အွန်လိုင်းလိမ်လည်လောင်းကစားမှု မြန်မာနိုင်ငံတွင် လုံးဝ (လုံးဝ) အခြေမပြု

ပြည်ထောင်စုသမ္မတမြန်မာနိုင်ငံတော် နိုင်ငံတော်အစိုးရအနေဖြင့် အွန်လိုင်း လိမ်လည်လောင်းကစားမှုလုပ်ငန်းများအားလုံးကို မြန်မာနိုင်ငံအတွင်း လုံးဝ (လုံးဝ) အခြေမပြုနိုင်ရေးအတွက် အမျိုးသားရေးတာဝန်တစ်ရပ်အဖြစ်ခံယူကာ တိုက်ဖျက် နှိမ်နင်းလျက်ရှိသည်။ အဆိုပါဒုစရိုက်မှုများကို တိုက်ဖျက်နှိမ်နင်းရာ၌ ပြည်တွင်း အင်အားစုများအပြင် အိမ်နီးချင်းနိုင်ငံအစိုးရများနှင့်လည်း ပေါင်းစပ်ညှိနှိုင်းလက်တွဲ၍ အရှိန်အဟုန်ဖြင့် တက်တက်ကြွကြွ ဆောင်ရွက်လျက်ရှိသည်။

လက်ရှိကာလတွင် ကရင်ပြည်နယ် မြဝတီဒေသ ရွှေကုက္ကိုလ်၊ ကျောက်ခတ်နှင့် KK Park နေရာများရှိ ငွေလိမ်ဂိုဏ်းများနှင့် အဆောက်အအုံ၊ ပစ္စည်းများကို နေ့စဉ်ရှင်းလင်းဖယ်ရှားလျက်ရှိသည်ကို တွေ့ရသည်။ အဆိုပါဒုစရိုက်ဂိုဏ်းများသည် မြန်မာနိုင်ငံမှ တည်ထောင်အခြေပြုဆောင်ရွက်ခဲ့ခြင်းမဟုတ်ဘဲ ကေအင်န်ယူခေါင်းဆောင်များအနေဖြင့် လုပ်ပိုင်ခွင့်ကို ဥပဒေမဲ့အသုံးချကာ နယ်စပ်ဒေသရှိ နိုင်ငံပိုင်မြေများကို နှစ်ရှည်စာချုပ်ချုပ်ဆိုပြီး ပြည်ပနိုင်ငံသားများကို ငှားရမ်းကာ တရားမဝင်လောင်းကစားလုပ်ငန်းများအပါအဝင် ဒုစရိုက်လုပ်ငန်းများကို အခကြေးငွေယူ၍ အကာအကွယ်ပေး လုပ်ကိုင်ကြခြင်းဖြစ်သည်။

အဆိုပါဒေသများတွင် ဒုစရိုက်လုပ်ငန်းများ တစ်စတစ်စထူပြောလာပြီး ဒေသခံပြည်သူများသည် ဘာသာစကားအခက်အခဲကြောင့် စီးပွားရေးလုပ်ကိုင်ရာတွင် အခက်အခဲများရှိလာသည့်အပြင် တစ်မြို့လုံးကို နိုင်ငံခြားသားများ လွှမ်းမိုးလာခဲ့သည်။ ထို့အပြင် ကာစီနိုလုပ်ငန်းများနှင့်အတူ လူမိုက်မာဖီးယားဂိုဏ်းများအသွင် လူကုန်ကူးမှု၊ ဥပဒေမဲ့အနိုင်ကျင့်နှိပ်စက်မှုများ ရှိလာခဲ့သည်။ မြဝတီဒေသသည် နယ်စပ်ဒေသဖြစ်သည့်အတွက် အွန်လိုင်းလိမ်လည် လောင်းကစားလုပ်ငန်းများတွင် ကေအင်န်ယူခေါင်းဆောင်ပိုင်းက အတွင်းကျကျပါဝင်ပတ်သက်နေသည်ကို တွေ့ရသည်။ ထို့ကြောင့် နိုင်ငံတော်အစိုးရ၊ တပ်မတော်နှင့် လုံခြုံရေးတပ်ဖွဲ့များက အဆိုပါဒုစရိုက်လုပ်ငန်းများကို စစ်ဆင်ရေးအသွင်ဖြင့် တိုက်ဖျက်နှိမ်နင်းလျက်ရှိသည်။

၂၀၂၁ ခုနှစ် ဖေဖော်ဝါရီလနောက်ပိုင်း နိုင်ငံရေးဖြစ်စဉ်များကြောင့် နိုင်ငံတော်၏ လုံခြုံရေးအခြေအနေများအပေါ် အခွင့်ကောင်းယူပြီး တရားမဝင်အဆောက်အအုံများကို တိုးချဲ့ဆောက်လုပ်ခဲ့ပြီး ဒုစရိုက်မှုကြီးထွားလာအောင် လုပ်ကိုင်ခဲ့ကြသည်။ ဒုစရိုက်မြို့တော်ကြီးတစ်ခုကဲ့သို့ ဖြစ်လာစေရန်အတွက် လက်နက်ကိုင်သောင်းကျန်း သူအဖွဲ့အချို့နှင့်တစ်ဖက်နိုင်ငံက အကူအညီအထောက်အပံ့အမျိုးမျိုးပေးခဲ့သည့်အပြင် ပြည်ပနိုင်ငံသားများ အလွယ်တကူဝင်၊ ထွက်သွားလာနိုင်အောင် လမ်းဖွင့်ပေးခဲ့သည်။ ထိုသို့သောအခြေအနေတွင် အမေရိကန်နိုင်ငံက ၎င်းနိုင်ငံသားများအား အွန်လိုင်းလိမ်လည်မှုမှ ကာကွယ်ရန် အဖွဲ့ဖွဲ့ပြီးဆောင်ရွက်နိုင်ရေး အောက်လွှတ်တော်အထိ ခြေဆန့်လာခဲ့သည်ကို တွေ့ရသည်။

