နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် မာန်အောင်မြို့ နေရောင်ခြည်စွမ်းအင်သုံး လျှပ်စစ်ဓာတ်အားပေးစက်ရုံဖွင့်ပွဲသို့ တက်ရောက်အမှာစကားပြောကြား၊ မာန်အောင်မြို့ ဒေသခံပြည်သူများနှင့် ရင်းရင်းနှီးနှီးတွေ့ဆုံ

မာန်အောင် ဒီဇင်ဘာ ၁၉

နယ်စပ်ဒေသနှင့် တိုင်းရင်းသားလူမျိုးများ ဖွံ့ဖြိုးတိုးတက်ရေး ဗဟိုကော်မတီဥက္ကဋ္ဌ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် ယနေ့တွင် ရခိုင်ပြည်နယ် မာန်အောင်မြို့ နေရောင်ခြည် စွမ်းအင်သုံးဓာတ်အားပေးစက်ရုံ ဖွင့်ပွဲ အခမ်းအနားသို့ တက်ရောက်အမှာစကား ပြောကြားပြီး ဒေသခံပြည်သူများနှင့် ရင်းရင်းနှီးနှီး တွေ့ဆုံသည်။

နိုင်ငံတော်၏ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်သည် ပြည်ထောင်စုဝန်ကြီး ဒုတိယဗိုလ်ချုပ်ကြီးကျော်ဆွေ၊ ဦးမင်းသူနှင့် ဦးဝင်းခိုင်၊ ဒုတိယဝန်ကြီး ဦးကျော်မျိုးနှင့် ဦးတင်လတ်၊ မြန်မာနိုင်ငံရဲတပ်ဖွဲ့ ရဲချုပ် ဒုတိယရဲဗိုလ်ချုပ်ကြီး အောင်ဝင်းဦးနှင့် တာဝန်ရှိသူများနှင့်အတူ ယနေ့နံနက်ပိုင်းတွင် နေပြည်တော်မှ အထူးလေယာဉ်ဖြင့် ထွက်ခွာကြရာ ရခိုင်ပြည်နယ် သံတွဲမြို့သို့ ရောက်ရှိကြသည်။

နိုင်ငံတော်၏အတိုင်ပင်ခံပုဂ္ဂိုလ်နှင့်အဖွဲ့အား ရခိုင်ပြည်နယ်ဝန်ကြီးချုပ် ဦးညီပု၊ တာဝန်ရှိသူများနှင့် ဒေသခံတိုင်းရင်းသားများက သံတွဲလေဆိပ်၌ ကြိုဆိုနှုတ်ဆက်ကြသည်။

ထို့နောက် နိုင်ငံတော်၏အတိုင်ပင်ခံပုဂ္ဂိုလ်နှင့်အဖွဲ့သည် ရဟတ်ယာဉ်များဖြင့် ဆက်လက် ထွက်ခွာကြပြီး မာန်အောင်မြို့သို့ ရောက်ရှိကြရာ ရခိုင်ပြည်နယ်ဝန်ကြီးများနှင့် တာဝန်ရှိသူများ၊ ဒေသခံတိုင်းရင်းသား၊ တိုင်းရင်းသူများက ကြိုဆိုနှုတ်ဆက်ကြသည်။

ယင်းနောက် နိုင်ငံတော်၏အတိုင်ပင်ခံပုဂ္ဂိုလ်သည် မာန်အောင် နေရောင်ခြည် စွမ်းအင်သုံး ဓာတ်အားပေး စက်ရုံဖွင့်ပွဲအခမ်းအနားသို့ တက်ရောက်သည်။

ထို့နောက် နိုင်ငံတော်၏အတိုင်ပင်ခံပုဂ္ဂိုလ်က အမှာစကား ပြောကြားသည်။

(နိုင်ငံတော်၏အတိုင်ပင်ခံပုဂ္ဂိုလ်၏အမှာစကားကို သီးခြားဖော်ပြထားပါသည်။)

ထို့နောက် လျှပ်စစ်နှင့်စွမ်းအင်ဝန်ကြီးဌာန ပြည်ထောင်စုဝန်ကြီး ဦးဝင်းခိုင်က ရခိုင်ပြည်နယ်အတွင်း ဓာတ်အားစနစ်မှ ဓာတ်အားတိုးတက်သုံးစွဲနိုင်ရေး ဆောင်ရွက်ပေးလျက်ရှိသော်လည်း မာန်အောင်မြို့နယ်သည် ကျွန်းမြို့ဖြစ်သည့်အတွက် ဓာတ်အားပေးနိုင်မည့် နည်းလမ်းများကို ကြိုးစားရှာဖွေခဲ့ပါကြောင်း၊ လျှပ်စစ်နှင့် စွမ်းအင်ဝန်ကြီးဌာနနှင့် ရခိုင်ပြည်နယ်အစိုးရအဖွဲ့၊ POSCO International Corporation တို့ ပူးပေါင်းပြီး လေ့လာဆန်းစစ်မှုများ ပြုလုပ် ဆောင်ရွက်ခဲ့ရာ Hybrid System - ဆိုလာ၊ ဒီဇယ်နှင့် စွမ်းအင်သိုလှောင်မှု စနစ်(ESS- Energy Storage System) သည် အသင့်တော်ဆုံးနည်းလမ်းဖြစ်သည် ကို သိရှိခဲ့ရသဖြင့် POSCO International Corporation နှင့်ပူးပေါင်း၍ နေရောင်ခြည်စွမ်းအင်သုံး ဓာတ်အားပေးစက်ရုံကို ဆောင်ရွက်ခဲ့ပါကြောင်း။

ယခု နေရောင်ခြည်စွမ်းအင်သုံး ဓာတ်အားပေးစက်ရုံမှ လျှပ်စစ်ဓာတ်အား တိုးတက်ရရှိမှုကြောင့် မာန်အောင်မြို့နယ်အတွင်းရှိ လူမှုစီးပွားဘဝများနှင့် ဒေသဖွံ့ဖြိုး တိုးတက်ရေးများ၌ အထောက်အကူဖြစ်မည်ဖြစ်ပြီး ဒေသထွက်ပစ္စည်းများ အခြေခံ၍ အသေးစား အလတ်စား စက်မှုလုပ်ငန်းများလည်း ထူထောင်နိုင်မည် ဖြစ်ကာ ဒေသခံပြည်သူများ၏ အလုပ်အကိုင် အခွင့်အလမ်း၊ စီးပွားရေး ဖွံ့ဖြိုး တိုးတက်မှုနှင့်အတူ ခရီးသွားလုပ်ငန်းအပါအဝင် အခြားကဏ္ဍများ အတွက်လည်း များစွာ အထောက်အကူပြုနိုင်မည်ဖြစ်ပါကြောင်း။

ပြည်သူများ၏ လူမှုစီးပွားဘဝဖွံ့ဖြိုးတိုးတက်စေရန်အတွက် အခြေခံအကျဆုံးသည် လျှပ်စစ်မီး ဖြစ်သည်နှင့် အညီ နိုင်ငံတော်အစိုးရအနေဖြင့် တစ်နိုင်ငံလုံး လျှပ်စစ် ဓာတ်အားရရှိသုံးစွဲနိုင်ရေးကို ဦးစားပေးဆောင်ရွက်လျက်ရှိပြီး လျှပ်စစ်ဓာတ်အား တိုးတက်ရရှိလာသည်နှင်အမျှ စီးပွားရေး၊ ပညာရေး၊ ကျန်းမာရေး၊ လူမှုရေး အစရှိသည့် ကဏ္ဍအားလုံး ဘက်ပေါင်းစုံဖွံ့ဖြိုး တိုးတက်လာမည် ဖြစ်ခြင်းကြောင့် လျှပ်စစ်နှင့် စွမ်းအင်ဝန်ကြီးဌာန၏ ဆောင်ရွက်မှုများအပေါ် ပြည်သူ တစ်ရပ်လုံးမှလည်း ပူးပေါင်းကူညီဆောင်ရွက်ပေးကြရန်နှင့် ဓာတ်အားရရှိသုံးစွဲနိုင်ခြင်း မရှိသေးသည့် ဒေသများကို ဓာတ်အားဖြန့်ဖြူးနိုင်ရေး ဆက်လက် ဆောင်ရွက်သွားမည် ဖြစ်သည့်အတွက် ဒေသခံမိဘ ပြည်သူများကလည်း ဝိုင်းဝန်း ကူညီဆောင်ရွက် ပေးကြပါရန် မေတ္တာရပ်ခံလိုပါကြောင်း ပြောကြားသည်။

