ဒုတိယ၀န်ကြီး ဦးအောင်လှထွန်းအဖွဲ့ အာဆီယံ - တရုတ် ပြန်ကြားရေးဝန်ကြီးများအဆင့် သတင်းမီဒီယာဖိုရမ်သို့ တက်ရောက်ခဲ့

 

နေပြည်တော် ဇူလိုင် ၂၉

ပြန်ကြားရေးဝန်ကြီးဌာန ဒုတိယ၀န်ကြီးဦးအောင်လှထွန်း ဦးဆောင်သည့် မြန်မာကိုယ်စားလှယ်အဖွဲ့သည် အင်ဒိုနီးရှားနိုင်ငံ၊ ဂျာကာတာမြို့၌ ဇူလိုင် ၂၃ ရက်မှ ၂၄ ရက်အထိ “Connected For A Better Future” ဆောင်ပုဒ်ဖြင့် ကျင်းပသည့် အာဆီယံ - တရုတ် ပြန်ကြားရေးဝန်ကြီးများအဆင့် သတင်းမီဒီယာဖိုရမ်သို့ တက်ရောက်ခဲ့သည်။

ဇူလိုင်  ၂၃  ရက် နံနက်ပိုင်းတွင် ဂျာကာတာမြို့ရှိ Hotel Mulia Senayan ၌ ကျင်းပသည့် High Level Conference on ASEAN – China Media Cooperation ဖွင့်ပွဲ အခမ်းအနားကို ကျင်းပရာ အာဆီယံနိုင်ငံများမှ ပြန်ကြားရေးဝန်ကြီးများ၊ ဒုတိယ၀န်ကြီးများ၊  တရုတ်ပြည်သူ့သမ္မတနိုင်ငံ အမျိုးသားရေဒီယိုနှင့် ရုပ်မြင်သံကြား စီမံခန့်ခွဲရေးအဖွဲ့ ဒုတိယ၀န်ကြီး မစ္စတာဖန်ဝေပင်း၊ အာဆီယံဆိုင်ရာ တရုတ်သံအမတ်ကြီး မစ္စတာဟောင်ရှီလန်၊ တရုတ်နိုင်ငံ တက္ကသိုလ်များနှင့် ရုပ်မြင်သံကြား ဌာနများမှ ကိုယ်စားလှယ်အဖွဲ့များနှင့် အာဆီယံအထွေထွေအတွင်းရေးမှူးချုပ်ရုံးမှ  ASCC Deputy Secretary – General မစ္စတာကွန်ဖုတ်နှင့် တာဝန်ရှိသူများ တက်ရောက်ခဲ့ကြသည်။

ဆွေးနွေးပွဲတွင် ဒုတိယ၀န်ကြီး ဦးအောင်လှထွန်းက  အာဆီယံ-တရုတ် မီဒီယာကဏ္ဍ ပူးပေါင်းဆောင်ရွက်မှု စီမံကိန်း ဆိုင်ရာ ကိစ္စရပ်များကို ပါဝင်ဆွေးနွေးပြောကြားသည်။ 

ဇူလိုင် ၂၄ ရက် နံနက်ပိုင်းတွင် ASEAN - China High Level Media Forum ကို ကျင်းပရာ တရုတ်နိုင်ငံ အမျိုးသား ရေဒီယိုနှင့် ရုပ်မြင်သံကြားစီမံခန့်ခွဲရေးအဖွဲ့ ဒုတိယ၀န်ကြီး မစ္စတာဖန်ဝေပင်း၊ အာဆီယံအထွေထွေ အတွင်းရေးမှူးချုပ် ဒါတိုလင်မ် ဂျော့ ဟွိုင်း နှင့် အာဆီယံဆိုင်ရာ တရုတ်သံအမတ်ကြီး မစ္စတာဟောင်ရှီလန်နှင့် အာဆီယံနိုင်ငံများမှ ၀န်ကြီးများ၊ ဒုတိယ၀န်ကြီးများ၊ တာဝန်ရှိသူများ တက်ရောက်သည်။

အစည်းအဝေးတွင် မီဒီယာကဏ္ဍ ပူးပေါင်းဆောင်ရွက်မှုများနှင့် ပတ်သက်၍ စကားဝိုင်းဆွေးနွေးပွဲနှစ်ရပ် ကျင်းပရာ “The Role of Media in Building a Closer ASEAN – China Community with a Shared Future” ခေါင်းစဉ်ဖြင့် ကျင်းပသည့် စကားဝိုင်းဆွေးနွေးပွဲ၌ ဒုတိယ၀န်ကြီးဦးအောင်လှထွန်းက Panelist အဖြစ်ပါဝင်၍ ဒစ်ဂျစ်တယ်ခေတ်တွင် မီဒီယာကဏ္ဍအရေးကြီးပုံကို မြန်မာနိုင်ငံ၏ အတွေ့အကြုံများနှင့် နှိုင်းယှဉ်၍ ဆွေးနွေးပြောကြားသည်။

ညနေပိုင်းတွင်  ဒုတိယ၀န်ကြီး ဦးအောင်လှထွန်းနှင့်အဖွဲ့သည် ဂျကာတာမြို့ရှိ အာဆီယံ အထွေထွေ အတွင်းရေးမှူးချုပ်ရုံး သို့ သွားရောက်၍ အာဆီယံဆိုင်ရာ မြန်မာသံအမတ်ကြီး ဦးမင်းလွင်နှင့်အဖွဲ့အား တွေ့ဆုံပြီး   အာဆီယံအထွေထွေ အတွင်းရေးမှူးချုပ်ရုံးရှိ စာကြည့်တိုက်၊ ပြခန်းများနှင့် အာဆီယံအထွေထွေ အတွင်းရေးမှူးချုပ်ရုံးသစ်တို့ကို လှည့်လည် ကြည့်ရှုခဲ့သည်။

(သတင်းစဉ်)