ပြည်ထောင်စုဝန်ကြီး ဦးရွှေလေး ရှမ်းပြည်နယ်(တောင်ပိုင်း)အတွင်းရှိ ဒေသဖွံ့ဖြိုးရေးလုပ်ငန်းများ ကြည့်ရှုစစ်ဆေး

 

နေပြည်တော် ဇူလိုင် ၁၁

ဆောက်လုပ်ရေးဝန်ကြီး ပြည်ထောင်စုဝန်ကြီး ဦးရွှေလေးနှင့် ရှမ်းပြည်နယ်အစိုးရအဖွဲ့၊ ပြည်နယ် လမ်းပန်းဆက်သွယ်ရေးဝန်ကြီး ရဲမှူးချုပ် တင်ကိုကိုတို့သည် တောင်ကြီးမြို့၊ လမ်းဦးစီးဌာန ပြည်နယ် ညွှန်ကြားရေးမှူးရုံးတွင် ရှမ်းပြည်နယ်(တောင်ပိုင်း)ရှိ ပြည်နယ်၊ ခရိုင်၊ မြို့နယ်နှင့် အဆောက်အဦ၊ လမ်း၊ တံတား အထူးအဖွဲ့များမှ ဝန်ထမ်းများနှင့် တွေ့ဆုံသည်။

 

တွေ့ဆုံစဉ် ပြည်ထောင်စုဝန်ကြီးက နိုင်ငံတော်ဖွံ့ဖြိုးတိုးတက်ရေးအတွက် နိုင်ငံ့ဝန်ထမ်းများ၏ အခန်းကဏ္ဍ သည် လွန်စွာအရေးကြီးပါကြောင်း၊ မိမိပြည်နယ်၊ ခရိုင်၊ မြို့နယ်အတွင်းရှိ အဆောက်အဦ၊ လမ်း၊ တံတားနှင့် မြို့ပြအိမ်ရာကဏ္ဍဖွံ့ဖြိုးရေးလုပ်ငန်းများ တိုးတက်အောင်မြင်ရေးအတွက် စေတနာထား ဆောင်ရွက်ရန် လိုကြောင်း၊ ဝန်ထမ်းများ စွမ်းဆောင်ရည်မြင့်မားစေရန်  Seminar များ ၊  Workshop များ ၊ Training များ လုပ်ဆောင်ပေးရန် လိုအပ်ပါကြောင်း၊ မိမိခရိုင်၊  မြို့နယ်အလိုက် နယ်မြေအခြေအနေနှင့်  လုပ်ငန်းဆောင်ရွက် ရာတွင် အခက်အခဲများရှိပါက တင်ပြပေးရန်လိုကြောင်း၊ သို့မှသာ လိုအပ်ချက်များကို ကူညီဖြေရှင်းပေး နိုင်မည်ဖြစ်ကြောင်း ပြောကြားသည်။

ထို့နောက် ရှမ်းပြည်နယ်အစိုးရအဖွဲ့၊ ပြည်နယ်လမ်းပန်းဆက်သွယ်ရေးဝန်ကြီး ရဲမှူးချုပ် တင်ကိုကိုက လိုအပ်သည် များကို ဖြည့်ဆည်းပြောကြားသည်။

ဆက်လက်၍ အဆောက်အဦဦးစီးဌာန၊ လမ်းဦးစီးဌာန၊ တံတားဦးစီးဌာနနှင့် မြို့ပြနှင့် အိမ်ရာဖွံ့ဖြိုးရေး ဦးစီးဌာနတို့မှ ညွှန်ကြားရေးမှူးချုပ်များ၊ ဒုတိယညွှန်ကြားရေးမှူးချုပ်တို့က လုပ်ငန်းပိုင်းဆိုင်ရာကိစ္စရပ်များ၊ ဝန်ထမ်းရေးရာကိစ္စရပ်များနှင့်ပတ်သက်၍ ရှင်းလင်းပြောကြားပြီး တက်ရောက်လာသော ပြည်နယ်၊ ခရိုင်၊ မြို့နယ်များနှင့် အထူးအဖွဲ့များမှ တက်ရောက်သူများကိုယ်စားတစ်ဦးက ရှင်းလင်းတင်ပြရာ ပြည်ထောင်စု ဝန်ကြီးနှင့်  လမ်းပန်းဆက်သွယ်ရေးဝန်ကြီးတို့က လုပ်ငန်းလိုအပ်ချက်များ ဖြည့်ဆည်းဆောင်ရွက်ပေးသည်။

