မြန်မာ့ကျေးရွာသစ် ခေါင်းဆောင်များ ညီလာခံ (Myanmar Saemaul Leadership Forum) ကျင်းပ

နေပြည်တော် ဧပြီ ၉

“အောင်မြင်သော ကျေးရွာတိုင်းတွင် ထူးချွန်ထက်မြက်သော ခေါင်းဆောင်ကောင်း များရှိကြသည်” ဆိုသည့်အတိုင်း မိမိကျေးရွာ ဖွံ့ဖြိုးတိုးတက်ရေးအတွက် အနစ်နာခံ အပင်ပန်းခံပြီး ရှေ့ဆောင်လမ်းပြ ဆောင်ရွက်ပေးရမည့် ခေါင်းဆောင်ကောင်းများ ဖြစ်အောင် ကြိုးစားအားထုတ်ခြင်းဖြင့် စံနမူနာကောင်းများပြကာ ကျေးရွာသူ/သားများနှင့် အတူတကွပူးပေါင်း ဆောင်ရွက်မှသာလျှင် ဖွံ့ဖြိုးရေးလုပ်ငန်းများအောင်မြင်မှု ရရှိမှာဖြစ်ကြောင်း ပြည်ထောင်စုဝန်ကြီး ဒေါက်တာအောင်သူက ပြောကြားသည်။

နေပြည်တော် ပြည်ထောင်စုနယ်မြေ၊ ဇေယျာသီရိမြို့နယ်၊ ရေဆင်းရှိစိုက်ပျိုး ပညာပေး ရေးနှင့် ကျေးလက်ဒေသ ဖွံ့ဖြိုးတိုးတက်ရေး သင်တန်းကျောင်း၌ ယနေ့ နံနက် ၈ နာရီက ကျင်းပသည့် ကျေးရွာသစ် ခေါင်းဆောင်များ ညီလာခံ (Myanmar Saemaul Leadership Forum)တွင် ပြည်ထောင်စုဝန်ကြီး က ထိုကဲ့သို့ ပြောကြားခြင်း ဖြစ်သည်။

မြန်မာနိုင်ငံနှင့် ကိုရီးယားသမ္မတ နိုင်ငံ နှစ်နိုင်ငံတို့၏ ချစ်ကြည်ရင်းနှီးမှုကို အရင်းခံ၍ ကျင်းပသော ကျေးရွာသစ် ခေါင်းဆောင်များ ညီလာခံသို့ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ ပြည်ထောင်စုဝန်ကြီး ဒေါက်တာအောင်သူ၊ အမျိုးသားလွှတ်တော် စိုက်ပျိုးရေး၊ မွေးမြူရေးနှင့် ရေလုပ်ငန်း ဖွံ့ဖြိုးတိုးတက်ရေး ကော်မတီဥက္ကဋ္ဌ ဦးအောင်ကြည်ညွန့်၊ ဒုတိယဝန်ကြီး ဦးလှကျော်နှင့် ဒေါက်တာရဲမြင့်ဆွေ၊ နေပြည်တော် ကောင်စီဝင် ဦးအေးမောင်စိန်၊ တိုင်းဒေသကြီး/ပြည်နယ်များမှ လယ်ယာ ကဏ္ဍဆိုင်ရာ ဝန်ကြီးများ၊ မြန်မာနိုင်ငံဆိုင်ရာ ကိုရီးယား သံအမတ်ကြီးနှင့် ကိုရီးယား အပြည် ပြည်ဆိုင်ရာ ပူးပေါင်းဆောင်ရွက်ရေး အေဂျင်စီ (KOICA) မှ တာဝန်ရှိ ပုဂ္ဂိုလ်များ၊ ပြည်တွင်း ပြည်ပဖွံ့ဖြိုးမှု မိတ်ဘက် အဖွဲ့အစည်းများမှ ကိုယ်စားလှယ်များ၊ ဌာနဆိုင်ရာ တာဝန်ရှိသူများ၊ စီမံကိန်းကျေးရွာများမှ ကျေးရွာခေါင်းဆောင်များ တက်ရောက်ကြသည်။

အခမ်းအနားတွင် ပြည်ထောင်စု ဝန်ကြီးက အဖွင့်အမှာစကား ပြောကြားရာ၌ မြန်မာ့ကျေးလက် ဒေသများ ဖွံ့ဖြိုးရေးအတွက် ကိုယ့်အားကိုယ်ကိုးခြင်း၊ လုံ့လဝီရိယရှိခြင်းနှင့် ပူးပေါင်းဆောင်ရွက်ခြင်း စသည့် ဆယ်မားအူးလ်အွန်ဒုန် စိတ်ဓါတ်များကို အခြေခံပြီး ဆောင်ရွက်ကြရာတွင် ကျေးရွာခေါင်း ဆောင်များ၊ ကျေးရွာသူ ကျေးရွာသားများ၏ တက်ကြွစွာပူးပေါင်းပါဝင် ကြိုးပမ်းခဲ့ကြမှုကြောင့် စီမံကိန်းဝင် ကျေးရွာများအားလုံး သိသာသောတိုးတက်အောင်မြင်မှုများရရှိနေမှုအပေါ် မှတ်တမ်းတင် ဂုဏ်ပြုအပ်ပါကြောင်း ၊

