“အနောက်ဖက်သို့ခရီးသွားခြင်း” အပါအဝင် မြန်မာပရိသတ်များအကြိုက်များသည့် တရုတ် ရုပ်မြင်သံကြား ဇာတ်လမ်း တွဲများ ပြသမည်

ရန်ကုန် စက်တင်ဘာ ၁၄

မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံသံရုံး ၊ China Radio International ၊ SkyNet နှင့် ယူနန်ပြည်နယ် တယ်ဟုန်ရုပ်မြင်သံကြားတို့ပူးပေါင်း၍ တရုတ်ဂန္ထဝင်ရုပ်ရှင် အစီအစဉ်များ၊ ထုတ်လွင့်ပြသ မည့် အခမ်းအနားကို ယနေ့နံနက် ၁၀ နာရီတွင် ရန်ကုန်မြို့ရှိ Wyndham Grand Yangon Hotel ၌ ကျင်းပ သည်။

အဆိုပါ အခမ်းအနားတွင် ရန်ကုန်တိုင်းဒေသကြီးဝန်ကြီးချုပ် ဦးဖြိုးမင်းသိ်န်း၊ မြန်မာနိုင်ငံဆိုင်ရာ တရုတ် သံအမတ်ကြီး မစ္စတာ ချန်းဟိုင် နှင့် ပြန်ကြားရေးနှင့်ပြည်သူ့ ဆက်ဆံရေးဦးစီးဌာန၊ ညွှန်ကြားရေးမှူးချုပ် ဦးရဲနိုင် တို့က တရုတ် ဂန္ထဝင်ဇာတ်ကားများ ထုတ်လွှင့်တင်ဆက်မှု ပြပွဲအထိမ်းအမှတ်အဖြစ် နှုတ်ခွန်း ဆက် စကားပြောကြားပြီး ဖဲကြိုးဖြတ်ဖွင့်လှစ်ပေးကြသည်။

အခမ်းအနားတွင် တိုင်းဒေသကြီး ဝန်ကြီးချုပ် ဦးဖြိုးမင်းသိ်န်းက “ကျွန်တော်တို့ တစ်နိုင်ငံနဲ့တစ်နိုင်ငံ ယဉ်ကျေး မှုတွေဟာ မတူကွဲပြားမှုတွေ၊ တူညီမှုတွေ အများကြီး ရှိပါတယ်။ အခု တရုတ်ပြည်သူ့ သမ္မတ နိုင်ငံက ဦးဆောင်ပြီးဆောင်ရွက်နေတဲ့ ရပ်ဝန်း နှင့် ပိုးလမ်းမ စီမံကိန်းမှာလည်း ကျွန်တော်တို့မြန်မာ နိုင်ငံ ဟာပါဝင်ဆောင်ရွက်နေတာ ဖြစ်ပါတယ်။ ရပ်ဝန်းနှင့် ပိုးလမ်းမ စီမံကိန်းနဲ့အတူ စီးပွားရေး၊ လူမှုရေး၊ ယဉ်ကျေးမှု၊ နယ်ပယ်အသီးသီးမှာ ပူးပေါင်းဆောင်ရွက်မှုတွေကိုဆောင်ရွက်နိုင်ဖို့ လိုအပ်ပါတယ်။ အခုပြသမဲ့ ရုပ်ရှင်ဇာတ်ကားတွေကို ပြည်သူတွေနဲ့ နီးစပ်မှုရှိအောင် ကျွန်တော်တို့ ကြိုးပမ်း ဆောင်ရွက်သင့်ပါတယ်။ အခုပြသမဲ့ရုပ်သံဇာတ်လမ်းတွေကို ရုပ်သံလွှင့် တွေက ပြသနေသလိုမျိုးပဲ ပြည်သူလူထုနဲ့ ပတ်သက်နေတဲ့ ဧရိယာတွေမှာလဲပြသနိုင်ဖို့ ဆောင်ရွက် သင့်တယ်လို့ ကျွန်တော့်အနေနဲ့ ယူဆပါတယ်။ ဒါမှသာ ပြည်သူ လူထုက နိုင်ငံတစ်နိုင်ငံရဲ့ ယဉ်ကျေးမှု အမွေအနှစ်တွေကိုသိရှိသွားမှာ ဖြစ်သလို ကျွန်တော်တို့ နိုင်ငံရဲ့ ယဉ်ကျေး မှု အမွေအနှစ်တွေကိုလည်း ဖော်ထုတ်ပြသနိုင်မှာ ဖြစ်ပါတယ်”ဟု ပြောကြားခဲ့သည်။

