်ဝါကောက် သိမ်းခြင်းအစား တစ်ပြိုင်တည်း ဝါကောက်သိမ်းနိုင်ရန် အပင်အရွယ်အစားထိန်းချုပ်ခြင်းနည်း လမ်းများ အသုံးပြုစိုက်ပျိုးခြင်းဖြင့် အမျိုးအစားတူ ဝါဂွမ်းများကို ဈေးကွက်သို့ တစ်လုံးတစ်ခဲတည်း ရောင်းချနိုင်မည်ဖြစ်ကြောင်း၊ ယခုနည်းလမ်းကို တောင်သူများ ကျယ်ကျယ်ပြန့်ပြန့် အသုံးပြု လာပါက ဝါကို စက်ဖြင့် တစ်ကွင်းတစ်ဆက်တည်းရိတ်သိမ်းခြင်းလုပ်ငန်းအထိ မျှော်မှန်းဆောင် ရွက်ခြင်းဖြစ်ကြောင်း။

ယနေ့ ကွင်းသရုပ်ပြပွဲတွင် ဝါပင်သက်တမ်းအလိုက် အပင်အရွယ်အစားထိန်းချုပ်ခြင်း နည်း လမ်းများကို အသေးစိတ်ရှင်းလင်းပြသပေးသွားမည်ဖြစ်၍ တောင်သူများ သိရှိလိုသည်များ မေးမြန်း ဆွေးနွေးနိုင်ကြကြောင်း၊ မိမိတို့နှင့် သင့်တော်အဆင်ပြေမည့် နည်းလမ်းကို အသုံးပြုနိုင်ကြောင်း၊ လိုအပ်သည့် နည်းပညာဆေးဝါးများ အသုံးပြုနိုင်ရေးကူညီပေးသွားမည်ဖြစ်၍ ဒေသအသီးသီး မိမိတို့စိုက်ကွင်းများတွင် စမ်းသပ်လုပ်ကိုင်စေလိုကြောင်း၊ သို့မှသာ တောင်သူတစ်ဦး၏ အောင်မြင် ဖြစ်ထွန်းမှုကို အနီးဝန်းကျင်မှ တောင်သူများက နမူနာယူလိုက်ပါလုပ်ဆောင်လာကြစေခြင်းဖြင့် ဝါ စိုက်ပျိုးမှုတွင် တစ်ပြိုင်တည်း ဝါကောက်သိမ်းနိုင်ရန် အပင်အရွယ်အစားထိန်းချုပ်ခြင်းနည်းလမ်းများ ကျယ်ကျယ်ပြန့်ပြန့် လွှမ်းခြုံလာမည်ဖြစ်၍ တက်ကြွစွာ ပူးပေါင်းဆောင်ရွက်ပေးကြရန် တိုက်တွန်းပြောကြားသည်။

ထို့နောက် စိုက်ပျိုးရေးဦးစီးဌာန ဝါနှင့် လျှော်မျှင်ထွက်သီးနှံဌာနခွဲမှ တာဝန်ရှိသူတစ်ဦးက တစ်ပြိုင်တည်း ဝါကောက်သိမ်းနိုင်ရန် အပင်အရွယ်အစားထိန်း ချုပ်ခြင်းနည်းလမ်းများ အသုံးပြု စိုက်ပျိုးခြင်းနှင့်ပတ်သက်၍ ရှင်းလင်းဆွေးနွေးပြီး ရွှေတောင်- ၁၀ နှင့် RAKA 666 ဝါမျိုး စမ်းသပ် ကွက်အတွင်း လက်တွေ့ရှင်းလင်းပြသသည်။

အဆိုပါ ကွင်းသရုပ်ပြပွဲသို့ ရမည်းသင်း၊ တပ်ကုန်း၊ လယ်ဝေး၊ ဇေယျာသီရိနှင့် ဥတ္တရသီရိမြို့နယ်များမှ ဝါတောင်သူ ၅၂ ဦးနှင့် ဌာနဆိုင်ရာ တာဝန်ရှိသူများ တက်ရောက်ခဲ့ကြပြီး တောင်သူများ၏ မေးမြန်းချက်များအပေါ် တာဝန်ရှိသူများက အသေးစိတ်ဖြေကြားဆွေးနွေးခဲ့ကြကြောင်း သိရသည်။

သတင်းစဉ်