ပြည်ထောင်စုဝန်ကြီး ဦးမြင့်ကြိုင် ပဲခူးတိုင်းဒေသကြီး၏ မဲဆန္ဒရှင်စာရင်း တိကျမှန်ကန်ရေးတိုက်ဆိုင်စိစစ်ဆောင်ရွက်နေမှု ကြည့်ရှုအားပေး

နေပြည်တော် နိုဝင်ဘာ ၂၈

မြေပြင်ကွင်းဆင်းစာရင်းကောက်ယူရေးကြီးကြပ်မှုဗဟိုကော်မတီဥက္ကဋ္ဌ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးမြင့်ကြိုင်သည် ပဲခူးတိုင်းဒေသကြီး မြေပြင်ကွင်းဆင်းစာရင်းကောက်ယူရေးကြီးကြပ်မှု ကော်မတီဥက္ကဋ္ဌ ပဲခူးတိုင်းဒေသကြီး ဝန်ကြီးချုပ် ဦးမျိုးဆွေဝင်းနှင့်အတူ ယနေ့နံနက်ပိုင်းတွင် ပဲခူးတိုင်းဒေသကြီးအစိုးရအဖွဲ့ စုပေါင်းခန်းမ၌ ပဲခူးတိုင်းဒေသ ကြီး အထွေထွေအုပ်ချုပ်ရေး ဦးစီးဌာန တိုင်းဒေသကြီး ရွေးကောက်ပွဲကော်မရှင်အဖွဲ့ ခွဲနှင့် လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာနတို့မှ ဝန်ထမ်းများစုပေါင်း၍ မဲဆန္ဒရှင် စာရင်း ပိုမိုတိကျမှန်ကန်စေရန် ဒေသပြောင်းရွှေ့နေထိုင်မှုများ၊ သေဆုံးသူများ၊ အခြားသော အကြောင်းများကြောင့် မဲစာရင်းတွင် ရွေးကောက်ပွဲဥပဒေအရ သတ်မှတ်ပုံစံများဖြင့် လျှောက်ထား မှုများနှင့်စပ်လျဉ်း၍ စိစစ်ပြင်ဆင်ဆောင်ရွက်နေမှုအခြေအနေများကို လှည့်လည်ကြည့်ရှုစစ်ဆေးသည်။

ကြည့်ရှု စစ်ဆေးစဉ် ပြည်ထောင်စုဝန်ကြီးက မဲစာရင်းမှန်ကန်ရေးအတွက် အဓိကဆောင် ရွက်နေသည့် အဖွဲ့အစည်းများ အနေဖြင့် အချင်းချင်းပေါင်းစပ်ညှိနှိုင်းဆောင်ရွက်ကြရန် မှာကြားပြီး လုပ်ငန်းဆောင်ရွက်နေသည့် ဝန်ထမ်းများအတွက် စားသောက်ဖွယ်ရာများကို တာဝန်ရှိသူများထံ ထောက်ပံ့ပေးအပ်သည်။

ယင်းနောက် ပဲခူးတိုင်းဒေသကြီး မြေပြင်ကွင်းဆင်းစာရင်းကောက်ယူရေးကြီးကြပ်မှုကော်မတီ လုပ်ငန်းညှိနှိုင်းအစည်းအဝေးကို တိုင်းဒေသကြီးအစိုးရအဖွဲ့အစည်းအဝေးခန်းမ၌ ဆက်လက်ကျင်းပရာ ပြည်ထောင်စုဝန်ကြီးက မဲစာရင်းမှန်ကန်စေရေးအတွက် သက်ဆိုင်ရာဌာန အချင်းချင်း ပေါင်းစပ်ညှိနှိုင်းကာ ပိုမိုတိကျမှန်ကန်သော မဲစာရင်း ဖြစ်စေရေး ကြိုးပမ်းဆောင်ရွက် ကြမည်ဖြစ်ပါကြောင်း၊ ထပ်မံထုတ်ပြန်မည့် မဲစာရင်းပိုမိုတိကျမှန်ကန်စေရေးအတွက် မြို့နယ်အဆင့် မြေပြင်ကွင်းဆင်းစာရင်းကောက်ယူရေးကြီးကြပ်မှုကော်မတီမှသည် ခရိုင်/တိုင်းဒေသကြီးအဆင့် ကော်မတီအဆင့်ဆင့်မှ အဖွဲ့စုံဖြင့် မဲစာရင်းမထုတ် ပြန်မီ အသေးစိတ်တိုက်ဆိုင်စစ်ဆေးအတည်ပြု ဆောင်ရွက်ကြရန်လိုအပ်ပါကြောင်း၊ ယင်းလုပ်ငန်းစဉ်အား အမျိုးသားရေးလုပ်ငန်းစဉ်အဖြစ် အားလုံးက ဝိုင်းဝန်း ပူးပေါင်းဆောင်ရွက်ပေး ကြစေလိုပါကြောင်း ရှင်းလင်းပြောကြားသည်။

