နေပြည်တော် ဇန်န၀ါရီ ၂၄
ဒုတိယအကြိမ် ပြည်ထောင်စုလွှတ်တော် (၁၁) ကြိမ်မြောက် ပုံမှန်အစည်းအဝေး ဒုတိယနေ့ကို ယနေ့နံနက် ၁၀ နာရီတွင် နေပြည်တော်ရှိ ပြည်ထောင်စုလွှတ်တော် အစည်းအဝေးခန်းမ၌ ကျင်းပသည်။
အစည်းအဝေးတွင် ပြည်ထောင်စုလွှတ်တော် နာယက ဦးတီခွန်မြတ်က ပြည်ထောင်စု လွှတ်တော်က အတည်ပြုသည်ဟု မှတ်ယူရမည့် ကုန်အမှတ်တံဆိပ် မူပိုင်ခွင့်ဥပဒေကြမ်းနှင့် စက်မှုဒီဇိုင်း မူပိုင်ခွင့် ဥပဒေကြမ်းများကို လွှတ်တော်က မှတ်တမ်းတင်ကြောင်း ကြေညာသည်။
ထို့နောက် ပြည်ထောင်စုလွှတ်တော် နာယက က ပြည်ထောင်စုလွှတ်တော် ဥပဒေကြမ်း ပူးပေါင်းကော်မတီတွင် အဖွဲ့ဝင်အဖြစ် ကချင်ပြည်နယ် မဲဆန္ဒနယ်အမှတ် (၁၀) မှ အမျိုးသားလွှတ်တော် ကိုယ်စားလှယ် ဦးသိန်းလွင် အစား ချင်းပြည်နယ် မဲဆန္ဒနယ်အမှတ် (၇) မှ အမျိုးသားလွှတ်တော် ကိုယ်စားလှယ် ဒေါ်ကျိန်ငိုက်မန်အား လည်းကောင်း၊ ဧရာဝတီတိုင်းဒေသကြီး မဲဆန္ဒနယ်အမှတ် (၁) မှ အမျိုးသား လွှတ်တော် ကိုယ်စားလှယ် ဦးစိုးမိုးအစား မန္တလေးတိုင်း ဒေသကြီး မဲဆန္ဒနယ်အမှတ် (၄) မှ အမျိုးသားလွှတ်တော် ကိုယ်စားလှယ် ဒေါ်လှဌေး (ခ) ဒေါ်အုန်းကြည် အား လည်းကောင်း ပြောင်းလဲတာဝန်ပေး အပ်ခြင်းကို လွှတ်တော်သို့ တင်ပြ၍ သဘောတူညီချက် ရယူသည်။
ယင်းနောက် ပြည်ထောင်စုလွှတ်တော် နာယက က ပြည်ထောင်စုလွှတ်တော် ပြည်သူ့ငွေ စာရင်း ပူးပေါင်းကော်မတီတွင် အဖွဲ့ဝင်အဖြစ် ချင်းပြည်နယ် မဲဆန္ဒနယ် အမှတ် (၈) မှ အမျိုးသားလွှတ်တော် ကိုယ်စားလှယ် ဦးမာန်လောမောင်း အစား မွန်ပြည်နယ် မဲဆန္ဒနယ်အမှတ် (၈) မှ အမျိုးသားလွှတ်တော် ကိုယ်စားလှယ် ဦးမျိုးဝင်းအား ပြောင်းလဲတာဝန်ပေးအပ်ခြင်းကို လွှတ်တော်သို့ တင်ပြ၍ သဘောတူညီချက် ရယူသည်။
