ရင်းနှီးမြှုပ်နှံမှုနှင့် စီးပွားရေးလုပ်ငန်းရှင်များ၏ အမြင်

ပြည်တွင်းပြည်ပ ရင်းနှီးမြှုပ်နှံသူများ မြန်မာနိုင်ငံတွင် စီးပွားရေးလုပ်ကိုင်နိုင်မည့် အခွင့်အလမ်းများ ရှာဖွေတွေ့ရှိနိုင်ရန် ရည်ရွယ်ပြီး Invest Myanmar Summit 2019 ကို နေပြည်တော်တွင် ကျင်းပလျက်ရှိသည်။ Invest Myanmar Summit 2019 တွင် ပြည်တွင်းပြည်ပ ရင်းနှီးမြှုပ်နှံသူများအနေဖြင့် တစ်နေရာတည်းတွင် တစ်နိုင်ငံလုံးနှင့်ပတ်သက်သည့် ရင်းနှီး မြှုပ်နှံမှု အခွင့်အလမ်းများကို မြင်တွေ့ ခွင့်၊ လေ့လာခွင့်ရရှိကြပြီး ဝယ်သူနှင့်ရောင်းသူတို့ တိုက်ရိုက်တွေ့ဆုံဆွေးနွေးခွင့် ရရှိနေပြီဖြစ်သည်။

Invest Myanmar Summit 2019 သို့ တက်ရောက်လာကြသည့် စီးပွားရေးလုပ်ငန်းရှင်များနှင့် စီးပွားရေး ပညာရှင်များ၏အမြင်များကို စုစည်း ဖော်ပြလိုက်ပါသည်။

 ဒေါက်တာမောင်မောင်လေး
(မြန်မာနိုင်ငံ ကုန်သည်များနှင့် စက်မှု လက်မှုလုပ်ငန်းရှင်များ အသင်းချုပ်ဒုတိယဥက္ကဋ္ဌ)

အရင်လို ဝယ်သူနဲ့ရောင်းသူ ဟောပြောပို့ချသွားတဲ့ ပုံစံမဟုတ်ဘဲနဲ့ အခုဟာက ဝယ်သူနဲ့ရောင်းသူ လက်တွေ့ တွေ့ဆုံဆွေးနွေးတဲ့ ပွဲဖြစ်ပါတယ်။ ပြည်တွင်း ပြည်ပလုပ်ငန်းရှင် တချို့က မြန်မာနိုင်ငံရဲ့ အရွေ့နဲ့ ငြိမ်းချမ်းရေးကို စောင့်ကြည့်နေတာ ရှိပါတယ်။ မြန်မာ နိုင်ငံရဲ့ စီးပွားရေးက ဆိုရှယ်လစ်စနစ် စီးပွားရေးစနစ်ကနေ ပြောင်းလာခဲ့တာ။ အပြောင်းအလဲမှာ တော်တော်များများက စောင့်ကြည့်လေ့ရှိပါတယ်။ နိုင်ငံရေး တည်ငြိမ်ဖို့တော့လိုပါတယ်။ နိုင်ငံရေး တည်ငြိမ်အောင် နိုင်ငံတော်ကလည်း လုပ်ဆောင်နေပါ တယ်။ တည်ငြိမ်မှုကို အဓိကကြည့်ပြီးသွားကြတာတွေလည်း ရှိပါတယ်။

အခုပွဲက ရောင်းမယ့်သူနဲ့ ဝယ်မယ့်သူကို တစ်နေရာတည်း မှာတွေ့ပေးတယ်။ တွေ့ပေးပြီးတော့ ရောင်းမယ့်သူက သူ့ Project တွေကို အများကြီးတင်တယ်။ Project ၂၀၀ လောက်ကိုတင်တယ်။ ပြည်ထောင်စုရော၊ တိုင်းဒေသကြီးနှင့် ပြည်နယ်တွေကရော Project တွေတင်တယ်။ ပြည်တွင်းပြည်ပက လုပ်ငန်းရှင်တွေက သူတို့အဖွဲ့တွေခေါ်လာပြီး ဘယ် Project တော့ကောင်းတယ်။

