ရန်ကုန် နိုဝင်ဘာ ၂၈
ပြန်ကြားရေးဝန်ကြီးဌာန အမျိုးသားစာပေဆု စိစစ်ရွေးချယ်ရေးကော်မတီသည် ၂ဝ၂၃ ခုနှစ်အတွင်း ပထမအကြိမ်ထုတ်ဝေခဲ့သည့် စာအုပ်များကို စိစစ်ရွေးချယ်ခဲ့ပြီး အမျိုးသားစာပေဆုချီးမြှင့်ရန် ရွေးချယ်ခံရသော စာအုပ်များနှင့် စာရေးဆရာများ၏ အမည်စာရင်းကို ထုတ်ပြန်ကြေညာခဲ့ရာ ဆုရရှိသူများအား တွေ့ဆုံမေးမြန်းမှုများကို ဖော်ပြလိုက် ပါသည်။
ဘာသာရပ် - လူငယ်
စာရေးသူ - ကပ္ပတိန်သာစိန်
စာအုပ်အမည် - ဘ၀ခရီးသွား လူငယ်များသို့
ကိုယ်တိုင်ကြုံတွေ့ရတဲ့အဖြစ် အပျက်တွေကို “ဒီဘဝခရီးသွား လူငယ်များသို့” ဆိုတဲ့စာအုပ်မှာ တင်ပြထားပါတယ်။ လူကြီးဆိုတာလည်း လူငယ်ဘဝက တက်လာတာဖြစ်လို့ သူ့မှာလည်း အခက်အခဲတွေအများကြီး ကြုံတွေ့ခဲ့ရတဲ့အကြောင်းကို လူငယ်တွေကို ပြောပြတဲ့သဘောပါ။ ဥပမာအားဖြင့် ကျွန်တော့်ဘဝဆိုရင်လည်း ရေတပ်ကဗိုလ်မှူးဘဝ၊ နောက် သင်္ဘောကပ္ပတိန်ဘဝ၊ နောက်တစ်ခါ လွှတ်တော်ကိုယ်စားလှယ်ဘ၀၊ စာရေးဆရာဘဝစသည်အားဖြင့် အဲဒီဘဝတွေမှာ ဘယ်လိုကြုံခဲ့ရတယ်၊ အခက်အခဲတွေကို ဘယ်လိုကျော်လွှား ခဲ့ရတယ်ဆိုတာတွေကို လက်တွေ့ဆန်အောင် ရေးသားထားတာဖြစ်ပါတယ်။ ကျွန်တော့်ရဲ့ ဘဝအတွေ့အကြုံကို လူငယ်တွေသိအောင်၊ သူတို့အတွက်အကျိုးရှိအောင် ရည်ရွယ်ပြီး ရေးသားခဲ့တာဖြစ်ပါတယ်။
ဒီစာအုပ်ကတော့ လူငယ်လေးတွေပေါ့လေ။ လူငယ်လေးတွေဆိုတာ ဘဝကို ခရီးသွားဖို့အတွက် ကိုယ့်ဘဝကိုယ်ရုန်းကန်မယ်၊ လှုပ်ရှားမယ်ဆိုတဲ့ လူငယ်ဟူသမျှဟာ ဘဝခရီးသွားတွေလို့ ကျွန်တော်ကသတ်မှတ်တယ်။ ဘဝခရီးသွားဆိုတဲ့ အဲဒီလူငယ်တွေဟာ လှုပ်ရှားသွားလာတဲ့ အခါမှာ သူတို့အတွက်အထောက်အကူ ဖြစ်အောင်လို့ ဘာတွေလုပ်သင့်တယ်၊ ဘယ်လိုစနစ်တကျ ပလန် (Plan) ဆွဲသင့် တယ်ဆိုတဲ့ဟာလေးတွေကို ထုတ်နုတ်ပြီးရေးသားထားတာဖြစ်ပါတယ်။
