နေပြည်တော် ဇွန် ၈
စိုက်ပျိုးရေး၊
မွေးမြူရေးနှင့် ဆည်မြောင်းဝန်ကြီးဌာန အနေဖြင့် စိုက်ပျိုးမွေးမြူရေး ကဏ္ဍ၊ ကျေးလက်ကဏ္ဍများ
ဖွံ့ဖြိုးတိုးတက်ရေးအပြင် ဒေသအနှံ့အပြားတွင် ကြုံတွေ့နေကြရသည့် သောက်သုံးရေ ပြတ်လပ်မှု
အခက်အခဲများကို ကူညီဖြည့်ဆည်းပေးနိုင်ရေးအတွက် ဆောင်ရွက်ဆဲနှင့် ဆောင်ရွက်မည့် ဖွံ့ဖြိုးရေး
စီမံကိန်းများတွင် ဦးစားပေးအလိုက် ထည့်သွင်းရေးဆွဲ ဆောင်ရွက်လျက် ရှိသကဲ့သို့ စေတနာရှင်
အလှူရှင်များ၏ စုပေါင်း လှူဒါန်းငွေနှင့် ဌာနဝန်ထမ်းများ၏ ကာယဉာဏ လုပ်အားဒါနတို့ဖြင့်
လိုအပ်ချက် တောင်းဆိုမှုများအပေါ် စိစစ်ပြီး ဦးစားပေးအလိုက် ကြိုးပမ်း ဆောင်ရွက်ပေးလျက်ရှိသည်။
စိုက်ပျိုးရေး၊
မွေးမြူရေးနှင့် ဆည်မြောင်းဝန်ကြီးဌာန မျှဝေခြင်း အစီအစဉ်တွင် ရန်ကုန်တက္ကသိုလ် သင်္ချာဌာန
အငြိမ်းစား ဆရာကြီး၊ ဆရာမကြီးများနှင့် တပည့်များက ပါဝင်လှူဒါန်းမှုဖြင့် စက်ရေတွင်းနှင့်
ရေလှောင်ကန် လွှဲပြောင်းပေးအပ်ပွဲ အခမ်းအနားကို ယနေ့ နံနက်ပိုင်းက မန္တလေးတိုင်းဒေသကြီး
မလှိုင်မြို့နယ် ဖက်ကုန်းကျေးရွာ အုပ်စု ၊ ကူနီကျေးရွာ၌ ကျင်းပသည်။
အခမ်းအနားသို့
ပြည်ထောင်စုဝန်ကြီး ဒေါက်တာ အောင်သူ၊ လွှတ်တော် ကိုယ်စားလှယ်များ၊ အမြဲတမ်းအတွင်းဝန်
ဦးကျော်မင်းဦးနှင့် ညွှန်ကြားရေးမှူးချုပ် ဦးကျော်မြင့်လှိုင်၊ ရန်ကုန်တက္ကသိုလ် သင်္ချာဌာန
၁၉၇၅-၇၉ ခုနှစ် ဆရာကြီး ဆရာမကြီး များနှင့် သင်္ချာအဓိက ကျောင်းသားကျောင်းသူများ၊ ကျေးရွာ
ရပ်မိရပ်ဖများ တက်ရောက်ကြသည်။
အခမ်းအနားတွင်
အလှူရှင်များကိုယ်စား ကိုယ်စားလှယ်တစ်ဦးက စက်ရေတွင်း၊ ရေတင်စက်ရုံ၊ အုတ်ရေလှောင်ကန်နှင့်
ရေပိုက်လိုင်း လှူဒါန်းရခြင်းနှင့် ပတ်သက်၍ ရှင်းလင်း ပြောကြားသည်။
ထို့နောက်အလှူရှင်၏
ကိုယ်စားလှယ်တစ်ဦးက စက်ရေတွင်း၊ ရေတင်စက်ရုံ၊ အုတ်ရေ လှောင်ကန်နှင့် ရေပိုက်လိုင်း
နှင့် စပ်လျဉ်းသည့် လွှဲပြောင်းမှတ်တမ်းအား ပေးအပ်ရာ ကူနီကျေးရွာ ကျေးရွာရပ်မိရပ်ဖ တစ်ဦးက