ဆက်လက်၍ အမျိုးသားပညာရေး မူဝါဒ ကော်မရှင်ဥက္ကဋ္ဌ ဒေါက်တာ မျိုးကြွယ်က အမျိုးသားပညာရေး မူဝါဒ ကော်မရှင်၏ ၆ လတာကာလ (၂၀၁၈ ခုနှစ်၊ ဧပြီ ၁၀ ရက်မှ အောက်တိုဘာ ၉ ရက်အထိ) အတွင်း လုပ်ငန်းဆောင်ရွက်ခဲ့မှု အစီရင်ခံစာနှင့် စပ်လျဉ်း၍ လွှတ်တော်သို့ ရှင်းလင်းတင်ပြရာတွင် ယခုအခါ အမျိုးသားပညာရေးမူဝါဒ ကော်မရှင်၏ သက်တမ်းမှာ (၂) နှစ်ပြည့်မြောက်ပြီး ဖြစ်ပါကြောင်း၊ လွန်ခဲ့သည့် (၂) နှစ်တာ ကာလအတွင်း ဆောင်ရွက်ခဲ့သည့် အတွေ့အကြုံများ အခြေခံလျက် အချက် ၄ ချက်ကို အကြံပြုလိုပါကြောင်း၊ ပထမ အကြံပြုချက်အနေဖြင့် ပညာရေးမူဝါဒများ၊ စီမံကိန်းများကို လေ့လာသုံးသပ် အကဲဖြတ် အကြံပြုရေးဖြစ်ပါကြောင်း၊ ကော်မရှင်က ပညာရေးမူဝါဒများ၊ ပညာရေး စီမံကိန်းများ အကောင်အထည် ဖော်မှုကို ကဏ္ဍအလိုက် သို့မဟုတ် ကဏ္ဍခွဲအလိုက် စနစ်တကျ လွှမ်းခြုံ သုံးသပ်အကဲဖြတ် အကြံပြုသင့်သည်ဖြစ်ရာ ထိုလုပ်ငန်းတာဝန်ကို ဆောင်ရွက်နိုင်ရန်အတွက် ပညာရေး ၀န်ကြီးဌာန၊ သက်ဆိုင်ရာ ၀န်ကြီးဌာနများ၊ မိတ်ဖက်အဖွဲ့အစည်းများနှင့် ကော်မရှင်တို့အကြား ပညာရေး ဆိုင်ရာ စာရင်းအင်းနှင့် သတင်းအချက် အလက်များ ဖလှယ်နိုင်မည့် ယန္တရားတစ်ခု ထူထောင်ဆောင် ရွက်ရန်နှင့် ကော်မရှင်ရုံးတွင် စီမံကိန်းလုပ်ငန်း ကြီးကြပ်အကဲ ဖြတ် သဘောတရားများကို နားလည်ပြီး၊ သုတေသန နည်းပညာ ကျွမ်းကျင်သည့် ၀န်ထမ်းများ တိုးချဲ့ခန့်ထားပြုစု ပျိုးထောင်ရန်တို့ ဖြစ်ပါကြောင်း။
ဒုတိယအကြံပြုချက်အနေဖြင့် ကော်မရှင်၊ ကော်မတီများနှင့် ၀န်ကြီးဌာန၊ သက်ဆိုင်ရာ ၀န်ကြီးဌာနများအကြား ပေါင်းစပ်ညှိနှိုင်းမှု အားကောင်းစေရေးဖြစ်ပါကြောင်း၊ ကော်မရှင်နှင့် ကော်မရှင်က ဖွဲ့စည်းထားသော ကော်မတီများနှင့် ပညာရေးဝန်ကြီးဌာန၊ သက်ဆိုင်ရာ ၀န်ကြီးဌာနများအကြား ပေါင်းစပ်ညှိနှိုင်းမှု၊ ပူးပေါင်းလုပ်ဆောင်မှု ပိုမိုအားကောင်းရေး အတွက် ပုံမှန်ပေါင်းစပ်ညှိနှိုင်းရေး ယန္တရားတစ်ခု ထူထောင်ဆောင်ရွက်ရန် ဖြစ်ပါကြောင်း။
