ကမ္ဘာ့သတင်း လွတ်လပ်ခွင့်နေ့ အခမ်းအနားကျင်းပ

ရန်ကုန် မေ ၃

မြန်မာနိုင်ငံ သတင်းမီဒီယာကောင်စီက ဦးစီးကျင်းပသည့် ကမ္ဘာ့သတင်းလွတ်​လပ်ခွင့်နေ့ အခမ်းအနားကို ယနေ့ နံနက် ၉ နာရီ က ရန်ကုန်မြို့ မြို့တော်ခန်းမ၌ ကျင်းပသည်။

ရှေးဦးစွာ ကမ္ဘာ့သတင်း လွတ်လပ်ခွင့်နေ့ အခမ်းအနားသို့ နိုင်ငံတော်သမ္မတ ဦးဝင်းမြင့်ထံမှ ပေးပို့သော သ၀ဏ်လွှာကို ပြန်ကြားရေးဝန်ကြီးဌာန ပြည်ထောင်စုဝန်ကြီး ဒေါက်တာဖေမြင့်က ဖတ်ကြားသည်။

ယင်းနောက် ကမ္ဘာ့သတင်းလွတ်လပ်ခွင့်နေ့ အခမ်းအနားသို့ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ထံမှ ပေးပို့သော သ၀ဏ်လွှာကို မြန်မာနိုင်ငံ သတင်းမီဒီယာကောင်စီ ဥက္ကဋ္ဌ ဦးအုန်းကြိုင် (ဟံသာဝတီ - ဦးအုန်းကြိုင်) က ဖတ်ကြားသည်။

ဆက်လက်၍ ပြည်ထောင်စုလွှတ်တော် နာယက ဦးတီခွန်မြတ်ထံမှ ပေးပို့သော သ၀ဏ်လွှာကို တွံတေးမဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဦးမြင့်လွင်က လည်းကောင်း၊ တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်ထံမှ ပေးပို့သော သ၀ဏ်လွှာကို ရန်ကုန်တိုင်း စစ်ဌာနချုပ်တိုင်းမှူး ဗိုလ်ချုပ်သက်ပုံက လည်းကောင်း ဖတ်ကြားကြသည်။

ထို့နောက် ပြန်ကြားရေးဝန်ကြီးဌာန ပြည်ထောင်စုဝန်ကြီး ဒေါက်တာဖေမြင့်က အဖွင့်အမှာစကား ပြောကြားရာတွင် ကမ္ဘာ့စာနယ်ဇင်းလွတ်လပ်ခွင့်နေ့ အထိမ်းအမှတ် အခမ်းအနားကို ကျင်းပရသည့် ရည်ရွယ်ချက်မှာ သတင်းလွတ်လပ်ခွင့်၊ စာနယ်ဇင်းလွတ်လပ်ခွင့်ကို အလေးအနက်ပြုရန်၊ ကာကွယ် စောင့်ရှောက်ရန်၊ ထိန်းသိမ်းမြှင့်တင်ရန်ဖြစ်ပါကြောင်း၊ ထို့အတွက် ကမ္ဘာတစ်လွှားမှာ နှစ်စဉ်အထိမ်းအမှတ် အခမ်းအနားကို ကျင်းပပါကြောင်း၊ လှုပ်ရှားမှုများလည်း ဆောင်ရွက်သည်ကို တွေ့ရှိရပါ ကြောင်း။

စာနယ်ဇင်း လွတ်လပ်ခွင့်နှင့် ပတ်သက်ပြီး စဉ်းစားလျှင် ဆက်စပ်စဉ်းစားစရာ အကြောင်းကိစ္စများစွာ ရှိပါကြောင်း၊ ဒီလို အကြောင်းအရာ၊ အချက်အလက်များစွာရှိသည်ကို အကြောင်းပြုပြီး တစ်နှစ် တစ်ကြိမ် ကျင်းပသည့်အခါမျိုးတွင် ဤအကြောင်းအရာ၊ အချက်အလက်များထဲမှ ပိုပြီးတော့ ထူးခြားသည့် အကြောင်းအရာ၊ ဒီအချိန်ကာလတွင် ပိုပြီးရှေ့တန်းရောက်လာနေသည့် သတင်း လွတ်လပ်ခွင့်ဆိုင်ရာ ပြဿနာမျိုးကို ခေါင်းစဉ်အနေဖြင့် အဓိက အကြောင်းအရာအနေဖြင့် ရွေးချယ်ဆွေးနွေးလေ့ ရှိပါကြောင်း၊ ယခု ၂၀၁၉ခုနှစ်အတွက် ရွေးချယ်ခဲ့သည့် ခေါင်းစဉ် သို့မဟုတ် ဆောင်ပုဒ်မှာ ဒီမိုကရေစီအတွက် သတင်းမီဒီယာများ (သို့မဟုတ်) ဒီမိုကရေစီအရေးကို အထောက် အကူပေးမည့် သတင်းမီဒီယာများဆိုပြီး အဓိပ္ပာယ်ကောက်၍ရပါကြောင်း။

