နေပြည်တော် ဖေဖော်ဝါရီ ၁၁
ရှေးဦးအရွယ် ကလေးသူငယ်ပြုစုပျိုးထောင်ရေးနှင့် ဖွံ့ဖြိုးရေးကော်မတီအစည်းအဝေးကို ယနေ့နံနက်ပိုင်းတွင် လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၌ ကျင်းပသည်။
အစည်းအဝေးသို့ ရှေးဦးအရွယ်ကလေးသူငယ်ပြုစုပျိုးထောင်ရေးနှင့် ဖွံ့ဖြိုးရေးကော်မတီဥက္ကဋ္ဌ၊ လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာစိုးဝင်းနှင့် ကော်မတီဝင် ဒုတိယဝန်ကြီးများ၊ ညွှန်ကြားရေးမှူးချုပ်များနှင့် တာဝန်ရှိသူများ တက်ရောက်ကြသည်။
အစည်းအဝေးတွင် ပြည်ထောင်စုဝန်ကြီးက ရှေးဦးအရွယ် ကလေးသူငယ်ကာလသည် ကိုယ်ဝန်ဆောင်စဉ်မှ အသက်ရှစ်နှစ်အရွယ်အထိပါဝင်ပြီး လူသားဖွံ့ဖြိုးမှု၏ အစောပိုင်းကာလများဖြစ်သောကြောင့် ကလေးသူငယ်များအား မှန်ကန်သော ပြုစုပျိုးထောင်မှု စနစ်တကျဆောင်ရွက်ပေးရန်လိုအပ်ပါကြောင်း၊ ဝန်ကြီးဌာနအနေဖြင့် ကိုယ်ဝန်ဆောင်ကာလမှ ကလေးအသက် နှစ်နှစ်အထိ ရက် ၁၀၀၀ အတွင်း အာဟာရထောက်ပံ့မှုများ၊ မူကြိုပညာရေးနှင့် မိဘအသိပညာပေးအစီအစဉ်များ၊ မူလတန်းကြိုဆရာမများအတွက် စွမ်းရည်မြှင့်သင်တန်းများ၊ ရပ်ရွာအခြေပြု မိခင်ဝိုင်းအစီအစဉ်များကို နှစ်စဉ်ဘဏ္ဍာနှစ်အလိုက် ဆောင်ရွက်လျက်ရှိပါကြောင်း။
နိုင်ငံတော်အကြီးအကဲက “မူကြိုကျောင်း တက်ရောက်မှုမရှိခဲ့ဘဲ KG နှင့် Grade 1 တို့တွင် တက်ရောက်သည့် ကလေးငယ်များအား ပညာသင်ကြားရေးကို အထောက်အကူပြုစေမည့် အသက်အရွယ်နှင့်ကိုက်ညီသည့် သင်ကြားမှုစနစ်ကို ဆောင်ရွက်ပေးရန်လိုကြောင်း၊ ထို့ကြောင့် မူလတန်း ဆရာ၊ ဆရာမ များအား ပညာရေးဝန်ကြီးဌာနနှင့် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနတို့မှ သက်ဆိုင်ရာသင်တန်းများသင်ကြားပေးခြင်းဖြင့် KG နှင့် Grade 1 တို့တွင် ပညာသင်ကြားလျက်ရှိသည့် ကလေးငယ်များ၏ သင်ကြားသင်ယူမှုများ ပိုမိုတိုးတက်ကောင်းမွန်လာမည်ဖြစ်ကြောင်း” လမ်းညွှန်မှာကြားထားရှိပါသဖြင့် ပညာရေးဝန်ကြီးဌာနနှင့် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနတို့ပူးပေါင်း၍ မူလတန်း ဆရာ၊ ဆရာမများအတွက် ရှေးဦးအရွယ်ကလေး သူငယ်ပြုစုပျိုးထောင်ရေးနှင့်ဖွံ့ဖြိုးရေးဆိုင်ရာ နည်းစနစ်များနှင့်အညီ သင်ကြားနိုင်ရေး ဆရာဖြစ်သင်တန်းလေးကြိမ်ကို ၂၀၂၆ ခုနှစ် ဇန်နဝါရီလမှ ဧပြီလအတွင်း ဖွင့်လှစ်သွားမည်ဖြစ်ပြီး ဆင့်ပွားသင်တန်းများကိုလည်း ဆက်လက်ဆောင်ရွက်သွားမည်ဖြစ်ကြောင်း။
ကလေးသူငယ်များ ဘက်စုံဖွံ့ဖြိုးတိုးတက်ရေးအတွက် ဝိုင်းဝန်းဆောင်ရွက်ပေးရန်လိုကြောင်း၊ ရှေးဦးအရွယ် ပြုစုပျိုးထောင်မှုရရှိခြင်းဖြင့် အသက်လွန်မှ မူလတန်းကျောင်းဝင်မှု၊ အချိန်မတိုင်မီ ကျောင်းထွက်နှုန်းမြင့်မားမှု စသည့် ပညာရေးစွမ်းဆောင်ရည်လိုအပ်ချက်များကို လျှော့ချပေး နိုင်မည်ဖြစ်ပါကြောင်း၊ တိုင်းရင်းသားဒေသများတွင်လည်း ရှေးဦးအရွယ် ကလေးသူငယ်ပြုစုပျိုးထောင်ရေးနည်းလမ်းများ ရောက်ရှိစေရန်အတွက် အစီအစဉ်များ ချမှတ်ဆောင်ရွက်သွားကြရန် လိုအပ်ကြောင်း မှာကြားသည်။
ထို့နောက် ကော်မတီဝင်များနှင့် တာဝန်ရှိသူများက ရှေးဦးအရွယ်ကလေးသူငယ်ပြုစုပျိုးထောင်ရေးနှင့် ဖွံ့ဖြိုးရေးကဏ္ဍနှင့်စပ်လျဉ်း၍ အကြံပြုဆွေးနွေးခြင်း၊ ယခင်အစည်းအဝေး ဆုံးဖြတ်ချက်များအပေါ် ဆောင်ရွက်ပြီးစီးမှု၊ ဆောင်ရွက်လျက်ရှိသည့်လုပ်ငန်းများနှင့် ရှေ့လုပ်ငန်းစဉ်များအပေါ် ဝိုင်းဝန်းဆွေးနွေးခဲ့ကြကြောင်း သတင်းရရှိသည်။
သတင်းစဉ်
No comments:
Post a Comment