ယင်းနောက် ရခိုင်ပြည်နယ်ဝန်ကြီးချုပ် ဦးညီပုက ရခိုင်ပြည်နယ်အတွင်း လျှပ်စစ်ဓာတ်အား တိုးတက်ရရှိရေးအတွက် ဆောင်ရွက်နေမှုများနှင့် မာန်အောင်မြို့ နယ်တစ်ခုလုံး လျှပ်စစ်ဓာတ်အား ရရှိရေးအတွက် အဆင့်လိုက်ဆောင်ရွက်မည့် အစီအစဉ်များနှင့် စပ်လျဉ်း၍ ရှင်းလင်း ပြောကြားသည်။

ထို့နောက် POSCO International Corporation မှ Chief Executive Officer Mr. Kim Young Sangက နှုတ်ခွန်းဆက်စကား ပြောကြားသည်။

ယင်းနောက် မြန်မာ့ရေနံနှင့် သဘာဝဓာတ်ငွေ့လုပ်ငန်း ဦးဆောင်ညွှန်ကြား ရေးမှူး ဦးမျိုးမြင့်ဦးက မာန်အောင်မြို့ နေရောင်ခြည်စွမ်းအင်သုံး ဓာတ်အားပေး စက်ရုံနှင့် ပတ်သက်သည့် စာရွက်စာတမ်း များကို လျှပ်စစ်ဓာတ်အားဖြန့်ဖြူးရေး လုပ်ငန်း ဦးဆောင်ညွှန်ကြားရေးမှူး ဦးစောဝင်းမောင် ထံလွဲပြောင်းပေးအပ်သည်။

ထို့နောက် မာန်အောင်မြို့နယ် ပြည်သူများကိုယ်စား မာန်အောင်မြို့နယ် ပြည်သူ့လွှတ်တော် ကိုယ်စားလှယ်က ဦးတင်နုအောင်က ယနေ့သည် မိမိတို့ မာန်အောင်ကျွန်းပေါ်တွင် နေထိုင်ကြသည့် ပြည်သူများအတွက် အိမ်မက်တစ်ခု အကောင်အထည်ပေါ်လာသည့်နေ့တစ်နေ့ဖြစ်ပါကြောင်း၊ မိမိတို့ တစ်ရက်တွင် ၂၄ နာရီ လျှပ်စစ်မီးရရှိခဲ့သည့်နေ့ တစ်ရက်မှ မရှိခဲ့ပါကြောင်း၊ မိမိတို့မှာ ရေနံဆီမီး ခွက်ဖြင့် ကြီးပြင်းခဲ့ရသူများဖြစ်ပါကြောင်း၊ ယခု၂၄နာရီလျှပ်စစ်မီးရရှိမည်ဖြစ်သည့် အတွက် မိမိတို့ သား၊သမီး၊ မြေး၊ မြစ်များ၏ ပညာရေး၊ကျန်းမာရေး၊ လူမှုရေးစသည့် လူမှုဘဝများ မြင့်မားလာကြမည် ဖြစ်ပါကြောင်း၊ ထို့အတွက် မာန်အောင်မြို့ နေရောင်ခြည်စွမ်းအင်သုံး ဓာတ်အားပေးစက်ရုံ တည်ဆောက်ပေးသည့်အတွက် တာဝန်ရှိသူများအား ကျေးဇူးတင်ရှိပါကြောင်း ပြောကြားသည်။

ထို့နောက် နိုင်ငံတော်၏အတိုင်ပင်ခံပုဂ္ဂိုလ်၊ ပြည်ထောင်စုဝန်ကြီး ဦးဝင်းခိုင်၊ ရခိုင်ပြည်နယ် ဝန်ကြီးချုပ် ဦးညီပု၊ မြန်မာနိုင်ငံဆိုင်ရာ ကိုရီးယားနိုင်ငံ သံအမတ်ကြီး မစ္စတာလီဆန်းဟွာနှင့် POSCO International Corporation မှ Chief Executive Officer Mr. Kim Young Sang တို့က မာန်အောင်မြို့ နေရောင်ခြည် စွမ်းအင်သုံး ဓာတ်အားပေးစက်ရုံကို စက်ခလုတ်နှိပ်၍ ဖွင့်လှစ်ပေးကြသည်။

ယင်းနောက် နိုင်ငံတော်၏အတိုင်ပင်ခံပုဂ္ဂိုလ်သည် နေရောင်ခြည်စွမ်းအား ရယူပြီး လျှပ်စစ်ဓာတ်အား ထုတ်ရန် တပ်ဆင်ထားသည့် Solar ပြားများအား ကြည့်ရှုသည်။

ထို့နောက် နိုင်ငံတော်၏အတိုင်ပင်ခံပုဂ္ဂိုလ်၊ ပြည်ထောင်စုဝန်ကြီးများ၊ ရခိုင်ပြည်နယ်ဝန်ကြီးချုပ် တို့သည် မြန်မာနိုင်ငံဆိုင်ရာ ကိုရီးယားနိုင်ငံ သံအမတ်ကြီး မစ္စတာလီဆန်းဟွာနှင့် POSCO International Corporation မှ တာဝန်ရှိသူများနှင့် လည်းကောင်း၊ ဒုတိယဝန်ကြီးများ၊ ပြည်နယ်ဝန်ကြီးများ၊ တာဝန်ရှိသူများ နှင့်လည်းကောင်း မှတ်တမ်းတင် ဓာတ်ပုံရိုက်ကြသည်။

ယခုဖွင့်လှစ်သည့် မာန်အောင်မြို့ နေရောင်ခြည်စွမ်းအင်သုံး ဓာတ်အားပေး စက်ရုံကို လျှပ်စစ်နှင့်စွမ်းအင်ဝန်ကြီးဌာန၊ မြန်မာ့ရေနံနှင့်သဘာဝဓာတ်ငွေ့ လုပ်ငန်းနှင့် အကျိုးတူပူးပေါင်း ဆောင်ရွက်လျက်ရှိသည့် POSCO International Corporation မှ ရွှေသဘာဝဓာတ်ငွေ့ စီမံကိန်း၏ လူမှုတာဝန်သိ အစီအစဉ်တစ်ရပ် အနေဖြင့် ဆောင်ရွက်သည့် စီမံကိန်းဖြစ်ပြီး အမေရိကန်ဒေါ်လာ ၂ဒဿမ၅သန်း အကုန်ကျခံ တည်ဆောက်ခဲ့ခြင်းဖြစ်သည်။

လက်ရှိ ဒီဇယ်ဓာတ်အားပေးစက်များနှင့် အချိန်ပိုင်း ဖြန့်ဖြူးပေးနေသည့် မာန်အောင်မြို့ပေါ် (၅)ရပ်ကွက်နှင့် ပတ်ဝန်းကျင် ကျေးရွာ(၃)ရွာရှိ အိမ်ထောင်စု (၁၄၃၅)စုအား ယခုဖွင့်လှစ်သည့် ဆိုလာ၊ ဒီဇယ်နှင့် စွမ်းအင် သိုလှောင်မှု ပေါင်းစပ် စနစ်ဖြင့် အချိန်ပိုမို၍ ဓာတ်အားပေးသွားနိုင်မည် ဖြစ်သည်။

