ပြည်ထောင်စုဝန်ကြီး ဒေါက်တာသက်ခိုင်ဝင်း ဘယ်လာရုစ်သမ္မတနိုင်ငံ ကျန်းမာရေးဝန်ကြီး H.E. Mr. Aliaksandr KHAJAYEU နှင့် စိုက်ပျိုးရေးနှင့်စားနပ်ရိက္ခာဆိုင်ရာဝန်ကြီး H.E. Mr. Yury HORLAU တို့နှင့််တွေ့ဆုံ

နေပြည်တော် နိုဝင်ဘာ ၂၈

ကျန်းမာရေးဝန်ကြီးဌာန ပြည်ထောင်စုဝန်ကြီး ဒေါက်တာသက်ခိုင်ဝင်းသည် ဘယ်လာရုစ် သမ္မတနိုင်ငံ ကျန်းမာရေးဝန်ကြီး H.E. Mr. Aliaksandr KHAJAYEU နှင့် စိုက်ပျိုးရေးနှင့်စားနပ်ရိက္ခာဆိုင်ရာဝန်ကြီး H.E. Mr. Yury HORLAU တို့ကို ယမန်နေ့ မွန်းလွဲ ပိုင်းက Jasmine Palace Hotel နေပြည်တော်၌ တွေ့ဆုံသည်။

တွေ့ဆုံစဉ် နှစ်နိုင်ငံကျန်းမာရေးဝန်ကြီးဌာနတို့အကြား ၂၀၁၃ ခုနှစ်က လက်မှတ်ရေးထိုးခဲ့သည့် နားလည်မှုစာချွန်လွှာအရ ရောဂါရှာဖွေရေးနှင့် ဓာတ်ခွဲခန်းသုံးစက်ပစ္စည်းများ ထုတ်လုပ်ရေးတွင် အကျိုးတူပူးပေါင်း ဆောင်ရွက်နိုင်ရေး၊ နှစ်နိုင်ငံကျန်းမာရေးလူ့စွမ်းအားအရင်းအမြစ်ကဏ္ဍများ ဖွံ့ဖြိုး တိုးတက်ရေးအတွက် ဆေးဘက်ပညာရပ်ဆိုင်ရာ သင်ကြားရေးနှင့် ဘွဲ့လွန်ဆေးပညာရပ်ဆိုင်ရာ သင်တန်းများပူးပေါင်းဆောင်ရွက်နိုင်ရေး၊ ဆေးလက်တွေ့ပညာရပ်၊ ဆေးကုသမှုနှင့် ပြည်သူ့ကျန်းမာ ရေးဆိုင်ရာ သုတေသနလုပ်ငန်းများ၊ ပူးပေါင်းဆောင်ရွက်မှုလုပ်ငန်းများအား ကျယ်ကျယ်ပြန့်ပြန့် တိုးမြှင့် ဆောင်ရွက်နိုင်ရေး၊ ဘယ်လာရုစ်နိုင်ငံမှ ထုတ်လုပ်သည့် ဆေးဝါးနှင့် ဆေးပစ္စည်းများကို Fast Track Mechnism ဖြင့် ဆေးဝါးမှတ်ပုံတင်ရရှိရေး ဆောင်ရွက်ပေးလျက် ရှိသည့် ကိစ္စရပ်များ။ ဘယ်လာရုစ်နိုင်ငံ စိုက်ပျိုးမွေးမြူရေးကဏ္ဍမှ ထုတ်လုပ်သည့် အစားအသောက်၊ ကလေး အာဟာရမှုန့်၊ နို့နှင့်နို့ထွက်ပစ္စည်းများ မြန်မာနိုင်ငံသို့ တင်ပို့ရောင်းချနိုင်ရေးကိစ္စများတွင် ကျန်းမာရေး ဝန်ကြီးဌာနမှ ကူညီဆောင်ရွက်ပေးမည့်ကိစ္စရပ်များ၊ အရေးပေါ် ထိခိုက်ဒဏ်ရာရသူများကို ကုသ ပေးသည့် အရေးပေါ်ဆေးသေတ္တာ (First Aid Medical Box) နှင့် အရေးပေါ် သွေးတိတ်ပတ်တီးများ မြန်မာနိုင်ငံတွင် အသုံးပြုနိုင်ရေး နှင့် လိုအပ်ပါက ထုတ်လုပ်မှုအထိ ဆောင်ရွက်နိုင်ရေးကိစ္စရပ်များ၊ အသည်းအစားထိုး ဆေးကုသမှုအပါအဝင် ဆေးကုသမှုလုပ်ငန်း များတွင် ပူးပေါင်းဆောင်ရွက်နိုင် ရေးကိစ္စရပ်များနှင့် နှစ်နိုင်ငံအပြန်အလှန် ဆေးဘက်ပညာရှင်များ စေလွှတ်၍ ဆေးကုသမှုလုပ်ငန်း များ ပူးပေါင်းဆောင်ရွက်ရေး၊ လေ့ကျင့်သင်ကြားပေးရေးကိစ္စရပ်များ၊ Virtual စနစ်ဖြင့် Teleme-dicine ဆေးကုသမှုလုပ်ငန်းများ ပူးပေါင်းဆောင်ရွက်ရေးကိစ္စရပ်များ၊ ကိုယ်ဝန်ဆောင်မိခင်နှင့် မွေးကင်းစကလေးကျန်းမာရေးစောင့်ရှောက်မှုလုပ်ငန်းများတွင် ပူးပေါင်းဆောင်ရွက်နိုင်ရေး ကိစ္စရပ်များ၊ ဆေးတက္ကသိုလ် (၁)၊ ရန်ကုန်နှင့် Belarus State Medical University (BSMU) တို့ အကြား ပညာရပ်ဆိုင်ရာပူးပေါင်းဆောင်ရွက်ရေးသဘောတူစာချုပ်အား နိုဝင်ဘာလအတွင်းက ချုပ်ဆိုခဲ့ပြီးဖြစ်ရာ နှစ်နိုင်ငံဆေးတက္ကသိုလ်များအကြား ကျန်းမာရေးလူ့စွမ်းအားအရင်းအမြစ် ဖွံ့ဖြိုးတိုးတက်ရေးအတွက် အဆင့်မြင့်သင်တန်းများ၊ သိပ္ပံပညာရပ် ဆိုင်ရာလက်တွေ့ဆွေးနွေးပွဲများ၊ ပညာရေးဆိုင်ရာ ညီလာခံများ၊ သင်တန်းများ ဖလှယ်ဆောင်ရွက်မည့်ကိစ္စရပ်များ အစရှိသည်တို့ကို ရင်းနှီးပွင့်လင်းစွာ အမြင်ချင်း ဖလှယ်ဆွေးနွေးကြသည်။

အဆိုပါတွေ့ဆုံပွဲသို့ ကျန်းမာရေးဝန်ကြီးဌာန၊ ဒုတိယဝန်ကြီးနှင့် တာဝန်ရှိသူများ၊ ဘယ်လာရုစ်နိုင်ငံ၊ နိုင်ငံခြားရေးဝန်ကြီးဌာနမှ တာဝန်ရှိသူများ တက်ရောက်ခဲ့ကြကြောင်း သိရသည်။

သတင်းစဉ်