လုပ်ချင်တယ်ဆိုရင် တစ်ထိုင်တည်းမှာ သက်ဆိုင်ရာ ဝန်ကြီးချုပ်တွေနဲ့ ဆွေးနွေးလို့ရပါတယ်။ ဒီအချိန်မှာပဲ အကောက်ခွန်တို့၊ မြေစာရင်းတို့နဲ့ ဆွေးနွေးလို့ရပါတယ်။ တစ်နေရာတည်းမှာ အလုပ်ဖြစ်သွားနိုင်ပါတယ်။ အရင်လို စကားပြောပြီး ဖိတ်ခေါ်တဲ့ပုံစံမျိုးမဟုတ်ဘဲနဲ့ လက်တွေ့ကျကျ အလုပ်လုပ်တဲ့ ပုံစံဖြစ်ပါတယ်။

၂၀၁၉ မှာ နိုင်ငံခြားရင်းနှီးမြှုပ်နှံမှု ပြန်တက်လာဖို့ ရှိနိုင်ပါတယ်။ ဒီ Project တွေ ပေါ်လာပြီဆိုတော့ Project တွေကို အသိပေးလာပြီ။ အရင်တုန်းက ပွင့်လင်းမြင်သာမှု မရှိပါဘူး။ အခုက ထင်သာမြင်သာနဲ့ လုပ်ကိုင်သွားတော့ တော်တော်များများက ယုံကြည်မှုတွေ ရလာပါတယ်။

 

ဒေါက်တာအောင်ထွန်းသက် (စီးပွားရေးပညာရှင်)

စီးပွားရေးလုပ်တဲ့အခါမှာ အမြတ်ရဖို့၊ လူတွေကို စောင့်ရှောက်ဖို့၊ ပတ်ဝန်းကျင်ကို ထိန်းသိမ်းဖို့ လိုပါတယ်။ သိက္ခာသမာဓိ ရှိဖို့လည်းလိုပါတယ်။ နိုင်ငံတစ်နိုင်ငံက ရင်းနှီးမြှုပ်နှံမှုကို ကြိုဆိုတဲ့အခါမှာ နိုင်ငံတစ်နိုင်ငံရဲ့ စီးပွားရေး၊ နိုင်ငံရေး၊ လူမှုရေး အခြေခံတွေက အရေးကြီးပါတယ်။ ကိုယ့်နိုင်ငံ စီးပွားရေးတိုးတက် ဖို့ဆိုရင် ကိုယ့်နိုင်ငံရဲ့ နိုင်ငံရေးကလည်း အခြေအနေ ကောင်းမှရမှာပါ။ တရားဥပဒေစိုးမိုးတာကလည်း အရေးပါတဲ့ ကိစ္စဖြစ်တဲ့အတွက် ဟန်ချက်ညီညီလုပ်မှ ရပါမယ်။ စီးပွားရေးတစ်ခုတည်း အာရုံစိုက်နေလို့ မဖြစ်ပါဘူး။ နိုင်ငံရေးကို အာရုံစိုက်ဖို့လိုပါတယ်။ လူမှုရေးကိုလည်း အာရုံစိုက်ဖို့ လိုပါတယ်။

အဲဒီလိုသာ လုပ်နိုင်ရင် လိုချင်တဲ့ရင်းနှီးမြှုပ်နှံမှုတွေ ဝင်လာလိမ့်မယ်လို့ ထင်ပါတယ်။ ဝင်လာတဲ့ ရင်းနှီးမြှုပ်နှံမှုဟာ ပြည်သူတွေအတွက် အကျိုးရှိတဲ့ ရင်းနှီးမြှုပ်နှံမှုဖြစ်ဖို့ အရေးကြီးပါတယ်။ ကျန်းမာရေးလုပ်ငန်းတွေ၊ ပညာရေး လုပ်ငန်းတွေမှာ ရင်းနှီးမြှုပ်နှံဖို့ လိုအပ်ပါတယ်။ အဂတိလိုက်စားမှု လျော့ပါးဖို့ လည်းလိုပါတယ်။ အဂတိ လိုက်စားမှုရှိသရွေ့ ရင်းနှီးမြှုပ်နှံမယ့် သူတွေခက်နေပါမယ်။ အစိုးရဝန်ကြီးဌာနတွေ အားလုံး အလုပ်လုပ်တဲ့အခါမှာ သွက်လက်ဖို့၊ မြန်ဆန်ဖို့လိုပါတယ်။ အဲဒါတွေရှိမှ လိုချင်တဲ့ ရင်းနှီးမြှုပ်နှံမှု ရနိုင်မယ်လို့ ထင်ပါတယ်။

