ကဆုန်လပြည့် ဗုဒ္ဓနေ့ဆိုင်ရာ မဟာမင်္ဂလာအခမ်းအနားများ MRTV မှ တိုက်ရိုက်ထုတ်လွှင့်မည်

 

နေပြည်တော် မေ ၂၀

ကဆုန်လပြည့် ဗုဒ္ဓနေ့ဆိုင်ရာ မဟာမင်္ဂလာအခမ်းအနားအစီအစဉ်များကို ဘာသာရေးဆိုင်ရာ ထုံးတမ်းအစဉ်အလာများနှင့်အညီ ၂၀၂၄ ခုနှစ် မေ ၂၂ ရက်တွင် နေပြည်တော် ဥပ္ပါတသန္တိစေတီတော်နှင့် မာရဝိဇယဗုဒ္ဓဥယျာဉ်တော်တို့တွင် ခမ်းနားထည်ဝါစွာနှင့် စည်ကားသိုက်မြိုက်စွာ စီစဉ်ကျင်းပမည်ဖြစ်သည်။

ကဆုန်လပြည့် ဗုဒ္ဓနေ့ဆိုင်ရာ အခမ်းအနားအစီအစဉ်တစ်ခုဖြစ်သည့် ဆီမီးတိုင်များ ကိုင်ဆောင်ပြီး လှည့်လည်ပူဇော်ပွဲအခမ်းအနားကို ညနေ ၃ နာရီ မိနစ် ၃၀ မှစတင်၍ တပေါင်းကွင်းမှ ဥပ္ပါတသန္တိစေတီတော် ပတ်လမ်းတစ်လျှောက်၊ ဥပ္ပါတသန္တိစေတီတော်မှ မာရဝိဇယဗုဒ္ဓဥယျာဉ်တော်သို့ မော်တော်ယာဉ်များဖြင့် ထွက်ခွာရာ လမ်းတစ်လျှောက်နှင့် မာရဝိဇယ ဗုဒ္ဓဥယျာဉ်တော်မုခ်ဦးမှ ညောင်ရေသွန်းမည့် မဟာဗောဓိပင်အထိလည်းကောင်း၊ မာရဝိဇယဗုဒ္ဓဥယျာဉ်တော်နှင့် ဥပ္ပါတသန္တိစေတီတော်ရှိ မဟာဗောဓိပင်နေရာများတွင် ကဆုန်ညောင်ရေ သွန်းလောင်းပူဇော်ခြင်းအခမ်းအနားများကိုလည်းကောင်း MRTV– HD Channel ၊ MRTV Parliament Channel၊ MWD-HD Channel ၊ MWD- Variety  HD Channel၊ MWD EDUCATION, KNOWLEDGE & SPORTS Channel နှင့် Channel LIGHT Channel တို့မှ တိုက်ရိုက် (Live) ရိုက်ကူး ထုတ်လွှင့်သွားမည်ဖြစ်သည်။

ထို့ပြင် ည ၈ နာရီမှစတင်၍ မာရဝိဇယဗုဒ္ဓဥယျာဉ်တော်အတွင်းရှိ အဂ္ဂါဓိပတိသာသနာ့ဗိမာန်တော်တွင် သီတဂူဆရာတော်ကြီး၏ ဓမ္မသဘင်ဆင်ယင်ကျင်းပမှုကို MRTV Parliament Channel ၊ MWD EDUCATION, KNOWLEDGE & SPORTS Channel နှင့် Channel LIGHT Channel တို့မှ တိုက်ရိုက် (Live) ရိုက်ကူးထုတ်လွှင့်သွားမည်ဖြစ်ပြီး MRTV – HD Channel ၊ MWD-HD Channel၊ MWD- Variety HD Channel တို့မှ ည ၈ နာရီ သတင်းအစီအစဉ်များအပြီးတွင်လည်း ထုတ်လွှင့်သွားမည်ဖြစ်သည်။

သတင်းစဉ်