မော်လမြိုင် နိုဝင်ဘာ ၂
(၂၄) ကြိမ်မြောက် မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီး ဗဟိုအဆင့်ပြိုင်ပွဲများနှင့် မဟော်သဓာဇတ်တော်ကြီး ပြိုင်ပွဲများတွင် ဆုရရှိခဲ့ကြသည့် ပြိုင်ပွဲဝင် အသင်းသူ /အသင်းသားများ၊ အုပ်ချုပ်သူအဖွဲ့သားများအား ယမန်နေ့ညနေပိုင်းက သံလွင်တံတား (မော်လမြိုင်) တွင် မွန်ပြည်နယ်ဝန်ကြီးချုပ် ဦးအောင်ကြည်သိန်း၊ အရှေ့တောင်တိုင်းစစ်ဌာနချုပ်တိုင်းမှူး၊ ပြည်နယ်အစိုးရအဖွဲ့ဝင်ဝန်ကြီးများ၊ တာဝန်ရှိသူများ၊ ကျောင်းသူ၊ ကျောင်းသား၊ မွန်ပြည်နယ်သူ၊ ပြည်နယ်သားများက အောင်သပြေခက်နှင့် ဂုဏ်ပြုပန်းခြင်းများဖြင့် လှိုက်လှဲဝမ်းမြောက်စွာဂုဏ်ပြုကြိုဆိုခဲ့ကြသည်။
ထို့နောက် (၂၄) ကြိမ်မြောက် မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီး ဗဟိုအဆင့်ပြိုင်ပွဲများနှင့် မဟော်သဓာဇတ်တော်ကြီး ပြိုင်ပွဲများတွင် ဆုရရှိခဲ့ကြသည့် ပြိုင်ပွဲဝင် အသင်းသူ /အသင်းသားများ၊ အုပ်ချုပ်သူအဖွဲ့သားများအား ဂုဏ်ပြုကြိုဆိုပွဲ အခမ်းအနားကို မော်လမြိုင်မြို့၊ ပြည်နယ်ခန်းမ၌ ဆက်လက်ကျင်းပပြုလုပ်ရာ ပြည်နယ်ဝန်ကြီးချုပ်၊ တိုင်းမှူးနှင့် ပြည်နယ်၀န်ကြီးများတက်ရောက်၍ ပြည်နယ်ဝန်ကြီးချုပ်က (၂၄) ကြိမ်မြောက် မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီး ဗဟိုအဆင့်ပြိုင်ပွဲများနှင့် မဟော်သဓာဇတ်တော်ကြီး ပြိုင်ပွဲတွင် ပထမဆု (ရွှေတံဆိပ်ဆု) များ ရရှိသည့်အတွက် အထူးဝမ်းမြောက်ဂုဏ်ယူမိပါကြောင်း၊ ထို့အပြင် အနုပညာ အရည်အချင်းများဖြင့်ကြိုးစားအားထုတ် ယှဉ်ပြိုင်ခဲ့ကြ၍ ယခုလို ရွှေတံဆိပ်၊ ငွေတံဆိပ်၊ ကြေးတံဆိပ်ဆုများကို မွန်ပြည်နယ်အတွက် ပြည်နယ်ဂုဏ်ဆောင်စွာထိုက်ထိုက်တန်တန် ရရှိခဲ့ခြင်းဖြစ်ကြောင်း၊ မြန်မာတို့ရဲ့ ရိုးရာယဉ်ကျေးမှု အနုပညာရပ်များကို ယခုလိုပြိုင်ပွဲများ ကျင်းပပေး၍ စောင့်ရှောက်မြှင့်တင်ပေးခြင်းအားဖြင့် မိမိနိုင်ငံ၊ မိမိလူမျိုးရဲ့ အမျိုးသားရေး ဂုဏ်သိက္ခာကို အမျိုးသားယဉ်ကျေးမှုနဲ့ယှဉ်တွဲပြီး မြင့်မားထည်ဝါစေရအောင် စွမ်းဆောင်မြှင့်တင်ပေးခြင်းဖြစ်ပြီး အမျိုးသားယဉ်ကျေးမှုကို ထိန်းသိမ်းမြှင့်တင်ခြင်းအားဖြင့် မြန်မာလူမျိုးတို့ရဲ့ အမျိုးသားရေး စရိုက်လက္ခဏာများ၊ အမျိုးသားယဉ်ကျေးမှု ဓလေ့ထုံးတမ်းစဉ်လာများ၊ အမျိုးသားရေးစံနှုန်းများနဲ့ ပိုမိုအားပြည့် ခိုင်မာစေရအောင် အနုပညာစွမ်းပကားဖြင့် နောင်နှစ်ပြိုင်ပွဲများမှာလည်း မွန်ပြည်နယ်၏ဂုဏ်ကို မြှင့်တင်စွမ်းဆောင်ပေးကြပါရန်ဖြင့် ဂုဏ်ပြုအမှာစကား ပြောကြားခဲ့သည်။
ဆက်လက်၍ မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီး ဆုရပြိုင်ပွဲဝင်များက ပြည်နယ်ဝန်ကြီချုပ်အား ဂါရဝပြုကန်တော့ခဲ့ကြပြီး ပြည်နယ်ဝန်ကြီးချုပ်က ပြိုင်ပွင်ဝင်များအား ရင်းရင်းနှီးနှီး ဂုဏ်ပြုအားပေး နှုတ်ဆက်ခဲ့ကြောင်း သိရသည်။
ခရိုင်(ပြန်/ဆက်)
No comments:
Post a Comment