ပြည်ထောင်စုတရားလွှတ်တော်ချုပ်နှင့် တိုင်းဒေသကြီး/ ပြည်နယ်တရားလွှတ်တော်များ၊ ကိုယ်ပိုင်အုပ်ချုပ်ခွင့်ရတိုင်းတရားရုံး၊ ကိုယ်ပိုင်အုပ်ချုပ်ခွင့်ရဒေသတရားရုံး၊ ခရိုင်တရားရုံးများ၏ (၂၄) ကြိမ်မြောက် ညှိနှိုင်းအစည်းအဝေးကျင်းပ

 

နေပြည်တော် ဖေဖော်ဝါရီ ၂၃

ပြည်ထောင်စုတရားလွှတ်တော်ချုပ်နှင့် တိုင်းဒေသကြီး/ ပြည်နယ်တရားလွှတ်တော်များ၊ ကိုယ်ပိုင်အုပ်ချုပ်ခွင့်ရ တိုင်းတရားရုံး၊ ကိုယ်ပိုင်အုပ်ချုပ်ခွင့်ရဒေသတရားရုံး၊ ခရိုင်တရားရုံးများ၏ (၂၄) ကြိမ်မြောက် ညှိနှိုင်း အစည်းအဝေးကို ယနေ့နံနက် ၉ နာရီတွင် နေပြည်တော်ရှိ ပြည်ထောင်စုတရားလွှတ်တော်ချုပ်၌ ဗီဒီယိုကွန်ဖရင့်ဖြင့် ကျင်းပသည်။

ဦးစွာ ပြည်ထောင်စုတရားသူကြီးချုပ် ဦးထွန်းထွန်းဦးက တရားစီရင်ရာတွင် အဂတိတရား ကင်းစင်စွာဖြင့် ဥပဒေနှင့်အညီ မှန်မှန်ကန်ကန် အဆုံးအဖြတ်ပြုကြရန်နှင့် ကြန့်ကြာမှုမရှိစေ ရေး ဆောင်ရွက်သွားကြရန်ဖြစ်ကြောင်း၊ တရားရုံးကဦးဆောင်သည့် စေ့စပ်ဖြေရှင်းရေးစနစ် သည် တရားမမှုများ စစ်ဆေးစီရင်မှုကို အထောက်အကူပြုပြီး စွဲဆိုပြီးအမှုများမှာ အမှုသည်များ ကိုယ်တိုင်ဖြေရှင်းနိုင်ခွင့်ကို ရရှိစေသည့်အတွက် တရားရုံးများက တရားမမှုများ စေ့စပ်ဖြေရှင်းရေး ပိုမိုလွှဲအပ်နိုင်ရန်နှင့် နှစ်ဖက်အမှုသည်များ လာရောက်နိုင်စေရန် ကြိုးပမ်း ဆောင်ရွက်ကြမည်ဖြစ်ကြောင်း၊ ငွေကြေးခဝါချမှုနှင့် သက်ဆိုင်သည့်ပြစ်မှုများ စစ်ဆေးစီရင်ရာတွင်လည်း ဥပဒေပြဋ္ဌာန်းချက်များ၊ နိုင်ငံတော်၏ လုပ်ငန်းစဉ်များကို တရားရုံးများက အလေးထားလိုက်နာဆောင်ရွက် ကြရန်ဖြစ်ကြောင်း၊ တရားစီရင်ရေးတွင် ခေတ်နှင့်အညီ နည်းပညာအသုံးပြုမှု ဆောင်ရွက်ခြင်းလုပ်ငန်းများကို အကောင်အထည်ဖော် ဆောင်ရွက်လျက်ရှိရာ နည်းပညာကိုလက်လှမ်းမီရန် အားလုံးဝိုင်းဝန်း ကြိုးပမ်းဆောင်ရွက်ကြ ရမည်ဖြစ်သည့်အပြင် စဉ်ဆက်မပြတ် လေ့လာဆည်းပူးကြရန်လည်း လိုအပ်ကြောင်း၊ နိုင်ငံ့ ဝန်ထမ်းများဖြစ်သည်နှင့်အညီ ပါတီနိုင်ငံရေး ကင်းရှင်းကြရမည်ဖြစ်ပြီး လုပ်ငန်းများ ဆောင်ရွက်ရာတွင်လည်း စာရွက်စာတမ်းလုံခြုံရေး၊ သတင်းလုံခြုံရေး ကျိုးပေါက်မှုမရှိစေရေး အထူး ဂရုပြု ဆောင်ရွက်ကြရန်ဖြစ်ကြောင်း၊ တရားစီရင်ရေး မဟာဗျူဟာစီမံကိန်း (၂၀၂၃-၂၀၂၇) ၏ ပထမနှစ် လုပ်ငန်းအစီအစဉ် (၂၀၂၃ ခုနှစ်) ရည်မှန်းချက်များ အောင်မြင်အောင် ကြိုးပမ်းဆောင်ရွက်သွားကြရန်ဖြစ်ကြောင်းနှင့် ပြည်သူအများ ယုံကြည်ကိုးစားသည့် တရားစီရင်ရေးစနစ်ဖြစ်ထွန်းရေး ကြိုးပမ်းဆောင်ရွက်သွားကြရန်ဖြစ်ကြောင်း ပြောကြားသည်။