လမ်းပန်းဆက်သွယ်ရေးခက်ခဲမှုရှိသည့် မာန်အောင်မြို့နယ်အား လျှပ်စစ် ဓာတ်အားဖြန့်ဖြူး ပေးနိုင်ရန်အတွက် ဖြစ်နိုင်မည့်နည်းလမ်းများအား ဆန်းစစ်ကြည့် ရာတွင် အကောင်းဆုံးနှင့် အသင့်တော်ဆုံး နည်လမ်းဖြစ်သည့် နေရောင်ခြည်စွမ်းအင် သုံးလျှပ်စစ်ဓာတ်အားပေး စက်ရုံ တည်ဆောက်ရန် ရွေးချယ်ခဲ့ကာ ယခုစီမံကိန်းမှာ အဆင့်(၁)ဖြစ်ပြီး Solar Panelအရေအတွက် ၁၄၁၁ခု၊ ဘက္ထရီ ၇၂၀ ခု တပ်ဆင်ထားပြီး ဝဒဿမ၅ မဂ္ဂါဝပ်ထုတ်လုပ်နိုင်ပြီး Energy Storage System ၂ နာရီ သိုလှောင်နိုင်စွမ်းရှိကြောင်း၊ ယခုစီမံကိန်းတွင် အသုံးပြုသည့် Energy Storage System နှင့် Diesel Hybrid System မှာ မြန်မာနိုင်ငံတွင် ပထမဆုံး အသုံးပြု ဆောင်ရွက်ခြင်း ဖြစ်ကြောင်း၊ စီမံကိန်းအဆင့်(၂)ကို ကိုရီးယားသမ္မတနိုင်ငံ နိုင်ငံတကာ ပူးပေါင်းဆောင်ရွက်ရေး အေဂျင်စီနှင့် ပူးပေါင်းဆောင်ရွက်သွားမည်ဖြစ်ကြောင်း သိရသည်။

လျှပ်စစ်နှင့်စွမ်းအင်ဝန်ကြီးဌာနအနေဖြင့် ဝန်ကြီးဌာန၏ ရည်မှန်းချက်ဖြစ်သည့် ပြည်သူများနှင့် စက်မှုလက်မှုလုပ်ငန်းများတွင် လျှပ်စစ်ဓာတ်အားပြည့်ဝစွာ သုံးစွဲနိုင်ရေးအတွက် ဓာတ်အားပေး စက်ရုံများ၊ ဓာတ်အားလိုင်းများ၊ ဓာတ်အားခွဲရုံများ တည်ဆောက်၍ ဓာတ်အားဖြန့်ဖြူးနိုင်ရေး ဆောင်ရွက်လျက်ရှိရာ ၂၀၁၉ ခုနှစ် ဒီဇင်ဘာလတွင် တစ်နိုင်ငံလုံး၏ ၅၀ ရာခိုင်နှုန်းထိ နိုင်ငံတော်ဓာတ်အားစနစ်မှ ဓာတ်အား ဖြန့်ဖြူးပေးနိုင်ခဲ့ပြီး ဖြစ်သည်။

ဆက်လက်၍ ၂၀၂၁ ခုနှစ်တွင် တစ်နိုင်ငံလုံး၏ ၅၅ ရာခိုင်နှုန်း၊ ၂၀၂၅-၂၀၂၆ တွင် တစ်နိုင်ငံလုံး၏ ၇၅ ရာခိုင်နှုန်း အထက်နှင့် ၂၀၃၀ ပြည့်နှစ်တွင် တစ်နိုင်ငံလုံး ၁၀၀ ရာခိုင်နှုန်း အပြည့်အဝ လျှပ်စစ်ဓာတ်အားရရှိရေး ကြိုးပမ်းဆောင်ရွက်လျက် ရှိကြောင်း၊ ထိုသို့ ဆောင်ရွက်လျက်ရှိရာတွင် ဓာတ်အားစနစ်မှ ဓာတ်အားပေး နိုင်ရေး ဆောင်ရွက်မှုများရှိပြီး ဓာတ်အားစနစ်နှင့် ဝေးကွာသော ဒေသများသို့လည်း လျှပ်စစ်ဓာတ်အား ရရှိသုံးစွဲနိုင်ရေးအတွက် နေရောင်ခြည်စွမ်းအင် အသုံးပြု၍ ဓာတ်အားပေးခြင်း၊ အသေးစားရေအား လျှပ်စစ်ဓာတ်အားပေးစက်များ၊ လေစွမ်းအင်သုံး လျှပ်စစ်ဓာတ်အားပေးစက်များ၊ ဒီဇယ်ဓာတ်အားပေးစက်များဖြင့် ဓာတ်အားပေး နိုင်ရေးကိုလည်း စီမံဆောင်ရွက်လျက်ရှိကြောင်း။

လက်ရှိအစိုးရလက်ထက်တွင် လျှပ်စစ်ဓာတ်အား တိုးတက်ရရှိရေး အတွက် ကြိုးပမ်း ဆောင်ရွက်ခဲ့ရာတွင် ၂၀၁၆ ခုနှစ် ဧပြီလမှ ၂၀၁၉ ခုနှစ် စက်တင်ဘာလ အထိ ၃ နှစ်ခွဲကာလအတွင်း ၉၀၄ မဂ္ဂါဝပ် ၊ ဓာတ်အားလိုင်းမိုင် စုစုပေါင်း ၁၉,၆၁၁ မိုင်၊ ဓာတ်အားခွဲရုံ စုစုပေါင်း ၁၂,၆၃၅ အမ်ဗွီအေ တို့ကို တိုးတက် ဆောင်ရွက် နိုင်ခဲ့ကြောင်း၊ထိုသို့ ၃ နှစ်ခွဲ ကာလအတွင်း မြို့ပေါင်း (၇၂)မြို့၊ ကျေးရွာပေါင်း (၆,၀၃၈)ရွာအား ဓာတ်အားစနစ်မှ ဓာတ်အားသုံးစွဲနိုင်အောင် ပိုမို တိုးချဲ့ဆောင် ရွက်ပေးနိုင်ခဲ့သည့် အတွက် ၂၀၁၆ ခုနှစ်တွင် နိုင်ငံတော် ဓာတ်အား စနစ်မှ မီးသုံးစွဲ သူ ၃၄ရာခိုင်နှုန်း သာရှိခဲ့ရာမှ ယခုအခါ ၅ဝဒဿမ ၀၉ရာခိုင်နှုန်း အထိ တိုးတက် အောင် ဆောင်ရွက်ပေးနိုင်ခဲ့ကြောင်း၊ လျှပ်စစ်ဓာတ်အားသုံးစွဲမှု တိုးတက်လာ သကဲ့သို့ လျှပ်စစ်ဓာတ်အား ထုတ်လုပ်မှုကိုလည်း လာမည့်နှစ်တွင် ၁,၁၆၆ မဂ္ဂါဝပ် တိုးတက်ထုတ်လုပ်နိုင်ရေး စီမံဆောင်ရွက်ထားပြီး ဖြစ်ကြောင်း။