ဒီလိုပွဲတွေ လုပ်တဲ့အတွက် တစ်ယောက်နဲ့တစ်ယောက် သိလာမယ်။ ချိတ်ဆက်မှုတွေ ရလာပါမယ်။ နိုင်ငံခြားသားတွေ လာကြတယ်။ ပြည်တွင်းလုပ်ငန်းရှင်တွေ လာကြတယ်။ ဒီနေ့ပွဲမှာ တစ်ယောက်နဲ့တစ်ယောက် ဆိုကြ၊ ပြောကြ၊ ဆွေးနွေးကြ၊ ညှိနှိုင်းကြပါတယ်။ ရင်းနှီးမြှုပ်နှံမှု အများဆုံးရအောင် လုပ်ကြပါလို့ တိုက်တွန်းချင်ပါတယ်။

 

ဦးရဲအောင်မိုး (ဟိုတယ်နှင့် ခရီးသွားညွှန်ကြားမှုဦးစီးဌာန၊ ရခိုင်ပြည်နယ် တာဝန်ခံ၊ ညွှန်ကြားရေးမှူး)

ရခိုင်ပြည်နယ်မှာ အဓိက ခရီးစဉ်ဒေသနှစ်ခုဖြစ်တဲ့ ငပလီ ကမ်းခြေဒေသနဲ့ မြောက်ဦး ရှေးဟောင်းယဉ်ကျေးမှုဒေသ ရှိပါတယ်။ အလားတူ ငပလီကမ်းခြေလို လှပတဲ့ ကမ်းခြေနေရာတွေလည်း အများကြီးရှိပါတယ်။ ဂွတို့၊ မာန်အောင်ကျွန်းတို့၊ ရမ်းဗြဲကျွန်း တို့ဟာလည်း အင်မတန် လှပသာယာတဲ့ နေရာတွေပါ။ ခရီးသွားလုပ်ငန်း ဖွံ့ဖြိုးတိုးတက်ဖို့အတွက် ဟိုတယ်နဲ့ ခရီးသွားလာရေးဝန်ကြီးဌာနနဲ့ ရခိုင်ပြည်နယ်အစိုးရအဖွဲ့တို့ ပူးပေါင်းကြိုးပမ်း အကောင်အထည်ဖော် ဆောင်ရွက်လျက် ရှိပါတယ်။ ဟိုတယ်လုပ်ငန်းတွေမှာ ရင်းနှီးမြှုပ်နှံနိုင်သလို စိုက်ပျိုးရေး၊ မွေးမြူရေး၊ ရေလုပ်ငန်း၊ စက်မှုလုပ်ငန်းတွေမှာပါ ရင်းနှီးမြှုပ်နှံနိုင်တဲ့ အခွင့်အလမ်းတွေရှိပါတယ်။ ရခိုင်ပြည်နယ်ရဲ့ ဘယ်လိုနေရာမှာ၊ ဘယ်လိုကဏ္ဍတွေမှာ ရင်းနှီးမြှုပ်နှံ နိုင်တယ်ဆိုတာကို Rakhine State Investment Fair ဆိုပြီး လာမယ့် ဖေဖော်ဝါရီလမှာ ငပလီကမ်းခြေဒေသမှာ ကျင်းပဖို့ အစီအစဉ်ရှိပါတယ်။ ပြည်နယ်ရဲ့ ရင်းနှီးမြှုပ်နှံနိုင်မှု အခွင့်အလမ်းတွေ ချပြမယ်။ စိတ်ပါဝင်စားတဲ့ ရင်းနှီးမြှုပ်နှံ လိုသူတွေကို ရင်းနှီးမြှုပ်နှံနိုင်မယ့် အခွင့်အလမ်းတွေကို ရှင်းပြမှာ ဖြစ်ပါတယ်။ ရင်းနှီးမြှုပ်နှံမှုအတွက် လမ်းပန်းဆက်သွယ်ရေး ကလည်း အရေးပါပါတယ်။

 

ဦးစည်သူမိုးမြင့်၊ Exective Director နှင့် Country Manager MPRL E & P ကုမ္ပဏီအုပ်စု