ထိုအချိန်တွင် ကေအင်န်ယူအဖွဲ့အနေဖြင့် နိုဝင်ဘာလ ၂၅ ရက်နေ့တွင် ဖလူး (မင်းလက်ပံ) ဒေသတွင် ဖြစ်ပွားခဲ့သည့်အခြေအနေကိုအသုံးချ၍ နိုင်ငံတော်၏အချုပ်အခြာအာဏာပိုင်နက်နယ်မြေကို ထိပါးလာအောင် ကြံစည်အားထုတ်မှုများ ပြုလုပ်လာသည်ကိုတွေ့ရသည်။ မြေပြင်တွင်လည်း ပြည်ပနိုင်ငံသားများကိုအသုံးချ၍ အကြမ်းဖက်သောင်းကျန်းသူများ၏ ယုတ်မာပက်စက်သည့်လှုပ်ရှားမှုများကို တွေ့မြင်နေရသည်။ နိုင်ငံတော်အစိုးရနှင့် တပ်မတော်အနေဖြင့် အချုပ်အခြာအာဏာ တည်တံ့ခိုင်မြဲရေး၊ နယ်မြေဒေသတည်ငြိမ်အေးချမ်းရေး၊ တရားဥပဒေစိုးမိုးရေး လုပ်ငန်းများဆောင်ရွက်ရာတွင် အိမ်နီးချင်းနိုင်ငံများအား မထိခိုက်စေဘဲ အသိပေး ပူးပေါင်းလက်တွဲပြီး အရှိန်အဟုန်ဖြင့် ဆက်လက်တိုက်ဖျက်နှိမ်နင်းသွားမည် ဖြစ်သည်။ မြန်မာ့မြေပေါ်တွင် ဒုစရိုက်မှုလုပ်ငန်းများ အမြစ်မတွယ်နိုင်အောင် ရှင်းလင်းဆောင်ရွက်လျက်ရှိသည်။

မြန်မာနိုင်ငံအနေဖြင့် အွန်လိုင်းလိမ်လည်လောင်းကစားလုပ်ငန်းများကို စတင် ခြေရာခံမိသည့်အချိန်မှစ၍ အိမ်နီးချင်းမိတ်ဆွေနိုင်ငံများ၊ ဒေသတွင်းနိုင်ငံများနှင့် ပူးပေါင်းပြီး ရှာဖွေဖော်ထုတ်ဖမ်းဆီးမှုများကို တက်တက်ကြွကြွဆောင်ရွက်လျက်ရှိသည်။ နိုင်ငံတစ်ဝန်းတွင် ပေါ်ပေါက်လာသည့် အွန်လိုင်းလိမ်လည်လောင်းကစားမှုများကို စစ်ဆင်ရေးအသွင်ဖြင့် ရှာဖွေနှိမ်နင်းလျက်ရှိရာ ပြီးခဲ့သည့်ရက်က ရှမ်းပြည်နယ် (တောင်ပိုင်း) မိုင်းနောင်မြို့အနီးရှိ ဒုစရိုက်ဂိုဏ်းကို ရှင်းလင်းဖယ်ရှားနိုင်ခဲ့သည်။ ကျူးလွန်မှုတွင် ပါဝင်ခဲ့သည့် ပြည်ပနိုင်ငံသားများအား ဥပဒေနှင့်အညီစိစစ်ပြီး သက်ဆိုင်ရာနိုင်ငံများသို့ ဘေးအန္တရာယ်ကင်းစွာဖြင့် စနစ်တကျ ပြန်လည်လွှဲပြောင်း ပေးလျက်ရှိသည်။

သို့ဖြစ်ရာ မြန်မာနိုင်ငံအစိုးရအနေဖြင့် အွန်လိုင်းလိမ်လည်လောင်းကစား လုပ်ငန်းများနှင့် ဒုစရိုက်လုပ်ငန်းများကို မည်သည့်အခါမျှ ခွင့်ပြုပေးခြင်းမရှိသလို မြန်မာနိုင်ငံ၏ ပိုင်နက်နယ်မြေကိုအသုံးချပြီး မိတ်ဆွေနိုင်ငံများ၊ အိမ်နီးချင်းနိုင်ငံများနှင့် နိုင်ငံတကာအပေါ် ရာဇဝတ်မှုကျူးလွန်မှုများကို လုံးဝ (လုံးဝ) လက်ခံမည်မဟုတ်ကြောင်းနှင့် နိုင်ငံတကာနှင့် တစ်ကမ္ဘာလုံးကိုအန္တရာယ်ပေးနေသည့် အွန်လိုင်းလိမ်လည်လောင်းကစားမှုလုပ်ငန်းများကို မြန်မာ့ရေမြေပေါ်မှနေ၍ အမြန်ဆုံး အမြစ်ပြတ်ပပျောက်စေရေးအတွက် အရှိန်အဟုန်ဖြင့် ဆက်လက်တိုက်ဖျက်နှိမ်နင်းလျက်ရှိပါကြောင်း။ ။