ပြည်ပသို့ သွားရောက် လုပ်ကိုင်သူများအနေဖြင့် ကြိုတင်လေ့လာသိရှိလိုသည်များကို အလုပ်သမား ညွှန်ကြားရေး ဦးစီးဌာနရုံးများသို့ စုံစမ်းမေးမြန်းနိုင်

နေပြည်တော် ဖေဖော်ဝါရီ ၁၈

Nice Way General Services Co., Ltd၊ Htet Mann Co., Ltd နှင့် Shwe Lann Pwint Co., Ltd တို့မှ ထိုင်းနိုင်ငံရှိ ဆောက်လုပ်ရေး လုပ်ငန်းသို့ စေလွှတ်ထားသော အလုပ်သမား အမျိုး သား ၂၄၅ ဦး၊ အ မျိုးသမီး ၆၁ ဦး စုစု ပေါင်း ၃၀၆ ဦးအနက် အမျိုးသား ၅၂ ဦး သည် ဇန်နဝါရီ ၃၀ ရက်က တရားမဝင် လမ်းကြောင်းမှတစ်ဆင့် မြ၀တီမြို့သို ပြန်လည်ရောက်ရှိခဲ့ကြသည်။

အဆိုပါ အလုပ်သမား ၅၂ ဦးသည် သုဝဏ္ဏဘူမိလေဆိပ် ဆောက်လုပ်ရေး လုပ်ငန်းခွင်၌ တစ်လခန့် လုပ်ကိုင်ပြီးချိန်တွင် လုပ်ခလစာပေးချေရန် နောက်ကျမှု အပေါ် အလုပ်သမား သံအရာရှိရုံး၊ မြန်မာ ပြည်ပအလုပ်အကိုင် ဝန်ဆောင်မှုလုပ်ငန်း ရှင်များ အဖွဲ့ချုပ်ရုံးနှင့် သက်ဆိုင်ရာ အေဂျင်စီတို့ထံ တစ်စုံတစ်ရာ အသိပေး အကြောင်းကြားမှုမရှိဘဲ ထိုင်းနိုင်ငံရှိ တရားမဝင် အဖွဲ့အစည်းများ၏ လွဲမှား သော လမ်းညွှန်မှုကိုခံယူ၍ လုပ်ကိုင် နေဆဲ အလုပ်များကို ပြီးပြတ်အောင် ဆောင်ရွက်ခြင်းမရှိဘဲ လုပ်ငန်းခွင်မှ ထွက်ခွာ သွားခဲ့ခြင်းဖြစ်ကြောင်း သိရှိရသည်။

လုပ်ငန်းခွင်၌ ကျန်ရှိခဲ့သည့် အလုပ်သမားများအား အလုပ်ရှင်မှ အခြား အလုပ်ဆိုက်များသို့ ပြောင်းရွှေ့လုပ်ကိုင် စေခဲ့ပြီး Samutprakan မြို့၌ လုပ်ကိုင် နေသည့် အလုပ်သမားများသည် တစ်နေ့ လျှင် ဘတ် ၃၅၀၊ Chonburi မြို့၌ လုပ်ကိုင်နေသည့် အလုပ်သမားများသည် တစ်နေ့လျှင် ဘတ် ၃၃၀ နှင့် Saraburi မြို့၌ လုပ်ကိုင်နေသည့် အလုပ်သမား များသည် တစ်နေ့လျှင် ဘတ် ၃၂၀ ရရှိ၍ လုပ်ငန်းခွင်များ၌ အဆင်ပြေစွာ လုပ်ကိုင် လျက်ရှိကြောင်း သိရှိရသည်။

ယင်းသို့ အလုပ်သမားများ လုပ်ငန်းခွင်မှ ထွက်ခွာသွားမှုအပေါ် အလုပ်ရှင်နှင့် သက်ဆိုင်ရာ အေဂျင်စီတို့မှ သက်ဆိုင်ရာ နယ်မြေရဲစခန်း၌ လူပျောက်တိုင်ကြားခြင်း များကို ဥပဒေနှင့်အညီ ဆောင်ရွက်ခဲ့ကြောင်း သိရသည်။