ရခိုင်ပြည်နယ်ကို နိုင်ငံတော်ဓာတ်အားစနစ်မှ လျှပ်စစ်ဓာတ်အား ဖြန့်ဖြူးပေးနိုင်ရန် ၂၀၁၁ ခုနှစ်က စတင်ပြီး ဆောင်ရွက်ပေးခဲ့ရာ ၂၀၁၄ ခုနှစ်၊ ဒီဇင်ဘာလတွင် တောင်ကုတ်၊ ကျောက်ဖြူ၊ အမ်း၊ ပုဏ္ဏားကျွန်း၊ စစ်တွေ၊ မြောက်ဦး၊ သံတွဲ၊ ရမ်းဗြဲ၊ ကျောက်တော်နှင့်ပတ်ဝန်းကျင် ကျေးရွာများကို နိုင်ငံတော်ဓာတ်အားစနစ်ကမှ လျှပ်စစ် ဓာတ်အားဖြန့်ဖြူးပေးနိုင်ခဲ့ပြီး ဖြစ်ကြောင်း၊ ထိုမှတဆင့် မအီ၊ မင်းပြားနှင့် ပတ်ဝန်းကျင် ကျေးရွာများကို ဓာတ်အားဖြန့်ဖြူးပေးနိုင်ရန်အတွက် ဓာတ်အားခွဲရုံ (၂)ရုံကို ၂၀၁၆ ခုနှစ်တွင်လည်းကောင်း၊ ဂွမြို့နယ်နှင့် အနီးတစ်ဝိုက်ဒေသ များကိုလည်း ဓာတ်အားဖြန့်ဖြူး ပေးနိုင်ရန်အတွက် လိုအပ်သော ဓာတ်အားလိုင်းနှင့် ဓာတ်အားခွဲရုံ တစ်ရုံတို့ကို ၂၀၁၇ ခုနှစ် ဇူလိုင်လတွင်လည်းကောင်း ဖွင့်လှစ်ပေးနိုင်ခဲ့ပြီး ဖြစ်ကြောင်း။

အစိုးရတာဝန်ယူပြီး (၃)နှစ်ခွဲ ကာလအတွင်း ရခိုင်ပြည်နယ်ရှိ ဂွမြို့အပါအဝင် မအီ၊ မင်းပြား၊ ဂွ၊ ကျိန္တလီ၊ မြေပုံ၊ ပေါက်တော၊ စနဲ၊ ကမ်းထောင့်ကြီး၊ တပ်တောင်၊ ရသေ့တောင်၊ ဘူးသီးတောင်၊ မောင်တော စသည့်မြို့များကို လျှပ်စစ်ဓာတ်အားရရှိအောင် ဆောင်ရွက်ပေးနိုင်ခဲ့ကြောင်း၊ မောင်တောမှတဆင့် ကြိမ်ချောင်းသို့လည်း လိုအပ်သည့် ဓာတ်အားလိုင်း တည်ဆောက်ပြီး ၂၀၂၀ ခုနှစ် နှစ်ကုန်ပိုင်းတွင် လျှပ်စစ်ဓာတ်အားရရှိရေး ရည်မှန်းချက်ထား ကြိုးပမ်း ဆောင်ရွက်လျက် ရှိကြောင်း။

လျှပ်စစ်နှင့်စွမ်းအင်ဝန်ကြီးဌာနအနေဖြင့် ရခိုင်ပြည်နယ်တွင် ၂၀၁၉ ခုနှစ် နိုဝင်ဘာလအထိ မြို့ပေါင်း(၂၃) မြို့၊ ကျေးရွာ(၅၆၁)ရွာ၊ အိမ်ထောင်စု(၁၂၆၅၉၅) စုကို ဓာတ်အားပေးနိုင်ပြီးဖြစ်သည့် အတွက် ရခိုင်ပြည်နယ်တစ်ခုလုံး၏ Electrifi- cation Ratio မှာ ၃ဝဒသမ၅၅ရာခိုင်နှုန်း လျှပ်စစ်ဓာတ်အားရရှိလျက် ရှိကြောင်း၊ ၂၀၂၁-၂၀၂၂ ခုနှစ်တွင် ၅၅ ရာခိုင်နှုန်းအထိလည်းကောင်း၊ ၂၀၂၅-၂၀၂၆ ခုနှစ်တွင် ၇၅ရာခိုင်နှုန်း အထိလည်းကောင်း ဖြည့်ဆည်းပေးနိုင်ရေး ကြိုးပမ်း ဆောင်ရွက်လျက် ရှိကြောင်းသိရသည်။

ထို့နောက် နိုင်ငံတော်၏အတိုင်ပင်ခံပုဂ္ဂိုလ်သည် မာန်အောင်မြို့နယ် ဒေသခံပြည်သူနှင့် ရင်းရင်းနှီးနှီး တွေ့ဆုံသည်။

တွေ့ဆုံပွဲတွင် နိုင်ငံတော်၏အတိုင်ပင်ခံပုဂ္ဂိုလ်က “အခု ဒီအခမ်းအနားကို စီစဉ်ပေးတဲ့ ရခိုင်ပြည်နယ်ဝန်ကြီးချုပ် ဦးညီပုနဲ့ ကြွရောက်လာတဲ့ ပြည်သူတွေအားလုံးကို ကျေးဇူးတင်ပါတယ်။ ကျွန်မအထူးသဖြင့် ဒီကို လာချင်တယ်ဆိုတာဟာ ရခိုင်ပြည်နယ်ဖြစ်လို့ကို လာချင်တာပါ။ ရခိုင်ပြည်နယ်မှာ ငြိမ်းချမ်းမှုမရှိဘူး၊ တည်ငြိမ်မှုမရှိဘူး၊ လက်နက်ကိုင်တိုက်ပွဲတွေ ဖြစ်နေတယ် ဆိုတော့ အဲဒါကြောင့်မို့ ကျွန်မတို့ လာဖို့လိုပါတယ်။ ဘာဖြစ်လို့လဲဆိုတော့ ကျွန်မတို့ နိုင်ငံတစ်နိုင်ငံလုံးဟာ ကျွန်မတို့ရဲ့ပြည်ထောင်စုပဲ။ အေးချမ်းနေတဲ့နေရာတွေကလည်း ကျွန်မတို့ရဲ့ ပြည်ထောင်စုပါပဲ။ မအေးချမ်းတဲ့နေရာတွေကလည်း ကျွန်မတို့ရဲ့ ပြည်ထောင်စုပဲ။ မအေးချမ်းတဲ့ နေရာတွေကို ကျွန်မတို့ ပိုပြီးတော့ ဂရုစိုက်ဖို့လိုပါတယ်။ ဘာဖြစ်လို့လဲဆိုတော့ ဥပမာပြောရမယ် ဆိုရင် ဆရာဝန်တစ်ယောက်က နေမကောင်းတဲ့လူကို ပိုပြီးတော့ ဂရုစိုက်ရတယ်။ နေကောင်းတဲ့ လူကို သိပ်ပြီးဂရုစိုက်ဖို့မလိုဘူး။ နေကောင်းတဲ့လူက သူ့ဟာသူမှန်မှန်ကန်ကန် ကျန်းမာရေးနဲ့ ကိုက်ညီတဲ့ နေပုံနေနည်းနဲ့ နေသွားဖို့ပဲ ဖြစ်ပါတယ်။ ဒါပေမယ့် ကျန်းမာရေးချို့တဲ့နေတယ် ဆိုရင်တော့ ဂရုစိုက်ရပါတယ်။ ဒီအတိုင်းပဲ အခုရခိုင်ပြည်နယ်ဟာဆိုရင် တည်ငြိမ်မှုအရ အားနည်းလို့ ဆိုပြီးတော့ ကျွန်မတို့ အထူးအလေးပေးပြီး ဖွံ့ဖြိုးတိုးတက်ရေး စီမံကိန်းတွေ လုပ်ဆောင်ပေးပါတယ်။

စောစောက ဝန်ကြီးချုပ် ဦးညီပု ပြောသွားတဲ့အတိုင်းပဲ တစ်နိုင်ငံလုံးအတိုင်းအတာနဲ့ ဆိုရင် ကျွန်မတို့နိုင်ငံက လျှပ်စစ်ဓာတ်အား လိုအပ်ချက်ရဲ့ ၅၀ ရာခိုင်နှုန်းပဲ ရပါသေးတယ်။ အဲဒါတွေက ရက်ပိုင်းအတွင်းမှာ ဖြစ်တဲ့ကိစ္စပါ။ ဒါပေမယ့် ရခိုင် ပြည်နယ်ကဆိုရင် ၅၂ ရာခိုင်နှုန်းရောက်နေပါပြီ။ ပြောရမယ်ဆိုရင် တစ်တိုင်းပြည်လုံး အတိုင်းအတာရဲ့ ပျမ်းမျှခြင်းထက် ပိုပါတယ်။ အဲဒီလို ပိုသွားတာဟာ သူ့ဟာသူအလိုလို ဖြစ်လာတာမဟုတ်ပါဘူး။ ကျွန်မတို့ သေသေချာချာ စီစဉ်ပြီးတော့ လုပ်လို့ ဖြစ်လာတာပါ။