ဒီပွဲမှာ ကျွန်တော်တို့ကုမ္ပဏီက လုပ်ကွက် A6 ရဲ့ဝန်ဆောင်မှုတွေကို အဓိကထားပြီး ပြထားပါတယ်။ နောက်ပြီး A6 ကို ပံ့ပိုးပေးမယ့် ကမ်းလွန်ထောက်ပံ့ရေးစခန်းကို ပြထားပါတယ်။ ကုမ္ပဏီကဆောင်ရွက်နေတဲ့ ဧရာဝတီတိုင်းဒေသကြီးထဲက ကမ်းလွန်လုပ်ကွက် A6 မှာ ရှာဖွေရေးလုပ်ငန်းတွေ အောင်အောင်မြင်မြင် ပြီးဆုံးသွားပြီဖြစ်တဲ့အတွက် သဘာဝဓာတ်ငွေ့ ထုတ်လုပ်ရေးအပိုင်းကို စတင်ဆောင်ရွက်ဖို့အတွက် ပြင်ဆင်နေပါတယ်။

သဘာဝဓာတ်ငွေ့ကို နောက် ငါးနှစ်ကြာတဲ့အခါ စတင်ထုတ်လုပ်ဖို့ ရည်ရွယ်ထားပါတယ်။ ကမ်းလွန်လုပ်ကွက် A6 မှာရှိတဲ့ စီမံကိန်းအမျိုးအစားဟာ ခက်ခဲတဲ့ စီမံကိန်း ဖြစ်ပါတယ်။ ကမ္ဘာပေါ်မှာ ဒီလိုရေအနက်အပိုင်းမှာ ဆောင်ရွက်နေတဲ့ စီမံကိန်း အခုလောလောဆယ် အခု ၂၀ ပဲရှိပါတယ်။ ဒီစီမံကိန်းဟာ ၂၁ ခုမြောက် စီမံကိန်းဖြစ်ပါတယ်။ ဒီစီမံကိန်းကို ငါးနှစ်နဲ့ အကောင်အထည်ဖော် ဆောင်ရွက်ဖို့ဆိုတာ အင်မတန် မြန်ဆန်တယ်လို့ ယူဆလို့ရပါတယ်။ ငါးနှစ်နဲ့ စီမံကိန်းဖြစ်မြောက် လာဖို့အတွက်လည်း စီမံကိန်းကို အထောက် အကူပြုမယ့် ကမ်းလွန်အထောက်အကူပြုစခန်း တစ်ခုလည်း တည်ဆောက်ဖို့ လိုပါတယ်။ ကမ်းလွန်လုပ်ကွက်တွေမှာ ဆောင်ရွက်နေတဲ့ လုပ်ငန်းတော်တော်များများက စင်ကာပူနိုင်ငံမှာရှိတဲ့ အထောက်အကူပြုစခန်းတွေကို မှီခိုပြီး လုပ်ငန်းတွေကို ဆောင်ရွက်ရတာဖြစ်တဲ့အတွက် မလိုလားအပ်တဲ့ ကုန်ကျစရိတ်တွေ ကုန်ဆုံးစေပါတယ်။ ဒါကြောင့် အထောက်အကူပြုစခန်းကို နှစ် နှစ်နဲ့ ပြီးအောင်တည်ဆောက် ခဲ့ပါတယ်။ အဲဒီစခန်းက A6 စီမံကိန်းဖြစ်မြောက်လာအောင်လည်း အထောက်အကူပြုသွားမှာ ဖြစ်ပါတယ်။

ကျွန်တော်တို့ မြန်မာနိုင်ငံဟာ ပထဝီမြေမျက်နှာသွင်ပြင် အနေအထားအားဖြင့် အရှေ့တောင်အာရှနိုင်ငံတွေကို အိန္ဒိယ သမုဒ္ဒရာနဲ့ ချိတ်ဆက်ပေးထားတဲ့ နေရာမှာရှိပါတယ်။ အာဆီယံ အနေနဲ့ အရှေ့နဲ့အနောက် ချိတ်ဆက်ပေးတဲ့ စင်္ကြံလမ်း (East West Corridor) ကို ဗီယက်နမ်နိုင်ငံ ဒါနန်းကနေ ထိုင်းနိုင်ငံကိုဖြတ်ပြီး ကျွန်တော်တို့ရဲ့ E & A OSB Project နေရာအထိ ချိတ်ဆက်ပေးနိုင်ခဲ့မယ်ဆိုရင် ဒေသတစ်ခုလုံး ဖွံ့ဖြိုးတိုးတက်ရေး အတွက် အထူးအထောက်အကူပြုလာစေမှာ ဖြစ်ပါတယ်။ ဒါကြောင့် ကျွန်တော်တို့လက်ရှိ စီမံကိန်းနေရာမှာ ကမ်းလွန်ထောက်ပံ့ရေး ဆိပ်ကမ်းမျိုးသာမက နောက်မှာ ဘက်စုံသုံး ပင်လယ်ရေနက် ဆိပ်ကမ်းအထိပါ ရည်မှန်းဆောင်ရွက်သွား နိုင်မှာဖြစ်ပါတယ်။