ယင်းနောက် ပြည်ထောင်စုဝန်ကြီးနှင့်အဖွဲ့သည် တောင်ကြီးမြို့၊ စဝ်စံထွန်းဆေးရုံဝင်းအတွင်း (၄)ခန်းတွဲ (၄)ထပ် ဝန်ထမ်းအိမ်ရာ (၂)လုံး ဆောက်လုပ်ပြီးစီးမှုကို ကြည့်ရှုစစ်ဆေးပြီး လိုအပ်သည်များ မှာကြားသည်။

ထို့နောက် ပြည်ထောင်စုဝန်ကြီးနှင့်အဖွဲ့သည် ရှမ်းပြည်နယ်(တောင်ပိုင်း)၊ တောင်ကြီးခရိုင်၊ လမ်းဦးစီးဌာနမှ ကြီးကြပ်ပြီး တောင်ပေါ်ဒေသ လမ်းဆောက်လုပ်ရေးကုမ္ပဏီမှ B.O.T စနစ်ဖြင့် ဆောင်ရွက်သော မိတ္ထီလာ - တောင်ကြီး - ကျိုင်းတုံ - တာချီလိတ်လမ်း (မိတ္ထီလာ - တောင်ကြီး အပိုင်း) မိုင်တိုင် (၆၂/၀) အနီးရှိ နှစ်ထပ် လမ်းနေရာတွင် မြေပြိုကျမှုနှင့်  လမ်းသားနိမ့်ကျမှုမရှိ စေရန် အခိုင်အမာကွန်ကရစ်မြေထိန်းနံရံ  တည်ဆောက်နေမှုတို့ကို  ကြည့်ရှုစစ်ဆေးသည်။

ယင်းနောက် ပြည်ထောင်စုဝန်ကြီးနှင့်အဖွဲ့သည် မိုင်တိုင်အမှတ် (၄၃/၇) နှင့် (၄၄/၀) ကြားတွင် ယခင် နှစ်လမ်းသွား တံတားဟောင်းနှင့်ကပ်လျက် အရှည်ပေ(၂၀၀)ရှိ နှစ်လမ်းသွား ပြည်ညောင်တံတားသစ် တည်ဆောက်နေမှုကို ကြည့်ရှုစစ်ဆေးပြီး တာဝန်ရှိသူများကို လုပ်ငန်းလိုအပ်ချက်များ မှာကြားသည်။

ဆက်လက်၍ ပြည်ထောင်စုဝန်ကြီးနှင့်အဖွဲ့သည် B.O.T စနစ်ဖြင့် ဆောင်ရွက်သော ဘုရားငါးဆူ လမ်းအပိုင်း ပြုပြင်ထိန်းသိမ်းထားရှိမှုကို လည်းကောင်း၊ ရန်ကုန် - ပဲခူး - တောင်ငူ  -   မန္တလေး   ပြည်ထောင်စုလမ်းမကြီး   (မိတ္ထီလာ  -  ပျဉ်းမနားအပိုင်း)  အဆင့်မြှင့်တင်ဆောင်ရွက်ထားရှိမှု၊ ပြုပြင်ထိန်းသိမ်းခြင်းလုပ်ငန်းများ ဆောင်ရွက်ထားရှိမှုတို့ကို လမ်းတစ်လျှောက် ကြည့်ရှုစစ်ဆေးပြီး တာဝန်ရှိသူများအား လုပ်ငန်းလိုအပ်ချက်များ မှာကြားခဲ့ကြောင်း သိရသည်။

(သတင်းစဉ်)