တတိယ အကြံပြုချက်အနေဖြင့် သက်ဆိုင်သူများနှင့် ကျယ်ပြန့်စွာ ညှိနှိုင်းဆွေးနွေးရေး ဖြစ်ပါကြောင်း၊ ထို့ကြောင့် အများပြည်သူနှင့် သက်ဆိုင်သည့် ပညာရေးမူဝါဒများကို ရေးဆွဲရာတွင် သက်ဆိုင်သူ ပုဂ္ဂိုလ်များအားလုံး အကျုံးဝင်ပြီး၊ ထိရောက်သော မူဝါဒရေးရာ ညှိနှိုင်းဆွေးနွေးမှုဖြင့် ဆောင်ရွက်နိုင်ရေး အတွက် ကော်မရှင်၏ ဘဏ္ဍာရေးနှင့် လူ့စွမ်းအား အရင်းအမြစ်ကို တိုးမြှင့်ဖွဲ့စည်းပေးရန် ဖြစ်ပါကြောင်း။
စတုတ္ထ အကြံပြုချက်အနေဖြင့် နိုင်ငံတကာပညာရေး မိတ်ဖက်အဖွဲ့အစည်းများနှင့် ပိုမိုပူးပေါင်းဆောင် ရွက်ရေး ဖြစ်ပါကြောင်း၊ ကော်မရှင်နှင့် ကော်မတီများသည် ပညာရေးမူ ၀ါဒများ၊ အဆင့်အတန်းများ၊ စံချိန်စံညွှန်းများ စသည်တို့ကို ဖော်ထုတ်သတ်မှတ် အကြံပြုပေး ရမည့် အဖွဲ့အစည်းများ ဖြစ်သည်နှင့်အညီ မူဝါဒ ဆိုင်ရာ ဆွေးနွေးပွဲများ၊ မူဝါဒဆိုင်ရာ စွမ်းဆောင်ရည်မြှင့်တင်ရေး အစီအစဉ်များကို နိုင်ငံတကာ မိတ်ဖက် အဖွဲ့အစည်းများနှင့် ပူးပေါင်းဆောင်ရွက်ခြင်းဖြင့် ပိုမိုထိရောက်သော မူဝါဒများကို ရေးဆွဲဖော် ထုတ် အကောင်အထည်ဖော်နိုင်မည် ဖြစ်ပါကြောင်း။
ထို့ကြောင့် အမျိုးသားပညာရေးမူဝါဒ ကော်မရှင်သည် အမျိုးသားပညာရေးစနစ်၏ အဆင့်အသီးသီးတွင် ပိုမိုထိရောက်ပြီး စွမ်းဆောင်ရည်ရှိသော ပညာရေးကဏ္ဍ ပေါင်းစပ်ညှိနှိုင်း နိုင်မှုများကို ဖြည့်ဆည်းပေးနိုင် ရန်နှင့် ပညာရေး ပြုပြင်ပြောင်းလဲ မှုများ ရေရှည်တည်တံ့ ခိုင်မြဲမှုကို ပံ့ပိုးပေးနိုင်ရန်တို့အတွက် အမျိုးသား ပညာရေးဥပဒေပါ ကော်မရှင်၏ တာဝန်နှင့် လုပ်ပိုင်ခွင့်များကို ဖော်ဆောင်ရာတွင် ပြည်ထောင်စု လွှတ်တော်၊ ပြည်ထောင်စုအစိုးရအဖွဲ့ အပါအ၀င် သက်ဆိုင်သူများ အားလုံးနှင့် ညှိနှိုင်း ဆောင်ရွက် သွားမည်ဖြစ်ကြောင်း ရှင်းလင်းပြောကြားသည်။
ယင်းနောက် ပြည်ထောင်စုလွှတ်တော် နာယက က အဆိုပါကိစ္စနှင့် စပ်လျဉ်း၍ ဆွေးနွေးလိုသည့် လွှတ်တော် ကိုယ်စားလှယ်ရှိပါက အမည်စာရင်း တင်သွင်းနိုင်ကြောင်း ကြေညာသည်။