 

ဦးမောင်ဝိတ်၊ ဥက္ကဋ္ဌ SAE PAING DEVELOPMENT LIMTED

ဒီနေ့အခမ်းအနားမှာ နိုင်ငံတော်၏ အတိုင်ပင်ခံပုဂ္ဂိုလ် ပြောသွားတဲ့ သတင်းစကားတွေက တော်တော်ကောင်းပါတယ်။ ရင်းနှီးမြှုပ်နှံသူတွေကို ဖိတ်ခေါ်သွားပါတယ်။ မြန်မာနိုင်ငံမှာ အခြေအနေကောင်းတွေရှိတယ်။ လာရောက်ရင်းနှီးမြှုပ်နှံဖို့ အတွက် သက်ဆိုင်ရာဌာနတွေအားလုံးကလည်း ကူညီပေးမယ်။ သက်ဆိုင်ရာ ဝန်ကြီးချုပ်တွေကလည်း ဥပဒေ ဘောင်ထဲကနေပြီး ဖြေလျှော့ပေးနိုင်တာတွေကို ဖြေလျှော့ပေးမယ်လို့ ပြောသွားတာ တော်တော်လေး အားရဖို့ ကောင်းပါတယ်။ ဒါကြောင့် ရင်းနှီးမြှုပ်နှံသူတွေ နောက်ထပ်အများကြီးရောက်လာကြမယ်လို့ မြင်မိပါတယ်။

စီးပွားရေးအခြေအနေက ၂၀၁၉ မှာ ကျန်ခဲ့တဲ့နှစ်တွေထက် အများကြီးပိုကောင်း လာလိမ့်မယ်လို့ ထင်ပါတယ်။ လုပ်ငန်းတိုင်းမှာ အခက်အခဲဆိုတာရှိပါတယ်။ အခက်အခဲတွေရှိတယ် ဆိုပေမယ့် လက်ရှိရှိတဲ့ အခြေအနေပေါ်မှာပဲ ပိုကောင်းအောင် ဘယ်လို ဆောင်ရွက်သွားမလဲဆိုတာကိုပဲ စဉ်းစားထားပါတယ်။

ရင်းနှီးမြှုပ်နှံမှုအရေအတွက်က ကျန်ခဲ့တဲ့နှစ်တွေနဲ့ နှိုင်းယှဉ်ကြည့်ရင် တိုးလာပါတယ်။ ဒါပေမယ့် အများကြီးတိုးပြီး ပိုပြီးတော့အောင်မြင်ဖို့ ဆိုရင် ဆက်ပြီးတော့ ကြိုးစားရဦးမှာပါ။ ဒီအတွက်ပဲ ရင်းနှီးမြှုပ်နှံမှု ဖိုရမ်ကိုကျင်းပပြီး ရင်းနှီးမြှုပ်နှံမှု တွေကို ဖိတ်ခေါ်ဖို့ ဆောင်ရွက် နေတာလို့ မြင်ပါတယ်။ ဒီလိုပွဲတွေ အများကြီးဆက်ပြီး ကျင်းပသွားဖို့ လိုပါတယ်။ နိုင်ငံတော်၏အတိုင်ပင်ခံပုဂ္ဂိုလ်၊ ပြည်ထောင်စု ဝန်ကြီးတွေ၊ ဝန်ကြီးချုပ်တွေ အားလုံးက ဒီလိုပွဲတွေမှာ ရင်းနှီးမြှုပ်နှံသူတွေကို မြန်မာနိုင်ငံမှာ ရဲရဲတင်းတင်း လာရောက်ရင်းနှီးမြှုပ်နှံပါ။ မြန်မာနိုင်ငံမှာ အခွင့်အလမ်းတွေ အများကြီးရှိပါတယ်လို့ မှတ်ချက်ပေးသွားတာဟာ ပြည်တွင်းပြည်ပ ရင်းနှီးမြှုပ်နှံသူတွေအတွက် အားရှိစေပါတယ်။