ဆက်လက်၍ မှုခင်းများ စစ်ဆေးစီရင်ခဲ့မှုနှင့်စပ်လျဉ်းပြီး ၂၀၂၂ ခုနှစ် ဇန်နဝါရီ ၁ ရက်မှ ဒီဇင် ဘာ ၃၁ ရက်အထိ ပြည်ထောင်စုတရားလွှတ်တော်ချုပ်မှာ ရာဇဝတ် အမှုပေါင်း ၁၀၇၆ မှု လက်ခံရရှိပြီး ၉၃၆ မှု စစ်ဆေးပြီးပြတ်ကြောင်း၊ တရားမအမှုပေါင်း ၁၈၄၄ မှု လက်ခံရရှိပြီး (ယခင်နှစ်အမှုလက်ကျန် ၁၅၃ မှု အပါအဝင်) ၁၉၉၇ မှု စစ်ဆေးပြီးပြတ်ကြောင်း၊ တိုင်းဒေသကြီးနှင့် ပြည်နယ်တရားလွှတ်တော်များမှာ ရာဇဝတ်အမှုပေါင်း ၄၅၀၅ မှု လက်ခံရရှိပြီး (ယခင်နှစ် အမှုလက်ကျန် ၁၅၇ မှု အပါအဝင်) ၄၆၆၂ မှု စစ်ဆေးပြီးပြတ်ကြောင်း၊ တရားမအမှုပေါင်း ၄၃၅၅ မှု လက်ခံရရှိပြီး (ယခင်နှစ် အမှုလက်ကျန် ၆၇၇ မှု အပါအဝင်) ၅၀၃၂ မှု စစ်ဆေးပြီးပြတ်ကြောင်း၊ ကိုယ်ပိုင်အုပ်ချုပ်ခွင့်ရ တိုင်းတရားရုံး၊ ကိုယ်ပိုင်အုပ်ချုပ်ခွင့်ရ ဒေသတရားရုံးများနှင့် ခရိုင်တရားရုံးများမှာ ရာဇဝတ် အမှုပေါင်း ၂၈၂၇၂ မှု လက်ခံရရှိပြီး (ယခင်နှစ် အမှုလက်ကျန် ၁၀၄၉ မှု အပါအဝင်) ၂၉၃၂၁ မှု စစ်ဆေးပြီးပြတ်ကြောင်း၊ တရားမ အမှုပေါင်း ၂၇၄၂၈ မှု လက်ခံရရှိပြီး (ယခင်နှစ် အမှုလက်ကျန် ၄၃၈ မှု အပါအဝင်) ၂၇၈၆၆ မှု စစ်ဆေးပြီးပြတ်ကြောင်း၊ မြို့နယ်တရားရုံးများမှာ ရာဇဝတ်အမှုပေါင်း ၁၆၉၄၂၁ မှု လက်ခံရရှိပြီး (ယခင်နှစ် အမှုလက်ကျန် ၂၀၄၈၉ မှု အပါအဝင်) ၁၈၉၉၁၀ မှု စစ်ဆေးပြီးပြတ်ကြောင်း၊ တရားမ အမှုပေါင်း ၁၉၅၁၄ မှု လက်ခံရရှိပြီး (ယခင်နှစ် အမှုလက်ကျန် ၆၂၀၀ မှု အပါအဝင်) ၂၅၇၁၄ မှု စစ်ဆေးပြီးပြတ်ကြောင်း၊ ဥပဒေအရ တည်ထောင်သော အခြားတရားရုံးများဖြစ်သည့် ကလေးသူငယ်တရားရုံး (ရန်ကုန်နှင့် မန္တလေး) မှာ ကလေးသူငယ်ဥပဒေအရ စွဲဆိုတင်ပို့သည့် အမှုပေါင်း ၃၈၅ မှု လက်ခံရရှိပြီး (ယခင်နှစ် အမှုလက်ကျန် ၁၀ မှု အပါအဝင်) ၃၉၅ မှု စစ်ဆေးပြီးပြတ်ကြောင်း၊ စည်ပင်သာယာတရားရုံး (နေပြည်တော်၊ ရန်ကုန်နှင့် မန္တလေး) တို့မှာ စည်ပင်သာယာ ဥပဒေအရ စွဲဆိုတင်ပို့သည့် အမှု ပေါင်း ၅၉၄၂ မှု လက်ခံရရှိပြီး (ယခင်နှစ် အမှုလက်ကျန် ၂၃၃ မှု အပါအဝင်) ၆၁၇၅ မှု စစ်ဆေး ပြီးပြတ်ကြောင်း၊ မော်တော်ယာဉ်တရားရုံး (နေပြည်တော်၊ ရန်ကုန်နှင့်မန္တလေး)တို့မှာ ယာဉ်စည်းကမ်း၊ လမ်းစည်းကမ်း ဖောက်ဖျက်၍ မော်တော်ယာဉ်ဥပဒေအရ စွဲဆိုတင်ပို့သည့်အမှုပေါင်း ၄၅၅၄၇ မှုကို စစ်ဆေးစီရင်ခဲ့ကြောင်း၊ ဆက်လက်၍ မှုခင်းများကို ကြန့်ကြာမှုမရှိစေဘဲ မှန်ကန် မြန်ဆန်စွာစစ်ဆေးပြီးပြတ်ရေး ကြိုးပမ်းဆောင်ရွက်သွားကြရန် ဖြစ်ကြောင်း ပြောကြားသည်။