လမ်းပန်းဆက်သွယ်ရေးနဲ့ လျှပ်စစ်ဓာတ်အား ရရှိရေးဟာ ကျွန်မတို့ရဲ့ နိုင်ငံ တစ်နိုင်ငံလုံးအတွက် အရေးကြီးပါတယ်။ အထူးသဖြင့် တည်ငြိမ်မှုမရှိတဲ့နေရာတွေအတွက် အရေးကြီးပါတယ်။ ရခိုင်ပြည်နယ်ဟာဆိုရင် ဆယ်စုနှစ်ပေါင်းများစွာ ဖွံ့ဖြိုး တိုးတက်မှုမှာ နောက်ကျကျန်နေခဲ့ရပါတယ်။ နောက်ကျကျန်နေခဲ့ရလို့ကို ကျွန်မတို့အထူး ဂရုစိုက်တာပါ။ ဒီရခိုင်ပြည်နယ်မှာ လက်နက်ကိုင် ပဋိပက္ခတွေဖြစ်မှ ကျွန်မတို့ လှည့်ကြည့်တာ မဟုတ်ပါဘူး။ ကျွန်မတို့အစိုးရ ၂၀၁၆ ခုနှစ်မှာ တာဝန်ယူကတည်းက ရခိုင်ပြည်နယ်ရဲ့ ပြဿနာတွေကို ကျွန်မတို့ဖြေရှင်းမှဖြစ်မယ်။ မဖြေရှင်းရင် တစ်ကမ္ဘာလုံးကနေပြီးတော့ ကျွန်မတို့နိုင်ငံကို ထိခိုက်နိုင်တဲ့လုပ်ရပ်တွေ လုပ်လာနိုင်တယ်ဆိုတာ ကျွန်မတို့ ခန့်မှန်းလို့ရပါတယ်။

နောက်ပြီးတော့လည်း ပြင်ပက ဘာလုပ်လုပ်၊ ဘာလုပ်သည်ဖြစ်စေ၊ မလုပ်သည် ဖြစ်စေ ကိုယ့်ရဲ့နိုင်ငံအတွင်းမှာ ပြဿနာဖြစ်ရင် ကိုယ့်ဟာကိုယ်ဖြေရှင်းဖို့ရာ တာဝန်ပါပဲ။ ဒါကြောင့်လည်း ကျွန်မတို့က ရခိုင်ပြည်နယ် တည်ငြိမ်အေးချမ်းမှုနှင့် ဖွံ့ဖြိုးတိုးတက်ရေး အကောင်အထည်ဖော်ရေး ဗဟိုကော်မတီဆိုပြီး အစိုးရသစ်တက်ပြီးတော့ နှစ်လ အတွင်းမှာ ကျွန်မတို့ ဖွဲ့လိုက်တာပါ။ ဒါဟာ ရခိုင်ပြည်နယ်မှာ ဖွံ့ဖြိုးမှုရှိမှ တည်ငြိမ်မှုရှိမယ်။ တရား ဥပဒေစိုးမိုးရေးရှိမှ ငြိမ်းချမ်းမှုရှိမယ်ဆိုတာကို ကျွန်မတို့ သဘောပေါက်လို့ လုပ်လိုက်တာဖြစ်ပါတယ်။

၂၀၁၆ ခုနှစ်မှာစပြီးဖြစ်တဲ့ လက်နက်ကိုင်ပဋိပက္ခတွေ၊ အကြမ်းဖက်သမားတွေ က ရဲစခန်းတွေကို စပြီးတိုက်တာတွေလည်း ဒီလိုတည်ငြိမ်သွားမယ့် အခြေအနေကို မရောက်စေချင်လို့လုပ်တယ်လို့ ကျွန်မတို့ဒီလိုပဲ မျှော်မှန်းပါတယ်။ ဒီလိုလုပ်ပြီး တော့မှ ပြင်ပကနေပြီးတော့ အကြောင်းအမျိုးမျိုးနဲ့ ကျွန်မတို့နိုင်ငံကို ဖိအားပေးအောင် ကျွန်မတို့ နိုင်ငံနဲ့ ပတ်သက်ပြီးတော့ အမြင်စောင်းအောင် လုပ်ခဲ့တာပါ။ ဒါဟာမလုပ်ကောင်းတဲ့ ကိစ္စပါ။ ဒီနိုင်ငံကို တကယ်ပဲချစ်တယ်။ ဒီရေ၊ ဒီမြေကို ချစ်တယ်ဆိုရင် ဒီရေ၊ ဒီမြေ၊ ဒီနိုင်ငံကိုထိပါးတဲ့ ကိစ္စ ဘာမဆို ရှောင်ရမှာဖြစ်ပါတယ်။ ငါတို့ရဲ့ နေရာလေးဆိုပြီးတော့ ကွက်ပြီးတော့ ကြည့်လို့မရပါဘူး။ ကျွန်မတို့တစ်နိုင်ငံလုံးဆိုတာ လူတစ်ယောက်ရဲ့ ခန္ဓာကိုယ်လိုပါပဲ။ ဒီခန္ဓာကိုယ်မှာ နှလုံးရောဂါရရင်လည်း ရောဂါပဲ။ အသည်းရောဂါရရင်လည်း ရောဂါပဲ။ နှလုံးရောဂါပဲရှိပါတယ်။ ကျန်းမာပါ တယ်ဆိုပြီး ပြောလို့မရဘူး။ နှလုံးရောဂါရှိတဲ့လူဟာ မကျန်းမာဘူး။ အသည်းသာ မကောင်းတာပါ။ ကျန်းမာပါတယ်လို့ ပြောလို့မရဘူး။ အသည်းမကောင်းရင် မကျန်းမာဘူးပဲ။ ထိုနည်းလည်းကောင်းပဲ အခြား အစိတ်အပိုင်းတွေ မကောင်းရင်၊ အစိတ်အပိုင်းတစ်ခု မကောင်းရင် လူတစ်ယောက်ဟာ ကိုယ့်ကိုယ်ကိုယ် ပြည့်ပြည့်၀၀ ကျန်းမာတယ်လို့ ဘယ်တော့မှ ပြောလို့မရပါဘူး။

ဒီအတိုင်းပဲ နိုင်ငံတစ်နိုင်ငံမှာဆိုရင် တစ်စိတ်တစ်ပိုင်းကနေပြီးတော့ အဆင်မပြေရင် ကျွန်မတို့နိုင်ငံ တစ်နိုင်ငံလုံးကို ထိပါတယ်။ အဲဒီလိုထိတယ်ဆိုတဲ့ စိတ်ဓာတ်လည်း ထားရမယ်။ အထူးသဖြင့် ဒီလိုစိတ်ဓာတ်မျိုးကို ရခိုင်ပြည်နယ်လို တည်ငြိမ်မှု ရှိသင့်သလောက် မရှိတဲ့နေရာတွေမှာ ဒီလိုစိတ်ဓာတ်ကို ပြည်သူလူထု တစ်ယောက်ချင်း တစ်ယောက်ချင်းက ထားဖို့လိုပါတယ်။ ငါ့ထိမှ ထိတာမဟုတ်ဘူး။ အခြားသူတွေ ထိရင်လည်း ငါ့ကိုထိတယ်။ ငါတို့မြေပေါ်မှာနေတဲ့ အေးအတူ ပူအမျှ၊ တစ်လှေတည်း စီးတဲ့သူတွေထဲက တစ်ယောက် ထိရင် ငါတို့အားလုံးကို ထိတယ်ဆိုတဲ့ စိတ်ဓာတ်ကိုထားဖို့ လိုပါတယ်။