ထို့နောက် ပြည်ထောင်စုလွှတ်တော် ဥပဒေကြမ်း ပူးပေါင်းကော်မတီဝင် ဦးဇော်ဝင်းက နိုင်ငံတော် သမ္မတထံမှ သဘောထား မှတ်ချက်ဖြင့် ပြန်လည်ပေးပို့ထားသော မြန်မာ့ကျောက်မျက်ရတနာ ဥပဒေ ကြမ်းနှင့် စပ်လျဉ်း၍ ဥပဒေကြမ်းပူးပေါင်း ကော်မတီ၏ လေ့လာတွေ့ရှိချက်နှင့် သဘောထားမှတ်ချက် အစီရင်ခံစာကို ဖတ်ကြားတင်ပြသည်။
ယင်းနောက် ပြည်ထောင်စုလွှတ်တော် နာယက က အဆိုပါ ဥပဒေကြမ်းနှင့် စပ်လျဉ်း၍ ဆွေးနွေးလိုသည့် လွှတ်တော်ကိုယ်စားလှယ်ရှိပါက အမည်စာရင်း တင်သွင်းနိုင်ကြောင်း ကြေညာသည်။
ဆက်လက်၍ ပြည်ထောင်စုလွှတ်တော် ဥပဒေကြမ်း ပူးပေါင်းကော်မတီဝင် ဒေါ်နွယ်နွယ်အောင် က နိုင်ငံတော်သမ္မတထံမှ သဘောထား မှတ်ချက်ဖြင့် ပြန်လည်ပေးပို့ထားသော မြန်မာနိုင်ငံ စာရင်းကောင်စီ ဥပဒေကို ပြင်ဆင်သည့် ဥပဒေကြမ်းနှင့် စပ်လျဉ်း၍ ဥပဒေကြမ်း ပူးပေါင်းကော်မတီ၏ လေ့လာတွေ့ ရှိချက်နှင့် သဘောထားမှတ်ချက် အစီရင်ခံစာကို ဖတ်ကြားတင်ပြရာတွင် မြန်မာနိုင်ငံစာရင်း ကောင်စီဥပဒေ ကို ပြင်ဆင်သည့် ဥပဒေကြမ်းကို ပြည်ထောင်စုလွှတ်တော်က ၂၀၁၈ ခုနှစ် ဒီဇင်ဘာ ၁၈ ရက်တွင် အတည်ပြုခဲ့ပြီး နိုင်ငံတော်သမ္မတထံသို့ လက်မှတ်ရေးထိုး ထုတ်ပြန်နိုင်ရန် ပေးပို့ခဲ့ရာ နိုင်ငံတော်သမ္မတက သဘောထားမှတ်ချက် နှစ်ချက်ဖြင့် ၂၀၁၈ ခုနှစ် ဒီဇင်ဘာ ၂၇ ရက်တွင် ပြန်လည်ပေးပို့ လာခဲ့ပါ ကြောင်း၊ ယင်းဥပဒေကြမ်းနှင့် စပ်လျဉ်း၍ နိုင်ငံတော်သမ္မတ၏ သဘောထားမှတ်ချက်အပေါ် ပြည်ထောင်စု လွှတ်တော်တွင် ဆွေးနွေးဆုံးဖြတ်နိုင်ရေး ဥပဒေကြမ်း ပူးပေါင်းကော်မတီ၏ သဘောထားမှတ်ချက် အစီရင်ခံစာ တင်ပြရန် ပြည်ထောင်စု လွှတ်တော် နာယက က ၂၀၁၈ ခုနှစ် ဒီဇင်ဘာ ၂၇ ရက်တွင် တာဝန်ပေးအပ်ခဲ့ပါကြောင်း။