တကယ်လည်း ဒီမိုကရေစီနှင့် သတင်းမီဒီယာများ၊ ဒီမိုကရေစီနိုင်ငံနှင့် လွတ်လပ်သော စာနယ်ဇင်း သမားများသည် အမြဲဒွန်တွဲတည်ရှိလျက်ရှိ်ပါကြောင်း၊ အားလုံးသိကြသည့်အတိုင်း ဒီမိုကရေစီသည် လွတ်လပ်မှု၊ တန်းတူညီမှုနှင့် တရားမျှတမှုကို ဦးထိပ်ပန်ဆင်ပါကြောင်း၊ ထိုနည်းတူစွာ မီဒီယာသည်လည်း သတင်းလွတ်လပ်ခွင့်ဆိုသည်ကို အစဉ်တစိုက်ဦးတည်ပြီး လှုပ်ရှားဆောင်ရွက် နေရခြင်းဖြစ် သော်လည်းတစ်ကယ်တော့ လွတ်လပ်မှုတစ်ခုတည်းကို တန်ဖိုးထားခြင်းမဟုတ်ဘဲ တန်းတူညီမှုနှင့် တရားမျှတမှုများကို မီဒီယာသည် အလေးထားပါကြောင်း၊ ဆိုလိုသည်မှာ ဒီမိုကရေစီ သမားနှင့် မီဒီယာသမားသည် လိုလားချက်နှင့် တန်ဖိုးထားချက်တို့မှာ တူညီပါကြောင်း၊ စာနယ်ဇင်း လွပ်လပ်ခွင့်နေ့ဆောင်ပုဒ်နှင့်ပတ်သက်ပြီး Media for democracy ဆိုတာသည် ယခုနှစ်ဆောင်ပုဒ်၏ ပထမပိုင်းဖြစ်ပြီး ဒုတိယပိုင်းမှာ Journalism and Elections in Times of Disinformation ဖြစ်ပါကြောင်း၊ Disinformation ဆိုသည်မှာ မမှန်သတင်းဖြစ်ပါကြောင်း၊ ပိုပြီးတိကျအောင် ပြောရလျှင် မမှန်သတင်းပေးခြင်း၊ မမှန်သတင်း ဖြန့်ချိခြင်းဖြစ်ပါကြောင်း။

ဘာကြောင့်လဲဆိုတော့ ဒီဖြန့်ချိသည့်သတင်းက မတော်တဆမှားယွင်း၍ တိမ်းစောင်းခြင်း မဟုတ်ပါကြောင်း၊ တမင်တကာ သတင်းလက်ခံရရှိမည့်သူကို လိမ်ညာလှည့်ဖြားချင်သည့် ရည်ရွယ် ချက်ဖြင့် မဟုတ်မမှန်သည်ကို ဟုတ်မှန်သယောင် လုပ်ကြံဖန်တီးပြီး ရေးခြင်း၊ သတင်းအဖြစ် ပေးပို့ခြင်းဖြစ်ပါကြောင်း၊ ထို့ကြောင့် သတင်းလိမ်၊ သတင်းတု၊ သတင်းမှားများကို ဆန့်ကျင်ခြင်း ဖြစ်ပါကြောင်း၊ ဒီကနေ့မှာ မမှန်သည့်သတင်းများ သတင်းတု၊ သတင်းလိမ်များသည် Fake news ဆိုသည့် နာမည်ဖြင့်အများက သိနေကြပြီဖြစ်ပါကြောင်း။

Fake news က ပြီးခဲ့သည့် ၃-၄-၅ နှစ်အတွင်းစပြီးပေါ်လာပါကြောင်း၊ ကမ္ဘာမှာ Fake news ဆိုပြီး ပြောသည့်အခါ မိမိတို့က လိုက်ပြီး ပြောလာကြပါကြောင်း၊ ရုတ်တရက်ကြည့်လျှင် Fake news ဆိုတာသည် ယနေ့ခေတ်ကာလတွင် ပေါ်ပေါက်သည့် အသစ်အဆန်းဆိုပြီး ထင်မြင်စရာရှိပါကြောင်း၊ သို့သော် တကယ်တော့ ကမ္ဘာအတွက်လည်း ယင်းမှာ အသစ်အဆန်းမဟုတ်သလို မိမိတို့အဖို့လည်း အသစ် အဆန်းမဟုတ်ပါကြောင်း၊ မိမိတို့တိုင်းပြည်တွင်လည်း ဒီလိုသတင်းမျိုးကို အရင်တုန်းကတည်း ကပြောဆိုဝေဖန် ထောက်ပြတာရှိခဲ့ပါကြောင်း၊ မိမိတို့မြန်မာတွင် ယခင်တုန်းက ပြောဆိုသည့် စကားလုံးသည် ကြာတော့ရိုးသွားပြီး မသုံးကြတော့ ခြင်းဖြစ်ပါကြောင်း၊ တချိန်တုန်းက ယင်းကို လန်ကြုတ်သတင်း၊ လုပ်ကြံဖန်တီးသည့် သတင်းဟု ပြောကြပါကြောင်း၊ ယနေ့တွင် လန်ကြုတ် သတင်းသည် Fake news ဆိုပြီး ပြန်လည်ပေါ်ပေါက်လာခြင်းဖြစ်ပါကြောင်း၊ တချိန်တုန်းက ကမ္ဘာမှာရော မြန်မာမှာ ပါရှိသည့် လန်ကြုတ် သတင်းသည် Fake news အဖြစ် ပေါ်လာသည့်အခါ ယခင်နှင့် ဘာကွဲပြား ခြားနားသွားသလဲဆိုလျှင်ယခင်ကထက် အရေအတွက်များပြား လာပါကြောင်း၊ မမှန်သတင်းများသည် ယခင်ကထက် အရေအတွက်များများပြားပြား ပိုပေါ်ထွက်လာပါကြောင်း၊ မသမာသူများက မမှန်သတင်းကို စနစ်တကျထုတ်လုပ် ဖြန့်ချိလာခြင်းဖြစ်သည့်အတွက်ပိုပြီး အန္တရာယ် ကြီးမားလာခြင်းဖြစ်ပါကြောင်း။