ကျွန်မစောစောတုန်းကလည်း ပြောသွားပါတယ်။ လက်နက်အင်အားနဲ့ အပြောင်း အလဲလုပ်ဖို့ ကြိုးစားတယ်ဆိုတာကို ကျွန်မအရင်က ပြောဖူးပါတယ်။ ဉာဏ်ပညာ အမြော်အမြင်နည်းလို့လည်း ဖြစ်နိုင်တယ်။ သတ္တိနည်းလို့လည်း ဖြစ်နိုင်တယ်။ စေတနာ နည်းလို့လည်း ဖြစ်နိုင်တယ်။ နိုင်ငံအပေါ်မှာ စေတနာရှိရင် နိုင်ငံကိုထိမယ့်ကိစ္စကို ဘယ်တော့မှ မလုပ်ဘူး၊ ဒါပထမပဲ။ ဒုတိယက ဒီနိုင်ငံဟာ အပြောင်းအလဲလိုအပ်တယ် ဆိုရင်၊ ကိုယ့်မှာ ဉာဏ်ပညာရှိရင် ဘယ်လိုနည်းနဲ့ ဒီအပြောင်းအလဲကို တည်တည်ငြိမ်ငြိမ်နဲ့ လုပ်မလဲဆိုတာ စဉ်းစားပြီးတော့ အဖြေရှာလို့ရရမယ်။ ဒီအဖြေမရှာနိုင်ရင် ကိုယ့်မှာဉာဏ်ပညာ အမြော်အမြင်နည်းလို့ပဲ။ ဒိလို ဘယ်လိုနည်းနဲ့ ရအောင် လုပ်ရမလဲ ဆိုတာသိရက်နဲ့ အဲဒီနည်းကို လိုက်နိုင်တဲ့ ဇွဲ၊ လုံ့လ၊ ဝီရိယ မရှိဘူးဆိုတာလည်း ဒါသတ္တိမရှိတာပဲ။

ဒါကြောင့်မို့ ကျွန်မတို့နိုင်ငံကို ပြောင်းလဲချင်ရင် ပြောင်းလဲနိုင်တဲ့ အခွင့်အရေးတွေ အများကြီး ကျွန်မတို့ပေးထားတယ်။ ဥပမာဆိုပါတော့ ရွေးကောက်ပွဲပါ။ ရွေးကောက်ပွဲ မှာဆိုရင် ကျွန်မတို့ ဘယ်ပါတီကိုမှ အသာစီးပေးတာ မဟုတ်ဘူး။ ကျွန်မတို့ အမျိုးသား ဒီမိုကရေစီအဖွဲ့ချုပ်ဆိုရင် ဘယ်တုန်းကမှ အသာစီးပေးတာမခံခဲ့ရဘူး။ ဖိနှိပ်တာသာ အများကြီးခံရတယ်။ ဒါပေမယ့်လည်း ကျွန်မတို့ဟာ ငြိမ်းချမ်းတဲ့၊ အကြမ်းမဖက်တဲ့ လမ်းစဉ်ကနေသွားမယ်ဆိုပြီးတော့ ဆုံးဖြတ်ထားတဲ့ အတိုင်း အဲဒီအတိုင်းပဲ ကျွန်မတို့ သွားခဲ့တယ်။ အဲဒီအတိုင်းသွားတဲ့အခါ ကျွန်မတို့ပြည်သူ လူထုကို ဘယ်လို စည်းရုံးမလဲ၊ ကျွန်မတို့ရဲ့ပါတီဟာ လက်နက်အင်အားလည်း မရှိဘူး။ ဓနအင်အားလည်း မရှိဘူး။ ဒီတော့ ကျွန်မတို့ ဘယ်လိုအင်အားနဲ့ စည်းရုံးသလဲဆိုရင် ဖြောင့်မတ်တဲ့ အင်အားနဲ့ စည်းရုံးတယ်။ ပြည်သူအပေါ်မှာ စေတနာထားတဲ့ အင်အားနဲ့ စည်းရုံးတယ်။ ပြည်သူကို အလေးထားတဲ့ အင်အားနဲ့ စည်းရုံးတယ်။

ပြည်သူကို လေးစားတဲ့အခါကျတော့ စည်းရုံးတဲ့အခါမှာ ပြည်သူကို ကိုယ်နဲ့ တန်းတူညီတူ တန်ဖိုးထားပြီးတော့ ကျွန်မတို့ရဲ့ လိုအပ်ချက်တွေ၊ ကျွန်မတို့ရဲ့ ပန်းတိုင်တွေဟာ ဘာလဲဆိုတာ သေသေချာချာရှင်းပြတယ်။ အဲဒီလိုရှင်းပြပြီးတဲ့အခါမှာ သဘော ပေါက်လို့ ပြည်သူက ကျွန်မတို့ကို ထောက်ခံလို့ ကျွန်မတို့ အစိုးရတစ်ခု ဖွဲ့နိုင်တာ ဖြစ်ပါတယ်။ ဒါကြောင့်မို့ ပြည်သူတွေအနေနဲ့ ဒီမိုကရေစီစနစ်အောက်မှာဆိုရင် အင်မတန်မှ အရေးကြီးပါတယ်။ ကျွန်မတို့ရဲ့ ပြည်သူလူထု တစ်ဦးချင်း တစ်ဦးချင်းဟာ ဆင်ခြင်တုံ တရားရှိမှ ဒီနိုင်ငံဟာ တိုးတက်မှာပါ။ ဒီတော့ ဆင်ခြင်တုံတရားဆိုတာ ဘာလဲဆိုတာကို စဉ်းစားပါ။ ဆင်ခြင်တုံတရားဆိုတာဟာ ဒီလောကကြီးမှာ ငါတစ်ယောက်တည်း မရှိဘူး ဆိုတဲ့ အသိနဲ့ စရမယ်။ ဒီလောကကြီးမှာ ငါတစ်ယောက်တည်းသာ ရှိတယ်၊ ငါသာ အဓိက ပဲ၊ ငါ့အတွက်သာ အဓိကပဲဆိုရင် အဲဒီ ကတည်းကစပြီးတော့ ဆင်ခြင်တုံတရားဟာ လမ်းမှာတစ်ခါတည်း ပိတ်သွားပြီပဲ။ အဲဒီတော့ ဒီလောကကြီးမှာ ငါတစ်ယောက်တည်းရှိတာ မဟုတ်ဘူး ငါ့အပြင် အများကြီးရှိသေးတယ်။ အများကောင်းစားမှ ငါလည်းကောင်းစားချင်တယ်ဆိုတဲ့ စိတ်ရှိမှသာလျှင် ဒါဆင်ခြင်တုံတရားရမှာ ဖြစ်ပါတယ်။

