နေပြည်တော် ဒီဇင်ဘာ ၁၉
ပို့ဆောင်ရေးနှင့်ဆက်သွယ်ရေးဝန်ကြီးဌာန၊
ပြည်ထောင်စုဝန်ကြီး၊ ဦးသန့်စင်မောင်သည် ထိုင်းနိုင်ငံ၊ ချင်းမိုင်မြို့တွင် ဒီဇင်ဘာ
(၁၅)ရက်မှ (၁၆)ရက်အထိ ကျင်းပသော မဟာမဲခေါင် ဒေသခွဲ အဖွဲ့ဝင်နိုင်ငံအသီးသီး၏ အမျိုးသားပို့ဆောင်မှု
လွယ်ကူချောမွေ့စေရေးကော်မတီ၏ ဥက္ကဋ္ဌများဖြင့် ဖွဲ့စည်းထားသော ပူးတွဲကော်မတီ၏ ပဉ္စမအကြိမ်မြောက်
အစည်းအဝေးသို့ တက်ရောက်သည်။
ပြည်ထောင်စုဝန်ကြီးသည်
ဒီဇင်ဘာ(၁၆)ရက်တွင် ကျင်းပသော အစည်းအဝေးတွင် မြန်မာနိုင်ငံ၏ သယ်ယူပို့ဆောင်ရေး ကဏ္ဍ စဉ်ဆက်မပြတ်
ဖွံ့ဖြိုးတိုးတက်စေရေး ဆောင်ရွက်နေမှုများ၊
ကုန်းလမ်းဖြင့် နယ်စပ်ဖြတ်ကျော်သယ်ယူပို့ဆောင်ရေး
ဆောင်ရွက်နေမှုများ၊ အမျိုးသားပို့ဆောင်မှု လွယ်ကူချောမွေ့စေရေးကော်မတီအား ဖွဲ့စည်း၍
နယ်စပ်ဖြတ်ကျော် ပို့ဆောင်ရေး လုပ်ငန်းလိုအပ်ချက် ညှိနှိုင်းဖြည့်ဆည်းပေးမှုများကို ရှင်းလင်းပြောကြားသည်။
အစည်းအဝေးတွင် ဆွေးနွေးသဘော တူညီမှုအရ မြန်မာနိုင်ငံမပါ အခြားအဖွဲ့ဝင်နိုင်ငံများသည်
GMS Cross - Border Transport Agreement မူဘောင်သဘောတူစာချုပ် အပြည့်အဝအကောင်အထည်ဖော်မှုကို
(၁-၃-၂၀၁၇) ရက်နေ့တွင် စတင် ဆောင်ရွက်မည် ဖြစ်ပြီး၊ မြန်မာနိုင်ငံအနေဖြင့် ကနဦးအကောင်အထည်မှု (Initial Implementation) ကို (၁-၁၂-၂၀၁၇) ရက်နေ့တွင်
စတင်ဆောင်ရွက်မည် ဖြစ်သည်။
ကနဦး အကောင်အထည်ဖော်မှု
အတွေ့အကြုံများကိုမူတည်၍ အပြည့်အဝအကောင်အထည်ဖော်မှု (Full Implementation) ကို (၁-၁-၂၀၁၉)
ရက်နေ့တွင် မြန်မာနိုင်ငံမှ ဆောင်ရွက်သွားမည် ဖြစ်သည်။ ထိုသို့ဆောင်ရွက်နိုင်ရန် ထိုင်း
- မြန်မာ မြဝတီ-မဲဆောက် မြစ်ကူးတံတားအမှတ် (၂) အနီး၌ နယ်စပ် ထိန်းချုပ်ရေးစခန်း
(Border Control Facilities) များနှင့် ချဉ်းကပ်ကားလမ်းများ ဆောက်လုပ်ရန် လိုအပ်နေသေးကြောင်း
သိရှိရသည်။
အစည်းအဝေးများကို
နိုင်ငံအက္ခရာစဉ်အလိုက် (၃) နှစ်တစ်ကြိမ် အလှည့်ကျ ကျင်းပလာခဲ့ရာ စတုတ္ထအကြိမ်မြောက်
အစည်းအဝေးကို မြန်မာနိုင်ငံမှ အိမ်ရှင်အဖြစ် ၂၀၁၃ခုနှစ်၊ နိုဝင်ဘာလတွင် ကျင်းပခဲ့သည်။
ယခုထိုင်းနိုင်ငံမှ အိမ်ရှင်အဖြစ် လက်ခံကျင်းပခြင်း ဖြစ်ပြီး၊ အစည်းအဝေးသို့ မဟာ မဲခေါင်ဒေသခွဲ
အဖွဲ့ဝင်နိုင်ငံများ ဖြစ်ကြသည့် ကမ္ဘောဒီးယား၊ တရုတ်၊ လာအို၊ ထိုင်းနှင့် ဗီယက်နမ် နိုင်ငံများမှ
ဝန်ကြီးများ၊ ဒုတိယဝန်ကြီးများ၊ အဆင့်မြင့်အရာရှိကြီးများ၊ ADB ၏ အရှေ့ တောင်အာရှ ပို့ဆောင်ရေးနှင့်ဆက်သွယ်ရေးတာဝန်ခံ
ဦးဆောင်သော တာဝန်ရှိသူများ တက်ရောက်ခဲ့ကြကြောင်း သတင်းရရှိသည်။
(သတင်းစဉ်)
No comments:
Post a Comment