ရခိုင်ပြည်နယ်အတွင်း ဆိုင်ကလုန်မုန်တိုင်း(မိုခါ) တိုက်ခတ်မှုကြောင့် ပျက်စီးမှုများ ဖြစ်ပေါ်ခဲ့သည့် ဒေသများ၌ ဒေသအလိုက် ခန့်အပ်တာဝန်ပေးသူများက သက်ဆိုင်ရာ တာဝန်ရှိသူများနှင့်အတူ ပြန်လည်ထူထောင်ရေးလုပ်ငန်းများ ကူညီဆောင်ရွက်လျက်ရှိ

 

နေပြည်တော် မေ  ၂၈

နိုင်ငံတော်စီမံအုပ်ချုပ်ရေးကောင်စီအနေဖြင့် ဆိုင်ကလုန်းမုန်တိုင်း(မိုခါ) တိုက်ခတ်မှုကြောင့် ထိခိုက်ပျက်စီးခဲ့သည့် ဒေသများကို သဘာဝဘေးအန္တရာယ် ဆိုင်ရာစီမံခန့်ခွဲမှုဥပဒေပုဒ်မ ၁၁ အရ သဘာဝဘေးအန္တရာယ်ကျရောက်သော ဒေသများအဖြစ် ကြေညာချက်များ ထုတ်ပြန်၍ ယင်းကြေညာချက်များပါ ဒေသများတွင် ပြန်လည်ထူထောင်ရေးလုပ်ငန်းများ ဆောင်ရွက်နိုင်ရန် ဒေသအလိုက် တပ်မတော်အရာရှိကြီးများကို ခန့်အပ်တာဝန်ပေးထားပြီးဖြစ်သည်။

ထိုသို့ ပြန်လည်ထူထောင်ရေးလုပ်ငန်းများ ဆောင်ရွက်ရန်အတွက် ခန့်အပ် တာဝန်ပေးအပ်ထားရှိရာ မေ ၂၇ ရက်တွင် မြောက်ဦးခရိုင်၊ မင်းပြားမြို့နယ်သို့ ရောက်ရှိနေသော ဗိုလ်မှူးချုပ်ခင်ဇော်သည် တာဝန်ရှိသူများနှင့်အတူ မြို့နယ်ပညာရေးမှူးရုံးခန်းမ၌ ကျောင်းဖွင့်ချိန်အမီ ကျောင်းများ ဖွင့်လှစ်နိုင်ရေးအတွက် ပျက်စီးမှုများဖြစ်ပေါ်ခဲ့သည့် ကျောင်းများမှ ဆရာ၊ ဆရာမများနှင့် ကျောင်းအုပ်ကြီးများ၊  ဆောက်လုပ်ရေးအဖွဲ့များအား တွေ့ဆုံ၍ ကျောင်းအဆောက်အဦများ ဆောက် လုပ်ပြီးစီးနိုင်ရေးအတွက် ညှိနှိုင်းဆောင်ရွက်ပေးသည်။ ထို့နောက် မင်းပြားမြို့နယ် အထွေထွေ အုပ်ချုပ်ရေးဦးစီးဌာနရုံးခန်းမ၌ မုန်တိုင်းသင့် ရပ်ကွက်၊ ကျေးရွာများမှ ဒေသခံပြည်သူများအား ဆန်နှင့် စားသောက်ဖွယ်ရာများအား လက်ဝယ် အရောက် ထောက်ပံ့ပေးအပ်ပြီး ရင်းရင်းနှီးနှီးလိုက်လံနှုတ်ဆက် အားပေးစကား ပြောကြားခဲ့သည်။

အလားတူ မြေပုံမြို့သို့ ရောက်ရှိနေသော ဗိုလ်မှူးချုပ် ကျော်ကျော်စိုးသည် တာဝန်ရှိသူများနှင့်အတူ ယနေ့တွင် လေဘေးသင့်ပြည်သူများအတွက် ရခိုင်ပြည်နယ်အစိုးရအဖွဲ့၏ သဘာဝဘေးပြန်လည်ထူထောင်ရေးကော်မတီနှင့် အလှူရှင်များ ထောက်ပံ့လှူဒါန်းသော တပ်မတော်ကမ်းထိုးရေယာဉ်ဖြင့် တင်ဆောင်ရောက်ရှိလာသည့် ပစ္စည်း ၁၃ မျိုးအား လေဘေးသင့်ပြည်သူများထံသို့ အမြန်ရောက်ရှိရေးတို့အတွက် မြို့နယ်သဘာဝဘေးပြန်လည် ထူထောင်ရေး ကော်မတီဝင် များနှင့် ညှိနှိုင်းဆွေးနွေးဆောင်ရွက်ခဲ့သည်။

အလားတူစစ်တွေမြို့သို့ ရောက်ရှိနေသာ ဗိုလ်မှူးချုပ် အောင်ကျော်မိုးသည်  စစ်တွေခရိုင်အထွေထွေအုပ်ချုပ်ရေး ဦးစီးဌာနရုံး အစည်းအဝေးခန်းမ၌   ပြုလုပ်သည့် စစ်တွေမြို့အတွင်း စုပေါင်းသန့်ရှင်းရေးဆောင်ရွက်နိုင်ရန်အတွက် ရပ်ကွက်အုပ်ချုပ်ရေးမှူးများ၊ လူမှုရေးအသင်းအဖွဲ့များမှ တာဝန်ရှိသူများနှင့် တွေ့ဆုံဆွေးနွေးပွဲသို့ တက်ရောက်ခဲ့ပြီး လိုအပ်သည်များ ပေါင်းစပ်ညှိနှိုင်းဆောင်ရွက်ပေးခဲ့ကြောင်း သတင်းရရှိသည်။