ဒါကို ပိုပြီးချဲ့လိုက်ရင် ငါတစ်ယောက်တည်းရှိတာမဟုတ်ဘူး။ ငါ့အဖွဲ့တစ်ခု တည်းရှိတာမဟုတ်ဘူး။ ငါ့လူမျိုးတစ်ခုတည်း ရှိတာမဟုတ်ဘူး။ ငါ့ရဲ့လိုအပ်ချက်ဆို တာပဲ ရှိတာမဟုတ်ဘူးဆိုတာကို နားလည်ရမယ်။ ကိုယ်နဲ့မတူတဲ့သူတွေ၊ ကိုယ်နဲ့ အတွေးအခေါ် ချင်းမတူတဲ့သူတွေကိုလည်း လက်ခံနိုင်ရမယ်။ အတွေးအခေါ်ချင်းကို ဖလှယ်နိုင်တဲ့ အင်အားရှိရမယ်။ ကိုယ်ကနေပြီးတော့ တစ်ဖက်က အတွေးအခေါ်တွေက မှားနေတယ် ဆိုရင်၊ မှားနေတယ်လို့ထင်ရင်၊ မှားနေကြောင်းကို တစ်ဖက်က နားလည်အောင်လို့ ဖျောင်းဖျနိုင်တဲ့ ဉာဏ်ပညာအစွမ်းကိုယ့်မှာ မွေးယူပါ။ တစ်ခါတည်း ငါနဲ့ သဘောထားချင်းမတူရင် ရိုက်လိုက်မယ်ဆိုတဲ့စိတ်ဓာတ်ဟာ ဉာဏ်ပညာ အမြော်အမြင် မရှိတဲ့လူတွေရဲ့ စိတ်ဓာတ်ပဲ။ တကယ်ဆိုရင် သတ္တိမရှိတဲ့လူတွေရဲ့ စိတ်ဓာတ်ပဲ။ ဉာဏ်ပညာကို သုံးပြီးတော့ ကိုယ်လိုချင်တဲ့ပန်းတိုင်ကို ရောက်အောင်သွားဖို့ဆိုတာ အင်မတန်မှ ပင်ပန်းပါ တယ်။ ဒီပင်ပန်းဒဏ်ကို မခံနိုင်လို့ ဖြတ်လမ်းနဲ့ သွားချင်ရင်တော့ အင်အားသုံးကြတာပေါ့၊ အကြမ်းဖက်တဲ့ နည်းတွေ သုံးကြတာပေါ့။ အဲဒီဟာတွေကို အဓိကခံနေရတာက ကျွန်မတို့ရဲ့ ပြည်ထောင်စုထဲမှာ အခုအချိန်မှာတော့ ရခိုင်ပြည်နယ်က ပြည်သူတွေဖြစ်ပါတယ်။

အခု မာန်အောင်ကျွန်းလိုနေရာဆိုတာ ဖွံ့ဖြိုးမှုနဲ့ ပတ်သက်ရင် အလားအလာတွေ အင်မတန်မှ ကောင်းပါတယ်။ ဒီကောင်းတဲ့ အလားအလာတွေကို အပြည့်အဝ ပြည်သူတွေ ခံစားနိုင်အောင်လို့ ကျွန်မတို့ကြိုးစားသွားမှာပါ။ ကြိုးစားသွားဖို့ဆိုတာက နံပါတ်တစ် အဓိက ကတော့ ပြည်သူလူထုတွေရဲ့ ပူးပေါင်းဆောင်ရွက်မှုကို ကျွန်မတို့လိုပါတယ်။ ပြည်သူတွေ ပူးပေါင်း ဆောင်ရွက်မှ ကျွန်မတို့ရဲ့ပန်းတိုင်ကို ရောက်နိုင်တာပါ။ ဒါကြောင့် ရေရှည် စဉ်းစားပါ။ နိုင်ငံတစ်နိုင်ငံရဲ့ ဖွံ့ဖြိုးတိုးတက်မှုဆိုတာ တာဝေးအပြေးပြိုင်ပွဲတစ်ခုလိုပဲ။ ခံနိုင်ရည်ရှိရတယ်။ အချိန်ယူနိုင်ရတယ်။ ရေတိုအချိန်အတွင်းမှာ ပြီးမယ့်ကိစ္စမဟုတ်ဘူး။ ရေတိုအချိန်အတွင်းမှာပြီးမယ့် ကိစ္စလို့ သဘောထားပြီးတော့ ရှိသမျှအင်အားတွေ သုံးလိုက်ရင် ရေရှည်ခရီးက မပြီးခင်လမ်းမှာ လဲပါလိမ့်မယ်။

ဒါကြောင့် ကျွန်မတို့က ဆင်ဆင်ခြင်ခြင်နဲ့ ဘယ်အချိန်မှာ ဘာလုပ်ရမလဲ။ ဘာလုပ်သင့်တယ် ဆိုတာကို သေသေချာချာ စဉ်းစားရပါတယ်။ ဘယ်တော့မှလည်း တစ်နေရာတည်းအတွက်၊ တစ်ဖွဲ့တည်းအတွက်၊ တစ်စုတည်းအတွက် စဉ်းစားလို့လည်း မဖြစ်ပါဘူး။ ဒါကြောင့် ကျွန်မတို့ရဲ့ ရခိုင်ပြည်နယ်က ပြည်သူလူထုက ဒီဟာတွေ အားလုံးကို သေသေချာချာ လေ့လာစေချင်ပါတယ်။ ဆင်ခြင်စေချင်ပါတယ်။ သုံးသပ် စေချင်ပါတယ်။ ကိုယ့်ရပ် ကိုယ့်ရွာ ငြိမ်းချမ်းခြင်းဆိုတာဟာ ကိုယ့်နိုင်ငံ ငြိမ်းချမ်းမှ ဖြစ်မယ်ဆိုတာကိုလည်း သဘောပေါက်စေချင်ပါတယ်။

အခု ကျွန်မခရီးသွားရင် အလုပ်ကိစ္စတွေရှိလို့ သွားတာပါ။ ဒါပေမယ့် ရောက်တဲ့ နေရာမှာ ပြည်သူတွေနဲ့ တွေ့ဆုံမှုကို ကျွန်မတို့ အမြဲပဲ ကြိုးစားပါတယ်။ ဘာဖြစ်လို့လဲ ဆိုတော့ ပြည်သူတွေရဲ့ အသံကို ကြားချင်လို့၊ နောက်ပြီးတော့လည်း ပြည်သူတွေဟာ တာဝန်သိသိနဲ့ ဒီမိုကရေစီစနစ်ထဲမှာ ဘယ်လို ဆက်ဆံရမလဲဆိုတာကို နားလည်စေချင်လို့ပါ။ တစ်ချို့တွေက ဒီလိုအခွင့်အရေးတွေကို အလွဲသုံးစားလုပ်တဲ့ သူတွေလည်းရှိတယ်။ ဒီမိုကရေစီအခွင့်အရေးဆိုတာ ဘယ်အခွင့်အရေးနဲ့မှ မကွာခြားဘူး။ အလွဲသုံးစားလုပ်ရင် အန္တရာယ်ပဲ။ မှန်မှန်ကန်ကန် သုံးရင်တော့ အင်အားပဲ။ အဲဒီတော့ ကျွန်မတို့ ဒီလိုပြည်သူ တွေနဲ့ စုဝေးပြီးတော့ တွေ့တဲ့အခါမှာ ကိုယ့်ရပ်ကိုယ့်ရွာအတွက် တကယ်အကျိုးရှိမယ့် ကိစ္စတွေကို တင်ပြစေချင်တယ်။ ကိုယ်တစ်ယောက်တည်းအတွက်မဟုတ်ဘူး။ တစ်ချို့ ဆိုရင် ပုဂ္ဂိုလ်ရေးအရ တင်ပြတာတွေရှိတယ်။ ကျွန်မဖြေနိုင်သလောက်ဖြေတယ်။ ဒါပေမယ့် ကျွန်မအမြဲပဲ ထောက်ပြတယ်။ ပုဂ္ဂိုလ်ရေးအရက ပုဂ္ဂိုလ်ရေးအရပဲ။ ကိုယ့်ရပ်ကိုယ့်ရွာ အများ ကောင်းကျိုးအတွက်သာ ကိုယ်ကတင်ပြသင့်တယ်ဆိုတာ အမြဲပဲသတိပေးပါတယ်။ အခုဆိုရင် ကျွန်မတို့ အချိန်ရသရွေ့ ပြည်သူလူထုရဲ့ တင်ပြချက်တွေ၊ မေးမြန်းချက်တွေကို ဖြေဖို့စီစဉ် ထားပါကြောင်း ပြောကြားသည်။

