နေပြည်တော် စက်တင်ဘာ ၇
မန္တလေးတိုင်းဒေသကြီး ကျောက်ဆည်ခရိုင်ဒေသသည် မြန်မာနိုင်ငံအလယ်ပိုင်း မိုးနည်းရေရှားပြီး ပူပြင်းခြောက်သွေ့သည့် ဒေသဖြစ်သောကြောင့် စိုက်ပျိုးရေ၊ သောက်သုံးရေအတွက် ဆည်/ကန် တမံများကို အဓိကအားထားရလျက်ရှိပြီး ကျောက်ဆည်ခရိုင် ကျောက်ဆည်မြို့နယ်နှင့် စဉ့်ကိုင်မြို့နယ်များအတွင်းတွင် ဇော်ဂျီရေသောက်စနစ်ဖြင့် စိုက်ပျိုးရေ၊ သောက်သုံးရေပေးဝေလျက်ရှိရာ ယခုနှစ် ဇော်ဂျီရေသောက်စနစ်မှ မိုးသီးနှံ၊ ဆောင်းသီးနှံနှင့် နွေသီးနှံသီးထပ်သုံးသီးအတွက် စိုက်ပျိုးရေပြည့်ဝစွာပေးဝေသွားမည်ဖြစ်ကြောင်း ဆည်မြောင်းနှင့်ရေအသုံးချမှု စီမံခန့်ခွဲရေးဦးစီးဌာနမှ သိရသည်။
ဇော်ဂျီမြစ်ပေါ်တွင် ဇော်ဂျီနှင့် မြို့ကြီးတမံနှစ်ခုကို တည်ဆောက်ထားပြီး ဇော်ဂျီမြစ်၏ စီးဝင်ရေများကို ထိန်းသိမ်းသိုလှောင်ထားလျက်ရှိသည့်အပြင် ဇော်ဂျီတမံ၏အထက်ဘက်တွင်ထပ်မံ၍ ကျိုင်းခမ်းရေလှောင်တမံကို တည်ဆောက်နေပြီး ယခုတည်ဆောက်ဆဲကာလတွင် ရေလွှဲမြောင်းဖြင့် ဇော်ဂျီ ရေလှောင်တမံအတွင်းသို့ ရေကူဖြည့်သွင်းပေးလျက် ရှိကြောင်း သိရသည်။ ဇော်ဂျီနှင့် မြို့ကြီးတမံ နှစ်ခုမှ ရေအားလျှပ်စစ်ထုတ်လုပ်ရင်း ထုတ်လွှတ်လိုက်သည့် ရေများကို အောက်ဘက်ရှိ မြို့ကြီး၊ နောင်ခမ်း၊ ငပြောင်၊ သင်းတွဲ၊ မင်းရဲ၊ ဇီးတော၊ ဇော်ဂျီစသည့် ရေလွှဲဆည်များဖြင့် အဆင့်ဆင့်ထိန်းညှိသိုလှောင်ကာ ကျောက်ဆည်နှင့် စဉ့်ကိုင်မြို့နယ် ဇော်ဂျီဆည်ရေ သောက်ဧရိယာအပြင် မြစ်သားမြို့နယ်အတွင်းရှိ ကင်းတားလက်ယာမြောင်း ရေသောက်ဧရိယာသို့လည်း စိုက်ပျိုးရေပေးဝေလျက်ရှိကြောင်း သိရသည်။
ရေလုံလောက်ပြည့်ဝစွာ ပေးဝေနိုင်မည်
ယခု မိုးသီးနှံရာသီတွင် ဇော်ဂျီရေသောက်ဧရိယာအတွင်း၌ မိုးစပါး ၆၂၃၃၉ ဧက၊ မိုးအခြား သီးနှံ ၆၆၄၁ ဧက၊ ကင်းတားလက်ယာ ရေသောက်ဧရိယာ အတွင်း၌ မိုးစပါး ၃၀၆၆၄ ဧက၊ မိုးအခြား သီးနှံ ၇၅၀၆ ဧက စုစုပေါင်း မိုးစပါး ၉၃၀၀၃ ဧက၊ မိုးအခြား သီးနှံ ၁၄၁၄၇ ဧကကို လျာထားစိုက်ပျိုးလျက်ရှိပြီး ၂၀၂၃ ခုနှစ် ဇွန် ၁၅ ရက်မှ စတင်၍ စိုက်ပျိုးရေပေးဝေလျက်ရှိကာ နိုဝင်ဘာလကုန်အထိ စိုက်ပျိုးရေပေးဝေ သွားမည်ဖြစ်ကြောင်း၊ ယနေ့ထိ မိုးစပါး ၈၉၈၄၁ ဧက၊ မိုးအခြားသီးနှံဧက ၇၇၄၀ ကို စိုက်ပျိုးပြီး ဖြစ်ကြောင်း သိရသည်။ ဇော်ဂျီနှင့် မြို့ကြီးတမံနှစ်ခုပေါင်းတွင် လက်ရှိရေပမာဏ ဧကပေ ၅၄၀၀၀၀ ခန့် သိုလှောင် ထားနိုင်သည့်အတွက် ယခုလျာထားစိုက်ပျိုးထားပြီးဖြစ်သည့် မိုးသီးနှံများကို အောင်မြင်ဖြစ်ထွန်းသည်အထိ စိုက်ပျိုးရေလုံလောက်ပြည့်ဝစွာ ပေးဝေနိုင်မည်ဖြစ်သည်။