အလုပ်သမားများ အနေဖြင့် လုပ်ငန်းခွင်၌ ပြဿနာဖြစ်ပွားပါက တရားဝင်စေလွှတ်ခဲ့သည့် ပြည်ပအလုပ် အကိုင် အကျိုးဆောင်လိုင်စင်ရ အေဂျင်စီ များနှင့် မြန်မာပြည်ပအလုပ်အကိုင် ဝန်ဆောင်မှု လုပ်ငန်းရှင်များ အဖွဲ့ချုပ် တို့ထံ ဆက်သွယ်အကြောင်းကြား၍ ဖြေရှင်းစေနိုင်ပြီး ညှိနှိုင်းဆောင်ရွက်နိုင်မှု မရှိပါက အလုပ်သမားသံအရာရှိများထံ အကူအညီတောင်းခြင်းဖြင့် ဖြေရှင်း ဆောင်ရွက်နိုင်ကြောင်း သိရသည်။

အလုပ်သမားများ မြ၀တီမြို့သို့ ပြန်လည်ရောက်ရှိလာမှုအပေါ် မြ၀တီမြို့ ရွှေ့ပြောင်းအလုပ်သမားရုံး တာဝန်ခံ အလုပ်သမား ညွှန်ကြားရေးဦးစီးဌာန (မြို့နယ်ရုံး) မြ၀တီမှ ဦးစီးအရာရှိနှင့် မြန်မာပြည်ပ အလုပ်အကိုင်ဝန်ဆောင်မှု လုပ်ငန်းရှင်များ အဖွဲ့ချုပ်မှ တာဝန်ရှိ သူများက မြ၀တီမြို့ရှိ လူမှုအဖွဲ့အစည်းများ နှင့်အတူ သက်ဆိုင်ရာ အေဂျင်စီများနှင့် အလုပ်သမားများကို ဇန်နဝါရီ ၃၁ ရက်နှင့် ဖေဖော်ဝါရီ ၁ ရက်တို့တွင် ညှိနှိုင်းပေးခဲ့ရာ အလုပ်သမားများမှ လုပ်အားခကျန်ငွေ၊ ကုန်ကျစရိတ်ငွေနှင့် နစ်နာကြေးငွေများ တောင်းဆိုခဲ့မှုအပေါ် အေဂျင်စီများမှ လုပ်ငန်းခွင် မှန်ကန်စွာ စေလွှတ်ခဲ့ ခြင်းဖြစ်၍ ကရုဏာကြေးအဖြစ် ခရီးစရိတ် ထောက်ပံ့ပေးမည် ဖြစ်ကြောင်းနှင့် လုပ်ငန်းခွင်၌ ရရန်ကျန်ရှိခဲ့သည့် လုပ်အားခများအား ပြန်လည်ရရှိရန် ထိုင်းနိုင်ငံ ဥပဒေနှင့်အညီ ကူညီဆောင် ရွက်ပေးမည်ဖြစ်ကြောင်း ညှိနှိုင်းခဲ့မှုအပေါ် ပြေလည်မှုမရသဖြင့် နှစ်ဖက်အပြန် အလှန် တရားစွဲဆိုနိုင်ရေး ဆောင်ရွက် လျက်ရှိကြောင်း သိရှိရသည်။

အလုပ်ရှင်၊ အလုပ်သမားသဘောတူ စာချုပ်ပါ အချက်များကို အလုပ်သမား များမှ ဖောက်ဖျက်ပါက နစ်နာမှုများကို လျော်ကြေးပေးရန် မဟုတ်ဟု ထိုင်းနိုင်ငံ ပဋိညာဉ်ဥပဒေ၌ ပြဋ္ဌာန်းထားပြီး ထိုင်း နိုင်ငံ အလုပ်သမား ကာကွယ်စောင့်ရှောက်ရေး ဥပဒေပုဒ်မ ၁၁၈ အရ အလုပ်သမားများ၏ နစ်နာမှုများကို တရားစွဲဆို တောင်းဆိုခွင့်ရှိသကဲ့သို့ ပုဒ်မ ၁၁၉ အရ အလုပ်ရှင်၏ လုပ်ငန်းပျက်စီးဆုံးရှုံးများ အတွက် နစ်နာမှုကို တရားစွဲတောင်းဆို ပိုင်ခွင့်ရှိကြောင်း သိရသည်။

ယခုဖြစ်စဉ်မျိုး မဖြစ်ပွားစေရေး ပြည်ပသို့ သွားရောက်လုပ်ကိုင်သူများ အနေဖြင့် ကြိုတင်လေ့လာသိရှိရေး နှင့် သိရှိလိုသည်များကို အလုပ်သမား ညွှန်ကြားရေးဦးစီးဌာနရုံးများ၊ Migrant Resource Center များသို့ စုံစမ်း လေ့လာမေးမြန်းမှုများ ပြုလုပ်နိုင် ကြောင်း အလုပ်သမား ညွှန်ကြားရေး ဦးစီးဌာနမှ သိရသည်။

သတင်းစဉ်