အလုပ်သမားရေးရာ လုပ်ငန်းညှိနှိုင်းရေး ကော်မတီ (WCC) ဖွဲ့စည်းရေး တွေ့ဆုံညှိနှိုင်း

နေပြည်တော် ဇန်န၀ါရီ ၁၂

အလုပ်သမားရေးရာ လုပ်ငန်းညှိနှိုင်းရေး ကော်မတီ (WCC) ဖွဲ့စည်းရေး တွေ့ဆုံညှိနှိုင်းပွဲကို ယနေ့နံနက် ၉ နာရီခွဲတွင် ရန်ကုန်တိုင်းဒေသကြီး လှိုင်သာယာမြို့နယ် ကနောင်ခန်းမ၌ ကျင်းပရာ အလုပ်သမား၊ လူဝင်မှု ကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေ၊ စက်မှုဇုန်စီမံခန့်ခွဲရေး ကော်မတီ ဥက္ကဋ္ဌများ၊ လှိုင်သာယာမြို့နယ် အတွင်းရှိ စက်ရုံ၊ အလုပ်ရုံများမှ အလုပ်ရှင် ကိုယ်စားလှယ်များနှင့် အလုပ်သမား ကိုယ်စားလှယ်များ တက်ရောက်ကြသည်။

ဆွေးနွေးပွဲတွင် ပြည်ထောင်စုဝန်ကြီး ဦးသိန်းဆွေက ယနေ့ဆွေးနွေးပွဲသည် အငြင်းပွားမှု များကို ငြိမ်းချမ်းစွာ ဖြေရှင်း ဆောင်ရွက်ရာတွင် အခြေခံကျသည့်အဖွဲ့ဖြစ်သော အလုပ်သမားရေးရာ လုပ်ငန်းညှိနှိုင်းရေး ကော်မတီ (WCC) ကို စက်ရုံ၊ အလုပ်ရုံ၊ အလုပ်ဌာနများတွင် ဖွဲ့စည်းနိုင်ရေး ရည်ရွယ်၍ ကျင်းပခြင်းဖြစ်ကြောင်း၊ ဝန်ကြီးဌာန အနေဖြင့် အလုပ်သမားရေးရာ ဥပဒေများ ပြင်ဆင်ရေးဆွဲခြင်း လုပ်ငန်းစဉ်ကို ဦးစားပေး ဆောင်ရွက်လျက် ရှိသည့်အပြင် အလုပ်အကိုင်အခွင့် အလမ်းများ ဖန်တီးပေးခြင်း၊ သင့်လျော်ကောင်းမွန်သော အလုပ်အကိုင်၊  လုပ်ငန်းခွင် ဘေးအန္တရာယ် ကင်းရှင်းရေးနှင့် ကျန်းမာရေး၊ တည်ဆဲအလုပ်သမားရေးရာ ဥပဒေများ နှင့်အညီ အလုပ်သမားများ၏ ရပိုင်ခွင့်များ ခံစားခွင့်ရရှိရေး၊ လုပ်ငန်းခွင် အေးချမ်းသာယာရေး တို့အတွက် အလေးထား ဆောင်ရွက်ပေးလျက်ရှိကြောင်း၊ အလုပ်သမားရေးရာ အငြင်းပွားမှုဖြေရှင်းရေး ဥပဒေတွင် အလုပ်သမား ၃၀ ဦးနှင့်အထက် အလုပ်လုပ်ကိုင်နေသော လုပ်ငန်းဌာနများတွင် အလုပ်သမားရေးရာ လုပ်ငန်းညှိနှိုင်းရေးကော်မတီ (WCC)ကို အလုပ်ရှင်က ဥပဒေနှင့်အညီ ဖွဲ့စည်းရန်နှင့် အလုပ်သမားဘက်ကဖြစ်စေ၊ အလုပ်ရှင်ဘက်ကဖြစ်စေ မိမိတို့၏ နစ်နာချက်ကို အဆိုပါ ဖွဲ့စည်းထားသည့် ညှိနှိုင်းရေးကော်မတီသို့ တိုင်ကြား၍ ဆွေးနွေးညှိနှိုင်းရန် ပြဋ္ဌာန်းထားပါကြောင်း၊ အလုပ်သမားရေးရာ လုပ်ငန်းညှိနှိုင်းရေး ကော်မတီ (WCC) သည် အလုပ်ရှင်နှင့် အလုပ်သမားအကြား ဖြစ်ပွားလာနိုင်သည့် အငြင်းပွားမှုများ၊ ပဋိပက္ခများကို လျော့နည်းစေနိုင် သည် သာမက နှစ်ဦးနှစ်ဖက်အကြား မိမိတို့၏ လိုလားချက်များကို ကနဦး ဆွေးနွေးညှိနှိုင်းခြင်းဖြင့် အငြင်းပွားမှုများ မဖြစ်ပွားစေရန် ကြိုတင်ကာကွယ်နိုင်ပြီး ပြေငြိမ်းမှုရရှိစေရေး အခြေခံကျသော အဖွဲ့ ဖြစ်သည့်အတွက် WCC ကို မဖြစ်မနေ ဖွဲ့စည်းနိုင်ရေး တွန်းအားပေးသည့်အနေဖြင့် လာရောက်ဆွေးနွေးခြင်းဖြစ်ကြောင်း ပြောကြားသည်။

ထိုနောက် အလုပ်သမားရေးရာ လုပ်ငန်းညှိနှိုင်းရေးကော်မတီ (WCC) ဖွဲ့စည်းနိုင်ရေး အတွက် တွေ့ကြုံနိုင်သည့် အခက်အခဲများကို အလုပ်ရှင်၊ အလုပ်သမား ကိုယ်စားလှယ်များက အကြံပြုဆွေးနွေးကြသည်။

ယင်းနောက် ပြည်ထောင်စုဝန်ကြီးသည် လှိုင်သာယာမြို့နယ် ရွှေသံလွင်စက်မှုဇုန်ရှိ Mr. Chung Fook Pui ပိုင်ဆိုင်သော BogardLingerie  (Yangon) Ltd. ၏ BogardLingerie Myanmar Training Center ၌ မြန်မာနိုင်ငံ လုပ်သားများ ကျွမ်းကျင်မှု “စံ” သတ်မှတ်ပြဋ္ဌာန်းရေး အဖွဲ့၏ အထည်ချုပ်လုပ်သား အလုပ်အကိုင် (Garment Sewing Machine Operator) (Level-1) အတွက် လုပ်သား(၅၀)ဦးအား ကျွမ်းကျင်မှု စစ်ဆေး အကဲဖြတ် ဆောင်ရွက်နေမှုကို ကြည့်ရှု အားပေးသည်။

(သတင်းစဉ်)