သတင်းအမှားများ ပေါ်ပေါက်လာသည့်ကိစ္စသည် သတင်းအမှားခေတ်ဖြစ်ပြီး ဤကာလသည် မိမိတို့ မျက်စိရှေ့တွင် တဖြည်းဖြည်းတိုးပွားလာသည့် ခေတ်တစ်ခေတ် လိုဖြစ်လာနေပါကြောင်း၊ လွန်ခဲ့သည့် ၄-၅ နှစ်ကို ပြန်ပြီး စဉ်းစားကြည့်လျှင် Post Truth ဆိုသည့် စကားလုံးတစ်လုံး ပေါ်ပေါက်လာ ပါကြောင်း၊ Post Truth သည် ၂၀၁၆ ခုနှစ်၏ အထူးခြားဆုံး စကားလုံး တစ်ခုဖြစ်ခဲ့ပါကြောင်း၊ Post Truth သည် အမှန်ကိုလွန်သွားသည့်ကိစ္စဟု ဆိုပါကြောင်း၊ Post Truth က ဘာကိုဆိုလိုချင် သလဲဆိုလျှင် လူတစ်ယောက်က တစ်စုံတစ်ရာကို ပြောဆို ရေးသား သည့် အခါအကြောင်းအရာ အချက်အလက်က မှန်ချင်မှမှန်မည်၊ သို့သော် နားထောင်ရသူ၊ ဖတ်ရသူကယုံသွား၊ လက်ခံသွား ပါကြောင်း၊ မမှန်တာကိုပြောသော်လည်း လူယုံသည် ဆိုသည့်ကိစ္စသည် အင်မတန်မှ တန်ဖိုးရှိသည့် ကိစ္စတစ်ခု၊ အတုယူစရာတစ်ခုဟု ဖြစ်လာလျှင် လူ့အဖွဲ့အစည်းတွင် မုသာဝါဒများ လွှမ်းမိုးလာ လိမ့်မည် ဖြစ်ပါကြောင်း၊ တကယ်တမ်း လွှမ်းမိုးလာလျှင် မမှန်သတင်းများ ထွန်းကားသည့် ကာလဟု သုံးနှုန်း လာတာရှိပါကြောင်း။

အမှန်ကိုလွန်တယ်ဆိုပြီး Post Truth ဆိုတာ စဉ်းစားကြည့်လျှင် နာမည်လှလှလေး ပေးလိုက်ခြင်း ဖြစ်ပြီး တကယ်ကတော့ အမှန်ကိုလွန်သွားပြီးသည့် နောက်တွင် မှန်တာမရှိတော့ပါကြောင်း၊ အမှန် တရားက သေဆုံးသွားသည့် သဘောဖြစ်ပါကြောင်း၊ Post Truthနောက်တွင် ပေါ်လာသည့် စကားလုံး၊ တွင်ကျယ်လာတာက Fake News ဟူ၍ ဖြစ်ပါကြောင်း၊ Fake News က လွန်ခဲ့သည့် ၃ -၄ နှစ်အတွင်း ပိုပြီးတွင်ကျယ်လာပါကြောင်း၊ သူ့ရိုက်ခတ်မှုများကို ခံနေရပါကြောင်း။

ဒီမမှန်သတင်းများ ပရမ်းပတာ ထွက်ပေါ်လာသည့် ကာလအတွင်းကျင်းပရမည့် ရွေးကောက်ပွဲသည် အဲဒီရွေးကောက်ပွဲနှင့် ပတ်သက်ပြီး သတင်းယူကြ၊ သတင်းဖြန့် ချိကြမည့် သတင်းသမားများ၊ သူတို့အတွက် ဘယ်လိုအခက်အခဲများ၊ စိန်ခေါ်မှုများ ရှိမလဲဆိုသည်ကို ခေါင်းစဉ်တင်ပေးထား ခြင်းဖြစ်ပါကြောင်း။

သတင်းအမှားများ ထွန်းကားနေသည့် ကာလကို ဘယ်လိုဖြတ်သန်းကြမလဲ၊ ရွေးကောက်ပွဲဆိုသည်မှာ ဒီမိုကရေစီနှင့် ပတ်သက်လျှင် ဒီမိုကရေစီ၏အသက်ဟု ပြော၍ရပါကြောင်း၊ ဒီမိုကရေစီစနစ် ပေါ်ထွန်းရန်၊ ဖြစ်ပေါ်ရန်၊ တည်တံ့ရန် လိုအပ်ချက်များတွင် ရွေးကောက်ပွဲသည် အင်မတန်မှ အရေးကြီးသည့်၊ အဓိကကျသည့် အချင်းအရာတစ်ခုဖြစ်ပါကြောင်း၊ လွတ်လပ်ပြီး တရားမျှတသည့် ရွေးကောက်ပွဲများ ပုံမှန်ကျင်းပနိုင်မှုသည် ဒီမိုကရေစီခေတ်တွင် အင်မတန်မှ အရေးကြီးပါကြောင်း၊ ဒီရွေးကောက်ပွဲမှ ပြည်သူလူထုက သူတို့၏ကိုယ်စားလှယ်များ ရွေးချယ်မည်၊ သူတို့၏ ကိုယ်စားလှယ်များက သူတို့ကိုယ်စား တိုင်းပြည်အတွက် တာဝန်များထမ်းဆောင်မည်၊ အချိန်ကာလ အလျှောက် ပြည်သူလူထုက ရွေးချယ်သည့် ပုဂ္ဂိုလ်များကို ပြန်လည်စိစစ်သုံးသပ်မည်၊ ပြန်လည် အသစ်ရွေးချယ်သည့် အလုပ်ကိုလုပ်မည်၊ အဲဒီလုပ်ငန်းစဉ် ပုံမှန်လည်ပတ်နေမှသာလျှင် ဒီမိုကရေစီ စနစ် အဓွန့်ရှည် တည်တံ့နေမှာ၊ ခိုင်မာနေမှာ ဖြစ်ပါကြောင်း။