ထို့နောက် ပဲခူးတိုင်းဒေသကြီး မြေပြင်ကွင်းဆင်း စာရင်းကောက်ယူရေးကြီးကြပ်မှု ကော်မတီ ဥက္ကဋ္ဌ တိုင်းဒေသကြီးဝန်ကြီးချုပ် ဦးမျိုးဆွေဝင်းက ပဲခူးတိုင်းဒေသကြီးအတွင်း မဲစာရင်း နှစ်ကြိမ် ထုတ်ပြန်ခဲ့မှုနှင့် ပြည့်စုံမှန်ကန်ရေးအတွက် ဖြည့်စွက်ပြင်ဆင်ဆောင်ရွက်နိုင်ရေး အခြေအနေ၊ ပိုမိုတိကျမှန်ကန်သော မဲစာရင်းဖြစ်စေရေးအတွက် ဌာနဆိုင်ရာ အချင်းချင်း ပေါင်းစပ်ညှိနှိုင်း ဆောင်ရွက်သွားမည့်အစီအစဉ်များကို ရှင်းလင်းတင်ပြသည်။

ဆက်လက်၍ တောင်ပိုင်းတိုင်းစစ်ဌာနချုပ်တိုင်းမှူး၊ လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာန ပဲခူးတိုင်းဒေသကြီး ဦးစီးမှူး၊ အီလက်ထရောနစ်မှတ်ပုံတင်စနစ်ဦးစီးဌာနမှ ဒုတိယ ညွှန်ကြားရေးမှူးနှင့် တက်ရောက် လာကြသူများက မဲစာရင်းမှန်ကန်စေရေးအတွက် လုပ်ငန်းကဏ္ဍ အလိုက် ညှိနှိုင်းပေါင်းစပ်ဆောင် ရွက်သွားမည့် အခြေအနေများနှင့် စပ်လျဉ်း၍ ရှင်းလင်းဆွေးနွေး တင်ပြကြရာ ပြည်ထောင်စုဝန်ကြီးက ရှင်းလင်းတင်ပြချက်များအပေါ် လိုအပ်သည်များ ညှိနှိုင်းဖြည့်ဆည်း ဆောင်ရွက်ပေးပြီး နိဂုံးချုပ် အမှာ စကားပြောကြားသည်။

ယင်းနေ့ နံနက်ပိုင်းကလည်း ပြည်ထောင်စုဝန်ကြီးသည် လူဝင်မှု ကြီးကြပ်ရေးနှင့် ပြည်သူ့အင်အား ဝန်ကြီးဌာန၊ ပဲခူးတိုင်းဒေသကြီး ဦးစီးမှူးရုံးသို့ သွားရောက်၍ အစည်းအဝေးခန်းမ၌ တိုင်းဒေသ ကြီးအတွင်းရှိ တိုင်းဒေသကြီး၊ ခရိုင်၊ မြို့နယ်ဦးစီးမှူးများအား တွေ့ဆုံကာ တာဝန်ရှိသူများ၏ တင်ပြချက် များအပေါ် လိုအပ်သည်များ ညှိနှိုင်းဆောင်ရွက်ပေးခဲ့ကြောင်း သိရသည်။

သတင်းစဉ်