နိုင်ငံခြားကနေ လာရောက်ရင်းနှီးမြှုပ်နှံတဲ့အခါ ပြည်တွင်း ကုမ္ပဏီတွေရဲ့ ယှဉ်ပြိုင်နိုင်တဲ့စွမ်းအား လျော့ကျသွားမယ်ဆိုတာ မဟုတ်ပါဘူး။ ကျွန်တော်တို့က အိမ်ရှင်တွေ ဖြစ်ပါတယ်။ မြန်မာနိုင်ငံအကြောင်းကို နိုင်ငံခြားသား တွေထက် ကျွန်တော်တို့ ပိုပြီးသိပါတယ်။ နိုင်ငံခြားရင်းနှီးမြှုပ်နှံသူတွေ ပါလာမှာက အုပ်ချုပ်မှုစနစ်၊ နည်းပညာတွေပါလာမယ်။ ဒေသခံတွေဖြစ်တဲ့ ကျွန်တော်တို့က နိုင်ငံသားတွေဖြစ်တဲ့အတွက် အားသာချက်တွေ ရှိပါတယ်။ သူတို့ရဲ့ အားသာချက်တွေလည်း ရှိပါ တယ်။ သူတို့ရဲ့ အားသာချက်တွေနဲ့ ကျွန်တော်တို့ရဲ့ အားသာချက်တွေ ပူးပေါင်းပြီး ပိုပြီးတော့ကောင်းတဲ့ အဖွဲ့အစည်းတွေ ပေါ်ထွက်လာဖို့၊ ပိုပြီးတော့ကောင်းတဲ့ နိုင်ငံတော်ကြီး ဖြစ်လာဖို့ဆိုတဲ့ ဒီလို နည်းလမ်းတွေနဲ့ ဆောင်ရွက်သွားမှာ ဖြစ်ပါတယ်။

ကျွန်တော်တို့ အနေနဲ့လည်း နိုင်ငံခြား ရင်းနှီးမြှုပ်နှံသူတွေကို ဖိတ်ခေါ်ပါတယ်။ ထိုနည်းတူပါပဲ။ မြန်မာနိုင်ငံသားတွေလည်း ရင်းနှီးမြှုပ်နှံမှုတွေမှာ ပါဝင်လာဖို့လည်း လိုပါတယ်။ မြန်မာနိုင်ငံသား ရင်းနှီးမြှုပ်နှံမှုတွေ တိုးတက်လာဖို့လည်း ကျွန်တော်တို့ ဆက်ပြီးတော့ ဆောင်ရွက်သွားရမှာ ဖြစ်ပါတယ်။ ဒီလိုပွဲတွေကို ခြောက်လ တစ်ကြိမ် ဒါမှမဟုတ် တစ်နှစ် တစ်ကြိမ် ဆောင်ရွက်သွားဖို့ အကြံပြု လိုပါတယ်။ ဒါမှလည်း ရင်းနှီးမြှုပ်နှံသူတွေနဲ့ နိုင်ငံတော်အကြီးအကဲတွေကြားမှာ ပိုပြီးတော့ ရင်းနှီးမှုတွေ ရလာမယ်။ တင်ပြစရာတွေရှိရင်လည်း တင်ပြလာနိုင်မယ်။ နိုင်ငံတော်အကြီးအကဲတွေရဲ့ လုပ်ငန်းစဉ်တွေ ဘယ်လိုရှိတယ် ဆိုတာကိုလည်း ပိုပြီးတော့ သိခွင့်ရလာမှာ ဖြစ်ပါတယ်။ ဒါကြောင့် အခုလိုပွဲမျိုးတွေကို များများလုပ်သွားဖို့ အကြံပြုပါတယ်။

 