ဒီလိုအဓွန့်ရှည် တည်တံ့ခိုင်မာနေရန်အတွက် ပြည်သူလူထုသည် ပြည်သူ့ကိုယ်စားလှယ်များ ရွေးကောက် တင်မြောက်သည့်အလုပ်ကို မှန်မှန်ကန်ကန်၊ ပြည့်ပြည့်၀၀၊ ပီပီပြင်ပြင် လုပ်ကိုင် ဆောင်ရွက်နိုင်ရန် လိုပါကြောင်း၊ ဒီ့အတွက် အများပြည်သူကို သတင်းအချက်အလက်များ ပေးချင်ပါ ကြောင်း၊ အများပြည်သူကို ရွေးကောက်ပွဲနှင့် ပတ်သက်သည့် သတင်းများ၊ နိုင်ငံရေးပါတီများ၊ ရွေးကောက်ပွဲတွင် ပါဝင်ယှဉ်ပြိုင်မည့်ကိုယ်စားလှယ်လောင်းများ၏ အချက်အလက်များ၊ သူတို့၏ နိုင်ငံရေးအယူအဆများ ၊ ရပ်တည်ချက်များ၊ မူဝါဒလမ်းစဉ်များ၊ ၎င်းတို့ အနေဖြင့် မူဝါဒလမ်းစဉ်များကို ပိုမိုအကောင်အထည်ဖော်နိုင်မည်လား၊ မဖော်နိုင်ဘူးလားဆိုသည့် အချက်များ၊ ၎င်းတို့ဆောင်ရွက် ခဲ့သည့် လုပ်ငန်းရာဇ၀င်၊ ၎င်းတို့၏ အရည်အချင်းများကို အများသိအောင်သတင်းမီဒီယာများက တင်ပြပေးနိုင်ရန်လိုပါကြောင်း။

အများပြည်သူက သတင်းမီဒီယာသမားများ၊ သတင်းမီဒီယာပေါင်းစုံက တင်ပြသည့် အချက်အလက် များကိုရမည်၊ အဲဒီမှာ သတင်းမီဒီယာသမားများက သူတို့ကိုယ်တိုင် ယုံကြည်သည့်ရပ်တည်ချက်အရ သူတို့ ထောက်ခံသည့်၊ ကန့်ကွက်သည့် မူဝါဒများ၊ ပါတီများ အဖွဲ့အစည်းများကို ဖော်ပြမည်ဖြစ်ပါ ကြောင်း၊ သို့သော်ဘယ်လိုပဲ မတူသည့် အယူအဆများကို ဖော်ပြသည်ဖြစ်စေ၊ သူတို့သည် အများပြည်သူကို မှန်ကန်သည့် သတင်းအချက်အလက်များ၊ ယုံကြည်ချက်များအတိုင်း လက်ခံသွား စေရန် ရည်ရွယ်ချက်ရှိမည်၊ အဲဒီသဘောရိုးအတိုင်း ဆောင်ရွက်နေသမျှ ကာလပတ်လုံး ဒါတွေသည် အင်မတန်မှကောင်းပါကြောင်း။

အများပြည်သူသည် သတင်းအချက်အလက် ပေါင်းစုံကိုသိရမည်၊ နိုင်ငံအရေးအရာများနှင့် ပတ်သက်ပြီး အတွေးအမြင် အယူအဆမျိုးစုံကို သတင်းမီဒီယာများမှ သိရှိခွင့်ရမည်၊ ယင်းအထဲမှ ကိုယ်နှစ်သက်မှုကို ရွေးချယ်နိုင်မည်ဆိုပါက ယင်းသည်အင်မတန်မှ တရားမျှတမှုဖြစ်ပါကြောင်း၊ ယင်းသည် ဒီမိုကရေစီစနစ်အတွက် အင်မတန်မှ လိုလားအပ်သည့် အနေအထားဖြစ်ပါကြောင်း၊ ဒီမိုကရေစီစနစ် တည်တံ့နေရေးအတွက် သတင်းမီဒီယာသမားများက အများပြည်သူကို မှန်ကန်သော သတင်းအချက် အလက်များပေးနိုင်ရန် လိုပါကြောင်း။

ဒီနေ့မှာ ကမ္ဘာ့နိုင်ငံများသာမက မိမိတို့နိုင်ငံတွင်လည်း မမှန်ကန်သော သတင်းဖြန့်ချိနေမှုများ အင်မတန်မှ ပြန့်ပွားလာနေပါကြောင်း၊ ထို့ကြောင့် နိုင်ငံတကာ တိုင်းပြည်များတွင် ရွေးကောက်ပွဲများ ကျင်းပသည့်အခါ အများပြည်သူသည် Disinformation များကြောင့် အယူအဆလွဲမှားပြီး သူတို့ရွေးကောက်ပွဲမှာ မဲပေးရွေးချယ်သည့်အခါ နားယောင်လှည့်ဖြားခံရပြီး လွဲချော်မှုများရှိခဲ့ပါ ကြောင်း၊ တစ်နည်းအားဖြင့် ရွေးကောက်ပွဲတွင် သူတို့၏ဆန္ဒမဲများကို လိမ်ညာလှည့်ဖြားပြီး ယူသွားမှုများ ခံရတာရှိပါကြောင်း၊ ထို့အပြင် ရွေးကောက်ပွဲကာလအတွင်း မတည်မငြိမ်ဖြစ်အောင် သွေးထိုးလှုံ့ဆော်သည့် သတင်းအမှားများဖြန့်ချိပြီး မငြိမ်မသက်ဖြစ်အောင် ဆောင်ရွက်မှုများလည်း ရှိပါကြောင်း။

