Unboxing Investment Facilitation Toolkit 2022 မိတ်ဆက်ခြင်းနှင့် နေပြည်တော်အတွင်းရှိ ရုပ်ရှင်၊ ဂီတ၊ သဘင်၊ စာနယ်ဇင်းနှင့် မီဒီယာများသို့ ကိုဗစ်-၁၉ ရန်ပုံငွေမှ ချေးငွေခွင့်ပြုခြင်းလက်မှတ်များ ပေးအပ်ခြင်း အခမ်းအနားကျင်းပ

 

နေပြည်တော် ဧပြီ ၈

Unboxing Investment Facilitation Toolkit 2022 မိတ်ဆက်ခြင်းနှင့် နေပြည်တော်အတွင်း ရုပ်ရှင်၊ ဂီတ၊ သဘင်၊ စာနယ်ဇင်းနှင့် မီဒီယာများသို့ ကိုဗစ်-၁၉ ရန်ပုံငွေမှ ချေးငွေခွင့်ပြုခြင်းလက်မှတ်များ ပေးအပ်ခြင်း အခမ်းအနားကို ယမန်နေ့ မွန်းလွဲ(၂)နာရီတွင် နေပြည်တော်ကောင်စီရုံး အစည်းအဝေး ခန်းမ၌ ကျင်းပသည်။

ရှေးဦးစွာ နေပြည်တော်ကောင်စီ ရင်းနှီးမြှုပ်နှံမှုကော်မတီအဖွဲ့ဝင်၊ နေပြည်တော်ကောင်စီအဖွဲ့ဝင် ဦးဇေယျာလင်းက Unboxing Investment Facilitation Toolkit 2022 စသည့် Online Tool များကို အသုံးပြုပြီး  နေပြည်တော် ရင်းနှီးမြှုပ်နှံမှုနှင့်ကုမ္ပဏီများညွှန်ကြားမှုဦးစီးဌာန (DICA)နှင့် စီးပွားရေး လုပ်ငန်းရှင်များကြား ချိတ်ဆက်မှု ပိုမိုအားကောင်းစေကာ စီးပွားရေးရပ်ဝန်းအတွက် အကျိုးရှိစွာ ပူးပေါင်းဆောင်ရွက်မှုများ ဆောင်ရွက်နိုင်လိမ့်မည်လို့ မျှော်လင့်ပါကြောင်း၊ နိုင်ငံတော်အစိုးရအနေဖြင့် ကိုဗစ်-၁၉ရောဂါကြောင့် ထိခိုက်မှု ရှိသည့် စီးပွားရေးလုပ်ငန်းများကို ယာယီအားဖြင့် ကုစားနိုင်ရေး ရန်ပုံငွေတစ်ရပ်ထူထောင်ပြီး၊ အလွန်သက်သာသည့် အတိုးနှုန်းဖြင့် ထုတ်ပေးနေတာဖြစ်ပါကြောင်း၊ နေပြည်တော်အတွင်း ကိုဗစ်-၁၉ ချေးငွေအနေဖြင့် လုပ်ငန်းရှင် ၇၁ ဦးအတွက် ချေးငွေ (၂.၅၆၃) ဘီလီယံ ထုတ်ချေးပေးထား ပြီးဖြစ်ကြောင်း၊ ယနေ့ထပ်မံခွင့်ပြုပေးသည့် လုပ်ငန်းရှင် ၁၅ ဦး စုစုပေါင်း ကိုဗစ်-၁၉ ရန်ပုံငွေမှ ချေးငွေခွင့်ပြုထားသည့် လုပ်ငန်းရှင်ပေါင်း ၈၆ ဦး ရှိပြီဖြစ်ပါကြောင်း၊ ချေးငွေ ခွင့်ပြုချက် ရရှိသူများအနေဖြင့် နိုင်ငံတော်အစိုးရ၏ ကိုဗစ်-၁၉ ရန်ပုံငွေချေးငွေ ရည်ရွယ်ချက် များနဲ့အညီ ချေးငွေများကို အကျိုးရှိစွာ ထိထိရောက်ရောက် အသုံးချပြီး၊ မိမိတို့၏ စီးပွားရေး  လုပ်ငန်းများ တည်တံ့ခိုင်မာတိုးတက်အောင် ကြိုးစားဆောင်ရွက်စေလိုကြောင်း၊ ချေးငွေကာလ (၁)နှစ် ပြည့်မြောက်ပြီး ပြန်ဆပ်ရမည့်အချိန်တွင် အပြည့်အဝ မှန်မှန်ကန်ကန် ပြန်ဆပ်ပေးကြရန် တိုက်တွန်း ပြောကြားသည်။

