၂၀၂၆ ခုနှစ် ကမ္ဘာ့တီဘီရောဂါတိုက်ဖျက်ရေးနေ့အထိမ်းအမှတ် အခမ်းအနား ကျင်းပ

နေပြည်တော် မတ် ၂၄

၂၀၂၆ ခုနှစ် ကမ္ဘာ့တီဘီရောဂါတိုက်ဖျက်ရေးနေ့အထိမ်းအမှတ်အခမ်းအနားကို ယနေ့တွင် နေပြည်တော်ရှိ ကျန်းမာရေးဝန်ကြီးဌာန ရုံးအမှတ် (၄) အစည်းအဝေးခန်းမ၌ ကျင်းပသည်။

ဦးစွာ ကျန်းမာရေးဝန်ကြီးဌာန ဒုတိယဝန်ကြီး ပါမောက္ခ ဒေါက်တာအေးထွန်းက မတ် ၂၄ ရက်ကို ကမ္ဘာ့တီဘီရောဂါတိုက်ဖျက်ရေးနေ့အဖြစ် သတ်မှတ်ပြီး မြန်မာနိုင်ငံအပါအဝင် ကမ္ဘာ့ နိုင်ငံအသီးသီးတွင် နှစ်စဉ်အထိမ်း အမှတ်အခမ်းအနားများ ကျင်းပ လျက်ရှိကြောင်း၊ မြန်မာနိုင်ငံသည် ကမ္ဘာပေါ်တွင် တီဘီ၊ တီဘီ/အိပ်ချ်အိုင်ဗွီ၊ ဆေးယဉ်ပါးတီဘီရောဂါအဖြစ် အများဆုံး နိုင်ငံ ၃၀ တွင်ပါဝင်ပြီး WHO South East Asia Region တွင် ဒုတိယမြောက် တီဘီလူနာသစ် ဖြစ်ပွားမှုအများ ဆုံးနိုင်ငံဖြစ်သဖြင့် တီဘီလူနာ ရှာဖွေကုသခြင်းကို အရှိန်အဟုန်မြှင့်၍ ဆောင်ရွက်ရန် လိုအပ် ကြောင်း၊ တီဘီရောဂါတိုက်ဖျက်ရေးလုပ်ငန်းများကို National TB Strategic Plan များ ရေးဆွဲပြီး မိတ်ဖက် အဖွဲ့အစည်းများနှင့် ပူးပေါင်း၍ အကောင်အထည်ဖော် ဆောင်ရွက်လျက်ရှိကြောင်း။

တီဘီရောဂါရှာဖွေရေးလုပ်ငန်းများတွင် (Double X Strategy) ကို ကျင့်သုံးလျက်ရှိကြောင်း၊ အသက် ရှစ်နှစ်အောက်ကလေးများ၏ ဝမ်းနမူနာစစ်ဆေး၍ တီဘီပိုးရှာဖွေခြင်းနှင့် တီဘီ‌ရောဂါမဖြစ်အောင် ကာကွယ်ကုသဆေး (TPT) တိုက်ကျွေးခြင်းကို တိုးချဲ့ဆောင်ရွက်လျက်ရှိကြောင်း၊ တီဘီ ရောဂါရှာဖွေရာတွင် AI နည်းပညာ (X-ray CAD)ကို အသုံးပြု၍ ရင်ခေါင်းဓာတ်မှန်ဖတ်ခြင်းအပြင် သယ်ဆောင်ရလွယ်ကူပြီး ဘက်ထရီဖြင့် အသုံးပြုနိုင်သော Portable Truenat စက်များကိုလည်း အသုံးပြုနေပြီဖြစ်ကြောင်း၊ တီဘီရောဂါတိုက်ဖျက်‌ရေးလုပ်ငန်းဆောင်ရွက်မှုအခြေအနေများကို အချိန်နှင့်တစ်ပြေးညီ စီမံခန့်ခွဲနိုင်ရန် Integrated TB e-Surveillance System ဖြင့် အကောင်အထည်ဖော် ဆောင်ရွက်လျက်ရှိကြောင်း၊ ၂၀၂၆ ခုနှစ် ကမ္ဘာ့တီဘီရောဂါ တိုက်ဖျက်ရေး ဆောင်ပုဒ်ဖြစ်သည့် “တီဘီရောဂါ ကင်းဝေးဖို့ နိုင်ငံတော်က ဦးဆောင်လို့ ပြည်သူ့အားဖြင့် ဆောင်ရွက်စို့” အတိုင်း နိုင်ငံတော်အစိုးရ၏ ဦးဆောင်လမ်းညွှန်မှုဖြင့် ကျန်းမာ ရေးဝန်ကြီးဌာနနှင့်အတူ နှီးနွှယ်ဝန်ကြီးဌာနများ၊ လူမှုရေးအသင်း အဖွဲ့များ၊ ပြည်တွင်း ပြည်ပ မိတ်ဖက်အဖွဲ့အစည်းများ၊ ကဏ္ဍပေါင်းစုံပူးပေါင်းကာ ပြည်သူတစ်ဦးချင်းစီတိုင်း ပါဝင်ဆောင်ရွက်ကြရန် လိုအပ်ကြောင်း ပြောကြားသည်။

အခမ်းအနားသို့ ကျန်းမာရေးဝန်ကြီးဌာနနှင့် နှီးနွှယ်ဝန်ကြီး ဌာနများမှ ညွှန်ကြားရေးမှူးချုပ် များ၊ ဒုတိယညွှန်ကြားရေးမှူးချုပ်များ၊ ညွှန်ကြားရေးမှူးများ၊ ဆေးရုံအုပ်ကြီးများ၊ အထူးကုဆရာ ဝန်ကြီးများ၊ မြန်မာနိုင်ငံ အမျိုး သမီးရေးရာအဖွဲ့ချုပ်၊ မြန်မာနိုင်ငံ မိခင်နှင့် ကလေးစောင့်ရှောက်ရေး အသင်းနှင့် မြန်မာနိုင်ငံ ကြက်ခြေနီအသင်းတို့မှ တာဝန်ရှိသူများ၊ အခြေခံကျန်းမာရေးဝန်ထမ်းများ၊ မိတ်ဖက်အဖွဲ့အစည်းများမှ တာဝန်ရှိသူများ တက်ရောက်ခဲ့ကြောင်း သိရသည်။

သတင်းစဉ်