နေပြည်တော်ကောင်စီအဖွဲ့ဝင် ဦးမြင့်စိုး လယ်ဝေးမြို့နယ်အတွင်း လေပြင်းတိုက်ခတ်မှုကြောင့် ထိခိုက်ပျက်စီးခဲ့သည့် အိမ်ထောင်စုများအတွက် ဆန်ရိက္ခာဖိုး၊ အိမ်ဆောက်ပစ္စည်းဖိုးနှင့် သေဆုံးသူ၊ ဒဏ်ရာရရှိသူများအတွက် ထောက်ပံ့ငွေစုစုပေါင်း ငွေကျပ် သိန်းသုံးရာကျော် ပေးအပ်

 

နေပြည်တော် ဧပြီ ၂၅

နေပြည်တော်ကောင်စီအဖွဲ့ဝင် ဦးမြင့်စိုးသည် နေပြည်တော်အဆင့်ဌာနဆိုင်ရာ တာဝန်ရှိသူများနှင့် အတူ ယမန်နေ့မွန်းလွဲပိုင်းက နေပြည်တော်၊ လယ်ဝေးမြို့နယ်ရှိ အောင်မြေကုန်းကျေးရွာနှင့် တံတားဦးကျေးရွာမှ လေးဘေးသင့် ပြည်သူများအား သွားရောက်၍ အားပေးစကားပြောကြားပြီး ထောက်ပံ့ငွေများ ပေးအပ်သည်။

နေပြည်တော်ကောင်စီအဖွဲ့ဝင် ဦးမြင့်စိုးသည် ကျေးရွာများအတွင်း လျှပ်စစ်ပြန်လည်ရရှိရေး ဆောင်ရွက်နေမှုအခြေအနေများ၊ ယာယီနေထိုင်ရေး အမိုးအကာများ ဆောင်ရွက်နေမှု အခြေအနေများကို လှည့်လည်ကြည့်ရှု စစ်ဆေးရာ တာဝန်ရှိသူများက ရှင်းလင်းတင်ပြခဲ့ပြီး နေပြည်တော်ကောင်စီအဖွဲ့ဝင်က တင်ပြချက်များနှင့်စပ်လျဉ်း၍ လိုအပ်သည်များကို ပေါင်းစပ်ညှိနှိုင်း ဆောင်ရွက်ပေးခဲ့သည်။

ထို့နောက် အောင်မြင်ကုန်းကျေးရွာနှင့် တံတားဦးကျေးရွာများမှ လေဘေးသင့်ပြည်သူများအတွက် လူမှုဝန်ထမ်းကယ်ဆယ်ရေးနှင့်ပြန်လည်နေရာချထားရေးဝန်ကြီးဌာနမှ ထောက်ပံ့ပေးအပ်သည့် လူဦးရေ ၁၀၁၉ ဦး အတွက် ဆန်ရိက္ခာဖိုး ထောက်ပံငွေကျပ် ၂၁ သိန်း သုံးသောင်းကိုးထောင့်ကိုးရာ ကိုလည်းကောင်း၊ ပြိုလဲအိမ် ၂၂၀ လုံးအတွက် အိမ်ဆောက်ပစ္စည်းဖိုး ထောက်ပံ့ငွေကျပ် ၂၂၀ သိန်း ကိုလည်းကောင်း၊ အမိုးလန်အိမ် ၃၅ လုံးအတွက် အိမ်ဆောက်ပစ္စည်းဖိုး ထောက်ပံ့ငွေကျပ် ၂၈ သိန်း ကိုလည်းကောင်း၊ သေဆုံးသူ ၆ ဦးအတွက် ထောက်ပံ့ငွေကျပ် ၁၈ သိန်းကိုလည်းကောင်း၊ ဒဏ်ရရှိသူ ၁၁၃ ဦးအတွက် ထောက်ပံ့ငွေကျပ် ၅၆ သိန်း ငါးသောင်းကိုလည်းကောင်း စုစုပေါင်း ထောက်ပံ့ငွေကျပ် သုံးရာလေးဆယ့်သုံးသိန်း ရှစ်သောင်းကိုးထောင့်ကိုးရာအား နေပြည်တော်ကောင်စီအဖွဲ့ဝင် ဦးမြင့်စိုးနှင့် တာဝန်ရှိသူများက ထောက်ပံ့ပေးအပ်ခဲ့ကြောင်း သိရသည်။

ထွန်းထွန်းဝင်း(ပြန်/ဆက်)