မိမိတို့နိုင်ငံ၌ ၂၀၂၀ ခုနှစ်တွင် အထွေထွေရွေးကောက်ပွဲ ကျင်းပရန်စီစဉ်နေသည်ကို အားလုံးအသိပင် ဖြစ်ပါကြောင်း၊ ယင်းကာလတွင် အလားတူ နိုင်ငံတကာမှာကြုံရသည့် ရွေးကောက်ပွဲကာလအတွင်း သတင်းအမှားများဖြင့် နှောက်ယှက်ဖျက်ဆီး မည့်အန္တရာယ်ကို ကြုံရနိုင်သည်ဆိုသည်ကိုအားလုံး သိနိုင်ပါ ကြောင်း၊ သတင်းအမှားများသည် မည်သူကို နှောင့်ယှက် ဖျက်ဆီးမလဲဆိုလျှင် ရွေးကောက်ပွဲဝင်လာမည့် နိုင်ငံရေးပါတီများ၊ ရွေးကောက်ပွဲဝင်လာမည့် ကိုယ်စားလှယ် လောင်းများကို နှောက်ယှက်ဖျက်ဆီးလိမ့်မည်၊ ၎င်းတို့ကို မမှန်ကန်သော သတင်းများဖြင့် တိုက်ခိုက်လိမ့်မည်၊ အများပြည်သူအထင်အမြင်ပျက်ပြားအောင် ဆောင်ရွက်လိမ့်မည်၊ ထိုနည်းလမ်း များဖြင့် ဆောင်ရွက်သည့်အတွက်ကြောင့် ရွေးကောက်ပွဲသည် ပုံသဏ္ဍန်မမှန်ဘဲ တိမ်းစောင်း ချွတ်ချော်မှုများဖြစ်လာပြီးအများပြည်သူ မျှော်မှန်း ထားသည့် ရလဒ်၊ အများပြည်သူ မျှော်မှန်းထား သည့်၊ ထင်မြင်ထားသည့်အနေအထား တလွဲတချော်ဖြစ်လာပါကရွေးကောက်ပွဲစနစ်ကို အများပြည်သူ က ယုံကြည်မှု လျော့နည်းလာနိုင်ပါကြောင်း၊ သတင်းအမှားများဖြင့် ပုံဖျက်တိုက်ခိုက်မှုကြောင့် နိုင်ငံရေးပါတီများ၊ နိုင်ငံရေးသမားများ အပါအ၀င် နိုင်ငံရေးစနစ်၊ ရွေးကောက်ပွဲ စနစ်အပါအ၀င် ကျင့်သုံးနေသည့် နိုင်ငံရေးစနစ်များပါ ထိခိုက်လျော့နည်းလာမည်ဆိုလျှင် ထိုအရာများအပေါ်တွင် အခြေခံပြီး တည်ဆောက်ထားသည့် ဒီမိုကရေစီစနစ်သည်လည်း ယိုင်နဲ့လာနိုင်ပါကြောင်း၊ တည်တံ့ရန်အတွက်လည်း အန္တရာယ်ဖြစ်လာနိုင်ပါကြောင်း။

တစ်ချိန်တည်းမှာ သတင်းအမှားများသည် ဒီမိုကရေစီစနစ်ကို၊ နိုင်ငံ၏တည်ငြိမ်မှုကို ထိပါးစေရုံ သာမက သတင်းမီဒီယာသမားကိုယ်တိုင်ကိုလည်း ထိပါးနိုင်ပါကြောင်း၊ သတင်းလောကထဲမှာ မမှန်ကန်သော သတင်းများ ပျံ့နှံ့နေမည်ဆိုလျှင် အများပြည်သူ ကြားလိုက်ရသည့် သတင်းမှန် သမျှမှာ အများစုက မဟုတ်မမှန် လုပ်ကြံသည့် သတင်းများဖြစ်သည်ဆိုလျှင် သတင်းမီဒီယာကို အများပြည်သူဘက်က အားကိုးယုံကြည်မှု လျော့နည်းလာနိုင်ပါကြောင်း၊ Times of Disinformation ခေတ်မှာ ရွေးကောက်ပွဲများ၏ ဒီမိုကရေစီစနစ်သည် ထိခိုက်လာနိုင်သကဲ့သို့ Journalism နှင့် Journalist များသည်လည်း ထိခိုက်လာနိုင်သည်ကို ပြောချင်ပါကြောင်း။

ယင်းအတွက် ဘယ်လိုကာကွယ်တားဆီးကြမလဲဆိုသည့် အချက်နှင့်ပတ်သက်ပြီး မီဒီယာသမားများ လောကတွင် သုံးသပ်ဆွေးနွေးမှုများရှိသည့်အတွက် ဘယ်လိုတားဆီး ကာကွယ်မလဲဆိုသည့် နည်းလမ်းများ ရှိပါကြောင်း၊ တချို့လည်းစတင် ဆောင်ရွက်နေသည်ကိုမြင်ရပါကြောင်း၊ ဆောင်ရွက် နိုင်သည့်နည်းလမ်းများမှာ စောစောကပြောသည့် Post Truth အမှန်ကို လွန်သွားပြီဆိုပြီး အမှန်ကိုမျက်ကွယ်ပြု သည့် အနေအထားမှတစ်ဆင့် သတင်းသမားများက သတင်းအမှားများကို ထုတ်ဝေဖြန့်ချိသည့် အနေအထားကိုရောက်သွားပါကြောင်း၊ ယင်းကို ကာကွယ်ရန် သတင်းသမား များသည် သတင်းအမှန်ဖြင့် ပြန်လည်ချေဖျက်ပြီး တားဆီးကာကွယ် ရမည်ဖြစ်ပါကြောင်း၊ သတင်းအမှန်များ၊ မိမိတို့ ရေးသားဖြန့်ဝေသည့်သတင်းများ အချက်အလက်မှန်ကန်ရန် ဂရုစိုက် ဆောင်ရွက်သင့်ပါကြောင်း၊ ဒါသည် အမှန်စင်စစ် တွင် သတင်းမီဒီယာသမား၏ မူလဘူတ အလုပ်ထဲမှာပါသော အဓိကအချက်ပင် ဖြစ်ပါကြောင်း၊ ပထမဆုံးကိုင်စွဲရသည့် အဓိကအချက် ဖြစ်ပါကြောင်း၊ သတင်းသမားသည် အချက်အလက်အမှန်ကို ပေးမည်ဆိုသည်မှာ သတင်းသမား၏ ပထမဆုံးကိုင်စွဲ ရသည့်ကျင့်ဝတ်ဖြစ်ပါကြောင်း၊ ဒီကျင့်ဝတ်ကို မြဲမြဲမြံမြံ ထိန်းသိမ်းခြင်းအားဖြင့် မိမိဖြန့်ချိမည့် သတင်းအမှန်များကို အများပြည်သူကသိရှိပြီး မည်သည့်သတင်းမီဒီယာများကို အားကိုးယုံကြည်ရသည်ဟု ဖြစ်လာအောင် ပြန်လည်တည်ဆောက်သည့် အလုပ်ကို လုပ်သင့်သည်ဟု မြင်ပါကြောင်း။

