နေပြည်တော် ဇူလိုင် ၂၅
အချို့သော နယ်မြေများတွင် PDF အမည်ခံသောင်းကျန်းသူ ပူးပေါင်းအဖွဲ့များသည် နိုင်ငံဖွံ့ဖြိုးတိုးတက်ရေးကို အဟန့်အတားဖြစ်စေရန် ရည်ရွယ်ချက်ဖြင့် ပြည်သူလူထု၏ နေ့စဉ်ဘဝအတွက် များစွာအရေးပါသည့် လျှပ်စစ်ဓာတ်အား များကို ထုတ်လွှတ်ပေးလျက်ရှိသည့် လျှပ်စစ်အခြေခံအဆောက်အအုံများကို နည်းလမ်းပေါင်းစုံဖြင့် ယုတ်မာရိုင်းစိုင်းစွာ မိုင်းထောင်ဖောက်ခွဲ ဖျက်ဆီး လျက်ရှိကြသည်။ ထိုသို့လုပ်ဆောင်မှုများကြောင့် ပျက်စီးဆုံးရှုံးခဲ့ရသည့် လျှပ်စစ်အခြေခံအဆောက်အအုံများ၊ ဓာတ်အားလိုင်းများကို အမြန်ဆုံးပြန်လည်ကောင်းမွန်၍ လျှပ်စစ်ဓာတ်အားများ ပြန်လည်ပို့လွှတ်ပေးနိုင်ရေး လျှပ်စစ်ဝန်ထမ်းများနှင့် နယ်မြေခံလုံခြုံရေး တပ်ဖွဲ့ဝင်များ၊ ဌာနဆိုင်ရာတာဝန်ရှိသူများက ကြိုးပမ်းပြင်ဆင်ဆောင်ရွက်လျက်ရှိသည်။
ထိုသို့ ဆောင်ရွက်လျက်ရှိရာ ရှမ်းပြည်နယ်(မြောက်ပိုင်း)တွင် ၂၀၂၄ ခုနှစ်အတွင်း လားရှိုးမြို့နယ်၊ နောင်ချိုမြို့နယ်၊ ကျောက်မဲမြို့နယ်နှင့် သီပေါမြို့နယ်တို့ကို အကြမ်းဖက် သောင်းကျန်းသူများ ဝင်ရောက်တိုက်ခိုက်မှုများကြောင့် ဓာတ်အားခွဲရုံကိုးရုံ၊ ထရန်စဖော်မာ ၈၆ လုံးနှင့် ဓာတ်အားလိုင်းများ ထိခိုက်ပျက်စီးခဲ့ပြီး ဓာတ်အားပြတ်တောက်ခဲ့သည်။
လားရှိုးမြို့နှင့် နောင်ချိုမြို့များကို တပ်မတော်မှ ပြန်လည်ထိန်းချုပ်ပြီးနောက် ဝန်ကြီးဌာနမှ ထိခိုက်ပျက်စီးခဲ့သည့် ဓာတ်အားခွဲရုံများ၊ ဓာတ်အားလိုင်းများနှင့် ထရန်စဖော်မာများကို အမြန်ဆုံးပြန်လည်ပြုပြင်ခဲ့ပြီး နောင်ချိုမြို့နယ်နှင့် လားရှိုးမြို့တို့ကို နိုင်ငံတော်ဓာတ်အားစနစ်မှ ဓာတ်အား ပြန်လည်ဖြန့်ဖြူးပေးလျက်ရှိသည်။
ထို့ပြင် သီပေါမြို့နယ်နှင့် ကျောက်မဲမြို့များတွင် ထိခိုက်ပျက်စီးခဲ့သည့် ဓာတ်အားခွဲရုံများ၊ ဓာတ်အားလိုင်းများနှင့် ထရန်စဖော်မာများ ပြန်လည်ပြုပြင်ခြင်းလုပ်ငန်းများ ဆောင်ရွက်ပြီးဖြစ်သဖြင့် ဓာတ်အားရယူသုံးစွဲရမည့် ၆၆ ကေဗွီ မန်စံ-သီပေါ ဓာတ်အားလိုင်း တိုင်အမှတ် ၂၁၀ နှင့် ၂၁၉ ကြား မြေမြှုပ်မိုင်းများရှင်းလင်း ခြင်းနှင့် ဓာတ်အားလိုင်းစစ်ဆေး ခြင်းများ ဆောင်ရွက်ပြီးစီးပါက သီပေါမြို့နှင့် ကျောက်မဲမြို့များကို နိုင်ငံတော်ဓာတ်အားစနစ်ဖြင့် ဓာတ်အားပြန်လည်ဖြန့်ဖြူးပေး နိုင်မည်ဖြစ်ပြီး လတ်တလော အနေဖြင့် သီပေါမြို့ကို ဒီဇယ် ဓာတ်အားပေးစက်နှစ်လုံးဖြင့် တစ်ရက်လျှင် ခြောက်နာရီနှင့် ကျောက်မဲမြို့ကို နမ့်စောင်းငေါင်း အသေးစား ရေအားလျှပ်စစ်ဓာတ် အားပေးစက်ရုံ ၂ မဂ္ဂါဝပ်ဖြင့် မြို့ပေါ်အရေးကြီးနေရာများနှင့် အများပြည်သူအချို့အား ဓာတ်အား ဖြန့်ဖြူးပေးလျက်ရှိပြီး နိုင်ငံတော်ဓာတ်အားစနစ်ဖြင့် ပုံမှန်အတိုင်း ဓာတ်အားပြန်လည် ဖြန့်ဖြူးနိုင်ရေး ဆောင်ရွက်လျက်ရှိသည်။
ထို့အတူ ကယားပြည်နယ် လွိုင်ကော်မြို့တွင် အကြမ်းဖက်သောင်းကျန်းသူများကြောင့် ၁၃၂ ကေဗွီ လွိုင်ကော်ပင်မဓာတ်အား ခွဲရုံ၊ ၃၃ ကေဗွီ ဓာတ်အားခွဲရုံ သုံး ရုံ၊ ထရန်စဖော်မာ ၇၃ လုံးနှင့် ဓာတ်အားလိုင်းများ ထိခိုက်ပျက်စီးခဲ့သဖြင့် ပြန်လည်တည်ဆောက်ခြင်းလုပ်ငန်းများ ဆောင်ရွက်ပြီး လွိုင်ကော်မြို့၊ လွိုင်လင်လေးမြို့၊ လောပိတမြို့နှင့် ကျေးရွာ ၃၀ ရှိ အိမ်ထောင်စုပေါင်း ၁၃၈၃၇ စု အား ဓာတ်အားပြန်လည်ပေးထားပြီးဖြစ်သည်။
ဒီးမော့ဆိုမြို့နယ်အတွင်း၌လည်း အကြမ်းဖက်များကြောင့် ၃၃ ကေဗွီ ဓာတ်အားခွဲရုံ တစ်ရုံ၊ ထရန်စဖော်မာများနှင့် ဓာတ်အားလိုင်းများ ထိခိုက်ပျက်စီးခဲ့ပြီး ပြန်လည်ပြုပြင်မှု ပထမအဆင့် အနေဖြင့် ၁၁ ကေဗွီ ဓာတ်အား လိုင်းပြုပြင်ခြင်းအား ဆောင်ရွက်၍ မြို့နယ်အတွင်းရှိ ကျေးရွာနှစ်ရွာနှင့် အရေးကြီးနေရာတို့ကို ဓာတ်အားပြန်လည်ပေးထားပြီးဖြစ်ကာ လွိုင်ကော်မြို့ရှိ ၃၃ ကေဗွီ ၁၀ အမ်ဗွီအေ ရွာတန်းရှည်ဓာတ်အားခွဲရုံ ပြန်လည်ပြုပြင်ခြင်းအား နိုင်ငံတော်အစိုးရသစ်၏ ပထမရက်ပေါင်း ၁၀၀ စီမံချက်အတွင်း ဆောင်ရွက်ပြီးစီးပြီဖြစ်၍ ဒီးမော့ဆို မြို့နယ်အား ရွာတန်းရှည်ခွဲရုံမှ ဓာတ်အားပြန်လည် ဖြန့်ဖြူးပေးနိုင်ရေး ဆက်လက်ဆောင်ရွက်သွားမည်ဖြစ်သည်။