သို့ဖြစ်၍ ဥပဒေကြမ်း ပူးပေါင်းကော်မတီသည် ၂၀၁၉ ခုနှစ် ဇန်န၀ါရီ ၂၃ ရက်တွင် ပြည်ထောင်စု စာရင်းစစ်ချုပ်ရုံးနှင့် ပြည်ထောင်စု ရှေ့နေချုပ်ရုံးတို့မှ တာဝန်ရှိပုဂ္ဂိုလ်များ၊ ပြည်ထောင်စုလွှတ်တော် ဥပဒေရေးရာနှင့် အထူးကိစ္စရပ်များ လေ့လာ ဆန်းစစ်သုံးသပ်ရေး ကော်မရှင်အဖွဲ့ဝင်များနှင့် အစည်း အဝေး ကျင်းပခဲ့ပြီး နိုင်ငံတော်သမ္မတ၏ သဘောထား မှတ်ချက်များကို လေ့လာစိစစ်ခဲ့ကြပါကြောင်း၊ ယင်းအစည်းအဝေးတွင် ဆွေးနွေးချက်များအရ နိုင်ငံတော်သမ္မတက သဘောထားမှတ်ချက်ဖြင့် ပြန်လည်ပေးပို့လာသည့် ဥပဒေကြမ်းနှင့် စပ်လျဉ်း၍ ဥပဒေကြမ်း၏ အပိုဒ် ၈ ပါ ပုဒ်မ ၂၉၊ ပုဒ်မခွဲ (ခ) နှင့် အပိုဒ် ၂၀ ပါ ပုဒ်မ ၉၅ တို့ကို နိုင်ငံတော်သမ္မတ၏ သဘောထား မှတ်ချက်အတိုင်း အတည်ပြု ပြဋ္ဌာန်းသင့် သည်ကို လေ့လာတွေ့ရှိရပါကြောင်း။
သို့ပါ၍ နိုင်ငံတော်သမ္မတ၏ သဘောထားမှတ်ချက်ဖြင့် ပြန်လည်ပေးပို့လာသော မြန်မာနိုင်ငံစာရင်း ကောင်စီဥပဒေကို ပြင်ဆင်သည့် ဥပဒေကြမ်းနှင့် စပ်လျဉ်း၍ ပြည်ထောင်စု လွှတ်တော်ဆိုင်ရာ နည်းဥပဒေ ၉၉ နှင့်အညီ လွှတ်တော်သို့ အစီရင်ခံ တင်ပြအပ်ပါကြောင်း ရှင်းလင်းတင်ပြသည်။
ထို့နောက် ပြည်ထောင်စုလွှတ်တော် နာယက က အဆိုပါ ဥပဒေကြမ်းနှင့် စပ်လျဉ်း၍ ဆွေးနွေးလိုသည့် လွှတ်တော် ကိုယ်စားလှယ်ရှိပါက အမည်စာရင်း တင်သွင်းနိုင်ကြောင်း ကြေညာသည်။
ယင်းနောက် ပြည်ထောင်စုလွှတ်တော် နာယက က နိုင်ငံတော်သမ္မတထံမှ သဘောထားမှတ်ချက်ဖြင့် ပြန်လည် ပေးပို့ထားသော မြန်မာနိုင်ငံ တိုင်းရင်းဆေးကောင်စီ ဥပဒေကြမ်းနှင့် စပ်လျဉ်း၍ တစ်ပိုဒ်ချင်းစီ အလိုက် အဆိုတင်သွင်း ဆွေးနွေး၍ လွှတ်တော်၏ အဆုံးအဖြတ် ရယူအတည်ပြုသည်။
ဆက်လက်၍ ပြည်ထောင်စုအစိုးရအဖွဲ့မှ ပေးပို့သော ၂၀၁၈ ခုနှစ်၊ ကာလလတ် ကြွေးမြီစီ မံခန့်ခွဲမှု မဟာဗျူဟာ ထုတ်ပြန်ရေးနှင့် ၎င်းအစီရင်ခံစာအပေါ် ပြည်သူ့ငွေစာရင်း ပူးပေါင်းကော် မတီ၏ လေ့လာတွေ့ ရှိချက်နှင့် သဘောထား မှတ်ချက် အစီရင်ခံစာ (၁/၂၀၁၉) တို့နှင့် စပ်လျဉ်း ၍ လွှတ်တော်ကိုယ်စားလှယ်များက ဆွေးနွေးကြသည်။
