ကြက်သွန်နီ စိုက်ပျိုး ထုတ်လုပ် သိုလှောင် ရောင်းဝယ်မှု ကွင်းဆက်တစ်လျှောက်မှ သက်ဆိုင်သူ များနှင့်တွေ့ဆုံ

နေပြည်တော် စက်တင်ဘာ ၃

ကြက်သွန်နီ စိုက်ပျိုး ထုတ်လုပ်သူတောင်သူများနှင့် ကုန်သည် လုပ်ငန်းရှင်များအနေဖြင့် အကျိုးတူ ပူးပေါင်း ထုတ်လုပ်မှုနှင့် ဈေးကွက်အခြေအနေ ထိန်းညှိနိုင်ရေးကို ပူးပေါင်းဆောင်ရွက်ကြရန် လိုအပ် ကြောင်း၊ စက်ကိရိယာ အသုံးပြုခြင်း၊ စိုက်ပျိုးရေ စီမံခန့်ခွဲခြင်းနှင့် သွင်းအားစုကို စနစ်တကျသုံးစွဲ၍ စရိတ်လျှော့ချခြင်းနှင့် အထွက်နှုန်း ကောင်းမွန်ရေး နည်းပညာများ လိုက်နာအသုံးပြုခြင်း စသည်တို့ကို စနစ်တကျလုပ်ကိုင်ဆောင်ရွက်ကြမှသာ ဈေးကွက် ယှဉ်ပြိုင်နိုင်မည်ဖြစ်ကြောင်း၊ အရည်အသွေး မထိခိုက်စေရန် သိုလှောင်နိုင်သည့် အဆင့်မြင့် သိုလှောင်ရုံများ အသုံးပြုနိုင်ရေး၊ တန်ဖိုးမြှင့် ကုန်ချော များအဖြစ် ထုတ်လုပ်နိုင်ရေးအတွက် ရင်းနှီးမြုပ်နှံမှုများကို နိုင်ငံတော်အစိုးရက အားပေးဆောင်ရွက် လျက်ရှိကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီး ဦးတင်ထွဋ်ဦး က ပြောကြားသည်။

 

စက်တင်ဘာ (၁)ရက်က ပြည်ထောင်စုဝန်ကြီးနှင့် မန္တလေးတိုင်းဒေသကြီး ကျောက်ဆည်နှင့် ကူမဲမြို့ များမှ ကြက်သွန်စိုက် တောင်သူများ၊ ကြက်သွန်လုပ်ငန်းရှင်များနှင့် တွေ့ဆုံစဉ်ထိုသို့ ပြောကြားခဲ့ခြင်း ဖြစ်သည်။

ကြက်သွန်နီ စတင်စိုက်ပျိုးသည်မှ ရိတ်သိမ်းပြီးနောက်ပိုင်း လုပ်ငန်းစဉ်များတွင် လုပ်ငန်း တွင်ကျယ်ပြီး စရိတ်သက်သာစေရန် စက်ကိရိယာများ အသုံးပြုနိုင်ရေး၊ ရေသွင်းစနစ်နှင့် ဓါတ်မြေသြဇာ အသုံးပြုမှု စနစ်များ ပြုပြင်ပြောင်းလဲ အသုံးပြုနိုင်ရေးတို့အတွက် သက်ဆိုင်ရာ ဌာနများက အကူအညီများ ဆောင်ရွက်ပေးခြင်း၊ လိုအပ်သော လက်တွေ့ အသုံးချ သုတေသန လုပ်ငန်းများ ဆောင်ရွက်ခြင်းနှင့် နည်းပညာပေးလုပ်ငန်းများကို ဌာနဆိုင်ရာများအပိုင်းက ဆောင်ရွက်ပေးသွားမည်ဖြစ်ပြီး၊ ထွက်ရှိလာ သည့် ပမာဏနှင့် သိုလှောင်ရုံ မျှတမှုရှိစေရန်၊ ကြက်သွန် အဆင့်အတန်းခွဲခြားစက်များ၊ တန်ဖိုးမြှင့် ကြက်သွန်ခြောက်နှင့် ကြက်သွန်အမှုန့် ထုတ်လုပ်ခြင်း လုပ်ငန်းများ တိုးချဲ့ဆောင်ရွက်ခြင်း၊ ဈေးကွက် သေချာမှုရှိစေရန် ကြိုတင်လေ့လာခြင်းနှင့် ချိတ်ဆက်ခြင်းလုပ်ငန်းများကို စီးပွားရေး လုပ်ငန်းရှင်များ အပိုင်းက ဆောင်ရွက် နိုင်ရေး လိုအပ်ချက်များကို ကျောက်ဆည်ခရိုင်အတွင်းရှိ ကြက်သွန်နီ စိုက်ပျိုး ထုတ်လုပ်မှု ကွင်းဆက် တစ်လျှောက် သက်ဆိုင်သူများနှင့် ညှိနှိုင်းခဲ့ခြင်းဖြစ်ကြောင်း သိရသည်။

(သတင်းစဉ်)