ကျွန်တော်တို့တွေဟာ ဒီအရပ်ကနေ ဟိုအရပ်ကိုသွားမယ်ဆိုလို့ရှိရင် ဘယ်လမ်းကနေသွားမလဲဆိုတဲ့ပုံစံမျိုးပေါ့။ သင်္ဘောသားနဲ့ပတ်သက်လို့ ကျွန်တော်က အနီးစပ်ဆုံးဥပမာပေးပြီး ပြောထားတယ်။ သင်္ဘောတစ်စင်းဟာ အရှေ့အရပ်ကနေ အနောက်အရပ်မှာရှိတဲ့မြို့ကို သွားမယ်ဆိုရင်လမ်းကြောင်းရှာရတယ်။ လမ်းကြောင်းတစ်ခုဆွဲရတယ်။ အဲဒီလမ်းကြောင်းအတိုင်း ကျွန်တော်တို့ကသွားရတယ်။ ဒါကသင်္ဘောဥပမာပေါ့။ ဒါပေမယ့် အဲဒီသင်္ဘောကကိုယ်ရောက်ချင်တဲ့အချိန် ရောက်ချင်မှ ရောက်မယ်။ ရေစီးကြမ်းတာ၊ လေတိုက်တာ၊ မုန်တိုင်းတွေဖြစ်တာ၊ အခက်အခဲတွေရှိတာတွေကို ကြုံရရင်မနည်း ထိန်းသိမ်းပြီးတော့သွားမှ ကိုယ်လိုချင်တဲ့ ခရီးကိုရောက်မယ်။ အဲဒီလိုပဲဘဝကို စတင်ပြီးရုန်းကန်မယ့် လူငယ်တွေဘဝမှာလည်း ကိုယ်ဘာဖြစ်ချင်တာလဲ ဆိုတာကို လမ်းကြောင်းဆွဲရမယ်။ အဲဒီလမ်းကြောင်းအတိုင်းသွားတဲ့အခါမှာ ကြုံတွေ့ရတဲ့အခက်အခဲတွေကို ရင်ဆိုင်ကျော်လွှားပြီး လိုရာခရီးကိုရောက်အောင် သွားနိုင်ဖို့ ရည်ရွယ်ပြီး ရေးသားထားတာ ဖြစ်ပါတယ်။ လိုရာခရီးရောက်အောင် သွားနိုင်ဖို့ဆိုပြီး ဒီစာအုပ်ဖြစ်လာတာပါ။ ဒီစာအုပ်ဖြစ်လာဖို့က ခြောက်လ၊ တစ်နှစ်လောက်ကြာပါတယ်။
ကျွန်တော်က အခုအသက် ၈၇ နှစ်ရှိပါပြီ။ ဒီအသက်အရွယ်ရောက်ခါမှ ဆုတွေဘာတွေရတယ်ဆိုတော့ ဝမ်းသာပါတယ်။ ကျွန်တော်ကစာအုပ် ၄၀ လောက် ထုတ်ထားပြီးဖြစ်ပါတယ်။ ဒါပေမယ့် ကျွန်တော်မပြိုင်ပါဘူး။ အခုဟာက မိတ်ဆွေတွေက ပြိုင်မယ့်အထဲမှာထည့်ပေးလို့ ဆုရတာပါ။ အထူးဝမ်းသာတယ်။ ကျွန်တော် စာပေလောကထဲကို ၁၉၉၀ ပြည့်နှစ်မှာ “သင်္ဘောသား မိတ်ဆက်” ဆိုတဲ့ စာအုပ်နဲ့ စတင်ကျင်လည်လာခဲ့တာပါ။ အခုလိုဆုရတဲ့အတွက်လည်း ဝမ်းသာပါတယ်။ နောက်ပြီး စာပေနဲ့ပတ်သက်လို့ တတ်နိုင်သမျှ ဆက်လက်ပြီး လုပ်ဆောင်နေပါတယ်။
ဘာသာရပ် - ရည်ညွှန်း
စာရေးသူ - သုတေသီမောင်မောင်
စာအုပ်အမည် - မဟာဂီတပေါင်းချုပ် စွယ်စုံကျမ်း
