ရန်ကုန် မေ ၂၂
နိုင်ငံတော်အစိုးရအနေဖြင့် ပြည်ပတွင်ရောက်ရှိနေသည့် အမိနိုင်ငံသားများ အခက်အခဲကြုံတွေ့နေရပါက နိုင်ငံသားများအပေါ် အလေးအနက်တန်ဖိုးထားသည့်အနေဖြင့် မည်သို့သောအခြေအနေတွင် တွေ့ကြုံနေရသည့်တိုင် မြန်မာသံရုံးနှင့်သက်ဆိုင်ရာသံရုံးများ ချိတ်ဆက်ပြီး အမိနိုင်ငံသားများ မြန်မာနိုင်ငံသို့ အေးချမ်းလုံခြုံစွာ အမြန်ဆုံးပြန်လည်ရောက်ရှိနိုင်ရေး ဆောင်ရွက်ပေးလျက်ရှိသည်။
ထိုသို့ဆောင်ရွက်ပေးလျက်ရှိရာ ဆော်ဒီအာရေဗျနိုင်ငံ ရီရတ်ဒ်မြို့တွင် အခက်အခဲကြုံတွေ့နေရသည့် မြန်မာနိုင်ငံသူတစ်ဦးအား အမိနိုင်ငံသို့ အမြန်ဆုံးပြန်လည်ပို့ဆောင်နိုင်ရန် မြန်မာသံရုံးအနေဖြင့် ရီရတ်ဒ်မြို့ရှိ အာဏာပိုင်များနှင့်ညှိနှိုင်း၍ ပြန်လည်ခေါ်ဆောင်နိုင်ခဲ့ရာ မြန်မာနိုင်ငံသူ မအေးအေးပိုင်သည် မေ ၂၁ ရက်က ဆော်ဒီအာရေဗျနိုင်ငံ ရီရတ်ဒ်မြို့မှ ဒေသစံတော် ချိန် ည ၁၂ နာရီ မိနစ် ၅၀ တွင် လေကြောင်းခရီးစဉ်ဖြင့် ထွက်ခွာခဲ့ပြီး Muscat မြို့နှင့် ဗန်ကောက်မြို့တို့မှတစ်ဆင့် ရန်ကုန်မြို့သို့ ယနေ့နံနက် ၉ နာရီ ၅ မိနစ်တွင် ပြန်လည်ရောက်ရှိခဲ့သည်။
မြန်မာနိုင်ငံသူ မအေးအေးပိုင်သည် ရီရတ်ဒ်မြို့တွင် အလုပ်လုပ်ကိုင်စဉ် အလုပ်ပင်ပန်းမှု၊ အိမ်ရှင်နှင့် ဆက်ဆံရေးအဆင်မပြေမှုတို့ကြောင့် မြန်မာနိုင်ငံသို့ပြန်လိုသည့်အတွက် အိမ်ရှင်မှ မြန်မာသံရုံးသို့ လာရောက်ပို့ဆောင်ခဲ့ရာ သံရုံးမှနေရာ ထိုင်ခင်းနှင့် စားသောက်ရေးအတွက် ကူညီဆောင်ရွက်ပေးခဲ့သည်။ ဆော်ဒီအာရေဗျနိုင်ငံမှ အမြန်ဆုံးပြန်လည်ထွက်ခွာနိုင်ရန် သက်ဆိုင်ရာတာဝန်ရှိသူများနှင့် ညှိနှိုင်းဆောင်ရွက်ပေးခဲ့ရာ ပြန်လည်ထွက်ခွာခွင့်(Exit Permit)ရရှိခဲ့ပြီး ယနေ့နံနက်ပိုင်းတွင် ရန်ကုန်မြို့သို့ အဆင်ပြေချောမွေ့စွာ ရောက်ရှိခဲ့ခြင်းဖြစ်သည်။
ဆော်ဒီအာရေဗျနိုင်ငံ ရီရတ်ဒ်မြို့တွင် အခက်အခဲကြုံတွေ့ခဲ့ရမှုကို မအေးအေးပိုင်က “ကျွန်မက မြင်းခြံမှာနေပါတယ်။ ရီရတ်ဒ်မှာ လေးလအလုပ်လုပ်ခဲ့ပါတယ်။ ကိုယ့်မြန်မာနိုင်ငံနဲ့မတူတဲ့ ယဉ်ကျေးမှု၊ အစားအသောက်၊ အနေအထိုင်၊ ဘာသာစကား စတဲ့အခက်အခဲတွေကြောင့် နေထိုင်ရတာအဆင်မပြေတဲ့အတွက် မြန်မာသံရုံးကို အကူအညီတောင်းခံပြီး ပြန်လာခဲ့တာပါ။ မြန်မာအမျိုးသမီးများကို အကြံပေးလိုပါတယ်။ အတတ်နိုင်ဆုံး ပြည်ပမှာအလုပ်လုပ်မယ်ဆိုရင် အဲဒီနိုင်ငံရဲ့အကြောင်းကို ပထမဆုံး ထဲထဲဝင်ဝင်သိရှိပြီးမှသွားသင့်ပါတယ်။ ကိုယ့်နိုင်ငံထက် ဝင်ငွေကောင်းတယ်ဆိုတဲ့ ငါးစာတစ်ချက်နဲ့ နားမယောင်မိဖို့ တိုက်တွန်းလိုပါတယ်။ အမျိုးသားတွေထက်ပိုပြီး နစ်နာဆုံးရှုံးမှုများလို့ပါ။ မြန်မာသံရုံးကိုရောက်တော့ နေထိုင်စားသောက်ဖို့ အားလုံးစီစဉ်ပေးပါတယ်။ သံအမတ်၊ သံမှူးနဲ့ ဝန်ထမ်းများက နွေးနွေးထွေးထွေးနဲ့ ကူညီစောင့်ရှောက်ကြတော့ ဝမ်းနည်းဝမ်းသာဖြစ်ရပါတယ်။ အခုလို အမိနိုင်ငံကို ပြန်လည်ခြေချခွင့်ရအောင် အစစအရာရာ ကူညီစောင့်ရှောက်ပေးခဲ့ကြတဲ့ နိုင်ငံတော်အကြီးအကဲများနှင့် သံရုံးဝန်ထမ်းအားလုံးကို ဒီနေရာကနေ ကန်တော့ပါတယ်။ ပြောမပြတတ်အောင် အထူးကျေးဇူးတင်ပါတယ်”ဟု ပြောသည်။
နိုင်ငံတော်အစိုးရအနေဖြင့် ပြည်ပ၌အလုပ်လုပ်ကိုင်စဉ် အခက်အခဲကြုံတွေ့ရသည့် မြန်မာနိုင်ငံသားများကို မြန်မာသံရုံး၏ ညှိနှိုင်းကူညီဆောင်ရွက်မှုဖြင့် အမိနိုင်ငံသို့ ပြန်လည်ခေါ်ဆောင်နိုင်ခဲ့ကြပြီး ယခုလို အမိနိုင်ငံသူတစ်ဦး အတိဒုက္ခကြုံတွေ့နေရစဉ် ကူညီကယ်တင်ပေးမှုအပေါ် ကာယကံရှင်နှင့် မိဘ ဆွေမျိုးများက နိုင်ငံတော်အစိုးရနှင့် မြန်မာသံရုံးတို့အား လှိုက်လှိုက်လှဲလှဲ အထူးကျေးဇူးတင်လျက်ရှိကြောင်း သိရသည်။
ညိမ်းသူ(သတင်းစဉ်)၊ ဓာတ်ပုံ - ကနူး
No comments:
Post a Comment