ယင်းမှာ လုပ်ကြံဖန်တီးသည့် သတင်းအမှားများအား မည်သို့မှားသည်ကို ဖော်ထုတ်ပြီး အများ သိအောင် ကြေညာပေးသည့်အလုပ်ဖြစ်ပါကြောင်း၊ သတင်းအမှားများ ပေါ်လာချိန်တွင် သတင်း အချက်အလက် မှန်ကန်မှုရှိအောင် စိစစ်သည့်အလုပ်ကို လုပ်သည့်စာနယ်ဇင်းအဖွဲ့အစည်းများ ပေါ်ပေါက်လာပါကြောင်း၊ သည်ကနေ့မှာ မြန်မာနိုင်ငံသတင်းမီဒီယာကောင်စီက ယင်းအစီအစဉ်ကို စတင်ဆောင်ရွက်နေပြီဟု သိရှိရပါကြောင်း၊ မြန်မာနိုင်ငံတွင် သတင်းအမှားများကို ဖော်ထုတ်ပြီး သတင်းအမှန်ဖြင့် ပြန်လည်ချေဖျက်မှုကိုလုပ်ဆောင်မည့်အစုအဖွဲ့များ ရှိနေသည်ကိုလည်း ကြားသိရ ပါကြောင်း၊ ယင်းအသင်းအဖွဲ့များသည် သတင်းအမှား တိုက်ဖျက်ရေးနှင့် သတင်းအမှန်များကို အများပြည်သူထံ ပြန့်ပွားအောင် ဆောင်ရွက်နိုင်မည်ဟု မြင်ပါ ကြောင်း။

နောက်တစ်ခုမှာ ယနေ့ကာလတွင် တချို့အဖွဲ့အစည်းများက စတင်ဆောင်ရွက် နေပြီဖြစ်သည့် Media and Information Literacy အများပြည်သူက သတင်းအမှား၊ သတင်းအတုအယောင်၊သတင်းလိမ်ကို တွေ့လျှင် ဒါသည် သတင်းအမှား၊ သတင်းအလိမ်အညာများဖြစ်သည်ကို သိသာအောင် စိစစ်သုံးသပ် အကဲဖြတ် နိုင်သည့် အသိပညာ၊ အတွေ့အကြုံရရှိစေမည့် အသိပညာပေးသော အစီအစဉ်ဖြစ်ပါ ကြောင်း၊ Media Literacy ၊ Information Literacy ရအောင် ဆောင်ရွက်သည့် ကိစ္စဖြစ်ပါကြောင်း၊ ယင်းကိစ္စများကို သတင်းမီဒီယာသမားများက အဓိကဦးဆောင်ပြီး ဆောင်ရွက်မည်ဆိုပါက မမှန်ကန်သော သတင်းများဖြန့်ချိသည့်ကာလကို မှန်မှန်ကန်ကန် အန္တရာယ်ကင်းစွာ ဖြတ်ကျော်နိုင် မည်ဟု မြင်ပါကြောင်း၊ ဒါ့အပြင် ပူးပေါင်းဆောင်ရွက်နိုင်မှုမှာရွေးကောက်ပွဲများဖြစ်ပါကြောင်း။

ရွေးကောက်ပွဲများနှင့် ပတ်သက်ပြီး သတင်းအချက်အလက်အမှန်များကို အများပြည်သူထံ ပြန့်ပွားအောင်ဆိုလျှင် ရွေးကောက်ပွဲ ကိစ္စများတွင် တာဝန်ယူဆောင်ရွက်နေသည့် အဖွဲ့အစည်းများ၊ ရွေးကောက်ပွဲတွင် ပါဝင်ဆင်နွှဲကြမည့်ပါတီများ၊ အဖွဲ့အစည်းများ၊ ရွေးကောက်ပွဲကို စောင့်ကြည့်ကြ မည့် လူမှုအဖွဲ့အစည်းများ၊ ရွေးကောက်ပွဲများအတွက် သမာသမတ်ကျအောင် လိုက်လံကြပ်မတ် ဆောင်ရွက်ကြမည့် ပြည်တွင်း၊ ပြည်ပအဖွဲ့အစည်းများကလည်း သတင်းအချက်အလက်အမှန်များ အများပြည်သူကြားမှာ ပြန့်ပွားနိုင်အောင် ဆောင်ရွက်နိုင်မည်ဟု မြင်ပါကြောင်း၊ ယင်းအဖွဲ့အစည်း များနှင့် သတင်းမီဒီယာများက ပူးတွဲပြီး စနစ်တကျ ဆောင်ရွက်နိုင်ကြမည်ဆိုလျှင် အရေးကြီးသည့် ၂၀၁၉ -၂၀၂၀ ခုနှစ်ကာလကို အောင်မြင်စွာ၊ မှန်ကန်စွာ၊ တရားမျှတစွာဖြတ်သန်းနိုင်မည်ဟု ယုံကြည်ပါကြောင်း ပြောကြားသည်။