ယင်းနောက် တွေ့ဆုံပွဲတွင် ကြိုတင်တင်ပြထားသည့် မာန်အောင်မြို့နယ် ကမ်းနားရပ်ကွက်မှ ဦးထွန်းမြင့်ဇော်က မာန်အောင်ကျွန်းပတ်လမ်းကတ္တရာခင်းရန် ကျန်ရှိနေသည့် ၁၁မိုင်အား ဆက်လက် ဆောင်ရွက်ပေးရေး၊ ပလင်ကျေးရွာ အုပ်စုမှ ဦးမောင်ဝင်းလှိုင်က ပလင်၊ ကအီး၊ ကံတိုင်းအုပ်ကျေးရွာများရှိ ပြည်သူများ သောက်သုံးရေ ရရှိရေးအတွက် လျိုပိတ်ဆည်တစ်ခု တည်ဆောက်ပေးရေး၊ ကျီးညို ကျေးရွာအုပ်စုမှ ဦးပုဖြူက ပြည်သူများက လက်ပြင်-ကျီးညို-ကန်စွန်းကျေးရွာအုပ် စုများအတွက် သောက်သုံးရေးရရှိရန် ဆည်မှတစ်ဆင့် ရေပိုက်သွယ်တန်း ပေးရေး၊ စမုံတဲကျေးရွာအုပ်စုမှ ဦးတင်ရွှေက မာန်အောင်မြို့နယ် ကျွန်းဖြတ်လမ်းအား ကျောက်ချော လမ်းဆောင်ရွက်ပေးရေးနှင့် သိမ္ဗလကျေးရွာအုပ်စုမှ ဦးခင်မောင်ကြီးက မာန်အောင် - ရမ်းဗြဲ ဇက်ရေယာဉ်ပြေးဆွဲပေးရေး မေးခွန်းတို့ကိုလည်းကောင်း၊ မဏ္ဍပ် အတွင်းမှ မဲစနစ်ဖြင့် ကိုယ်တိုင်ကိုယ်ကျ မေးမြန်းလာသည့် ညောင်ကုန်း ကျေးရွာမှ ဒေါ်သီတာဝင်းက ညောင်ပင်လှ-ညောင်ကုန်းကျေးရွာချင်းဆက်လမ်း ဖောက်လုပ်ပေးရေး၊ ကင်းတဲကျေးရွာမှ ဦးချစ်အေး က မြို့နှင့် ပတ်ဝန်းကျင် (၃) မိုင် အကွာအဝေး ရှိသည့် ဒေသများ လျှပ်စစ်မီးရရှိရေးနှင့် ဒေသဖွံ့ဖြိုးရေး ဆောင်ရွက်ပေးရေး၊ ကျီးညို ကျေးရွာမှ ဦးမြင့်ရွှေက ကျီးညို၊ လက်မဲ၊ ကန်းစွန်းကျေးရွာများအတွက် လူနာတင် ယာဉ်တစ်စီး ကူညီပေးနိုင်ရေး၊ မိမ္မကြွယ်ကျေးရွာမှ ဦးခင်မောင်ဝင်းက မိမ္မကြွယ် ကျေးရွာရှိ သောက်သုံးရေကန်ပြုပြင်ပေးရေးနှင့် သစ်ပုံကျေးရွာမှ ဦးဝင်းမြင့်သိန်းက သစ်ပုံကျေးရွာမြေ အသုံးပြုထားသည့် MPT ဆက်သွယ်ရေးတိုင်အတွက် မြေအသုံး ပြုခရရှိရေး မေးခွန်းတို့ကိုလည်းကောင်း မေးမြန်းကြရာ ဒုတိယဝန်ကြီး ဦးကျော်မျိုးနှင့် ကဏ္ဍအလိုက် သက်ဆိုင်ရာ ပြည်နယ်ဝန်ကြီးများက ချက်ချင်းဆောင်ရွက်ပေးမည့် အခြေအနေများနှင့် ရေရှည် ဆောင်ရွက်ပေးမည့် အခြေအနေများကို ရှင်းလင်း ပြောကြားကြပြီး နိုင်ငံတော်၏ အတိုင်ပင်ခံပုဂ္ဂိုလ်က လိုအပ်သည်များကို ညှိနှိုင်း ပေါင်းစပ်ဖြည့်ဆည်း ဆောင်ရွက်ပေးသည်။

ထို့နောက် နိုင်ငံတော်၏အတိုင်ပင်ခံပုဂ္ဂိုလ်က မိမိအနေဖြင့် ပြည်နယ်အစိုးရ အဖွဲ့နှင့် ဌာနဆိုင်ရာ တာဝန်ရှိသူများအား သတိပေး ပြောကြားလိုပါကြောင်း၊ အလုပ် တစ်ခုဆောင်ရွက်မည်ဆိုပါက ပြည်သူလူထုအား အသိပေးရမည်ဖြစ် ပါကြောင်း၊ ပြည်သူလူထုက ဆောင်ရွက်လိုသည့်ကိစ္စကို ဆောင်ရွက်ပါက ပြည်သူအတွက် အကျိုးဖြစ်ထွန်းစေမည့် အချက်များကိုပါ လေးလေးစားစားဖြင့် သေသေချာချာရှင်း ပြစေ လိုကြောင်း၊ မိမိတို့ပြည်သူများမှာ နားလည်မှုနှင့် တုံ့ပြန်တတ်ပါကြောင်း၊ ပြည်နယ်အစိုးရနှင့် အုပ်ချုပ်ရေးပိုင်းဆိုင်ရာများမှ ပြည်သူများအား မရှင်းပြခဲ့မှုများ အပေါ် မိမိအနေဖြင့် တောင်းပန်ပါကြောင်း၊ တွေ့ဆုံပွဲသို့ တက်ရောက်လာကြသူများကို ကျေးဇူးတင် ရှိပါကြောင်း၊ ပြည်သူလူထုဆိုသည်မှာ တာဝန်ရှိသလို လုပ်ပိုင် ခွင့်ရှိသည်ကိုလည်း သဘောပေါက် ကြစေလိုကြောင်း၊ လုပ်ပိုင်ခွင့်ကို မှန်မှန်ကန်ကန် အသုံးပြုပြီး တာဝန်ကိုလည်း ကျေပွန်စွာ ထမ်းဆောင်စေလိုပါကြောင်း၊ အစိုးရရော၊ ပြည်သူရော တာဝန်နှင့် လုပ်ပိုင်ခွင့်ကို သေသေချာချာ ကိုင်စွဲသွားပါက မိမိတို့နိုင်ငံမှာ တိုးတက်မှုနှုန်းမြန်မည့် နိုင်ငံဖြစ်ပါကြောင်း၊ ယင်းကို မှန်မှန်ကန်ကန် အသုံးပြုရန်မှာ အရေးကြီးပါကြောင်း၊ မာန်အောင်မြို့နယ်နှင့် ရခိုင်ပြည်နယ်ရှိ ပြည်သူများ ကိုယ်စိတ်နှဖြာ ကျန်းမာချမ်းသာပြီး ကောင်းကျိုးလိုအင်ဆန္ဒပြည့်၀ကြစေရန် ဆုတောင်းပေး လိုက်ပါကြောင်းဖြင့် ပြောကြားသည်။

တွေ့ဆုံပွဲအပြီးတွင် နိုင်ငံတော်၏အတိုင်ပင်ခံပုဂ္ဂိုလ်သည် တိုင်းရင်းသူများနှင့် မှတ်တမ်းတင်ဓာတ်ပုံ ရိုက်ပြီး မဏ္ဍာပ်အပြင်၌ စောင့်ဆိုင်းနေကြသည့် ဒေသခံ ပြည်သူများအား ရင်းနှီးခင်မင်စွာ လိုက်လံနှုတ်ဆက်သည်။

ယင်းနောက် နိုင်ငံတော်၏အတိုင်ပင်ခံပုဂ္ဂိုလ်နှင့်အဖွဲ့သည် မာန်အောင်မြို့မှ ရဟတ်ယာဉ်များဖြင့် ပြန်လည်ထွက်ခွာကြရာ သံတွဲမြို့သို့ ရောက်ရှိကြပြီး ထိုမှ တစ်ဆင့် အထူးလေယာဉ်ဖြင့် ဆက်လက် ထွက်ခွာခဲ့ရာ မွန်းလွဲပိုင်းတွင် နေပြည်တော်သို့ ပြန်လည်ရောက်ရှိကြသည်။

(သတင်းစဉ်)