ကျွန်တော်ငယ်စဉ်ကပင် သီချင်းဆို ဝါသနာပါခဲ့တာ ၁-၆-၁၉၆၂နေ့ ပဉ္စမတန်းအောင်မြင်လို့ အဘွားဖြစ်သူဒေါ်ငွေရင်က ဓာတ်စက်နဲ့မလှရွှေရဲ့ စန္ဒကိန္နရီဓာတ်ပြား၊ ပေသစ်ရဲ့ ဖိုးသာအောင်ဓာတ်ပြား၊ ကိုစိုးအောင်ရဲ့ ဝသာခါ+ ကိုစိုးအောင် ရီရီဝေ၊ ဟာဝေရဲ့ရွှေပိုး ဝေဝေဓာတ်ပြားတို့ကို ဆုအဖြစ်ပေးအပ်ခဲ့တယ်။ စန္ဒကိန္နရီဓာတ်ပြားရဲ့ကက် တလောက် နံပါတ်ကို စိတ်ဝင်စားလို့ ခေတ်ဟောင်းဓာတ်ပြား စာရင်းကိုစတင်ပြုစုခြင်းနဲ့ ဓာတ်ပြားဟောင်းတွေ စုဆောင်းခြင်းတို့ကို စတင်ဆောင်ရွက်ခဲ့တယ်။ ယနေ့ထိလည်း ဆောင်ရွက်ဆဲဖြစ်ပါတယ်။ မြန်မာ့အသံရေဒီယိုသာမက အော် အိန္ဒိယရေဒီယိုကိုပါ စတုတ္ထကျောင်းသားဘဝကတည်းက မလွတ်တမ်းနားထောင်ခဲ့လို့ ခေတ်ဟောင်းသီချင်းအားလုံးကို အလွတ်ရခဲ့ပါတယ်။ အဋ္ဌမတန်းရောက်တဲ့အခါ လက်ရေးသီချင်းစာအုပ်ကြီးကို စတင်ရေးသားခဲ့ပြီး ၁၉၆၈ ခု မော်လမြိုင်ကောလိပ်ကို စတင်တက်ရောက်ရတဲ့အခါ အဲဒီ လက်ရေးခေတ်ဟောင်းသီချင်း စာအုပ်ကြီးဟာ မော်လမြိုင်ကောလိပ်ကျောင်းအုပ်ကြီး ဦးလှရွှေ ထံ ရောက်ရှိသွားခဲ့ တယ်။ ကျောင်းအုပ်ကြီးက အဲဒီလက်ရေး သီချင်းစာအုပ်ကြီးကို လက်နှိပ်စက်ရိုက်ပြီး မော်လမြိုင်ကောလိပ် စာကြည့် တိုက်မှာ ထားရှိပေးခဲ့ပါတယ်။
ကျောင်းအုပ်ကြီးက မဟာဂီတကျမ်းများမှ ဟတ်ကာများကောက်ယူဖို့ တာဝန်ပေးခဲ့ရာ အဲဒီလုပ်ငန်းကို ၁၉၆၈ ခုနှစ်မှ ယနေ့ထိဆောင်ရွက်ဆဲဖြစ်ပါတယ်။ အဲဒီအချိန်က ဟတ်ကာများနဲ့ ရှားပါးတဲ့ ဓာတ်ပြားသွင်းထားတဲ့ မဟာဂီတစာသားတွေကိုသာ စုဆောင်းခြင်းဖြစ်ပါတယ်။
၂၀၂၂ ခုနှစ်မှာ ပုံနှိပ်ထုတ်ဝေခဲ့တဲ့ ခေတ်ဟောင်းဓာတ်ပြားသီချင်း ပေါင်းချုပ်ကြီးအတွက် ၃-၇-၂၀၂၁ နေ့မှာတစ်သက်တာ အမျိုးသားစာပေဆုရှင်ဆရာကြီး ဦးထွန်းရီထံမှ အမှာစာတောင်းခံခဲ့တဲ့အခါ ဆရာကြီးက မဟာဂီတစာအုပ်ထုတ်ဖို့ တိုက်တွန်းလို့ ၁၉၆၈ ခုနှစ်က ပြုစုခဲ့တဲ့မဟာဂီတမာတိကာရှိပြီးဖြစ်လို့ သီချင်းစာသားတွေ စုဆောင်းထုတ်ဝေမယ်လို့ ကတိပေးခဲ့ပါတယ်။ ငယ်စဉ်ကတည်းက ကိုယ်ပိုင်စုဆောင်းထားတဲ့ မဟာဂီတကျမ်းများမှ သီချင်းစာသားတွေကို စိစစ်ရွေးချယ်ခဲ့ပါတယ်။ မဟာဂီတကျမ်းတွေအပြင် ဓာတ်ပြားတွေ၊ ပေပုရပိုက်တွေ၊ ပညာရှင်ကြီးတွေထိန်းသိမ်းထားတဲ့ သီချင်းတွေပါရယူခဲ့ပါ တယ်။ စာအုပ်အဖုံးမှာ ရည်ညွှန်းကိုးကား တဲ့ စာအုပ်တွေ၊ ပေပုရပိုက်တွေ၊ ဓာတ်ပြား တွေကို ဖော်ပြထားပါတယ်။
မဟာဂီတမှာ ကြိုး၊ ဘွဲ့၊ သီချင်းခံ၊ ပတ်ပျိုး၊ ယိုးဒယား၊ မွန်၊ လေးထွေသံကတ်၊ ပြင်းခင်း၊ လောကနတ်သံ၊ ဒိန်းသံ၊ ကရင် ဩသံ၊ သိင်္ဂါသံ၊ ဘောလယ်ဟူသောကဏ္ဍ ၁၃ ရပ်ကို ဖော်ပြထားပါတယ်။ အဲဒီကဏ္ဍ ၁၃ ရပ်အတွက်အမျိုးအစားခွဲခြားဖို့ ရှေ့ပိုင်းမှာဆရာကြီး စန္ဒရားဦးရည်နွယ် ထံမှ နည်းခံခဲ့ပြီး နောက်ပိုင်းမှာ မဟာ ဂီတဆရာကြီး ဦးစိန်ဝင်း (မြစတင်း၊ မြန်မာ့ အသံသီချင်းကြီးစိစစ်ရေး ဘုတ်အဖွဲ့ အတွင်းရေးမှူး) ထံ ဆက်လက်နည်းခံ ခဲ့ပါတယ်။ ကဏ္ဍ ၁၃ ရပ်ဝင် ကြိုး၊ ဘွဲ့၊ သီချင်းခံ၊ ပတ်ပျိုးစတဲ့သီချင်းတွေမှာ မဟာဂီတကျမ်းအသီးသီးမှာ ပါရှိပြီး ဖြစ်ပေမယ့် မိုးဒေဝါ၊ တေဘုမ္မာ၊ ဥဩ သံအေး စတဲ့နောက်ရေးမဟာဂီတတွေ၊ သံဆန်းတွေ၊ ပဒေသာတွေမှာ စုစည်း ထားခြင်းမရှိတဲ့အတွက် ဆက်လက်ပြုစုရပါတယ်။ အဲဒီနောက် မဟာဂီတာ သားများရဲ့အနက်နဲ့ အဓိပ္ပာယ်များမှာ တိမ်မြုပ်နေတဲ့အတွက် ဖော်ထုတ်ရပြန် ပါတယ်။
ပေါရာဏ ဝေါဟာရတို့ကို ဖော်ထုတ်ရာမှာ လုံးကောက်အဓိပ္ပာယ်တွေနဲ့ မလုံလောက်ကြောင်းတွေ့ရလို့ မှတ်စုအတို၊ မှတ်စုရှည်တွေ ရေးရပြန်ပါတယ်။ မှတ်စုတွေနဲ့လည်း မဟာဂီတအရသာ ကို လုံလောက်စွာ ခံစားနိုင်တာမရှိတဲ့အတွက် ဆိုင်ရာဇာတ်ထုပ်တွေကို ရေးရ ပြန်ပါတယ်။ အဲဒီသုတေသနဟာ ၃-၇-၂ဝ၂၂ နေ့မှာပြီးစီးခဲ့လို့ ဆရာကြီး ဦးထွန်းရီ ထံ ပြန်လည်တင်ပြပါတယ်။ တစ်နှစ်လောက်ထပ်အချိန်ယူပြီး အကောင်းဆုံးလုပ်ပါဟု တိုက်တွန်းပြောကြားပါတယ်။ အခုလို ဆုရတဲ့အတွက် ဝမ်းသာမိပါတယ်။
ကပ္ပတိန်သာစိန်
အာကာလင်း၊ ဓာတ်ပုံ-တင်စိုး
No comments:
Post a Comment