မိုးသီးနှံ စိုက်ပျိုးရေပေးဝေပြီးချိန်ဖြစ်သည့် နိုဝင်ဘာလကုန်အထိ ထပ်မံဝင်ရောက်လာနိုင်သည့် စီးဝင်ရေ ပမာဏနှင့် သုံးစွဲမည့် ပမာဏ၊ လက်ကျန်ရေ ပမာဏများအပေါ်တွင်အခြေခံ၍ နွေရာသီအတွင်းလိုအပ်သော ဒေသသောက်သုံးရေနှင့် လာမည့်နှစ် မိုးစပါးပျိုးထောင်ရေ လိုအပ်ချက်များကို အဓိကထား၍ လျာထားချန်လှပ်ပြီး ဆောင်းသီးနှံနှင့် နွေသီးနှံများကို ဆက်လက်ပေးဝေနိုင်ရန်ဌာနမှ စနစ်တကျတွက်ချက်စီမံဆောင်ရွက်လျက်ရှိကြောင်း သိရ သည်။
အကျိုးအမြတ် ပိုမိုရရှိ
အယ်လ်နီညိုကဲ့သို့ ရာသီဥတုပြောင်းလဲမှုဖြစ်စဉ်များကြောင့် မိုးရွာသွန်းမှုနည်းပါးကာ တမံများအတွင်း ရေဝင်ရောက်မှုလျော့နည်းလာခြင်း၊ အပူချိန်မြင့်တက်လာပြီး စိုက်ပျိုးရေလိုအပ်ချက် ပိုမိုမြင့်မားလာခြင်း စသည့်စိန်ခေါ်မှုများအပေါ်တွင် ရေလိုအပ်ချက်များပြားသော နွေစပါးလျာထားစိုက်ပျိုးမှုကို လျှော့ချပြီး ရေလိုအပ်ချက်နည်းနည်းဖြင့် စီးပွားရေးပိုမိုတွက်ခြေကိုက်သည့် အခြားသီးနှံများကို တောင်သူများ ပြောင်းလဲစိုက်ပျိုးလာသည့် အားသာချက်ရရှိ အောင်ဆောင်ရွက်လျက်ရှိပြီး သီးထပ် သုံးသီးစိုက်ပျိုးကာ တောင်သူများ စီးပွားရေးအကျိုးအမြတ် ပိုမိုရရှိစေလျက်ရှိကြောင်း သိရသည်။
ဆည်မြောင်းနှင့် ရေအသုံးချမှုစီမံခန့်ခွဲရေးဦးစီးဌာနအနေဖြင့် စိုက်ပျိုးရေလေလွင့်ဆုံးရှုံးမှ လျော့ပါးသက်သာစေရန်၊ မြောင်းဆုံးမြောင်းဖျား စိုက်ပျိုးရေပြည့်ဝစွာ ပေးဝေနိုင်ရန်နှင့် ချောင်းရိုးများအတွင်းသို့ စွန့်ပစ်သည့်ရေများကို လေလွင့်ဆုံးရှုံးမှုမရှိစေရေးအတွက် ပြန်လည်ပိတ်ဆို့သိုလှောင်ပြီး စိုက်ပျိုးရေအဖြစ် ပြန်လည်အသုံးပြုပေးဝေနိုင်ရန် စသည့်ဆည်ရေသောက်စနစ် ပြုပြင်ထိန်းသိမ်းခြင်းလုပ်ငန်းများကို စီမံဆောင်ရွက်လျက်ရှိသကဲ့သို့ ဖွဲ့စည်းထားပြီးဖြစ်သည့် ရေအသုံးချသူများအဖွဲ့ (WUG)များနှင့် ပူးပေါင်း၍လည်း စိုက်ခင်းအတွင်း ရေစီမံခန့်ခွဲမှုလုပ်ငန်းများကို ဆောင်ရွက်လျက်ရှိကြောင်း သိရသည်။
ထို့ပြင် အယ်လ်နီညိုရာသီဥတုဖြစ်စဉ်၏ သက်ရောက်မှုကြောင့်လာမည့် နွေရာသီတွင်အပူချိန် မြင့်တက်ပြီး စိုက်ပျိုးရေလိုအပ်ချက် မြင့်မားလာနိုင်မည့် အခြေအနေနှင့်အတူ ရေရှားပါးခက်ခဲလာနိုင်မည့် အခြေအနေ၊ စိုက်ပျိုးရေများကို တောင်သူအချင်းချင်း ညီညွတ်မျှတသည့် စိတ်ဓာတ်ဖြင့် ပေါင်းစပ်ညှိနှိုင်းပြီး လေလွင့်ဆုံးရှုံးမှုမရှိအောင် စနစ်တကျခွဲဝေသုံးစွဲရန် လိုအပ်မှုအခြေအနေ၊ နွေသီးနှံရာသီတွင် နွေစပါးကဲ့သို့ ရေလိုအပ်ချက်များပြားသော သီးနှံအစား ရေလိုအပ်ချက်နည်းပြီး စီးပွားရေးပိုမိုတွက်ခြေကိုက်သည့် နွေအခြားသီးနှံများကို ပိုမိုတိုးချဲ့စိုက်ပျိုးရမည့် အခြေအနေစသည့်မြေအသုံးချစိုက်ပျိုးမှု၊ ရေအသုံးချစိုက်ပျိုးမှုဆိုင်ရာများကို တောင်သူများ သိရှိနားလည်ပြီး ဌာန၏ရေစီမံခန့်ခွဲမှု လုပ်ငန်းစဉ်များအပေါ် ပူးပေါင်းဆောင်ရွက်နိုင်စေရေး ပညာပေးဆွေးနွေး ဆောင်ရွက်လျက်ရှိကြောင်း သိရသည်။
မောင်မွှေး
No comments:
Post a Comment