လက်ခံရယူပြီး ကျေးဇူးတင်စကား ပြန်လည် ပြောကြားသည်။
ယနေ့လွှဲပြောင်းပေးအပ်ခဲ့သော
စက်ရေတွင်းမှာ တစ်နာရီ ရေဂါလံ ၄၈၀၀ ထွက်ရှိပြီး ရေဂါလံ ၃၀၀၀ ဆံ့သည့် ရေစုကန် မှ ရေကို၊
ပေ ၄၃၀၀ ရှည်လျားသည့် ၃ လက်မ ရေပိုက်လိုင်းဖြင့် ကျေးရွာတွင်း အရောက် ရေသွယ်ပေးပို့ခြင်းတို့
ပါဝင်ပြီး ကျေးရွာနေ လူဦးရေ ၅၀၇ ဦး အတွက် သောက်သုံးရေ ဖူလုံစေမည်ဖြစ်သည်။
ထိုမှတဆင့်
ပြည်ထောင်စုဝန်ကြီးနှင့် အဖွဲ့သည် နေပြည်တော်ပြည်ထောင်စုနယ်မြေရှိ ငလိုက်ရေလှောင်တမံသို့
ရောက်ရှိကြရာ ဆည်မြောင်းနှင့် ရေအသုံးချမှုစီမံခန့်ခွဲရေး ဦးစီးဌာန ညွှန်ကြားရေးမှူးချုပ်
ဦးကျော်မြင်လှိုင် က ရေပိုလွှဲ ဘိလပ်မြေသရွတ်မှုတ်သွင်းခြင်း လုပ်ငန်း အဆင့်ဆင့် ဆောင်ရွက်ခဲ့မှုနှင့်
တမံကြံ့ခိုင်ရေးလုပ်ငန်းများအား ရှင်းလင်း တင်ပြသည်။
တင်ပြချက်များအပေါ်
ပြည်ထောင်စုဝန်ကြီးက ဆွေးနွေးမှာကြားရာ၌ ဆည်တမံများသည် လယ်ယာကဏ္ဍ အတွက် သာမက ဒေသစိမ်းလန်းစိုပြည်ရေး
အတွက်ကိုပါ အကျိုးပြုလျက်ရှိနေကြကြောင်း၊ သဘာဝဘေးကြောင့် မလိုလားအပ်သော ဆိုးကျိုးများ
မဖြစ်ပေါ်စေရေး၊ တာတမံများရေရှည် အကျိုးရှိစွာ အသုံးပြုနိုင်ရေးအတွက် စောင့်ကြည့် စစ်ဆေးခြင်း
ပြုပြင်ထိန်းသိမ်းခြင်း လုပ်ငန်းများကို စဉ်ဆက်မပြတ် ဂရုပြု ဆောင်ရွက်ကြရမည် ဖြစ်ကြောင်း၊
ပြုပြင်မွမ်းမံမှုများ အားလုံး ရာသီချိန်မီ ချိန်ကိုက်ဆောင်ရွက်နိုင်ရေး အတွက် လိုအပ်သော
ရန်ပုံငွေသုံးစွဲခွင့်ကို ဘဏ္ဍာနှစ်အလိုက် စိစစ်ဆောင်ရွက်ရန် လိုအပ်ကြောင်း ပြောကြားသည်။
ငလိုက်ရေလှောင်တမံသည်
နေပြည်တော် ဥတ္တရသီရိမြို့နယ် ကျွဲရှင်းရွာအနီး ငလိုက် ချောင်းပေါ်တွင် တည်ရှိကာ တမံအလျား
၃၉၈၀ ပေ၊ တမံအမြင့် ၈၂ ပေရှိ မြေသားတမံအမျိုးအစားဖြစ်သည်။ ငလိုက်ရာဘာရေလွှဲဆည်မှတဆင့်
ဆည်ရေသောက်ဧရိယာ စိစစ်ပြီး ဧက ၁၇၇၈၄ ဧက ကို စိုက်ပျိုးရေ ပေးဝေလျက်ရှိကြောင်း သိရှိရသည်။
(သတင်းစဉ်)
No comments:
Post a Comment