အလားတူ ချင်းပြည်နယ် ဖလမ်းမြို့နယ်အတွင်း အကြမ်းဖက်သောင်းကျန်းသူများကြောင့် ၆၆ ကေဗွီ ဓာတ်အားခွဲရုံ တစ်ရုံ၊ အသေးစားရေအားလျှပ်စစ်စက်ရုံနှစ်ရုံ၊ ထရန်စဖော်မာ ၃၁ လုံးနှင့် ဓာတ်အားလိုင်းများ ပျက်စီးခဲ့သဖြင့် လိုအပ်သော ပစ္စည်းများ ပို့ဆောင်၍ ပြန်လည်ပြုပြင်ခြင်း လုပ်ငန်းများ ဆောင်ရွက်သွားမည်ဖြစ်သည်။ လတ်တလောတွင် ဖလမ်းမြို့ ယာယီဆေးရုံ၌ ၁၂ ကီလိုဝပ်ဆိုလာမီးဖြင့်လည်းကောင်း၊ အရေးကြီးနေရာများ၌ ၆ ကီလိုဝပ်ဆိုလာမီးများဖြင့် လည်းကောင်း ယာယီဓာတ်အား ပေးနိုင်ရန် ပြည်နယ်အစိုးရ အစီအစဉ်ဖြင့် ဆောင်ရွက်လျက်ရှိပြီး အရေးကြီးနေရာများအား ယာယီဓာတ်အားပေးနိုင်ရန်အတွက် ၃၀၀ ကေဗွီအေ ဒီဇယ်ဓာတ်အားပေးစက်အား ပြန်လည်ပြုပြင်ထားရှိပြီးဖြစ်သည်။
တွန်းဇံမြို့အား ဓာတ်အား ပြန်လည်ပေးနိုင်ရေးအတွက် ၂၀၂၆ ခုနှစ် ဇွန် ၁၈ ရက်တွင် လျှပ်စစ်ဝန်ထမ်း ၁၂ဦး ရောက်ရှိ၍ ပျက်စီးမှုစာရင်းများ ကောက်ယူခြင်းနှင့် ပြန်လည်ထူထောင်ရေး လုပ်ငန်းများ စတင်ဆောင်ရွက် လျက်ရှိသည်။ လတ်တလောတွင် ၃၀၀ ကေဗွီအေ ဒီဇယ်ဓာတ်အား ပေးစက်ကို ပြန်လည်ပြုပြင်ပြီးဌာနဆိုင်ရာရုံး ၁၁ရုံးနှင့် ဓာတ်အား သုံးစွဲသူ ၃၁၀ ခန့်အား ညစဉ် တစ်နေ့သုံးနာရီ ဓာတ်အားပေးလျက်ရှိပြီး ၂၀၀ ကီလိုဝပ် တွီးဆောင်း ရေအားလျှပ်စစ်စက်ရုံမှ ဓာတ်အား ပြန်လည်ရရှိသုံးစွဲနိုင်ရေးအတွက် သွားရောက်စစ်ဆေးနိုင်ရန် အုပ်ချုပ်ရေးအဖွဲ့များနှင့် ညှိနှိုင်း ဆောင်ရွက်လျက်ရှိသည်။
နိုင်ငံတော်အစိုးရနှင့်လျှပ်စစ်နှင့် စွမ်းအင်ဝန်ကြီးဌာန၏ အားသွန်ခွန်စိုက် ကြိုးပမ်းမှုကြောင့် လျှပ်စစ်ဓာတ်အား ပြတ်တောက်ခဲ့ရသည့်ဒေသများတွင် လျှပ်စစ်ဓာတ်အားများ ပြန်လည်ရရှိလာ သည်နှင့်အညီ ဒေသခံပြည်သူများ၏ နေ့စဉ်လူမှုဘဝသွားလာ နေထိုင်မှုများ ပြန်လည်အဆင်ပြေ ချောမွေ့လာခြင်း၊ အသေးစား/အလတ်စား စီးပွားရေးလုပ်ငန်းများ၊ ဒေသတွင်းကုန်ထုတ်လုပ်မှုများနှင့် အသက်မွေးဝမ်းကျောင်း လုပ်ငန်းများ ပြန်လည်လည်ပတ်နိုင်ခြင်း၊ ဆေးရုံ/ဆေးခန်းများတွင် ပြည်သူများအတွက် ကျန်းမာရေးစောင့်ရှောက်မှု လုပ်ငန်းများဆောင်ရွက်ခြင်းနှင့် ကျောင်းသူ ကျောင်းသားများ၏ ပညာသင်ကြားရေးကဏ္ဍများတွင် များစွာအကျိုးဖြစ်ထွန်းလာခဲ့ပြီ ဖြစ်သည့်အတွက် ပြည်သူလူထု၏ လျှပ်စစ်ဓာတ်အား လိုအပ်ချက်ကို တိုးမြှင့်ဖြည့်ဆည်ပေးလျက်ရှိကြောင်း သတင်းရရှိသည်။
သတင်းစဉ်
No comments:
Post a Comment