ပြည်ထောင်စုဝန်ကြီး ဦးသိန်းဆွေ ကုလသမဂ္ဂလူဦးရေ ရန်ပုံငွေအဖွဲ့၏ မြန်မာနိုင်ငံဆိုင်ရာ ဌာနေ ကိုယ်စားလှယ် Mr. Ramanathan Balakrishnan အား တွေ့ဆုံ

နေပြည်တော် ဇန်နဝါရီ  ၂၂

အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာန၊ ပြည်ထောင်စုဝန်ကြီး ဦးသိန်းဆွေသည် ကုလသမဂ္ဂ လူဦးရေ ရန်ပုံငွေအဖွဲ့ (UNFPA) ၏ မြန်မာနိုင်ငံဆိုင်ရာ ဌာနေ ကိုယ်စားလှယ် Mr. Ramanathan Balakrishnan အား ယနေ့မွန်းလွဲ (၃) နာရီတွင် နေပြည်တော်ရှိ အဆိုပါဝန်ကြီးဌာန၊ ပြည်ထောင်စုဝန်ကြီး၏ ဧည့်ခန်းမ၌ လက်ခံ တွေ့ဆုံသည်။

တွေ့ဆုံစဉ် ၂၀၁၄ ခုနှစ် ၊ လူဦးရေနှင့် အိမ်အကြောင်းအရာ သန်းခေါင်စာရင်း ကောက်ယူမှုနှင့် ကောက်ယူ ရရှိသော အချက်အလက်များအပေါ် အခြေခံ၍ သုတေသန စာတမ်းများနှင့် သန်းခေါင် စာရင်းရလဒ်မြေပုံတို့  အဆင့်ဆင့် ထုတ်ပြန်ခဲ့မှု အခြေအနေ၊ ထုတ်ပြန်ပြီး သန်းခေါင်စာရင်းအချက် အလက်များအား မြို့နယ်များ အဆင့်အထိ အသုံးပြုနိုင်ရေးအတွက် ဖြန့်ဝေ ဆောင်ရွက်နိုင်မှုနှင့် အချက်အလက် အသုံးပြုသူများမှ ယုံကြည်စိတ်ချစွာ အသုံးပြုဆောင်ရွက်နေမှု အခြေအနေ၊ ယင်းအချက်အလက်များမှ Micro Data အထိ ပံ့ပိုးပေးနိုင်မှုနှင့် အချက်အလက် အသုံးပြုသူများမှ တိကျသေချာသော သန်းခေါင်စာရင်းဆိုင်ရာ အချက်အလက်များအား မျှဝေသုံးစွဲနေမှု၊ ကောက်ယူ ရရှိသော အချက်အလက်များမှ ထုတ်ပြန်ရန် ကျန်ရှိသည့် အချက်အလက်များအား ဆက်လက် ထုတ်ပြန်နိုင်ရေး ကြိုးပမ်းဆောင်ရွက်နေမှု အခြေအနေ၊ သန်းခေါင်စာရင်း အချက်အလက် အသုံးပြုသူများအတွက် မြို့နယ်အဆင့်အလုပ်ရုံ ဆွေးနွေးပွဲများ ဆက်လက် ကျင်းပနိုင်ရေးအတွက် စီစဉ်ဆောင်ရွက်နေမှု၊ ၂၀၁၄ ခုနှစ် သန်းခေါင်စာရင်း ကောက်ယူပြီးနောက် (၅)နှစ်တာကာလအတွင်း ပြောင်းလဲသွားသည့် အချက်အလက်များကို နှိုင်းယှဉ်သိရှိနိုင်ရန်၊ အခြားဌာနများမှ လိုအပ်သည့် အချက်အလက်များကို ဖြည့်ဆည်း ကောက်ယူပြုစုပေးနိုင်ရန်နှင့် ၂၀၂၄ ခုနှစ်တွင် ဆောင်ရွက်မည့် ပြည်လုံးကျွတ် သန်းခေါင်စာရင်း လုပ်ငန်းစဉ်အတွက် လိုအပ်ချက်များ ကြိုတင်စီစဉ်ဆောင်ရွက်နိုင်ရန် စသည့် ရည်ရွယ်ချက်များဖြင့် ယခုနှစ် နိုဝင်ဘာလအတွင်း ကြားဖြတ်သန်းခေါင်စာရင်း ကောက်ယူနိုင်ရေး အတွက် စီမံချက်ရေး ဆွဲဆောင်ရွက်နေမှု၊ ကြားဖြတ်သန်းခေါင်စာရင်း ကောက်ယူခြင်း လုပ်ငန်းစဉ်အတွက် အလုပ်ရုံ ဆွေးနွေးပွဲများ ကျင်းပ ဆောင်ရွက်နိုင်ရေး ယင်းလုပ်ငန်းစဉ်များအပေါ် UNFPA မှ အတွေ့အကြုံ၊ အကြံဉာဏ်များနှင့် လိုအပ်သည့် စက်ကိရိယာ၊ နည်းပညာများ ဆက်လက်ပံ့ပိုး ကူညီဆောင်ရွက်ပေးနိုင်ရေး အခြေအနေ၊ ဝန်ကြီးဌာနနှင့် UNFPA တို့အကြား ယခင်ပူးပေါင်း ဆောင်ရွက်ခဲ့သည့် လုပ်ငန်းစဉ်များအတိုင်း ဆက်လက် ပူးပေါင်း ဆောင်ရွက်နိုင်ရေး အခြေအနေများနှင့် စပ်လျဉ်း၍ ရင်နှီးပွင့်လင်းစွာ ဆွေးနွေးခဲ့ကြကြောင်း သတင်း ရရှိသည်။

(သတင်းစဉ်)