အစည်းအဝေးသို့ ပြည်ထောင်စုတရားလွှတ်တော်ချုပ် တရားသူကြီးများ၊ အမြဲတမ်းအတွင်းဝန်၊ ညွှန်ကြားရေးမှူးချုပ်များ၊ ဒုတိယညွှန်ကြားရေးမှူးချုပ်များနှင့် ညွှန်ကြားရေးမှူးများ တက်ရောက်ကြပြီး တိုင်းဒေသကြီး/ ပြည်နယ် တရားလွှတ်တော် တရားသူကြီးချုပ်များ၊ တိုင်း ဒေသကြီး/ ပြည်နယ်တရားရေးဦးစီးမှူးများ၊ ကိုယ်ပိုင်အုပ်ချုပ်ခွင့်ရ တိုင်းတရားသူကြီး၊ ကိုယ်ပိုင်အုပ်ချုပ်ခွင့်ရဒေသ တရားသူကြီး၊ ခရိုင်တရားသူကြီးများသည် ဗီဒီယိုကွန်ဖရင့်ဖြင့် တက်ရောက်ကြသည်။ အစည်းအဝေးကို ဖေဖော်ဝါရီ ၂၃ ရက်မှ ၂၅ ရက်အထိ ကျင်းပမည် ဖြစ်ကြောင်း သိရသည်။

သတင်းစဉ်