ဒေါ်ခင်အေးဝင်း၊ မန်နေဂျင်းဒါရိုက်တာ STI MYANMAR UNIVERSITY

ဒီပွဲမှာတော့ မြန်မာနိုင်ငံ ရင်းနှီးမြှုပ်နှံမှုကော်မရှင်မှာ တင်ထားတဲ့ ပညာရေးဝန်ဆောင်မှု လုပ်ငန်းတွေကို ပါဝင်ပြသ ထားပါတယ်။ လက်ရှိမှာတော့ သင်ကြားရေးဌာနကြီး လေးခုရဲ့ အောက် ကနေပြီးတော့ ကျန်းမာရေးသိပ္ပံအပိုင်း၊ ပညာရေးနှင့် ဘာသာ စကားဆိုင်ရာ သင်ကြားရေးဌာနကြီး၊ စီးပွားရေးနဲ့ ပတ်သက်တဲ့ သင်ကြားရေးဌာနကြီးနဲ့ အင်ဂျင်နီယာပိုင်းဆိုင်ရာနဲ့ပတ်သက်တဲ့ သင်ကြားရေးဌာနကြီးအောက်မှာ ဘွဲ့ကြိုနဲ့ ဘွဲ့လွန်သင်တန်းတွေကို သင်ကြားပို့ချ ပေးနေပါတယ်။ အဓိကကတော့ ကျွန်မတို့ အင်္ဂလန်နိုင်ငံနဲ့ ပူးပေါင်းပြီး သင်ကြားပေးနေတာ ဖြစ်ပါတယ်။

MIC အတည်ပြုချက်ရပြီး ပညာရေးဥပဒေထွက်ပြီး သွားတဲ့အခါ နည်းဥပဒေတွေ အကုန်လုံး ရှင်းရှင်းလင်းလင်း ဖြစ်သွားပြီး လိုင်စင်ရသွားရင် မြန်မာနိုင်ငံမှာ ဂုဏ်သိက္ခာရှိတဲ့ အရည်အသွေးအလွန်မြင့်မားတဲ့ အိမ်နီးနားချင်းနိုင်ငံတွေမှာ ထိပ်တန်း တက္ကသိုလ်တစ်ခုအဖြစ် ရပ်တည်နိုင်မယ့် အဆင့်မြင့် ပုဂ္ဂလိက တက္ကသိုလ်ကြီးတစ်ခု တည်ထောင်နိုင်ဖို့ ရည်ရွယ်ပြီး ကြိုးစားဆောင်ရွက်နေတာဖြစ်ပါတယ်။ အဓိကကတော့ နိုင်ငံတကာက ကျောင်းသားတွေကို လက်ခံသွားချင်တာပါ။

ဘာဖြစ်လို့လဲဆိုတော့ ကျွန်မတို့နိုင်ငံက လူသိလည်းနည်းတယ်။ စီးပွားရေးကိုလည်း တိုးတက်အောင်ပြန်ပြီးတော့ ကြိုးစားနေရတဲ့ အချိန်မှာ ကမ္ဘာမှာ နိုင်ငံတကာ ကျောင်းသား တွေကနေပြီးတော့ တစ်ဆင့်ပြန်ပြီးတော့ မြန်မာနိုင်ငံရဲ့ ယဉ်ကျေးမှုပိုင်းတွေ၊ ရိုးရာဓလေ့တွေနဲ့ မြန်မာနိုင်ငံအကြောင်းကို ပိုပိုပြီး လူတွေသိလာပြီးတော့ တိုင်းပြည်တည်ဆောက် ကြမယ့် အနာဂတ်လူငယ်တွေကို တကယ်လိုအပ်တဲ့ အသိပညာ၊ အတတ်ပညာတွေကို အိမ်နီးနားချင်းနိုင်ငံတွေက လူငယ်တွေနဲ့ အတူတူ ရင်ပေါင်တန်းပြီး နိုင်ငံတာဝန်တွေကို ကျတဲ့နေရာမှာ ထမ်းဆောင်နိုင်အောင်လို့ ဂုဏ်သိက္ခာရှိရှိနဲ့ ဒီတိုင်းပြည်ကို ပိုပြီးကောင်းမွန်အောင် တည်ဆောက်နိုင်ဖို့ ကြိုးစားဆောင်ရွက်နေ တာဖြစ်ပါတယ်။ ဒါဟာ နိုင်ငံတော်၏ အတိုင်ပင်ခံပုဂ္ဂိုလ် သွားချင်နေတဲ့ လမ်းကြောင်းဆိုရင်လည်း မမှားပါဘူး။

ဒီပွဲမှာ တိုင်းဒေသကြီးနဲ့ ပြည်နယ်တွေလည်း ရင်းနှီးမြှုပ်နှံမှု နဲ့ဆိုင်တဲ့ အခွင့်အလမ်းတွေ အများကြီးလာပြကြတယ်။ ပြည်တွင်းနဲ့ အပြည်ပြည်ဆိုင်ရာ ရင်းနှီးမြှုပ်နှံချင်သူတွေလည်း လာကြပါတယ်။ တစ်နေရာတည်းမှာပဲ တစ်နိုင်ငံလုံးနဲ့ ပတ်သက်တဲ့ ရင်းနှီးမြှုပ်နှံမှု အခွင့်အလမ်းတွေကို မြင်တွေ့ ရတဲ့အတွက်ကြောင့် အင်မတန်ကောင်းပါတယ်။