အုတ်တွင်း မဲဆန္ဒနယ်မှ ဒေါ်ချိုချိုက ပြည်ပကြွေးမြီအများစုသည် အတိုးနှုန်း သက်သာပြီး ပြန်ဆပ်ကာလကြာရှည်သော ချေးငွေများဖြစ်သော်လည်း နှစ်စဉ် အတိုးအရင်း ပြန်လည်ပေးဆပ်ရ မည်ဖြစ်၍ ပြည်ပချေးငွေများကို ထိထိရောက်ရောက် အကျိုးရှိစွာ အသုံးပြုရန် လိုအပ်သကဲ့သို့ အတိုးနှုန်း မြင့်မားနေသည့် ချေးငွေများကို ဆောလျင်စွာ ပြန်ဆပ်သင့်ကြောင်းကို အကြံပြုလိုပါကြောင်း။
ကမ္ဘာ့ဘဏ်နှင့် အပြည်ပြည်ဆိုင်ရာ ငွေကြေးရန်ပုံငွေအဖွဲ့တို့၏ သတ်မှတ်ချက်အရ အလယ်အလတ်အဆင့် ၀င်ငွေနည်းပါးသည့် နိုင်ငံတွင် ပြည်တွင်း၊ ပြည်ပကြွေးမြီနှင့် GDP အချိုးမှာ ၃၈ ရာခိုင်နှုန်းထက် မကျော်စေရ ဆိုသော်လည်း ၂၀၁၇-၂၀၁၈ ဘဏ္ဍာနှစ်တွင် မြန်မာနိုင်ငံ၏ ပြည်တွင်းပြည်ပ ကြွေးမြီနှင့် GDP အချိုးမှာ ၃၈ ဒသမ ၃ ဖြစ်သောကြောင့် ကြွေးမြီခံနိုင်ရည်ရှိမှု ကန့်သတ်ချက်ဘောင်ထက် အနည်းငယ် ကျော်လွန်လျက်ရှိသဖြင့် ထိုအချိုးကို လျှော့ချနိုင်ရန် ကြိုးပမ်းသင့်ပါကြောင်း၊ ဘတ်ဂျက်လိုငွေနှင့် GDP အချိုးမှာလည်း ၅ ရာခိုင်နှုန်းထက် မြင့်မားလျက်ရှိသဖြင့် ထိုအချိုးအစားကို နိမ့်ကျသွားစေရန် ကြိုးပမ်းခြင်းဖြင့် ကြွေးမြီခံနိုင်ရည်ရှိမှုကို ပိုမိုကောင်းမွန်လာအောင် ဆောင်ရွက် သင့်ပါကြောင်း အကြုံပြုဆွေးနွေးသည်။
လှိုင်းဘွဲ့ မဲဆန္ဒနယ်မှ ဦးခင်ချိုက ချေးငွေတစ်မျိုးချင်းနှင့် စပ်လျဉ်း၍ စာချုပ်ပါ စည်းမျဉ်း၊ စည်းကမ်းများနှင့်အညီ ဆောင်ရွက်နိုင်ရေး၊ မူလရည်မှန်းချက်များနှင့်အညီ လုပ်ငန်းအကောင် အထည်ဖော်နိုင်ရေး၊ လုပ်ငန်းဆောင်ရွက်မှုနှင့် ချေးငွေထုတ်ယူမှု မှန်ကန်ထိရောက်ရေးတို့ကို အကြံပြုလိုပါကြောင်း၊ နိုင်ငံပိုင် စီးပွားရေးအဖွဲ့အစည်း ၃၂ ခုရှိသည့်အနက် ၈ ခုသာ ကိုယ်ပိုင်ရန်ပုံငွေနှင့် ကြွေးမြီများကို ပေးဆပ်နိုင်ပြီး ကျန် ၂၄ ခုကို နိုင်ငံတော်က တာဝန်ယူပေးဆပ်နေရသည့် အတွက် နိုင်ငံတော်အတွက် ၀န်ထုပ်ဝန်ပိုး ဖြစ်နေမှုအပေါ် နည်းလမ်းများ ရှာဖွေသင့်ပါကြောင်း။