ယင်းနောက် ပြန်ကြားရေးဝန်ကြီးဌာန ဒုတိယ၀န်ကြီး ဦးအောင်လှထွန်းက အမှာစကား ပြောကြားရာတွင် မိမိတို့နိုင်ငံ၏ တစ်ကျော့ပြန် ဒီမိုကရေစီသည် ၂၀၁၀ ပြည့်နှစ် ရွေးကောက်ပွဲ အလွန် ၂၀၁၁ ခုနှစ် ဧပြီ ၁ ရက်တွင် စတင်ခဲ့ပါကြောင်း၊ ဒီမိုကရေစီနှင့် ကင်းကွာခဲ့သည် မှာ ရာစုနှစ်တစ်ဝက်ကျော် ရှိပါကြောင်း၊ ထိုကာလအတွင်း ဒီမိုကရေစီမှ ပေါက်ဖွားလာသည့် မီဒီယာလွတ်လပ်ခွင့်သည် ၅ နှစ်ခန့်ရှိပြီ ဖြစ်ပါကြောင်း၊ မိမ်ိလေ့လာမိသလောက် ဘယ်နိုင်ငံမှာ မှ မဏ္ဍိုင်သုံးခုနှင့် မီဒီယာကြားတွင် ထိခိုက်ပွတ်ရှမှု မကင်းပါကြောင်း၊ မဏ္ဍိုင်သုံးခုနှင့် မီဒီယာကြား ပွတ်တိုက်မှုသည် နိုင်ငံတိုင်းတွင် ရှိပါကြောင်း၊ မိမိတို့နိုင်ငံသည် ၇ နှစ် ကျော် ၈ နှစ်ကြားအရွယ် ဒီမိုကရေစီနှင့် ၅ နှစ်သားအရွယ် မီဒီယာ လွတ်လပ်ခွင့်တို့အကြား ပွတ်တိုက်မှုရှိသည်မှာ လုံးဝမဆန်း ပါကြောင်း၊ မိမိတို့တွင် အခြားစိန်ခေါ်မှုများ အများအပြားရှိပါကြောင်း၊ နှစ်ကာလများစွာ စောင့်ဆိုင်းနေသည့် အင်မတန်ရှုပ်ထွေးသော စိန်ခေါ်မှုများ အများကြီးရှိပါကြောင်း။

တစ်ကျော့ပြန်ဒီမိုကရေစီ ပြန်လည်ပေါက်ဖွားလာရန်အတွက် သတင်းသမား တစ်ယောက်အနေဖြင့် တတ်နိုင်သည့် အခန်းကဏ္ဍမှ ပါဝင်ခွင့်ရသည့်အတွက် ဂုဏ်ယူပါကြောင်း၊ မီဒီယာနှင့် မဏ္ဍိုင်သုံးခုကြား ပွတ်တိုက်မှုကို အသိအမှတ်ပြုပါ ကြောင်း၊ ဧပြီ ၃၀ ရက်က တတိယအကြိမ် မဏ္ဍိုင် လေးရပ် အလုပ်ရုံဆွေးနွေးပွဲကို ကျင်းပခဲ့ပါကြောင်း၊ မဏ္ဍိုင် လေးခုအကြားတွင် အပြန်အလှန် နားလည်မှုရှိရန် လိုအပ်ပြီး နားလည်မှုရှိမှ ယုံကြည်မှုရှိမည်ဖြစ်ပါကြောင်း။

မိမိတို့၏ မိတ်ဖက်များဖြစ်သည့် ယူနက်စကို၊ IMF တို့နှင့် ပူးပေါင်းပြီး Myanmar Media Development Conference ဆိုပြီး ကျင်းပခဲ့ပါကြောင်း၊ ပြီးခဲ့သည့်နှစ်က ထူးခြားချက်အနေဖြင့် နေပြည်တော်တွင် ပထမဆုံးအကြိမ် ကျင်းပခြင်းဖြစ်ပါကြောင်း၊ ယင်းကိုဆက်လက်ပြီး အကောင် အထည်ဖော်ရန်လိုအပ်ပါကြောင်း၊ မိမိတို့ မီဒီယာသမားများ ပူးပေါင်းပါဝင်ပြီး ရှေ့ဆုံးက ဆောင်ရွက်ခဲ့သဖြင့် ဒီမိုကရေစီသည် ပြန်လည်ပေါ်ပေါက် လာခဲ့ပါကြောင်း၊ သို့သော် မိမိတို့၏ ဒီမိုကရေစီ အသွင်ကူးပြောင်းရေးသည် မျှော်လင့်ထားခဲ့သော စိန်ခေါ်မှုများထက် အဆပေါင်းများစွာ ကြီးမားပါကြောင်း၊ မိမိလက်လှမ်းမီသလောက် လူကြီးသူမများကို မေးမြန်းလေ့လာခဲ့ရာတွင် တစ်ခါမျှ မိမိတို့ နိုင်ငံသည် နိုင်ငံတကာက အာရုံစူးစိုက်မှုကို ဒီလောက်အထိ မရခဲ့ဖူးပါကြောင်း၊ မီဒီယာသမား ညီအစ်ကိုများကို မေတ္တာရပ်ခံချင်သည်မှာ မိမိတို့အပါအ၀င် အားလုံးက ကြိုးပမ်း အားထုတ်ဆောင်ရွက်ခဲ့၍ ဒီမိုကရေစီသည် မွေးဖွားလာခဲ့ပါကြောင်း၊ မညင်သာသည့်လမ်းကို လျှောက်နေပါကြောင်း၊ ဒီ့ထက်မနိမ့်ကျအောင် လုပ်ဆောင်ရမည်ဖြစ်ပါကြောင်း၊ သွေဖည်အောင် မလုပ်ရန်နှင့် မိမိတို့ ဒီမိုကရေစီသည် လမ်းကြောင်းမှန်ပေါ်တွင် ရှိနေစေလိုပါကြောင်း၊ ယင်းကို ၀ိုင်းဝန်းပူးပေါင်း ဆောင်ရွက်သွားကြပါဟု မေတ္တာရပ်ခံပါကြောင်း ပြောကြားသည်။