ထို့နောက် နေပြည်တော် ရင်းနှီးမြှုပ်နှံမှုနှင့်ကုမ္ပဏီများညွှန်ကြားမှုဦးစီးဌာနမှ တာဝန်ရှိသူက ရင်းနှီး မြှုပ်နှံမှုဆိုင်ရာ စုံစမ်းမေးမြန်းမှုများကို Online မှတစ်ဆင့် လွယ်ကူစွာ တွေ့ဆုံကူညီဖြေရှင်းပေးနိုင်ရန် ရည်ရွယ်၍ အီလက်ထရောနစ် တွေ့ဆုံဆွေးနွေးခြင်း ဝန်ဆောင်မှု(DICA Online Solution - DOSo) စနစ်၊ Standard Operating Procedures (SOPs) တစ်နေရာတည်း၌ အလုံးစုံဝန်ဆောင်မှုပေးခြင်း (OSS) စနစ်၊ DICA info Android Mobile application တို့နှင့်စပ်လျဉ်း၍  အသေးစိတ်ရှင်းလင်းတင်ပြသည်။

ယင်းနောက် နေပြည်တော်ကောင်စီအဖွဲ့ဝင်များဖြစ်ကြသည့် ဦးဇေယျာလင်းနှင့် ဦးမြင့်စိုး တို့က နေပြည်တော်အတွင်းရှိ ရုပ်ရှင်၊ ဂီတ၊ သဘင်၊ စာနယ်ဇင်းနှင့် မီဒီယာလုပ်ငန်းများသို့ ကိုဗင်-၁၉ ရန်ပုံငွေမှ ချေးငွေခွင့်ပြုခြင်း လက်မှတ်များပေးအပ်ရာ  တိုင်းသဘင်အစည်းအရုံး ဥက္ကဋ္ဌ ဦးသိန်းအောင် နှင့်တာဝန်ရှိသူများက လက်ခံရယူကြပြီး တိုင်းသဘင်အစည်းအရုံး ဥက္ကဋ္ဌ ဦးသိန်းအောင်က ကျေးဇူးတင်စကား ပြန်လည်ပြောကြားသည်။

ထို့နောက် နေပြည်တော်ကောင်စီရင်းနှီးမြှုပ်နှံမှုကော်မတီအဖွဲ့ဝင်၊ နေပြည်တော်ကောင်စီအဖွဲ့ဝင် ဦးဇေယျာလင်းက Unboxing Investment Facilitation Toolkit 2022 မိတ်ဆက်ခြင်းနှင့် နေပြည်တော်အတွင်း ရုပ်ရှင်၊ ဂီတ၊ သဘင်၊ စာနယ်ဇင်းနှင့် မီဒီယာများသို့ ကိုဗစ်-၁၉ ရန်ပုံငွေမှ ချေးငွေခွင့်ပြုခြင်း လက်မှတ်များပေးအပ်ခြင်းနှင့်စပ်လျဉ်း၍ နိဂုံးချုပ်အမှာစကားပြောကြားခဲ့ ကြောင်းသိရသည်။

ထွန်းထွန်းဝင်း(ခရိုင်ပြန်/ဆက်)