မြန်မာနိုင်ငံတွင် ဆယ်မားအူးလ်အွန်ဒုန် စီမံကိန်းကို တိုင်းဒေသကြီး/ပြည်နယ် (၁၀) ခု၊မြို့နယ် (၂၇) မြို့နယ်ရှိ ရှေ့ပြေးစံပြကျေးရွာ (၁၁၀)တွင် အကောင်အထည်ဖော် ဆောင်ရွက်လျက်ရှိရာ ရုပ်ပိုင်း စိတ်ပိုင်းဖွံ့ဖြိုးမှု ရလဒ်ကောင်းတွေ ရရှိနေသကဲ့သို့ ဖွံ့ဖြိုး တိုးတက်လာမှုအောင်မြင်မှုများကို ရေရှည် တည်တံ့စေရေး နှင့်အခြား ကျန်ရှိ နေသေးသည့် ကျေးရွာများပါ ဖွံ့ဖြိုးတိုးတက် လာစေရေးအတွက် ရှေ့ဆောင် လမ်းပြဖြစ်လာအောင် ဆက်လက်ကြိုးပမ်း ဆောင်ရွက်သွားကြရမှာ ဖြစ်ကြောင်း ပြောကြားသည်။

ဆက်လက်၍ မြန်မာနိုင်ငံဆိုင်ရာ ကိုရီးယားသံအမတ်ကြီး H.E Mr. Lee Sang-hwa က မြန်မာနိုင်ငံတွင် ဆယ်မားအူးလ်အွန်ဒုန်စီမံကိန်း အကောင်အထည်ဖော် ဆောင်ရွက်ခဲ့မှုနှင့် စီမံကိန်းဝင် ကျေးရွာများ၏ အောင်မြင်မှုများအတွက် ဂုဏ်ပြုစကား ပြောကြားသည်။

ထို့နောက် ရှမ်းပြည်နယ်၊ တောင်ကြီးမြို့နယ်၊ ညောင်စဉ်စံပြကျေးရွာ ခေါင်းဆောင် ဦးခွန်ချမ်းသာ က ဆယ်မားအူးလ်အွန်ဒုန်စီမံကိန်း အတွေ့အကြုံ၊ ရလဒ်များအား ရှင်းလင်းတင်ပြ သည်။

ယင်းနောက် ပြည်ထောင်စုဝန်ကြီး၊ ဒုတိယဝန်ကြီးနှင့် တာဝန်ရှိသူများက ထူးချွန်စံပြ ကျေးရွာ ဆုများ၊ ထူးချွန်ဝန်ထမ်းဆု ရရှိသူများကို ထူးချွန်ဆုနှင့် ဂုဏ်ပြု မှတ်တမ်းများ ပေးအပ်ချီးမြှင့်ကြပြီး ကိုရီးယား သံအမတ်ကြီးနှင့် ပညာရှင်များအား ဂုဏ်ပြုအမှတ်တရလက်ဆောင် များပေးအပ်သည်။

မြန်မာနိုင်ငံနှင့် ကိုရီးယားသမ္မတ နိုင်ငံနှစ်နိုင်ငံအကြား ၂၀၁၄ခုနှစ်မှစ၍မြန်မာဆယ်မားအူးလ် အွန်ဒုန်ကျေးရွာ သစ်လှုပ်ရှားမှု စီမံကိန်းကို ပူးပေါင်း အကောင် အထည်ဖော် ဆောင်ရွက်ခဲ့ရာ စီမံကိန်းအရ အတွေ့အကြုံများ မျှဝေပေးခြင်း၊ ငွေကြေးနှင့် နည်းပညာဆိုင်ရာများ ကူညီ ထောက်ပံ့ ပေးခြင်းတို့ကြောင့် တိုင်းဒေသကြီး/ပြည်နယ် (၁၀)ခု၏ မြို့နယ်(၂၇)မြို့နယ်ရှိ ရှေ့ပြေးစံပြကျေးရွာ (၁၁၀)တွင် ဖွံ့ဖြိုးရေး လုပ်ငန်းများ၊ ဝင်ငွေတိုးလုပ်ငန်းများ အောင်မြင်စွာ ဆောင်ရွက်နိုင်ခဲ့ပြီး ယခုအခါ ကျေးရွာများတွင် ကိုယ်ပိုင် အရင်းအနှီး မတည်ငွေများဖြင့် လည်ပတ် ဆောင်ရွက်လျက် ရှိကြောင်း သိရသည်။

(သတင်းစဉ်)