ထို့နောက် မြန်မာနိုင်ငံသတင်းမီဒီယာကောင်စီဥက္ကဋ္ဌ ဦးအုန်းကြိုင် (ဟံသာဝတီ - ဦးအုန်းကြိုင် )၊ မြန်မာနိုင်ငံ အမျိုးသား လူ့အခွင့်အရေး ကော်မရှင်ဥက္ကဋ္ဌ ဦးဝင်းမြတို့က အမှာစကား ပြောကြား ကြသည်။ ယင်းနောက် မြန်မာနိုင်ငံ အဂတိလိုက်စားမှု တိုက်ဖျက်ရေးကော်မရှင် ဥက္ကဋ္ဌ ဦးအောင်ကြည်ထံမှ ပေးပို့သော သ၀ဏ်လွှာကို အဖွဲ့ဝင် ဦးဟန်ညွန့် (ဦးဟန်ညွန့်-ဥပဒေ)က ဖတ်ကြား သည်။

ဆက်လက်၍ ကုလသမဂ္ဂအတွင်းရေးမှူးချုပ် မစ္စတာအန်တိုနီယိုဂူတာရက် (Mr Antonio Guterres) ထံမှ ပေးပို့သည့် ကမ္ဘာ့သတင်းလွတ်လပ်ခွင့်နေ့ ဗီဒီယိုဖိုင်အား ပြသပြီး ကုလသမဂ္ဂ ပညာရေး၊ သိပံ္ပနှင့် ယဉ်ကျေးမှုအဖွဲ့(UNESCO) ညွှန်ကြားရေးမှူးချုပ်၏ သ၀ဏ်လွှာကိုယူနက်စကို မြန်မာရုံး ဌာနေကိုယ်စားလှယ် မစ္စမင်ဂျောင်ကင် (Ms.Min Jeong Kim)က ဖတ်ကြားသည်။

ထို့နောက် ပြည်ထောင်စုဝန်ကြီး၊ ဒုတိယ၀န်ကြီးတို့သည် တက်ရောက်လာ ကြသူများနှင့်အတူ စုပေါင်းမှတ်တမ်းတင် ဓါတ်ပုံရိုက်သည်။

မွန်းလွဲပိုင်းတွင် မြန်မာနိုင်ငံ သတင်းစာဆရာအသင်း၊ မြန်မာနိုင်ငံ စာရေးဆရာအသင်း၊ မြန်မာ ဂျာနယ်လစ်ကွန်ရက်၊ မြန်မာနိုင်ငံ စာနယ်ဇင်းသမဂ္ဂ၊ မြန်မာနိုင်ငံ စာရေးဆရာများသမဂ္ဂ၊ နိုင်ငံတကာ မြန်မာသတင်းအဖွဲ့၊ မြန်မာနိုင်ငံ ကာတွန်းဆရာအသင်း၊ မြန်မာနိုင်ငံပုံနှိပ်နှင့် ထုတ်ဝေသူ လုပ်ငန်းရှင်များအသင်း၊ မြန်မာအမျိုးသမီး သတင်းသမားများ အဖွဲ့၊ မြန်မာသတင်းသမားများ ကာကွယ်ရေးကော်မတီ၊ မြန်မာသတင်းပညာသိပ္ပံ၊ မြန်မာနိုင်ငံ စာပေထုတ်ဝေသူနှင့် ဖြန့်ချိသူများ အသင်း၊ မြန်မာ မီဒီယာဖွံ့ဖြိုးရေးစင်တာတို့မှ ကမ္ဘာ့သတင်း လွတ်လပ်ခွင့် နေ့အတွက် ပေးပို့လာသော သ၀ဏ်လွှာများကို သက်ဆိုင်ရာ ကိုယ်စားလှယ်များက ဖတ်ကြားကြသည်။

ယနေ့ပြုလုပ်သည့် အခမ်းအနားတွင် ကမ္ဘာ့သတင်း လွတ်လပ်ခွင့်နေ့နှင့် ပတ်သက်ပြီး မြန်မာနိုင်ငံ သတင်းမီဒီယာ ကောင်စီက ကြေညာချက်တစ်စောင်ကို ထုတ်ပြန်ခဲ့သည်။

ကုလသမဂ္ဂ ပညာရေး၊ သိပ္ပံနှင့်ယဉ်ကျေးမှုအဖွဲ့သည် ကမ္ဘာ့သတင်း လွတ်လပ်ခွင့်နေ့ကို ကမ္ဘာတစ်ဝန်းလုံးရှိ နိုင်ငံပေါင်း ၁၀၀ နီးပါး၌ ကျင်းပလျက်ရှိပြီး အခမ်းအနားများတွင် ရွေးကောက်ပွဲများ၌ မီဒီယာသမားများ ကြုံတွေ့ရသည့် စိန်ခေါ်မှုများအပြင် ငြိမ်းချမ်းရေးနှင့် ပေါင်းစည်းရေးအတွက် သတင်းမီဒီယာများက ပူးပေါင်းပါဝင် ကူညီထောက်ပံ့မှုပြုနိုင်သည့် အလားအလာများကို အဓိကခေါင်းစဉ် အနေဖြင့် သတ်မှတ်ကျင်းပကြောင်း သိရသည်။

ကမ္ဘာ့သတင်း လွတ်လပ်ခွင့်နေ့ နိုင်ငံတကာညီလာခံကို အီသီယိုးပီးယားနိုင်ငံ အဒစ်အဘာဘာမြို့တွင် ကျင်းပကြောင်း သိရသည်။

ယခုနှစ် ကမ္ဘာ့သတင်းလွတ်လပ်ခွင့်နေ့ ၂၀၁၉ အခမ်းအနားဆောင်ပုဒ်မှာ လုပ်ကြံသတင်းခေတ် အတွင်းမှ သတင်းအတတ် ပညာနှင့် ရွေးကောက်ပွဲများ ခေါင်းစဉ်ဖြစ်ကြောင်း သိရသည်။

(သတင်းစဉ်)