 

ဦးဇော်လင်းအောင်၊ မန်နေဂျင်းဒါရိုက်တာ ကမ္ဘောဇဘဏ်

ကျွန်တော်တို့ ကမ္ဘောဇဘဏ် အနေနဲ့ KBZ Pay ကို အခုပွဲမှာ အဓိကထားပြီး ပြသသွားမှာ ဖြစ်ပါတယ်။ KBZ Pay ဆိုတာ ၁၀၀ ရာခိုင်နှုန်းအပြည့်ဘဏ္ဍာရေးဆိုင်ရာ ဝန်ဆောင်မှုအဖြစ် ရည်ရွယ်ပြီးဆောင်ရွက်နေခြင်း ဖြစ်ပါတယ်။ ပုံမှန် ဘဏ်လုပ်ငန်း ဝန်ဆောင်မှုစနစ်ကနေပြီး ဒီဂျစ်တယ်ဘဏ်လုပ်ငန်း ဝန်ဆောင်မှုကို မိုဘိုင်းလ်ဖုန်း အသုံးပြုပြီး တစ်နိုင်ငံလုံးက ပြည်သူတွေ ရရှိခံစားနိုင်ဖို့အတွက် ရည်ရွယ်ဆောင်ရွက်နေခြင်း ဖြစ်ပါတယ်။ ဆက်လက်ပြီး ဒီဂျစ်တယ် ဘဏ်လုပ်ငန်း စနစ်ကို တိုးချဲ့ဆောင်ရွက်သွားဖို့ ရှိပါတယ်။

 

ဦးကျော်သက်လှိုင် (Myanmar Developer Association ဒုတိယဥက္ကဋ္ဌ)

ဒီပွဲမျိုးက တော်တော်ကောင်းတဲ့ပွဲပါ။ နိုင်ငံတကာကနေ မြန်မာနိုင်ငံရဲ့ လက်ရှိအခြေအနေကို မျက်ဝါးထင်ထင် ထိတွေ့ ခံစားနိုင်ပါတယ်။ အလုပ်အကိုင် အခွင့်အလမ်းတွေအပြင် လက်ရှိနိုင်ငံတော်မှာ နိုင်ငံရေး၊ စီးပွားရေးနဲ့ စီးပွားရေးမူဝါဒတွေ တည်ငြိမ်နေပါတယ်။ နိုင်ငံတော်အစိုးရကလည်း စီးပွားရေးကို အခုလိုအားပေး နေတယ်။ ပြည်သူလူထုကလည်း လာရောက် ရင်းနှီးမြှုပ်နှံမယ့်သူတွေကို နွေးနွေးထွေးထွေးကြိုဆိုတာကို သူတို့ တကယ်လက်တွေ့ ခံစားသွားရအောင် ပြသနိုင်တာ ဖြစ်တဲ့အတွက် ဒီလိုပွဲမျိုး မကြာမကြာလုပ်သင့်ပါတယ်။ မြန်မာနိုင်ငံက ပြဋ္ဌာန်းလိုက် တဲ့ ရင်းနှီးမြှုပ်နှံမှု ဥပဒေဟာ တစ်ကမ္ဘာလုံးကို ပျံ့နှံ့ပြီး တစ်ကမ္ဘာလုံး မှာရှိတဲ့ စီးပွားရေးလုပ်ငန်းရှင်တွေ နားလည်အောင် အချိန် နည်းနည်း ယူရပါမယ်။ ဒါတွေ နားလည်ပြီး အခွင့်အရေးတွေ ကိုသိပြီး မြန်မာနိုင်ငံမှာ သွားပြီးရင်းနှီးမြှုပ်နှံ သင့်တယ်လို့ သိသွားပါလိမ့် မယ်။ အခုကတော့ သူတို့ကို ဒီလိုပွဲမျိုးတွေ ကျင်းပပြီးတော့ မကြာမကြာ ရှင်းပြနေရဦး မှာဖြစ်ပါတယ်။

အမေး၊ အရေး- မော်စီ၊ ထက်သူ

ဓာတ်ပုံ- ရွှေကိုလေး၊ အေးသန်း