မြန်မာ့တိုင်းရင်းဆေးသမားတော်နေ့အထိမ်းအမှတ် အခမ်းအနား ကျင်းပ

နေပြည်တော် ဖေဖော်ဝါရီ ၂၅

တပေါင်းလပြည့်နေ့တွင်ကျရောက်မည့် မြန်မာ့တိုင်းရင်းဆေးသမားတော်နေ့အထိမ်းအမှတ် အခမ်း အနားကို ယနေ့နံနက်ပိုင်းက ကျန်းမာရေးဝန်ကြီးဌာန တိုင်းရင်းဆေးပညာဦးစီးဌာန အစည်းအဝေးခန်းမ၌ ကျင်းပသည်။

အခမ်းအနားတွင် သဘာပတိအဖြစ် ကျန်းမာရေးဝန်ကြီးဌာန ပြည်ထောင်စုဝန်ကြီး ပါမောက္ခ ဒေါက်တာ သက်ခိုင်ဝင်းက ဆောင်ရွက်ပြီး အခမ်းအနားကို နဝရတ်ကတိသစ္စာ သံပြိုင်ရွတ်ဆို၍ ဖွင့်လှစ်သည်။

ထို့နောက် ပြည်ထောင်စုဝန်ကြီးက မြန်မာ့တိုင်းရင်းဆေးသမားတော်နေ့သည် ပြည်သူလူထု၏ ကျန်းမာရေးကိုတိုင်းရင်းဆေးပညာဖြင့် စောင့်ရှောက်ခဲ့ကြသော တိုင်းရင်းဆေးသမားတော်ကြီးများ၏ ကြိုးစားအားထုတ်မှုများကို အမှတ်တရပြုဂုဏ်ပြု ချီးမြှင့်ခြင်းဖြစ်ကြောင်း၊ ခေတ်အဆက်ဆက် သမားတော်ကြီးများက မြန်မာ့တိုင်းရင်းဆေးသမားတော်နေ့ကို အစဉ်အလာမပျက် ကျင်းပခဲ့ကြောင်း၊ တိုင်းရင်းဆေးသမားတော်များ၏ တိုင်းရင်းဆေးပညာရပ်ဆိုင်ရာ အဖိုးတန်အမွေအနှစ်များကို မျိုးဆက်သစ်တိုင်းရင်းဆေးဆရာများထံ လက်ဆင့်ကမ်းရန်၊ မျိုးဆက်သစ်လူငယ်များအကြား တိုင်းရင်း ဆေးပညာကိုစိတ်ဝင်စားလာစေပြီး မြန်မာ့တိုင်းရင်းဆေးပညာ၏အတိတ်၊ ပစ္စုပ္ပန်၊ အနာဂတ်ကိုဆက်စပ် ကာ ခေတ်မီဆေးပညာနှင့်ပေါင်းစပ်၍ ပြည်သူ၏ ကျန်းမာရေးစနစ်အတွင်း တိုင်းရင်းဆေးပညာ၏ အခန်းကဏ္ဍကို မြှင့်တင်နိုင်ရန်ဖြစ်ကြောင်း၊ ရှေး တိုင်းရင်းဆေးသမားတော်ကြီးများ၏ အတွေ့အကြုံ၊ စူးစမ်းလေ့လာမှု၊ အနစ်နာခံဆောင်ရွက်မှုတို့မှ မွေးဖွားလာသော မြန်မာ့တိုင်းရင်းဆေးပညာကို ယနေ့အချိန်တွင် တိုင်းရင်းဆေးသိပ္ပံမှ တိုင်းရင်းဆေး တက္ကသိုလ်အဆင့်အထိ တည်ထောင်နိုင်ခဲ့ခြင်းကြောင့် တိုင်းရင်းဆေးရုံ၊ ဆေးခန်းများဖြင့်ဖွံ့ဖြိုးလာပြီ ဖြစ်ကြောင်း၊ အနာဂတ်ကာလတွင် မြန်မာ့တိုင်းရင်းဆေးပညာကို သိပ္ပံနည်းကျသုတေသနများဖြင့် အထောက်အထားပြုလုပ်ခြင်း၊ ခေတ်မီဆေးပညာနှင့် ပေါင်းစပ်အသုံးချခြင်း၊ လူငယ်မျိုးဆက်များကို စနစ် တကျပညာပေးသင်ကြားခြင်း၊ နိုင်ငံတကာအဆင့်နှင့်အညီ မြှင့်တင်ခြင်းတို့ကို ဆက်လက်ကြိုးပမ်း ဆောင်ရွက်ရန်လိုအပ်ကြောင်း၊ ယနေ့အခမ်းအနားမှ မြန်မာ့တိုင်းရင်းဆေးပညာကို ပြည်သူ့ကျန်းမာရေးအတွက် အမြဲအားထားရမည့် အင်အားတစ်ရပ်အဖြစ် တည်တံ့ခိုင်မြဲစေရန် ဆုမွန်ကောင်းတောင်းပါကြောင်း ပြောကြားသည်။

ယင်းနောက် တိုင်းရင်းဆေးပညာဦးစီးဌာန ညွှန်ကြားရေးမှူးချုပ် ဒေါက်တာစုစုဒွေးက မြန်မာ့တိုင်းရင်းဆေးသမားတော်နေ့ ကျင်းပရခြင်းနှင့်ပတ်သက်၍ ရှင်းလင်းပြောကြားပြီး ပြည်ထောင်စုဝန်ကြီးက သက်ကြီး၊ ဝါကြီး တိုင်းရင်းဆေးသမားတော်ကြီးများအား ဂါရဝပြုလက်ဆောင်နှင့် သိပ္ပကျော်စွာဘွဲ့ရ မြန်မာနိုင်ငံတိုင်းရင်းဆေးကောင်စီ နာယကတိုင်းရင်းဆေး ဆရာကြီးဦးမြင့်လွင်အား ဂုဏ်ပြုဆုပေးအပ်ချီးမြှင့်သည်။

 ဆက်လက်၍ တိုင်းရင်းဆေးပညာဦးစီးဌာန ညွှန်ကြားရေးမှူးချုပ်၊ မြန်မာနိုင်ငံတိုင်းရင်းဆေးကောင်စီ၊ မြန်မာနိုင်ငံတိုင်းရင်းဆေးဆရာအသင်း၊ တိုင်းရင်းဆေးဝါးထုတ်လုပ်သူများနှင့် ဆေးပစ္စည်းလုပ်ငန်းရှင်များအသင်းတို့မှ တာဝန်ရှိသူများက သက်ကြီး၊ ဝါကြီးတိုင်းရင်းဆေး သမားတော်ကြီးများအား ဂါရဝပြုလက်ဆောင်ပေးအပ်ပြီး စွမ်းဆောင်ရည်ဆုနှင့် သင်တန်းထူးချွန်ဆုရရှိသူ တိုင်းရင်းဆေးဆရာများအား ဆုများပေးအပ်ချီးမြှင့်ရာ စွမ်းဆောင်ရည်ဆုရ ရန်ကုန်တိုင်းဒေသကြီး ဒလမြို့နယ်တိုင်းရင်း ဆေးကုဌာနမှ ဒုတိယတိုင်းရင်းဆေးမှူးက ကျေးဇူးတင်စကားပြောကြားခဲ့ကြောင်း သိရသည်။

သတင်းစဉ်