ပင်စင်လုပ်ငန်းဆိုင်ရာ အထောက်အကူပြုသင်တန်းဖွင့်လှစ်

နေပြည်တော် ဖေဖော်ဝါရီ ၉

ဘဏ္ဍာရေးနှင့်အခွန်ဝန်ကြီးဌာန ပင်စင်ဦးစီးဌာန ပင်စင်လုပ်ငန်းဆိုင်ရာ အထောက်အကူပြုသင်တန်းဖွင့်ပွဲအခမ်းအနားကို ယနေ့နံနက်ပိုင်းက အဆိုပါဝန်ကြီးဌာန၌ ကျင်းပသည်။

သင်တန်းဖွင့်ပွဲသို့ ဘဏ္ဍာရေးနှင့်အခွန်ဝန်ကြီးဌာန ပြည်ထောင်စုဝန်ကြီး ဒေါက်တာ ကံဇော်၊ ဒုတိယဝန်ကြီးများ၊ ဌာနဆိုင်ရာတာဝန်ရှိသူများ၊ သင်တန်းနည်းပြများ၊ သင်တန်းသား သင်တန်းသူများ တက်ရောက်ကြသည်။

ဖွင့်ပွဲအခမ်းအနားတွင် ပြည်ထောင်စုဝန်ကြီးက နိုင်ငံ့ဝန်ထမ်းများ အငြိမ်းစားယူသည့်အခါ ပင်စင်အကျိုးခံစားခွင့်များ လျင်မြန်စွာရရှိစေရန်နှင့် ပင်စင်အမှုတွဲများ တွက်ချက်ရာတွင်လည်းကောင်း၊ ငွေပေးမိန့်ထုတ်ပြန်ခြင်းများ ဆောင်ရွက်ရာတွင်လည်းကောင်း မှန်ကန်မြန်ဆန်စွာ ဆောင်ရွက်နိုင်စေရန်ရည်ရွယ်၍ ယခုသင်တန်းကို ဖွင့်လှစ်ပေးခြင်းဖြစ်ကြောင်း။

နိုင်ငံတော်အနေဖြင့် အမျိုးသားပင်စင်စနစ် (National Pension System) ပေါ်ပေါက်လာစေရေးအတွက် ရေရှည်တည်တံ့ပြီး မျှတသည့်ပင်စင်စနစ်ဖြစ်ပေါ်လာစေရန် ဆောင်ရွက်လျက်ရှိရာ လက်ရှိပင်စင်စနစ်ကို မူဘောင်အတွင်းမှ ပြုပြင်ပြောင်းလဲခြင်း (Parametric Reform) နှင့် ရန်ပုံငွေကို အခြေခံ၍ ပင်စင်အကျိုးခံစားခွင့်ပြုသည့်စနစ် (Systemic Reform)သို့ ပြောင်းလဲဆောင်ရွက်နိုင်ရေးအတွက် ဝန်ထမ်းနောင်ရေးဗဟိုရန်ပုံငွေ (Central Provident Fund) ထူထောင်နိုင်ရန် လိုအပ်သည့်ဥပဒေပြဋ္ဌာန်းနိုင်ရေး ဆောင်ရွက်လျက်ရှိကြောင်း။

ပင်စင်ဆိုင်ရာ စာရွက်စာတမ်းနှင့် မှတ်တမ်းများသည် အငြိမ်းစားဝန်ထမ်းများအတွက် လွန်စွာအရေးကြီးသဖြင့် တိုးတက်လာသည့် ICT နည်းပညာကို အသုံးပြု၍ မှတ်တမ်းထိန်းခြင်းစနစ် (Record Keeping System) ကို စနစ်တကျဆောင်ရွက်ကြရန်လိုကြောင်း ပြောကြားသည်။

အဆိုပါသင်တန်းသို့ အရာထမ်း၊ အမှုထမ်း ၆၀ တက်ရောက်ကြမည်ဖြစ်ပြီး သင်တန်းကာလမှာ ရက်သတ္တလေးပတ်ကြာမြင့်မည်ဖြစ်ကြောင်း သတင်းရရှိသည်။  

သတင်းစဉ်