တရုတ်ရုပ်မြင်သံကြား ဇာတ်လမ်းတွဲ အစီအစဉ်များ ပြသသည့် အစီအစဉ်တွင် ၁၉၈၆ ခုနှစ်က ရိုက်ကူးခဲ့သည့် "အနောက်ဖက် သို့ခရီးသွားခြင်း" အပါအဝင် ပရိသတ် များအကြိုက်များသည့်   ၁၉၉၄ ခုနှစ် က ရိုက်ကူး ခဲ့သော "သုံးပြည်ထောင်ခေတ်" ဇာတ်လမ်းတွဲ ၊ "ဟောရိုး-စင်္ကြ ံ" စသည့်တရုတ်ဂန္တဝင် ဝတ္တုဇာတ် လမ်း (၄)ခု အပါအဝင် ဂန္ထဝင်ဇာတ်လမ်းတွဲများနှင့် မှတ်တမ်းရုပ်ရှင်(၁၀)ခုကို မြန်မာဘာသာနောက်ခံ စကား ပြော(သို့မဟုတ်) မြန်မာဘာသာစာတန်းထိုးဖြင့် SkyNet World Drama Channel ၊Knowledge Channel i Asia Movie Channel MRTV Entertainment တို့တွင် ယနေ့မှစတင်၍ ထုတ်လွင့်ပြသသွားမည်ဖြစ်ကြောင်း အဆိုပါ အခမ်းအနား ထုတ်ပြန် ချက်များမှ သိရသည်။

မြန်မာနိုင်ငံဆိုင်ရာ တရုတ်သံအမတ်ကြီး မစ္စတာ ချန်းဟိုင် က “မြန်မာဘာသာ စကားနဲ့ အသံထည့်သွင်း ထားတဲ့ ခန်းဆောင်နီအိမ်မက် ဇာတ်လမ်းတွဲကို မြန်မာ နိုင်ငံမှာ ထုတ်လွှင့်ပြသခဲ့ရာအပြုသဘောဆောင်တဲ့ တုန့်ပြန်မှုများစွာ ရရှိခဲ့ပါတယ်။ နောက်ပိုင်းမှာလည်း လက်ရွေးစင် တရုတ်ရုပ်ရှင်များနဲ့ ယခုထက် ပိုမို ကောင်းမွန်တဲ့ မှတ်တမ်းဇာတ်ကားများကိုလည်း မြန်မာနိုင်ငံမှာ ဆက်တိုက် ထုတ်လွှင့်ပြသသွားမှာ ဖြစ်ပြီး မြန်မာပရိသတ်များ ကြိုက်နှစ်သက်ကြမည်ဟုယုံကြည်ပါတယ်” ဟု ပြောကြား သည်။

ထို့နောက် ပြသသွားမည့် တရုတ်ဂန္ထဝင်ဇာတ်ကားများတွင် ပါဝင်သော နောက်ခံတေးသီချင်းများကို သီဆို ဖျော် ဖြေတင်ဆက်ခဲ့ကြပြီးတက်ရောက်လာကြသူ များအား “အနောက်ဖက်သို့ခရီးသွားခြင်း” ရုပ်ရှင် ဇာတ် လမ်း တွဲအပိုင်း(၁)ကို မြန်မာ ဘာသာ နောက်ခံစကားပြောဖြင့် ပြသခဲ့သည်။

ယနေ့ကျင်းပသည့် အခမ်းအနားသို့ ရန်ကုန် တိုင်းဒေသကြီး အစိုးရအဖွဲ့ ရခိုင် တိုင်းရင်းသား လူမျိုး ရေးရာဝန်ကြီး ဦးဇော်အေးမောင်နှင့် ဖိတ်ကြားထားသော ဧည့်သည် တော်များ တက်ရောက်ခဲ့ကြသည်။

သတင်းနှင့်ဓာတ်ပုံ…ညွန့်ကိုကို