နောင်တွင် ချေးငွေများ ချေးယူရာ၌ နိုင်ငံနှင့် ပြည်သူအတွက် အကျိုးသက်ရောက်နိုင်မှု အနေအထား၊ ချေးငွေများ ပြန်လည်ပေးဆပ်ရန်နှင့်ဝင်ငွေ ပြန်လည်ရရှိနိုင်မှု အလားအလာ မျှော်မှန်းချက်၊ ချေးငွေဖြင့် ဆောင်ရွက်မည့် လုပ်ငန်းများ၏ အရေးပါမှု၊ လုပ်ငန်းအောင်မြင် တိုးတက်နိုင်မည့် အလားအလာ၊ ချေးငွေဝန်ထုပ်ဝန်ပိုး ဖြစ်နိုင်မှု အခြေအနေများကို ကြိုတင်တွက်ချက် မှန်းဆထားသင့်ပါကြောင်း၊ ချေးငွေဖြင့် ဆောင်ရွက်သည့်လုပ်ငန်းများ အခြေအနေ၊ လုပ်ငန်းများ တိုးတက်မှုနှင့် ပြီးပြတ်မှု အခြေအနေများကိုလည်း လွှတ်တော်သို့ အခါအားလျော်စွာ အစီရင်ခံ တင်ပြသင့်ပါကြောင်း။
ချေးငွေ ၀န်ထုပ်ဝန်ပိုး ကျဆင်းလာရန်၊ နိုင်ငံတော်၏ အခွန်အကောက်ပိုမိုရရှိလာနိုင်ရေးနှင့် နိုင်ငံပိုင်စီးပွားရေးလုပ်ငန်းများ ၀င်ငွေကျဆင်းလာမှု၊ အရှုံးဖြစ်ပေါ်နေမှုနှင့် လုပ်ငန်းရပ် ဆိုင်းနေမှုများကိုလည်း ဖြေရှင်းဆောင်ရွက်နိုင်မှသာ အဆင်ပြေနိုင် မည်ဖြစ်ကြောင်းနှင့် နိုင်ငံ၏ ငွေကြေးတန်ဖိုး တည်ငြိမ်ရေးကိုလည်း အလေးထား ထိန်းညှိဆောင်ရွက်ရန် လိုအပ်ပါကြောင်း ဆွေးနွေးပြောကြားသည်။
ယင်းကိစ္စတို့နှင့် စပ်လျဉ်း၍ ချောက်မဲဆန္ဒနယ်မှ ဦးဘိုကြီး၊ သရက်မဲဆန္ဒနယ်မှ ဦးကံမြင့်၊ ရန်ကုန်တိုင်းဒေသကြီး မဲဆန္ဒနယ်အမှတ် (၄) မှ ဦးသန်းစိုး (ခေါ်) သန်းစိုး (ဘောဂဗေဒ) နှင့် ဧရာဝတီတိုင်းဒေသကြီး မဲဆန္ဒနယ်အမှတ် (၅) မှ ဦးမောင်မောင်အုန်း တို့က ဆက်လက်ဆွေးနွေးကြသည်။
ဒုတိယအကြိမ် ပြည်ထောင်စုလွှတ်တော် (၁၁) ကြိမ်မြောက် ပုံမှန်အစည်းအဝေး တတိယနေ့ကို ဇန်န၀ါရီ ၂၉ ရက်တွင် ဆက်လက် ကျင်းပသွားမည်ဖြစ်ကြောင်း သိရသည်။
အောင်ရဲသွင်၊ အေးအေးသန့်
No comments:
Post a Comment